އިންސާފު ލިބޭނެބާ – 02

” މަންމާ އެވެ! އަހަރެން ދޫކޮށްލާފައި ތި ދިޔައީ ހާދަ ދުރަކަށްށެވެ! އަހަރެން އެކަނި މި ބޮޑު ދުނިޔޭގައި އުޅޭނީ ކިހިނެތް ހެއްޔެވެ؟ ދުވަހަކުވެސް ތި ލޯބި ފިރުމުންތަކުން ވަކިވާކަށެއް ބޭނުމެއް ނޫނެވެ! އަހަރެން މަންމަ އާއި ނުލައި އުޅޭނީ ކިހިނެތް ހެއްޔެވެ؟ މީ ހުސްވެސް އަހަރެންގެ ކުށެވެ. އަހަރެން އެ ގޭންގަށް ނުވަދުން ނަމައެވެ.. އަހަރެން މަސްތުވާތަކެތި ބޭނުން ނުކުރި ނަމައެވެ.. އަހަރެން އެ ކަރުދާސްކޮޅު ސާރއަށް ދެއްކުން ނަމަ.. މަންމަ މިއަދު ދުނިޔޭގައި ހުރިކަން ޔަގީނެވެ. މަންމަ ނެތް ދުނިޔެއެއްގައި އަހަރެން އުޅޭކަށް ބޭނުމެއް ނޫނެވެ. އަހަރެން މިތަނުން ފުންމާލާނީއެވެ. އޭރުން އެ ގޭންގްގެ މީހުނަށްވެސް ރަނގަޅު ވާނެއެވެ. އޭރުން ބޮޑުބޭބެމެންނަށް އެއްވެސް ނުރައްކަލެއް ކުރިމަތިވުމުގެ ފުރުސަތެއް ނޯންނާނެއެވެ. އަހަރެން ދިޔާމަ އެމީހުންނަށްވެސް ނުލާހިކު ފަސޭހަ ވާނެއެވެ… ”

އުކައިލް ހިތާހިތުން އެހެން ބުނުމަށްފަހު ރެއިލިންގެ މައްޗައް އެރިއެވެ…

** ޕާޓް 2 **

ﷲأَكْبَ ﷲأَكْبَر ފަތިސް ނަމާދުގެ ބަންގީގެ އަޑު މުޅި ފަޒާގައި ގުގުމައިލިއެވެ. އުކައިލްއަށް އެއަޑު އިވުމުން ހަމަހޭވެރިކަން ލިބުނު ފަދައެވެ. ތެޅިގަނެފައި އަވަހަށް ޓެރަސް މަތިން ފޭބިއެވެ. އޭރު އޭނާގެ މޫނުމަތިން އޮށްދާހިއްލައި ގަނެފިއެވެ. މޫނުގައި ދެއަތް ކާއްތާލަމުން ފުން ނޭވާއެއް ދޫކޮށްލިއެވެ.

