އަރޫނީ 1

ސީލިންގުގައި ހަރުކޮށްފައިހުރި ހިތްގައިމު ފަންކާއަށް ނަޒަރު ހުއްޓާލައިގެން އޮތީ ފުންވިސްނުމެއްގައެވެ. އުޅެބޮޑުވި ރަށާއި, މަޔަކާއި ނުލައި ބަލާބޮޑުކުރި ލޯބިވާބައްޕަ ދޫކޮށްލުމަށްފަހު އޭނާ މާލެ އައީ ބައްޕަގެ ހުވަފެންތައް ހަޤީޤަތަކަށް ހަދައިދިނުމަށްޓަކައި ޓީޗިންގ ކޯސް ހެދުމަށެވެ. އަރޫނީގެ ސިކުނޑީގައި އެނބުރެމުން ދިޔައީ މިއަދު މިގެއަށް އައިއިރު ދިމާވި ކަންތައްތަކެވެ.

“މިއީ ޖައިޝް ދެން މިހިރީ ޖީނާ. ބޭބެގެ ފުރާނަ އަކީވެސް މިދެކުދިން” މަންސޫރުބޭބޭ ކިތަންމެ ހެވިލާފައި ތައާރަފް ކޮށްދިނަސް އެކުދިންގެ މޫނުމަތިން ފެނުނީ ފޫހި ކަމެވެ. އަދި ޖައިޝްގެ ރުޅިވެރިނަޒަރުން ހީވަނީ އަރޫނީ އަންދާ އަޅިއަށް ހަދާލަފާނެހެވެ. އެކުދިން އެހާ ފޫހިވީ އޭނާ އެގެއަށް ކިޔަވަން އައިމަހެއްޔެވެ؟ ނޫނީ ރާއްޖެ ތެރޭގެ ކުއްޖަކަށް ވީމާހެއްޔެވެ؟  އެކުދިން އެހާ ރުޅިއަންނަންޏާ މިގޭގައި ހުރުމަކީ ފަސޭހަ ކަމަކަށް ނުވާނެއެވެ.އަނެއްކޮޅުން މިފަދަ މުއްސަނދި ދިރިއުޅުމަކަށް އޭނާ ހޭނެން ވެސް ފަސޭހައެއް ނުވާނެއެވެ. ސުވާލު ތަކުން އަރޫނީގެ ސިނކުޑިއަށްބާރު ކުރަން ފެށިއެވެ.

“މަށަށް ކޮންކަމެއް؟ ހުރެދާނެއްނު ފުއްޕާފަ. މަންސޫރުބޭބުނީ މީ އަހަރެންގެވެސް ގެޔޭ. މަނާ އެއްޗެއް ނޯންނާނެޔޭ.އައިމް ކޫލް.” ކުއްލިޔަކަށް ފުންމައިގެން ތެދުވެފައި އަމިއްލަ އަމިއްލައަށް ވާހަކަ ދައްކަމުން އަރޫނީގޮސްވަނީ ފާޚާނާ އަށެވެ.

“ހާދަ ފޫއްސޭ! ޖަހާ ކަޓުވައްތަރު. 80 ގެ އަހަރުތަކުގައި މީހުން ލާކަހަލަ ހެދުމެއް ލައިގެންވެސް ދެން ނޭނގެ. އަދި ބައްޕަވެސް ބުނެފިއޭ ތަންތަނަށް ދާއިރު ގެންދާށޯ. ޖީއަށް ކެރޭތަ، ޖީގެ ފްރެންޑުން މަލާމާތްވެސް ކުރާނެ. އަޅެ.” ދެފައި ތަޅާތަޅާފައި ޖީނާ އޭނާގެ ދޮންބެ ކައިރީ ޝަކުވާކުރަމުން ދެއެވެ.

“ކާމް ޑައުން ސިސް! އަހަރުން ނަކަށް ގޮތެއް ހުހެއްނުވާނެ.” ސޯފާމަތީ އޮތްފޯނު އަނބުރާލަމުން ޖައިޝް ވިހަ ހިނިތުންވުމެއް ތުންފަތްމައްޗަށް ވެރިކޮއްލި އެވެ. ދެން ޖައިޝް ބުނި ވާހަކައިން ޖީނާ އަނގަމަތީ އަތް އަޅަމުން ބާރަކަށް ހީގަތެވެ.

