އެ ރާޅު..

ރޭގަނޑު ނުވައެއް ޖަހާކަން ހާއިރެވެ. ދާއިންއާއި އޭނާގެ ރައްޓެހިން ތިބީ ރަށުގެ އަތިރިމަތި ސަރަހައްދުގައި ހަދާފައިވާ ބީޗްވިއު ރެސްޓޯރެންޓްގެ އޯޕަންއެއާރގައި ކޮފީ ބޯށެވެ. އޭރު އެތަނުގައި ދާއިންމެން ހަތަރު މީހުންގެ އިތުރުން އެހެންވެސް ދެ މޭޒެއްގަ ހައެއްކަ މީހުން ކޮފީ ބޯން ތިއްބެވެ. މުޅިތަނަށް ވެރިވެފައިވަނީ ސާދަވިލޭރޭގެ ހަނދުގެ ނަލަނަލަ އަލިކަމާއި އާދައިގެ ވަރަކަށް ޖެހެމުންދިޔަ ވައިގެ ހިތްގައިމުކަމެވެ. ތަނުގައި ރަސްކަން ކުރަމުން ދިޔައީ ހަމަހިމޭން ކަމާއި މަޑުމައިތިރިކަމެވެ.

މާލޭގެ ހަލަބޮލި މާހައުލުގައި އުޅެ ފޫހިވެފައި ހުރި ދާއިން ގަސްދުކުރީ މި ލިބުނު ޗުއްޓީ ދުވަސްކޮޅުގައި މާހައުލު މުޅިން ބަދަލުކޮށްލާށެވެ. އެއްވެސް ހާސްކަމެއް ފިކުރުކުރުމެއްނެތި ވަގުތު ހޭދަކޮށްލާ އުފާކޮށް މަޖާކޮށްލާށެވެ. ހަތަރު މީހުންގެ މެދުގައި ދެކެވެމުން ދިޔައީ އެ ވާހަކައެވެ.

“ކިހިނެއްވާނެ މިތާކައިރި މިއޮށް ޕިކްނިކް އައިލެންޑަށް އޯވަރ ނައިޓްއަކަށް ދިޔައިއްޔާ؟” އަބަދުވެސް އެންމެ މަޑުން އިންނަ ޒައިދު އޭނާގެ ޚިޔާލުވެސް ފާޅުކޮށްލިއެވެ.

“އާނ.. ރަނގަޅުވާނެ. މަޖާވާނެ އެންނު ދޯ؟..” ދާއިންވެސް ޒައިދުއާއި އެއްބައިވުމުގެ ގޮތުން އެއްޗެކޭ ބުނެލިއެވެ.

ހަތަރު އެކުވެރިން ވަރަށް ވިސްނުމަށްފަހު ނިންމީ ޒައިދު ބުނިގޮތަށް ކައިރީގައި އޮތް ޕިކްނިކް އައިލެންޑަށް އޯވަރނައިޓަށް ދާށެވެ.

“އެހެންވީމަ މިއަންނަ ހުކުރުދުވަހުގެ ހަވީރު ގޮސް ހޮނިހިރު ދުވަހުގެ ރޭގަނޑު މިކޮޅަށް އަންނާނީ! އެންމެ ރަނގަޅެއްނު؟” ދާއިން ބުންޏެވެ.

*********

(ހުކުރު ދުވަސް)

ހަވީރުގެ ވަގުތެވެ. ދާއިން އާއި އޭނާގެ ދެ އެކުވެރިން ކަމަށްވާ ޒައިދު އާއި އަހުމަދު ތިބީ ބަނދަރުމަތީގައި ޖަހާފައިވާ ގޮނޑިތަކެއްގައި އިށީނދެގެންނެވެ. ދާއިން އިރުއިރުކޮޅާއި އަތުކުރީގައި އަޅާފައި އޮތް ގަޑިއަށް ބަލައިލާގޮތުން ތަނަކަށް ދާން ލަސްވަނީހެން ހީވެއެވެ. އެމީހުން އިންތިޒާރުކުރަމުން ދިޔައީ ދަތުރުގެ އެންމެ ފަހު ބައިވެރިޔާ ކަމަށްވާ ލިއަމް އަންނާނެ އިރަކަށެވެ.

