އެމަންޖެގެ ރޫހް (2ވަނަ ބައި)

ކުރިމަތީގައި ހުރީ ރީތި ސޫރައެއްގައި ހުރި ޒުވާން ފުރައިގެ ދިވެހި އަންހެން ކުއްޖެކެވެ. އެކުއްޖާ ހީވަނީ ކަމަކަށް ބޭނުންވެގެން އުޅޭހެންނެވެ. އެކުއްޖާގެ ލޮލުން ފައިބަމުންދާ ކަރުނަތައް ކޯތާފަތްމަތިން އޮހެމުންދެއެވެ. ހީވަނީ ކޮންމެވެސް ބަޔަކު އަނިޔާތަކެއް ކޮށްފައި ހުރިކުއްޖެއްހެނެވެ. އެކުއްޖާ ލައިގެން ހުރި ހެދުންވެސް ހުރީ ވީދިފައެވެ. މާރޓިން އެނދުން ފުންމައިލިއެވެ. އަދި ސުވާލުކުރަން ފެށިއެވެ.
“ތީކާކު؟ މިކޮޓަރީގަ ކީއްކުރަނީ؟ ވާހަކަ ދައްކަބަލަ؟ ސުވާލަކަށްފަހު ސުވާލެއް އެއަންހެން ކުއްޖާއަށް މާރޓިން ކުރަމުންދިޔައެވެ. އެ އަންހެންކުއްޖާ އަނގައިން އެންމެ ބަހެއްވެސް ނުބުނެ ބަލަހައްޓައިގެން ހުއްޓެވެ. މާރޓިން އެ އަންހެން ކުއްޖާއާ ދިމާއަށް ދިޔުމަށް ހިނގައިގަތެވެ. އަދި މާރޓިން އެހިސާބަށް ދާންފެށިތަނާ އައްޔެއް ފާޅުވެ، ކުއްލިއަކަށް އެކުއްޖާ ގެއްލިއްޖެއެވެ. މާރޓިންވެސް ގަތީ އަމަށަކު ބިރެއް ނޫނެވެ.
އެދުވަހަކީ އެދެމަފިރިން ރާއްޖެ ދޫކޮށް އެމީހުން ޤައުމަށް ދިޔުމަށް ހަމަޖެހިފައި އޮތްދުވަހެވެ. މާރޓިންގެ ދެމަފިރިން ވަރަށް ތަފްސީލުކޮށް މިވާހަކަތައް ރިސޯޓްގެ މެނޭޖްމަންޓަށް ކިޔައިދިނެވެ.
ޖެހިގެން އައި ރެއެވެ. މެނޭޖަރަށްވެސް މާރޓިންމެންގެ ދެމަފިރިންނަށް ކަންތައް ދިމާވިގޮތަށް ކަންތައް ދިމާވިއެވެ.
އަނެއް ދުވަހު އިރު އެރިއިރު، ޒުވާންފުރައިގެ ފިރިހެނަކު އޮތީ ރަށުގެ އުތުރު ފަރާތުގައިވާ 38 ނަމްބަރު ބަނގަލޯއާ ދިމާލު ބީޗްގައި މަރުވެފައެވެ. މުޅިގައިގެ އެތަން މިތަނުން ހުރީ ލޭކޮށާލައިފައެވެ. ގަމީސް އޮތީ ވީދިފައެވެ. މުޅިމޫނުގައި އޮތީ ވަކި އަޅާފައެވެ. ހީވަނީ ބިރުވެރި ސިންގާއެއްގެ ހަމަލައެއް ހެންނެވެ. މެނޭޖަރު ފުލުހުންނަށް ގުޅައި މިވާހަކަތައް ކިޔައިދިނެވެ. ވަގުތުން މައްސަލަ ތަޙުޤީޤު ކުރުމަށްޓަކައި ފުލުހުން ރިސޯޓަށް އައެވެ.