ހެނދުނުގެ ނާސްތާއަށް ކާކޮޓަރިއަށް ވަން މަންސޫރަށް، މޭޒުމަތި ތައްޔާރު ކުރަން ހުރި އަރޫނީ ފެނުމާއި އެކު މޫނުމަތި އަލިވެގެން ދިޔައެވެ. ފަރިތަކަމާއި ފާޑުވެރި ކަމާއި އެކު އަރޫނީ މޭޒުމަތި ތައްޔާރުކުރަމުން ދިޔައީ ހިނިތުންވެ ހުރެއެވެ.

“އަހަނ ދުރުވީތޯ؟ އަވަހަށް އިށީންނަވާ!” މަންސޫރާއި އަރޫނީވެސް ސިހުނީ ގޭގައި ކައްކަން އުޅޭ ފާތާނިކެގެއަޑަށެވެ.

” އެކޮއި ދެންދޭ ފެންވަރާލައިގެން ސައިބޯން އަންނަން.” އަރޫނީގެ ބުރަކަށިގައި ޖަހާލަމުން ފާތާނިކެ ބުނެލީ ލޯތްބާއެކުއެވެ.

“ދަރިފުޅު އަންނަމުން ޖީނާއަށް ވެސް ގޮވާލާތި. ޖައިޝް ސައިނުބޮއި ދިޔައީ ދޯ.” އެއްފަހަރު އަރޫނީއަށް އަނެއްފަހަރު ފާތާނިކެއަށް ބަލަމުން މަންސޫރުވާހަކަ ދެއްކިއެވެ.

” އަޅުގަނޑަށް ހީވަނީ މަންސޫރުގެ ހުވަފެންތަށް ހަޤީޤަތަކަށް ވަނީހެން.” އަރޫނީ ދިޔަ ދިމާއަށް ބަލަން ހުރެ ފާތާނިކެ އުފާވެރި އަޑަކުން ވާހަކަދެއްކިއެވެ. ފަތިސް ނަމާދު ކޮށްގެން އައިސް ފާތާނިކެއަށްވުރެން ކުރިން ބަދިގެއާ ތަންތަން ސާފުކޮށް ސައިހެދުމުގެ މަސައްކަތް އަރޫނީ ކުރިވާހަކަ ކިޔައި ދިނީ ހިނިއައިސް އިނދެއެވެ.

ހެންދުނުގެ ސައި ގަޑީގައި ޖައިޝް މޭޒުދޮށަކުން ނުފެނެއެވެ. ފުސްމޫނު ހަދައިގެން އިނދެ ޖީނާ ކައި ނިންމާލީ އަވަސް އަވަހަށެވެ. ހީވަނީ ބައްޕަގެ ދަރިފުޅަކީ އަރޫނީ ހެނެވެ. އެކި ސުވާލުތައް އަރޫނީ އާއިބައްޕަ ކުރަމުން ދިޔައިރު ޖީނާ އިނީ ރުޅިއައިސްގެން ހަލާކުވާވަރުވެފައެވެ.

ކޮލެޖް ތެރެއަށް ވަދެގެން ދިޔައިރު ތަނބެއްކައިރީ ބައިހަދާފައި ތިބި އަންހެން ގުރޫޕެއް އޭނާއަށް ބަލަމުންދާކަން އަރޫނީއަށް އެނގުނެވެ. އޮފީހާއި ދިމާއަށް ދަމުން އެއްފަހަރު އެކުދިންނާއި ދިމާއަށް ބަލާލިއެވެ. ހައްތާވެސް ފެޝަން ކުދިންނެވެ. ބާރު ޖީންސާއި ކުރު ޓޮޕްކޮޅުތަކުގައެވެ. މުޅިންވެސް މިތަނުން ފެންނަނީ އެކަހަލަ ކުދިންނެވެ. އަރޫނީ ލައިގެން ހުރީ ކަކުލަށްވުރެން ތަންކޮޅެއް މައްޗަށް ހުރި މަޑުނޫކުލައިގެ އަރިފެޅި ހެދުމެކާއި އެކުލައިގެ ދޫ ބެލްސްއެކެވެ.