“ކިހާ އިރެއް މި ވަނީ! ފުރަން ހަތަރެއް ޖަހާއިރަށް ކިޔާފަ ފަހެއް ޖަހަން އުޅޭއިރުވެސް ނާދޭ..” ދާއިން ހިތްހަމަނުޖެހިފައި ބުނެލިއެވެ. އޭނާގެ އަޑުގައިވަނީ ކެތްތެރިކަން ކުޑަކަމެވެ.

“އަދި މަޑުކޮށްލަންވީނު ފަސް ވަރަކަށް މިނެޓް ވަން-” އަހުމަދުއަށް ޖުމްލަ ފުރިހަމަ ނުކުރެވެނީސް އެމީހުން ކައިރިއަށް ސައިކަލެއްގައި މަޑުކޮށްލި ލިއަމް ފެނިއްޖެއެވެ.

“މިއޮށް އައީނު! ކޮންކަމެއް ލައިގަތީ އަނެއްކާ؟” ޒައިދު އެހިއެވެ.

“އެއީ.. މި އަނެއް.. ކަމެއް ނުވޭ..” ލިއަމް އަށް ޖަވާބު ދެވުނީ އަޅައަޅައިގަންނަމުންނެވެ. އޭނާގެ މޫނުމަތިން ކަމަކާއި ފިކުރުބޮޑުވެފައިހެން ހީވެއެވެ. އެހެންނަމަވެސް އޭނާ އެ އިހްސާސްތައް ފޮރުވައިލީ ލުއި ހިނިތުންވުމަކުންނެވެ.

“ދެން ލަސްނުކޮށް ހިނގާ އަވަހަށް ފުރަން!” ޒައިދު ލޯންޗު އަޅާފައި އޮތް ދިމާލަށް ހިނގައިގަތެވެ. އޭނާގެ ފަހަތުން ބާކީ ތިބި ތިންމީހުންވެސް ހިނގައިގަތެވެ.

އެންމެން ލޯންޗަށް އަރާ ހަމަޖެހިލުމާއެކު ލޯންޗު ދުއްވައިލިއެވެ. ކުއްލިއަކަށް ވައިގަދަވެ ކަނޑުގަދަވާން ފެށިއެވެ. ވާރޭވެސް އޮއްސައިގަތީ ނުހަނު ބޯކޮށެވެ. އެންމެންގެ މޫނުމަތިން ފެނުނީ ހާސްކަމާއި ބިރުވެރިކަމެވެ. ކިޔުނުހާ ހެޔޮ އެއްޗެއް އެންމެން ކިޔަމުން ދިޔައެވެ.

“ވަރަށް ގަދަ.. ކުރިއަށް ދެވޭނެހެނެއް ހިޔެއް ނުވޭ..” ކައްޕި ބުންޏެވެ. އޭނާގެ އިރުޝާދާއެކު އެންމެން ލައިފް ޖެކެޓް އެޅިއެވެ. އެހެންނަމަވެސް ދެވަނަ ސިކުންތުގައި ޖެހި ބޮޑު ރާޅާއެކީ ލޯންޗު ބަންޑުން ޖަހައިލިއެވެ.

އެހެންނަމަވެސް އެންމެން ކުރި ބުރަ މަސައްކަތުން ލޯންޗު ކޮޅަށް ޖެހިއެވެ. އެ މާކަނޑުގެ މެދުގައި ތިބީ އެމީން އެކަނިމާ އެކަންޏެވެ. ބައިގަޑިއިރެއްހާ ފަހުން މޫސުން ރަނގަޅުވެލުމާއެކު އެމީހުން އެނބުރި މާލެއަށް ދަތުރު ފެއްޓިއެވެ. ﷲގެ ރަޙްމަތުން ސަލާމަތާއެކީ އެނބުރި މަންޒިލަށް އެމީހުންނަށް ވާޞިލްވެވުނެވެ. އަލްޙަމްދުﷲ!

~ނިމުނި~