” سُبْحَانَ ٱللهِ އަހަރެންނަށް ކުރެވެން މިއުޅެވުނީ ކީއްހެއްޔެވެ؟ ކުފުރު މަރަކުން މަރުވުމަކީ ކިހާ ބޮޑު ފާފައެއް ހެއްޔެވެ؟ އަހަރެން މަރުވެއްޖެނަމަ މަންމައަށް އިންސާފު ހޯދަ ދޭނީ ކާކު ހެއްޔެވެ؟ މަންމައަށް އިންސާފު ހޯދާ ދިނުމަށްޓަކައި އަހަރެން ދުނިޔޭގައި ހުންނަން ޖެހޭނެއެވެ. އަހަރެން މިހާ ފިނޑިވީ ކޮންއިރަކު ހެއްޔެވެ؟ ޔާﷲ އަހަރެންނަށް ކުރެވެން އުޅުނު ފާފަ އަފޫ ކޮށްދެއްވާށިއެވެ.. ” އުކައިލް ހިތާހިތުން ބުނެލުމަށްފަހު އަވަސްވެގަތީ ނަމާދަށް އަރަން މިސްކިތަށްދާށެވެ. ނަމާދުކޮށް ނިމުމުން މަންމައަށް ހެޔޮ ރަޙްމަތް ލެއްވެވުން އެދި އުކައިލް މާތް ﷲއަށް ދުޢާ ދެންނެވިއެވެ. އެ މަންމަގެ ކުށް ފާފަތަށް ޢަފޫކޮށް އެ މަންމައަށް އިންސާފު ހޯދައިދިނުމުގެ ހަނގުރާމައިން އޭނައަށް ކާމިޔާބު ލިއްބައިދިނުމަށްވެސް ދުޢާކުރިއެވެ. ދުޢާއަކީ މުއުމިނުންގެ އެންމެ ބާރުގަދަ ހަތިޔާރުކަމުގައި އޭނާގެ މަންމަ އަބަދުވެސް ބުނެއުޅެއެވެ. ނަމާދުން ފައިބައިގެން އުކައިލް ދިޔައީ ވަރުގަދަ އަޒުމެއް ހިތުލައިގެންނެވެ.

ވަޒީފާއަށް ދިޔުމަށްޓަކައި އޭނާ ތައްޔާރުވެލިއެވެ. އެވަގުތު އޭނާގެ ބޮޑުބޭބެ ޖާވިދު އެކޮޓަރިއަށް ވަނެވެ. ” އުކައިލް ދަރިފުޅާ.. ވަޒީފާއިން ޗުއްޓީއެއް ނަގަން ވީނުން؟ ” ޖާވިދު އޭނާގެ ހިޔާލު ފާޅުކުރިއެވެ. އުކައިލް ޖާވިދަށް ބަލައިލިއެވެ. އޭނާގެ ދެލޯ ވަނީ ރުއިމުގެ ސަބަބުން ރަތްވެފައެވެ. ކުޑައިރުއްސުރެ އެކުގައި އުޅެބޮޑުވި ކޮއްކޮ އެފަދައިން ނިޔާވުމުން ދެރަނުވާނީ ކޮން ބޭބެއެއް ހެއްޔެވެ؟ ” ބޭބެ ކަންބޮނޑު ނުވޭ މަންމައަށް އެހެން ހެދި މީހުންނަށް ހައްޤު އަދަބު ލިބޭނެ އިންޝާ ﷲ.. ” އުކައިލްގެ މޫނުން ފެނިގެން ދިޔައީ މަންމައަށް އިންސާފް ހޯދާދިނުމަށްޓަކައި ކޮންމެ ކަމެއް ކުރަންވެސް ތައްޔާރަށް ހުރި ކަމުގެ ކުލަވަރެވެ. އުކައިލްގެ އަޑުގައިވާ ޔަގީންކަން ޖާވިދަށް ދެނެގަނެވުނެވެ. އެހެންކަމުން ހިތި ގޮތަކަށް ހިނިތުންވެލިއެވެ. ސައި ބުއިމަށް އެދިފައި ޖާވިދު އެކޮޓަރިން ނިކުތެވެ.

އުކައިލް ތައްޔާރުވެ ނިމުމުން ސައިބޯން އައިސް މޭޒުދޮށުގައި އިށީނެވެ. އޭރު ޖާވިދުގެ ދަރިފުޅު ކަމަށްވާ ޝީން ވެސް ސްކޫލަށްދާން ތައްޔާރުވެގެން އިނެވެ. 15 އަހަރުގެ ޝީންގެ މޫނުމަތިންވެސް ފެނިގެން ދަނީ ހިތާމައިގެ ކުލަވަރެވެ. އޭނާގެ ޓާރމްޓެސްޓް އޮތުމުގެ ސަބަބުން ސްކޫލަށް ނުގޮސްވާކަށް ނެތެވެ. ޖާވިދުގެ އަންހެނުން މާރިޔާވެސް ސައި ތައްޔާރު ކުރުމައިގެން އުޅެއެވެ. އެ އާއިލާގެ ހިތްތަކުގައި ވަނީ ބިރުވެރުކަމާއި ހިތާމައިގެ އަސަރުތަކެވެ. ދެން އެފަދަ ކަމެއް ދިމާވާނީ ކާކަށް ކަމެއް ކޮންއިރަކު ކަމެއް އެމީހުންނަކަށް ނޭނގެއެވެ. ކާކޮޓަރީގައިވި ނުތަނަވަސްކަން އުކައިލްއަށް ނަގައިގަނެވުނެވެ.