“ހައި ބޭބީ!” ގޭޓުން ވަދެގެން އައި ޖައިޝް ފެނުމާއިއެކު ތުއި ގޮތަކަށް ހިނގާލާފައި ޖަޒްލީ ގޮސް ހުއްޓިލިއެވެ. ވާހަކަ ދައްކަމުން އައި ޖައިޝްގެ ފިޔަވަޅުތައް މަޑުޖެހުނީ އޮފީސްބައިން ނިކުމެގެން ގޮސް ކުލާސްރޫމު ތަކާއި ދިމާއަށް ދިޔަ އަންހެން ކުއްޖާފެނިފައެވެ.

“ޖޭޒް އަށް ހީވަނީ އެއީ މިއަދު ޖޮއިން ކުރި ގަމާރެއް ހެން. ހިނި އަންނަ ފާޑެއްދޯ ޖަހަނީ” ފަރި ގޮތަކަށް ޖައިޝްގެ ކަސްރަތީ މުލައްދަނޑީގައި އަތް އަޅުވާލަމުން ޖަޒްލީ ބުނެލިއެވެ. ޖަޒްލީގެ އުނަގަނޑުގައި އަތް އަޅުވާލަމުން ޖައިޝް ހީލިއެވެ.

އިއްތިފާޤަކުން ނަމަވެސް އަރޫނީ އާއި އެއްކުލާހެއްގައި އިންނަން ޖެހުމަކީ ޖައިޝްއަށް ކެތް ކުރެވޭ ކަމަކަށް ނުވިއެވެ. ހާދަ ވަރުގަދަ ކުއްޖާ ގަނޑެކެވެ.ދެން އެސައިންމެންޓްތައް ވެސް ހަދައިދޭޖެހޭނީ އޭނާއަށް ކަންނޭގެއެވެ. ނޫނެކެވެ. އަރޫނީ ޖެހޭނީ ދާށެވެ. އެގެއިންވެސް ކޮލެޖުންވެސް އޭނާ އަރޫނީ ފައްސާލާނެއެވެ. އޭނާ އާއެއްފެން ވަރަކަށް އަރޫނީ ކަހަލަ އާދައިގެ ކުއްޖަކަށް އާދެވޭނީ ކިހިނެއް ހެއްޔެވެ؟

އަޑުގައި އޮތްހާތަނަކަށް ލެކްޗަރު ދެމުންދިޔަ މާނިޝް އިރު އިރު ކޮޅާއި އަރޫނީއަށް ބަލާލައެވެ. އެބަލާލުން ފާހަގަ ވެގެން ބައެއްކުދިން އެނބުރިފައިވެސް އަރޫނީއަށް ބަލާލައެވެ. ނަމަވެސް ނޯޓުފޮތެއްތެރެއިން އެއްޗެއްހޯދުމަށް އަވަދިނެތި އުޅެމުން ދިޔަ އަރޫނީ އަށް މިކަން ރޭކާލާހެނެއްވެސް ހިޔެއްނުވެއެވެ. ކުއްލިޔަކަށް މާނިޝް އަތްމަޅާލާފައި މާކަރުގެ ދޯރިއެއްލީ އަރޫނީގެ ނިތްކުރިއާ ދިމާއަށެވެ.

ހުރިހާކުދިން ހައިރާންވެ އަނގަ ހުޅުވުނު ނަމަވެސް މާނިޝް އަށް ޖެހި ލެވުނީ ފަހަތަށެވެ. ލޮލާއި ދެތިން އިންޗި ދުރުމުނިގައި ދޯރި ހިފާއްޓާލައިގެން އިން އަރުނީ އިނީ މާނިޝް އަށް ބަލަހަށްޓައިގެނެވެ.

“ނައިސް ކެޗް! ބޮޑީ ގާރޑް ގަ ސަލްމާންޚާން ހެން.” އަރޫނީ އާއި ޖެހިގެން އިން އިމްޝާ ބުނެލިއެވެ.