ނިޒާރުއާއި ޝަކީބު ނަމަކަށް ކިޔުނު ދެ މީހަކު މެނޭޖަރު އަޝްފާޤާއި ބައްދަލުކުރުމަށް އޭނާގެ ކޮޓަރިއަށް އައެވެ. ނިޒާރާއި ޝަކީބު އަދި ރޭގައި ބަނގަލޯ ކައިރީ މަރާލާފައިއޮތް މަތީނަކީ ސުނާމީ ކާރިސާއަށްފަހު މިރިސޯޓްގެ ގިނަ ބަނގަލޯތައް މަރާމާތުކުރުމުގެ މަސައްކަތް ކޮންޓްރެކްޓް ކުރެވުނު ފަރާތެވެ.
ނިޒާރުއާއި ޝަކީބު އަޝްފާޤް ކައިރިއަށް އައިއިރު، ދެމީހުންވެސް ތިބީ ދާ ހިއްލާ ވަރުބަލިވެފައެވެ. އެމީހުންގެ މޫނުމަތިން ފެންނަމުން ދިޔައީ މާޔޫސްކަމުގެ އަސަރެވެ.
“އަޅުގަނޑުމެން މިއައީ ވަރަށް ބޮޑުކަމެއް އޮޅުން ފިލުވައިދޭން! އަޅުގަނޑުމެންނަށް ކެތްނުކުރެވިގެން އަޅުގަނޑުމެންނަށް ސަލާމަތްވާނެކަމަށް ވަނީ މިވާހަކަތައް އަޝްފާޤަށް ކިޔައިދީގެން!” ވަރަށް ހިތްވަރުކޮށްފައި ނިޒާރު ރިސޯޓްގައި މިދިމާވާ ނާމާން ބިރުވެރި ވާހަކަތަކުގެ ހަޤީޤަތް އަޝްފާޤަށް އޮޅުން ފިލުވައިދޭން ފެށިއެވެ
“މިރިސޯޓުން އެފެންނަ ކުއްޖަކީ ހިމަންދޫ ފުއްޓަރުގޭ އައިމިނާ! އެކުއްޖާ އަޅުގަނޑުމެންނާއި ބައްދަލުވީ 2005 އޮކްޓޯބަރ 05 ވަނަ ދުވަހު އެރަށަށް ދިޔަ ދަތުރެއްގައި! އަޅުގަނޑުމެން އެރަށަށް ދިޔައީ ބަންގަލޯތައް ތައްޔާރުކުރުމަށް ފަންގި ހޯދުމަށް އަރިއަތޮޅުގެ ރަށްތަކަށް ކުރި ދަތުރެއްގައި! އައިމިނާއަކީ އަޅާލާނެ ޔާރެއްއިޔާރެއްނެތް ކުއްޖެއް! އަޅުގަނޑުމެން އެރަށުގެ ގެތަކަށް ފަންގި ހޯދުމަށް ކުރެވުނު ދަތުރުގައި ފުއްޓަރުގެއަށްވެސް ދެވުނު! އައިމިނާ އަޅުގަނޑުމެންގެ ގާތުގައި ވަރަށް ބޮޑުކަމަކަށް އެދުނު! އެއީ އައިމިނާއަކީ އެރަށުގައި އެއްވެސް ޢާއިލާގެ މީހަކުނެތް އެކަނިވެރި ކުއްޖަކަށްވާތީ، އޭނާއަށް ކޮންމެވެސް ވަޒީފާއެއް ތަނަކުން ހޯދައި ދިނުމަށް.” މިހިސާބަށް މިވާހަކަތައް ކިޔައިދިނުމަށްފަހު ނިޒާރު ގޮނޑީގައި އިށީނެވެ.
“ދެން ކިހިނެތްވީ!” ވާހަކަ އަޑުއެހުމުގެ ޝައުޤުވެރިކަން ހުރިވަރުން އަޝްފާޤު އެހިއެވެ.