” ބޭބެމެން ކަންބޮޑުނުވޭ އަހަރެން ހުއްޓަ ބޭބެގެ އާއިލާއަކަށް އެއްވެސް ގެއްލުމެއް ލިބުނަ ނުދޭނަން.. މިއަދު އިރާދަކުރެއްވިއްޔާ މި އާއިލާގެ ރައްކާތެރިކަމަށް ފުލުހުންގެ ޓީމެއް ހަމަޖައްސާނެ އިންޝާ ﷲ.. ” އުކައިލް ޖާވިދާއި ދިމާލަށް ބުނެލިއެވެ. ” ދަރިފުޅާ ބަލައިގެން އުޅޭތި! ތިހާ ބޮޑުކަމެއް ބޭބެމެނަށް ކޮށްދޭއިރު ކިހާ ފައިސާއެއް ހަރަދުވާނެ.. ބޭބެއަށް ތިގޮތް ކަމަކު ނުދޭ އެއްގޮތަކަށްވެސް.. ” ޖާވިދް މަޑުމައިތިރި ކަމާއެކު ބުނެލިއެވެ. ” ބޭބޭ.. އަހަރެންގެ މަންމައަށް ފަހު އަހަރެން އެންމެ ލޯބިވަނީ މި އާއިލާ ދެކެ.. މި އައިލާއަށް ކަމެއް ވެއްޖެއްޔާ އަހަރެންގެ އަމިއްލަ ނަފްސު މިހާރަށް ވުރެ ބޮޑަށް ކުށްވެރި ކުރެވޭނެ.. އެހެންނޫނަސް އެއްވެސް ފައިސާއެއް ހަރަދެއް ނުވާނެ މިކަމަކުން.. މީ ފުލުހުންގެ ފަރާތުން ދޭ ހިދުމަތެއް! ” އުކައިލް ލުއި ހިނިތުންވުމަކާއެކު ބުނެލިއެވެ.

ޕޮލިސް ސްޓޭޝަންއަށް ވަދެވުންއިރު ހަމްދަރުދީގެ ބެލުންތަށް އޭނައަށް ލިބެމުން ދިޔައެވެ. ނަމަވެސް އޭނަ އެެއްވެސް މީހެއްގެ ހަމްދަރުދީއެއް ބޭނުމެއްނޫނެވެ. އޭނަ ބޭނުންވަނީ މަންމައަށް އިންސާފެވެ. އެކަންކުރި މީހުންނަށް ހައްގު އަދަބެވެ. އޭނައަށް އެކަންކުރި ބަޔަކު ޔަގީނާއި ގާތަށް އެނގެއެވެ. އެހެންނަމަވެސް އެމީހުންގެ ހަގީގަތް ހާމަ ކުރުން ވާނީ ވަރަށް ވެސް އުނދަގޫ ކަމަކަށްށެވެ. ސަބަބަކީ އެމީހުންގެ ނުފޫޒު އެކިތަންތަނަށް ވަރަށް ބޮޑަށް ފޯރާފައިވާތީއެވެ. ނަމަވެސް އޭނަ އެކަން ކުރާނެއެވެ.

