ޒެވިއަން 9

“ދޭ ފެންވަރާލަން. އަންނާނަށް ކާލާނެ އެއްޗެއް ހިފައިގެން” ކައިލް ބުނެލިއެވެ. މާވީ ބޯޖަހާލާފައި ފެންވަރަން ވަނެވެ. ހޫނު ފެނުންފެންވަރާލައިގެން މާވީ ނިކުން އިރު ލާނެ އެއްޗެހިވެސް އެނދުމަތީގައި ކައިލް ބަހައްޓާފައި ހުއްޓެވެ. އެއްޗެހި ލައިގެން މާވީ އިށީންދެލީ ވެފައިހުރި ވަރުބަލިންނެވެ.

ހިނދުކޮޅެއްފަހުން ކައިލްއައެވެ. މޭވާކޮޅަކާއި ކިރުޕެކެޓެއް މާވީއަށް ދިނެވެ. “ކައިލް މަންމަމެން ރުޅިއެއް ނާންނާނެތަ؟” މާވީ އެއްސެވެ. “ހެޔޮކަމެއް ކޮއްދީގެން ކީއްވެތަ ރުޅިއަންނަންވީ ހެހެ” ކައިލް ހީލިއެވެ. ރަނގަޅަށް ކާލައިގެން ނިދާލާ އިނގޭ. އައިމް ގޮއިންގް ނައު” ކައިލް ބުނެލިއެވެ. މާވީ ބޯޖަހާލިއެވެ.

***5 މަސް ފަސް***

އެދުވަހަށް ފަހު މިންހާގެ އެއްވެސް ޙަބަރެއް އެނގިފައެއް ނުވެއެވެ. އެހެންކަމުން މާވީ ބަލަމުން ދިޔައީ، ކައިލް، ކަޔާން، އަދި ނިމްރާއެވެ. ދުވަސްކޮޅަކީ އޯލެވެލް ދުވަސްކޮޅަށް ވެފައި ވިހަން ގާތްވެފައި އިނުމުން މާވީއަށް ކިޔެވުމަށް އެހާ ބޮޑު ސަމާލު ކަމެއް ނުދެވެއެވެ. އެހެން ނަމަވެސް މާވީ ދިޔައީ އޭނާއަށް ކުރެވުނު ވަރަކަށް ކެއް ކުރަމުންނެވެ.

45 މިނިޓްގެ ޓެސްޓްއަށް ފަހު ކުދިންތައް ނިކުންނަން ފެށިއެވެ. ދުވަހަކީ އެންމެ ފަހު ޓެސްޓު އޮތް ދުވަސްކަމުން ކުދިންގެ މޫނު މަތިން ފެންނަމުން ދިޔައީ އުފާވެރިކަމާއި ހިތާމައެވެ.

އަވަސް ހިނގުމުގައި ދިޔަ ޔަޝްއަލްގެ ފިޔަވަޅުތައް ހުއްޓުނީ ވަކިން ކްލާސް ރޫމްއެއްގައި ޓެސްޓު ހަދަމުން ދިޔަ މާވީ ފެނިފައެވެ. އަބަދުވެސް ހިކިދަނޑިއެއްހެން ހުރި މާވީ ގައިގައި މަސްޖަހާ ޗަބީ ވެލާފައި ހުރުމުން ވަރަށްވެސް ލޯއިތްބެވެ. ވިހަން ގާތްވެފައި ހުރުމުން މާވީގެ ބަނޑުވަރަށްވެސް ބޮޑެވެ. ދުވަސްކޮޅަކުން މާވީ ވިހާނެތާއެވެ. ނަމަވެސް އެދަރިފުޅު ދެކިލުމަށް ޔަޝްއަލްއަށް ނުދެވޭނެކަން އެނގުމުން ޔަޝްއަލްގެ ހިތުގައި ރިއްސާލިއެވެ.

“ހެއީ. ކިހިނެތްތަ ޓެސްޓު؟” ނުހާ ގާތުގައި ހުއްޓި ޒެވިއަން އެއްސެވެ. “ވަރަށް ބެސްޓު އަލްހަމްދުލިއްލާހި. ޒެވްގެ ޓެސްޓު ކިހިނެތަ؟” ނުހާ އެއްސެވެ. “ހެހެ ޒެވް އަބަދުވެސް ބަޔޮލޮޖީއަށް ވަރަށް ދަށް ވާނެ” ބޯކަހާލާފައި ޒެވިއަން ބުނެލިއެވެ. ނުހާ ހީލިއެވެ.