ނިޒާރު ދައްކަމުން ދިޔަ ވާހަކަތަކާއި ގުޅުވައިގެން ދެން ވާހަކަ ދައްކަންފެށީ ޝަކީބުއެވެ.
“އަޅުގަނޑުމެން އައިމިނާ ގެނައީ މިރިސޯރޓަށް! ވަޒީފާއެއް ދޭނަމޭ ބުނެގެން! އަޅުގަނޑުމެން އައިމިނާ ނިދުމަށްދެއްކީ ރިސޯޓްގެ 38 ނަމްބަރު ބަންގަލޯ! އޭރު އެބަންގަލޯ ހުރީ ބޭނުންކުރެވިދާނެ ވަރަށް ނިމިފައި!”
“ދެން ކަލޭމެން އެމަންޖެއަށް ކިހިނެއްތަ ހެދީ؟ ކިޔައިދީބަލާ!” ކެތްމަދުވެފައިވާ ރާގަކަށް އަޝްފާޤު އެހިއެވެ.
“އަސްލުވީ ގޮތަކީ އެއްރެއަކު އައިމިނާ ނިދާފައި އޮއްވާ އެބަންގަލޯއަށް ދިޔައިން! އަދި ތިން މާބުރެއްގެ ޝިކާރައަކަށް ފަރިވެ ފޮޅިފައިން މަލެއް ވެގެންދިޔައީ! އަދި އަޅުގަނޑުމެން އެކަން ސިއްރުކުރަން މިރިސޯރޓުގެ ފަސްގަނޑުގެ ދަށް ވެގެންދިޔައީ! އަޅުގަނޑުމެން މިރަށަށް މިއައީ ހަމަ މިވާހަކަ ކިޔަދޭންވެގެން! އައިމިނާގެ ރޫޚް ބުނަނީ މިވާހަކަތައް މެނޭޖަރަށް ކިޔައިދީފިނަމަ އުނދަގުލެއް ނުކުރާނެކަމަށް! އަދި އެއްވެސް ފަރާތަކަށްވެސް އައިމިނާ ނުފެންނާނެކަމަށާއި، އައިމިނާގެ ފުށުން އުނދަގުލެއްވެސް ނުވާނެކަމަށް! އަޅުގަނޑުމެންނަށް ގޮތެއް ނަހައިދީފިނަމަ ޝުކުރުވެރިވާނަން!”
މިވާހަކަ ތަކުގެ އަޑުއިވިފައި އަޝްފާޤު ވަރަށް ރުޅިއައެވެ. އަދި ބުންޏެވެ.
“ކަލޭމެން ތިކުރީ ވަރަށް ބޮޑު ކުށެއް! ތިކަމުގެ އަދަބު ލިބެންޖެހޭނެ! މައުސޫމު ކުއްޖެއްގެ އިއްފަތްތެރިކަން ނަގާލުމަށްފަހު، އަދި މަރާވެސްލީ! ހަޤީޤަތުގަ އެކުއްޖާގެ އެރޫޚު މިކަން އޮޅުންފިލުވަދޭން އުޅުމުގެ ބޭނުމަކީ ކަލޭމެން އިންސާފުގެ ކުރިމައްޗަށް ގެނައުން! އެހެންވީމާ އަހަރެން އެގޮތަށް ކަންތައް ކުރަންޖެހޭ! ނޫންނަމަ އަދިވެސް އެރޫޚްގެ ފަރާތުން އުނދަގޫތަކެއް ކުރިމަތިވާނެ!”
މިހެން ބުނެފައި އަޝްފާޤު ވަގުތުން ރިސޯޓްގައި މަތީންގެ މައްސަލަ ތަހުޤީޤުކުރުމަށް އައިސް އުޅޭ ފުލުހުންނަށް ގުޅައި ގެނައެވެ. މިކަންތައް ފުލުހުންނަށް ކިޔައިދިނުމަށްފަހު، މި ދެ މުޖުރިމުން ފުލުހުންނާއި ހަވާލުކުރިއެވެ.
-ނިމުނީ-