އޭނާގެ ހެޑް ސާޖެންޓް ކަމަށްވާ ކިނާން އެވަގުތު އޭނާގެ ގާތަށްއައެވެ. ” އުކައިލް ބޭނުން ނަމަ ލީވްއެއް މިދުވަސްކޮޅު ނެގިދާނެ.. ” ކިނާން އައިސްފައި ބުންޏެވެ. ” ނޫން އަޅުގަނޑު ބޭނުންވަނީ މަންމަގެ ކޭސް ވީހާވެސް އަވަހަކަށް ނިންމާލަން.. އަދި އަޅުގަނޑުގެ އާއިލާ މީހުންގެ ރައްކާތެރިކަން ވަރަށް މުހިންމު.. ” އުކައިލް ބުންޏެވެ. ” ލައްބަ ތިކަންތައްވާނެ.. އާއިލާގެ ރައްކާތެރިކަމަށްށާ، އުކައިލްގެ މަންމަގެ ގާތިލުން ހޯދުމަށްޓަކައި އުކައިލް އިތުބާރު ކުރާ ކުދިން ކޮޅެއް ޓީމްއަށް ނަގާ.. ” ކިނާން ބުންޏެވެ. އެއާއެކު އުކައިލް ލައްބައޭ ބުނުމަށްފަހު ދިޔައީ އޭނާގެ އޮފީހަށްށެވެ.

ޓީމްތައް ނަގައި ނިމުމުން އެއްބައި އުކައިލްގެ އާއިލާ ގާތަށް ފޮނުވާލެވުނެވެ. އަދި އުކައިލް އާއިއެކީ މަސައްކަތް ކުރުމަށް އުކައިލް އާއި ލައިގެން ޖުމުލަ ފަސް ފުލުހުން ނެގުނެވެ. އެއީ އެކި ދާއިރާތަކަށް މޮޅު ފުލުހުންނެވެ. އެ މީހުންގެ މަސައްކަތް ވީ އެންމެ އަވަހަކަށް ފެށުމަށް ވަނީ ހަމަޖައްސާފައެވެ. އެގޮތުން މިއަދު އޮތީ މައުލޫމާތު ހޯދުމެވެ.

” ދާލިޔާ އެ ގޯޅުގަނޑުގައި ހުރި ސީސީޓީވީ ފުޓޭޖްތައް އެނަލައިޒް ކުރޭ.. އެތަނުގައި ހަރަކާތްތެރިވި މީހުން ދެނެގަނެވޭތޯ ބަލާ… އަދި ސަސްޕެކްޓެއް ހުރިނަމަ އަހަރެންނަށް އަންގާ! ޒާލިކް ކޭސް ރިޕޯރޓް ކުރި މީހުންނާ ސުވާލުކުރޭ.. އިޔާދު ހެލްޕް ޒާލިކް.. ދާރިއަން އަހަރެންނާއެކީ އާދޭ! ” އެންމެނަށް އެކި ކަންކަން ބަހައިލުމަށްފަހު ދާރިއަން އާއިއެކީ އުކައިލް އޭނާގެ އޮފީހަށް ވަދެ ހަމަޖެހިލިއެވެ.

އުކައިލްގެ އޮފީހަށް ވަދެވުމާއިއެކު ދާރިއަންއަށް ކައިރީގައި ހުރި ގޮނޑިއެއްގައި އިށީނުމަށް އިޝާރާތްކުރިއެވެ. ” ދާރިއަން ތީ އަހަރެން ޓީމްއިން އެންމެ އިތުބާރު ކުރާ މީހާއޭ ބުންޏަސް ދޮގަކަށް ނުވާނެ. އަހަރެން މިއުޅެނީ ދާރިއަންއާއި ވަރަށް ބޮޑުކަމެއް ހަވާލުކުރަން… ދާރިއަން މިކަމަށް ނޫނެކޭ ބުންޏަސް އަހަރެންގެ އެއްވެސް މައްސަލައެއް ނެތް. ” އުކައިލް ވަރަށް ސީރިއަސްވެ ހުރެ ވާހަކަ ދައްކަމުން ދިޔައެވެ. ” އުކައިލް.. އަހަރެމެން މީ އެކު އުޅެ ބޮޑުވި ދެ އެކުވެރިން.. މިހާ އުނދަގޫ ދަނޑިވަޅެއްގައި އުކައިލްއަށް އެހީނުވެދިނިއްޔާ އަހަރެންވާނީ ކިހާ ގޯސް މީހަކަށް.. އަވަހަށް އަހަރެން ކައިރީ ބުނޭ ކުރަންވީ ކަންތައް.. ” ދާރިއަން ފުން ނޭވާއެއް ދޫކޮށްލަމުން ބުންޏެވެ. އުކައިލް ދާރިއަންގެ ދެލޮލަށް ފުންކޮށް ބަލައިލުމަށްފަހު އޭނަ ބުނަން އުޅޭ ވާހަކައަށް ތައްޔާރުވެލިއެވެ.