“ހެއި މިއަދު ހަވީރު ބިޒީތަ؟” ޒެވިއަން އެއްސެވެ. “ނޫން.. ބިޒީއެއްނޫން. ކިހިނެތްވީ؟” ނުހާ އެއްސެވެ. “ދިމާކޮއްލަން ކަމަށް” ޒެވިއަންގެ އެދުމާއި އެކު ނުހާގެ ހިތް ތެޅިގަތެވެ. އުފާވެ، މޫނުމައްޗަށް ޖަންބު ކުލަ އެރިއެވެ. “ޝުއާރް” ނުހާ ބުންޏެވެ. އަދި ފިޔަވަޅުތައް ހަލުވި ކޮއްލާފައި ހިނގައިގަތެވެ. ޒެވިއަންއަށް ހިނިތުންވެވުނެވެ.

އެންމެ ފަހު ޓެސްޓު ނިމުމުން މާވީއަށް ހަމަ ޖެހުމުގެ ނޭވާއެއް ދޫކޮށްލެވުނެވެ. ކުރިމަތީގައި އިން ޓީޗަރަށް ހިނިތުންވުމެއް ރައްދުކޮއްލާފައި މާވީ ނިކުތެވެ. އޭރު މާވީގެ އިންތިޒާރުގައި ނިމްރާ ހުއްޓެވެ. “ދެން އަޅުގަނޑު ބުނީމެއްނުން އޯކޭއޭ ބަލާ ނަޔަސް” މާވީ ބުންޏެވެ. “ހެހެ އެކަމް ނިމްދައްތަ ބުނިންދޯ އަންނާނަމޭ؟ މިހާރު ވިހަން ގާތްވެފަ ހުރީމަ ވަރަށް ބަލައިގެންނޭނުންދޯ އުޅެންވާނީ؟ މިއަދު އަދި އެބަ ޖެހެއެއްނުން ޑަކްޓަރަށް ވެސް ދާންވެސް. އަރާ އަވަހަށް” ނިމްރާ ބުންޏެވެ. މާވީ ހިނިތުންވެލާފައި ނިމްރާ ސައިކަލު ފަހަތައް އެރިއެވެ.

ސޯފާގައި އިން ކައިލް އިނީ ފޯނުން މާވީގެ ފޮޓޯއަކަށް ބަލަންށެވެ. 9 މަހުގެ ބޮޑުބަނޑާއި އެކު މާވީ ކިތަންމެހާވެސް ލޯއިތްބެވެ. ބަލާބަލާ ފޫހި ނުވާނެކަން ގައިމެވެ. “ދޮންބޭ؟” ފަހަތުން އިވުނީ ނިލީޝާގެ އަޑެވެ. ވަގުތުން ކައިލް ފޯނު ނިއްވާލިއެވެ.

“ހްމްމްމް.. ދޮންބެ އެހެން މާވީއަށް ތިހާ ހެލްޕް ވާހިތުން ތިއުޅެނީ މާވީދެކެ ދޮންބެ ލައިކްވަނީދޯ؟” ނިލީޝާ އެއްސެވެ. ކައިލް އެއްޗެކޭ ނުބުނެ ހިނިތުންވެލިއެވެ. “ކަމޯން ބްރޯ އައިމް ޔުއާރް ޓްވިންއޭ. ނިލީ ގާތު ބުނަންވާނެއްނުން” ތުންކޮޅު އޮޅާލަމުން ނިލީޝާ ބުންޏެވެ. “އޯކޭ އޯކޭ. އެކަމް މާވީ ގާތުގަ ނުބުނައްޗޭ. ޔެސް އައި ލައިކް ހާރް. މިކަން ވުމުގެ މާކުރިންސުރެއްވެސް” ކައިލް ބުންޏެވެ. އަދި އެންމެ ފުރަތަމަ މާވީއާއި ދިމާވި ދުވަހުގެ ވާޙަކަވެސް ކިޔައިދިނެވެ.

“މަންމަމެނަށް އެނގޭތަ؟” ނިލީޝާއެއްސެވެ. ކައިލް ބޯޖަހާލިއެވެ. “ދެން ދޮންބެ މިބުނީނުން ދޮންބެގެ ކްރަޝް؟ ދެން އަވަހަށް ބުނޭ ނިލީގެ ކްރަޝްވެސް” ކައިލް އެއްސެވެ. “ދޮންބެވެސް ނުބުނާތި އޭނަ ކައިރީ. ދޮންބެ ވަރަށް ކްލޯޒް ވާނެ އޭނައަށް. ދޮންބެ އޭނަ ގާތުގަ އެވާޙަކަ ބުނިއްޔާ ބުނާނަން މާވީ ގާތުގަވެސް ދޮންބެ މާވީ ދެކެ ލޯބިވާ ވާހަކަ” ނިލީޝާ ބުނެލީ އަމުރުކޮއްލާހެންނެވެ.

