ކީއްވެ ހެއްޔެވެ؟

އެންމެން އަހަރެންނަށް ތިޔަހެން ތިޔަހަދަނީ ކީއްވެހެއްޔެވެ؟؟ ކޮންމެ މީހަކުވެސް އެންމެފުރަތަމަ އަހަރެންގެ ގައިގައި ފިރުމާއިރު ހީވާނީ އެހެންފަދަ ކަމެއްހެންނެވެ. މިވަރުގެ ރީތިކަމެއް މިދުނިޔެމަތިން ދުވަހަކު ނުފެންނަ ބައެއްފަދައިން އުޅޭއިރު ހީވާނީ އަހަރެންނާއި ހެދި ލޯބިން މޮޔަވެދާނެ ހެންނެވެ.. އެކަމަކު އެއީ ކުޑަ އިރުކޮޅެއްގެ ކަމެކެވެ. މާގިނަ އިރުތަކެއްނުވެ އެލޯތްބަށް ނިމުންއައިސް އެއްވެސް ރަހުމެއް ނެތި އެމީހުންގެ ފައިދަށުލާ އަހަންނަށް ތަދުކޮށްލައެވެ. އެޔެއް މިޔެއް ނުބަލައި އެކިވަރުގެ މީހުން އަހަރެންގެ ގަޔަށް ފައިންއަރައި އަހަރެންގެ ހައްޓަށް އެދެނީ ކިހާ އަނިޔާއެއް ހެއްޔެވެ؟ ފަލަމީހުންނާއި ހިކިމީހުން، އަދި ބަރުމީހުންނާއި ލުއިމީހުންވެސް އަހަރެންގެ ގަޔަށް ކޮޅަށް އަރައި އަހަންނަށް އެދެމުންދާ ވޭން ދެކޭނެ މީހަކު މިދުނޭގައި ހަމަ ނެތީހެއްޔެވެ؟

އިރުއިރުކޮޅާ އައިސް އަހަރެންގެ ގަޔަށް އެރުމުން އެމީހުންނަށް ހިތްހަމަޖެހުން ލިބޭ ކަހަލައެވެ. ހެވިފައި ތިބެ އަހަރެންގެ ބުރަކައްޓަށް ބަރުކުރަމުން ދާއިރު އަހަރެންގެ ބަލިކަށި ކަމާއިމެދު އެމީހުން ހަމަ އެންމެ ފަހަރަކުވެސް ވިސްނާނުލާކަން އަހަރެންނަށް ޔަގީނެވެ. ހިތެއްއޮތް މީހަކަށް އަނިޔާވެރިވާކަށް ނުކެރޭނެޔޭ މީހުން ބުނާއަޑު އަހަރެންވެސް އަހަމެވެ. އެހެންވީމާ އެބައިމީހުންގެ ހަށިގަނޑުގައި ހިތެއް ނުވަނީތާއެވެ.

އަހަރެންގެ ވަފާތެރިކަމަށްވެސް އެބައިމީހުން ޝުކުރު ނުކުރެއެވެ. ހަވީރު ވާއިރަށް މޫނުގައި ފުށްތަޅައި ރީތިވެގެން މަންމަ ކައިރީގައި ޓިއުޝަނަށް ދަނީކަމުގައި ބުނެ ބިޓުން ކައިރިއަށް ދާ އަންހެންކުދިންގެ ވާހަކަ އެކުދިންގެ މައިންބަފައިންނަށް އަހަރެން ސިއްރުކުރަމެވެ. އަދި މަގުމަތީގައި ސައިކަލުގައި ދަމުން އަންހެންކުދިންނާއި ފޮށެމުން ދާ ފިރިހެނުންގެ ވާހަކަ އެމީހުންގެ ބިޓުންނާއި އަނބިން ކައިރީގައި ދުވަހަކުވެސް ކިޔާފައެއް ނޯންނައެވެ. އެކަމަކު… އެމީހުންވެސް އަހަރެންގެ ވަފާތެރިކަމުގެ ބަދަލެއްގެ ގޮތުންވެސް ދެނީ ހަމަ އަނިޔާއެވެ..
ދުވަހަކު ކޮޅުންވެސް ކަލޭމެން ފަލަ ކަމުން ނޫނީ ބަރުވެގެން އަހަރެން ޝަކުވާއެއް ކުރިންހެއްޔެވެ؟. އަހަރެންގެ ބުރަކަށްޓަށް ބަރުވެގެންގޮސް ބުރަކަށިން ހަންމެށި އަވަދިވާއިރުވެސް ޗުއްޕުވެސް ނުބުނަމު ނޫންހެއްޔެވެ؟ ދެން ފަހެ އަހަރެންނަށް ތިޔަހެން ތިޔަ ހަދަނީ ކީއްވެހެއްޔެވެ؟

 
ދޭހާ އަތްވެއްގައި އަހަރެންގެ މިނިކަމެތި ހަށިގަނޑު ހާމައަށް ބާއްވައިގެން އިރުގެ ހޫނުން ހަށިގަނޑު ފިހޭއިރުވެސް މަޑުމަޑުން އޮންނަނީ އަސަރު ނުކުރާތީކީ ނޫނެވެ. އެއީ އަހަރެން ނެތުމުން އަހަރެންގެ ސާހިބުމީހާ އުޅޭނެހާލު އަހަރެންނަށް އެނގޭތީއެވެ.