” އަހަރެން ބޭނުންވަނީ ދާރިއަން ބްލަޑް މާފިއާގެ ތެރެއަށް ސްޕައި ކުރަން ވަންނަން.. އަހަރެން ވަދެއްޖެ ނަމަ އެމީހުންނަށް އެނގޭނެ އަހަރެން ވަންނާނީ ކޮންބޭނުމެއްގައިކަން.. އަދި އަހަރެން ނުވެސް ވައްދާނެ.. ސަބަބަކީ އަހަރެން ގޭންގަށް ބިޓްރޭކޮށް މިކޮޅާ ގުޅިގެން އުޅޭތީ.. އެކަމް ދާރިއަން؟ އެމީހުން އެއްގޮތަކަށްވެސް ސަސްޕެކްޓްއެއް ނުކުރާނެ.. ވިސްނާނެ ވަރަކަށް ވިސްނާ.. މީ ވަރަށް ރިސްކީ ކަމެއްކަން އަހަރެންނަށްވެސް އެނގޭ ދާރިއަންއަށް ނޫނެކޭ ބުނުމުގެ ފުރުސަތުވެސް އެބައޮތް.. ” އުކައިލް ދާރިއަންއާއި ހަތަރު ކަޅި ހަމަކޮށްލަމުން ބުންޏެވެ. އުކައިލް ދިޔައީ ދާރިއަންގެ ސިކުނޑީގައި ހިނގާ ފިކުރުތައް ދެނެގަނެވޭތޯ މަސައްކަތް ކުރަމުންނެވެ.

” ތި އެދުނީ ވަރަށް ބޮޑުކަމަކު.. ތިކަމުން އަހަރެންގެ އާއިލާއަށްވެސް ނުރައްކާވާނެ.. އެކަމަކުވެސް ތިކަމުން ވާނެ ފައިދާ ކިތަންމެހާ ވެސް ބޮޑު.. އަހަރުމެންނަށް ގޭންގްތައް ހިންގުމުގެ އަޑީގައި ތިބޭ މީހުން ހޯދުމުގެ ފުރުސަތު ބޮޑު.. ބަޑީ އަހަރެން ތިކަމާއި މެދު ވިސްނާލަން ވަގުތުކޮޅެއްދީ.. މިރޭގެ ވަގުތެއްގައި ޖަވާބެއް ދޭނަން.. ” ދާރިއަން ވިސްނަމުން ބުންޏެވެ. އުކައިލް ޝުކުރުވެރި ހިނިތުންވުމެއް ރައްދުކުރަމުން ބޯޖަހައިލިއެވެ.