“އޭ އޭ ދެކުދިން ކްރަޝް ވާހަކަ ދައްކައޭ އެބަ ހަމަ ދޮންތި ނުލާ. ދޮންތިއާވެސް ލައިގެން ކިޔަގާ” އެވަގުތު އެތަނަށް އައި ނުހާ ތުންކޮޅު އޫކޮއްލާފައި ބުންޏެވެ. “ދޮންބެ ހޭޒް އަ ކްރަޝް އޮން މާވީ” ނިލީޝާ ހީލާފައި ބުންޏެވެ. “ހޫމް ތިތަންކޮޅު އިވުނޭ ހަހަ” ނުހާ ހީލިއެވެ. “ދެން ނިލީގެ ޓާން” ކައިލް ބުންޏެވެ. “ޔަލާން…” ބޯކަހާލަމުން ނިލީޝާ ބުންޏެވެ.

“އޯ އެމް ޖީ. ވާވާ އޭ ބުނީ ހެހެ” ނުހާ ހީލާފައި ބުންޏެވެ. “ދޮންތި ހޭނެކަމެއްނެތޭ ދެން ބުނޭ ދޮންތިގެ ކްރަޝްވެސް” ނިލީޝާ ބުންޏެވެ. އެއާއި އެކު ނުހާގެ ދޮންމޫނު އެކީގައިހެން ރަތްވެލިއެވެ. “ވެއިޓް އަ މިނުޓް.. ދޮންތި އަނެއްކާ ބޯއިފްރެންޑްއެއް ހުރޭތަ މިހާރު؟” ކައިލް އެއްސެވެ. “ހެހެ ނޫނޭ.. އަމް.. ޒެވިއަން… އެންޑް އައި ތިންކް ހީ ލައިކްސް މީ ޓޫ..” މޫނުގައި އަތް އަޅަމުން ނުހާ ބުންޏެވެ. “އޯމައި ގޯޑް. މިދެމީހުން އެހެންވެ އެއް ފެމެލީއަކަށް ދޯ މިދަނީ؟ ހަހަ” ކައިލް ހީލިއެވެ.

ގެއަށް ގޮސް އެއްޗެހި ބަދަލު ކޮއްލައިގެން މާވީ ގޮވައިގެން ނިމްރާ ދިޔައީ ހޮސްޕިޓަލަށެވެ. “އަވަހަށް އެޑްމިޓް ވާން އައުން ބުއްދިވެރި. މިހާރު މާވީ ހުރީ 3 ސެންޓިމީޓަރަށް ޑައިލޭޓް ވެފަ” ޑަކްޓަރު ބުންޏެވެ. “ލައްބަ، ވޯޑްއެއް ހަމަ ޖައްސާލަ ދެއްވާ” ނިމްރާ ބުންޏެވެ.

“ބިރުންތަ ތިއޮތީ؟” މާވީގެ އަތުގައި ހިފާލަމުން ނިމްރާ އެއްސެވެ. އޭރު މާވީ އޮތީ އޮބްޒާރްވޭޝަން ރޫމްގައެވެ. “ޔެސް.. ވަރަށް..” މާވީ ބުނެލިއެވެ. “ކޮންކަމަކަށްތަ ބިރުގަންނަނީ؟” ނިމްރާ އެއްސެވެ. “ނޭނގެ.. ހީވަނީ ބޭބީ ހެލްތީކޮއް ނުވިހިދާނޭ.. ނޫނީ ކަފާލަން ޖެހިދާނޭ. ނޫނީ ބޭބީގެ ހާލަތު ދަށްވެދާނޭ” މާވީ ބަނޑުގައި ފިރުމާލަމުން ބުންޏެވެ.

“މާވީ.. ޔެސް، ކުއްޖަކު ވިހެއުމަކީ ފަސޭހަ ކަމެއްނޫން. އެކަމަކު މާތް ﷲ އަހަރެމެން އަންހެނުންނަށް އެކަމުގެ ކުޅަދާނަކަންވަނީ ދެއްވާފަ. އެއީ އަހަރެމެން އަންހެނުންނަކީ މަތިވެރި ބަޔަކަށްވީތީ. އިންޝާ ﷲ މާވީގެ ދަރިފުޅުވެސް ރަނގަޅު ސިއްހަތުގައި ދުނިޔެއަށް އުފަންވާނެ” ނިމްރާ ހިނިތުންވުމަކާއި އެކު ބުނެލިއެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.