އަތުގައި އޮތް ދޯރި ޓީޗަރުގެ މޭޒުމަތީގައި ބޭއްވިއިރު އަރުނީގެ މޫނު މަތީގައި ވަނީ ހަމަޖެހުމުގެ ކުލަވަރެވެ. ކަމެއްވީ ހެންވެސް ހީނުވެއެވެ. އާނގަމަވެފައި ބަލަން ހުރެވުނީ މާނިޝްއަށެވެ.

“ހޭއި އައިލެންޑް މައުސް! މަށަށް ބޮޑީގާރޑެއް ހޯދަންއެބަ. އެޖޮބަށް އަންނަންވީނުން. ރަނގަޅު މުސާރައެއްވެސް ދޭނަން. ” ކެންޓިނުގައި ކާންތިބި ޖަޒްލީމެނަށް އަރޫނީ ފެނުމާއި އެކު މަލާމާތް ކޮއްލިއެވެ.

” ތެދެއް. އޭރުން މާމަގެ ހެދުންތައް ލާކަށްވެސް ނުޖެހޭނެއްނު.” އަމާނީގެ ޖުމްލައާއި އެންމެން އަޑުގެ ކޮޅަށް ހީގަތެވެ.

“އަސްލުތަ؟ ” ހީހީތިބި ޖަޒްލީމެންގާތަށް ހުއްޓެމުން އަރޫނީ އަހާލީ ޝައުޤުވެރި ރާގެއްގައެވެ. ޖައިޝް އަނގަޔަށް ނުބައިވައްތަރެއް ޖައްސާލިއިރު ދެންތިބިކުދިން ދެލޯބޮޑުކޮށްލަމުން އެކަކު އަނެކަކަށް ބަލައިލިއެވެ.

“ގަމާރު ކަމުގެ އިންތިހާ! މީހަކު މަލާމަތް ކުރިޔަސް އެގެނީއެއްވެސް ނޫން.” ޖައިޝް ހިތާހިތުން އެތިވަރު ގޮވައިގަތް ނަމަވެސް އެންމެ ލަފްޒެއްވެސް ދުލާއި ހަމައަކަށް ނުގެނެއެވެ.

“ޖޭޒް އަށް ރަނގަޅު މުސާރައެއް ދެވޭނެތަ؟ މިހެން މި އެހީ، މީހާއަށް ބަލާލާފައިވެސް އެގޭވިއްޔަ އުނުއޮރިޔާން ނިވާކުރާނެ ފަދަ އެއްވެސް ނެތްކަން. ބޮޑިގާރޑަކީ އަދި މާފަހުގެ ކަމެއްތާ!” ޖަޒްލީގެ ބޮޑުބައެއްހާމަ ވެފައިވާ މޭމައްޗަށް ލޮލުން އިޝާރާތް ކޮށްލަމުން އަރޫނީ ބުނެލީ މަލާމާތުގެ ރާގަކަށެވެ. އެހެންކުދިން އަނގަމަތީ އަތްއަޅާލެވުނެވެ. ޖަޒްލީ ރުޅިއައިސްގެން ރަތްވެގެން އުކައިގަތް ހޫނު ކޮފީތަށިން ހުށިޔާރުކަމާއެކު ރެކެމުން އަރުނީ ހިނގައިގަތެވެ. ލާނެއްހިންނެއްއައިސްފަހި ހުރި ޖައިޝް ފެނުމާއި އެކު އެ ރުޅިވެރި އަލިފާންގަނޑަށް ހީވީ ޕެޓްރޯލް އެޅިހެނެވެ. އަތުން ޖަހާ މޭޒުމަތި ހުރި ހެދިކާތަށް ބުރުވާލި އެވެ. އަދި ބާރުބާރަށް އަތުން މޭޒުގައި ޖެހިއެވެ.