ދޮރުގައި ޓަކިޖަހާލި އަޑުއިވުމުން ދެމީހުންގެ ނަޒަރު ދޮރަށް ހުއްޓުނެވެ. ” ވަދޭ ” އުކައިލް ދޮރުގެ ފުރަގަހުގައި ހުރި މީހާއަށް ވަންނާނޭ ފުރުސަތު ދިނެވެ. ދޮރުހުޅުވައިލުމަށްފަހު ދާލިޔާ އޮފީސް ތެރެއަށްވަނެވެ. ” ސާރ އެގޯޅިގަނޑުގައި ހުރި  ސީސީޓީވީ ކެމެރާތަށް ހުރީ ކޮންމެވެސް ބަޔަކު ހެކް ކޮށްފަ.. ދެއާރ އިޒް ނޯ ކުލޫ ހޫ ޑިޑް އިޓް.. ” ދާލިޔާ އުކައިލްގެ މޫނަށް ބަލަން ނުކުރިގެން އިސްޖަހައިލިއެވެ. ” ވަޓް.. ކަލެމެންނަކަށް ނޭނގުންތަ ކެމެރާތަށް ހެކް ކުރި އިރުވެސް؟ ކެމެރާތައް ބަލަން ތިބޭ މީހުން ތިބެނީ ނިދާފަތަ އަޅެފަހެ؟ ” އުކައިލް އައި ރުޅިން އަޑު ބާރުވިއެވެ. ދާރިއަން އުކައިލްގެ ކޮނޑުގައި އަތް ބާއްވާލީ އެނާގެ ރުޅި މަތަކުރުމަށް އިޝާރާތް ކުރުމުގެ ގޮތުންނެވެ. ފުންނޭވާއެއްލުމަށްފަހު އުކައިލް އޭނާގެ އަމިއްލަ ނަފްސު ހަމައަކަށް އަޅުވައިލިއެވެ. ” ދެއާރ އިޒް އަ ކުލޫ.. މި ކަރުދާސްކޮޅު މީ އަހަރެން އެއްދުވަހަކު ލިފްޓަށް އެރިގަޑީ މީހަކު އަހަރެންގެ ޖީބަށްލީ އެއްޗެއް.. ” އުކައިލް ފުންނޭވާއެއްލަމުން ޖީބުގައި އޮތް ކަރުދާސްކޮޅު ދައްކައިލިއެވެ.

އެކަރުދާސްކޮޅު ކިޔުމުން ދެ މީހުންގެ ހަށިގަނޑުން ހީބިހި ނަގައިގެން ދިޔައެވެ. ” އެ ގޭންގްއިން ކެނޑި ބޭވަފާތެރިވުމުން އަހަރެންގެ ކިބައިން ބަދަލު ހިފާފަ މިއީ.. އަހަރެންނަށް އޭރު މާބޮޑަށް އަޅާނުލެވުނީ އެކަމަކު ދެން މިކަހަލަ ކަމެއް ނުވާނެ.. ދާލިޔާ ދެން ކުރަންވީ ކަމަކީ އޭރު ސެކިޔުރިޓީ ބަލަހައްޓަން ތިބީ ކޮންބަޔެއްތޯ ބަލައިދޭންވީ.. އިޔާދު އާ ޒާލިކް އަދި ނާދޭތަ؟ ” އުކައިލް އަހައިލިއެވެ.  ” ލައްބަ ސަރ އަދި އިޔާދް އާއި ޒާލިކްއެއް ނާދޭ.. އަޅުގަނޑު ހިޔާލެއް ދެންތޯ؟ ” ދާލިޔާ އަހައިލިއެވެ. އުކައިލް ދާލިޔާއަށް ބަލައިލަމުން ބޯޖަހައިލިއެވެ. ” ވީ ޝުޑް ފައިންޑް ވިޓްނެސަސް.. ރިޕޯޓް ކުރި މީހުން ގާތު އަހައިގެން އެ މަގުގައި އޭރު ހުރި މީހުންނާއި ސުވާލު ކުރުން ރަނގަޅުވާނެ.. ” ދާލިޔާ މަޑުމަޑުން ބުނެލިއެވެ. ” ގުޑް އައިޑިޔާ ދާލިޔާ.. އައިލް ގޯ ޗެކް އޮން އިޔާދު އެންޑް ޒާލިކް.. ދާރިއަން އަހަރެންނަށް ޖަވާބެއް މިރޭގެ ކުރިން ދިނިއްޔާ ވަރަށް ރަނގަޅު.. ” އުކައިލް ދާލިޔާއަށާއި ދާރިއަންއަށް ބުނުމަށްފަހު ހިނގައިގަތެވެ.

( ނުނިމޭ )

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.