ހަމައެގޮތަށް ވެހޭހާ ވާރޭގައި ހިޔަލެއް ނެތިފައިވެސް ކިތަންމެރެއަކު އަހަންނަށް އޮންނަން ޖެހެއެވެ. ހީކަރުވައިގަނެގެން ތުރުތުރުލާއިރުވެސް އަހަރެންގެ ހާލުބަލައިލާނެ މީހަކު ގިނަފަހަރަކު ނުވެއެވެ.. އަހަރެންގެ ހާލު ބަލައިލާ މަދުމީހެއްވެސް އަހަރެން ނަގައި ގޭތެރޭގެ ކޮންމެވެސް ތަނަކަށް ބާރުބާރަށް ޖަހާފައި ދަނީއެވެ.. ގައިގައި ހުންނަ ފެންތައް ހިއްކައިދިނުމުގެ ބަދަލުގައި އަމިއްލައަށް ހިކެންދެން އަހަރެންގެ އެކަނި ހާލާއިގެން ދޫކޮށްލާފައި ދަނީއެވެ. އެފަދަ ހާލުގައި މުޅިރޭ ނިމިގެންދަންދެން ފިނިބޮޑުވެފައި އަހަރެން އޮންނަތަން ފެނުމުންވެސް ހަމަ އަސަރެއްނުކުރަނީ ހެއްޔެވެ؟

މިފަދަ އަނިޔާވެރި ދިރިއުޅުމެއް ތަހައްމަލް ކުރަމުން ދާއިރު އެއްވެސް ރަހުމެއްނެތި އަހަރެން ގެއިން ބޭރުކޮށްލާ ރޭރޭގައި ގޭދޮރުމަތިން ދާ ކޮންމެވެސް މީހަކަހަށް އަހަރެން ފެނި އަހަންނަށް ހިތްކިޔުމުން އަހަރެން ގޮވައިގެން ދަނީ މަދުފަހަރަކު ނޫނެވެ. ދެން އެހާ ހިސާބުން އަހަރެންގެ ސާހިބުމީހާ އަހަރެން މަތިން ހަނދާއްކޮށް ރޮއިހަދަން ފަށައެވެ. ގޭއެންމެން ކައިރީގައި އަހަރެންގެ ވާހަކަ ދައްކައި އަހަރެން ނެތުމުން ދެރަވެގެން އުޅެން ފަށައެވެ. އެކަމަކު އެއީ ހަމަ ހުސް ޑްރާމާކަން އަހަރެންނަށް އެނގެއެވެ. އާނ އެހެންޏާ ފަހެ، ކުރިން އަހަރެންދެކެ ނުވި ލޯތްބެއް ވަކި އަހަރެން ނެތުމުންވެސް ނުވާނެތާއެވެ….

އަހަރެން ގެންދާ އާ ސާހިބުމީހާ އަހަރެންނަށް ހިމާޔަތްދީ ލޯބިދޭނެ ކަމުގައި ހީކުރެވުނަސް އަނެއްކާވެސް ޖެހެނީ އެ ސާހިބުމީހާއަށް ތަބާވެ އޭނާއަށް ހިދުމަތްކޮށްދީގެން ހަމަކުރީގެ ދިރިއުޅުމަށް ރުޖޫޢަވާށެވެ. މިފަދަމަޖުބޫރު ހާލުގައި ދުވަސްތައް ވޭތުކުރަމުން ދަނިކޮށް އަހަރެން ދެކެ ހަމަ ފޫހިވާއިރަށް އަހަރެން ދޫކޮށްލުމަށްފަހު އެހެން ބައިވެރިއެއް ހޯދަނީ އަހަރެންގެ ކޮންކުށެއް އޮވެގެންހެއްޔެވެ؟ އަދި އަހަރެން މުސްކުޅިވެ ގައިބާރު ދެރަވެގެންގޮސް ކަށިތައްފީވެ ގައިގެ އެތަންމިތަން ބިނދެން ހަމަ ފަށާއިރަށް އެއްވެސް ރަހުމެއްނެތި އަހަރެން ނަގައިހޫރާލަނީ އަހަރެންގެ ވަފާތެރިކަމުގެ ބަދަލެއްގެ ގޮތުން ހެއްޔެވެ؟ ނުނީ އަހަރެން ކޮށްދިން ޚިދުމަތުގެ މަތިން ކުޑަކޮށްވެސް ހަނދާންނުވާތީ ހެއްޔެވެ؟

އާނ އެކެވެ…. އެންމެންވެސް އަހަރެންނާއި ދޭތެރޭގައި ތިޔަހާ އިހާނެތިކޮށް ކަންތައް ތިޔަކުރަނީ އަހަރެންނަކީ ފައިވާނަކަށް ވީމާ ނޫން ހެއްޔެވެ؟؟؟

****ނިމުނީ*****