“ބޭބީ ހަމަ ޖެހިބަ! ތިއޮއްލޯބި މޫނު ހަޑިވަނީ އޭ ތިހެން ހުރީމަ!” މަސްލަހަތަށް ބަލާފައި ޖައިޝް ވަގުތުން ފިޔަވަޅުއެޅިއެވެ.  ސްވިޗަކަށް ފިތާލިހެން ޖަޒްލީގެ ރުޅިގަނޑު ފިނިވިއެވެ.ވާނީވެސް އެހެންތާއެވެ. ރައްޓެހިވެގެން ތިންމަސްވީއިރުވެސް ޖައިޝް އޭނާ އާ މިހާލޯބިން މުޚާތަބު ކޮށްފައެއްނުވެއެވެ. އޭނާ ޖައިޝް އާހެދި ފިދާވާއިރުވެސް މާބޮޑަކަށް އޭނާއާ ހެދިއެއް ނޫޅެއެވެ.

“ހިނގާދާން!” ޖަޒްލީގެ އުނަގަނޑުގައި ހިފާ ގަޔާ ފިއްތާލަމުން ޖައިޝް ބުނެލިއެވެ. ޖަޒްލީއަށްހީވީ ދުނިޔޭގެ ހުރިހާ އުފަލެއް ކުއްލިޔަކަށް އޭނާގެ އުންގަށް ބަންޑުންވީހެނެވެ. ހުރިހާދަތްތަކެއް ފެންނަވަރަށް ހީލަމުން ޖަޒްލީ ތުއިވެލިއެވެ.

“އޯ! އައިލެންޑް މައުސް! ޔޫޑިޑް އަ ފޭވަރ އެކްޗުއެލީ” ޖަޒްލީ ހިތާހިތުން ކިޔާލިއެވެ.

“ދޮންބޭ!” ސޯފާގައި ޚިޔާލަކަށް ގެއްލިފައި އޮތް ޖައިޝް ސިއްސައިގެންދިޔައީ ޖީނާއައިސް ގައިމައްޗަށް ޖެހިގަތުމުންނެވެ. 15 އަހަރު ވިއިރުވެސް ޖީނާ އުޅެނީ ކުޑަކުއްޖެއްހެނެވެ.

“ކޯޗެއް ވިސްނަނީ” ބޯއަރި ކޮއްލަމުން ޖައިޝް މޫނަށް ޖީނާ ބަލާލިއެވެ.

” ދޭބަ ދުއްވާލަންދާން ރެޑީވެލަން” ޖީނާގެ ބޮލުގައި ތުންފަތް ޖައްސާލާފައި ޖައިޝް ލޯތްބާއެކު ބުނެލިއެވެ. ބޯހަމަޖައްސާލުމަށް ޖައިޝް ކުރާކަމަކީ އެއެވެ. ލޯބިވާކޮއްކޮ ގޮވައިގެން ބުރުޖަހާލަން ދިޔުމެވެ. ކޮއްކޮގެ މަޖާ ވާހަކަ ތައް އަޑުއެހުމެވެ. މަންމަ ނެތްތަން ފޫބައްދައިދިނުމަށްޓަކައި ކޮއްކޮއާ އެކު ގިނަވަގުތު ހޭދަކުރުމަށް އޭނާ އަބަދުވެސް އިސްކަންދެއެވެ.
“މިދަނީ ދޮންބެއާ ދެކުދިން ދުއްވާލަން.” ދެބެންނަށް ނިކުމެވުނީ ބައްޕަގެ ކުރިމައްޗަށެވެ.

“ދެން އަރޫނީ އޯ؟ އެމަންޖެވެސް ގޮވައިގެންދޭ! އެކަނިވީމަ ކިހާފޫހިވާނެ.” ޖީނާގެ މޫނުކޮޅު ވަގުތުން ފުއްޕާލިއެވެ. ތުންކޮޅުދަމާލިއިރު އެތެރެއިން އަނދައިގަތީ ތިޔަހެންނެއްނޫނެވެ. ޖައިޝްވެސް ހިތްހަމަ ނުޖެހިފައި ދަތްދޮޅީގައި ފިރުމާލިއެވެ.

“ދަރިފުޅާ! ކުދިންނާ ގުޅުނީމައޭ އެކުދިންގެ ގޮތްވެސް އެނގޭނީ!”މަންސޫރު އެތައް ވާހަކައެއް ދައްކައިގެން، ލޯބިން އެކުދިންނަށް ވިސްނައިދެވޭތޯ މަސައްކަތް ކުރިއެވެ.

ބާރަށް ދުއްވާފައި ދިޔަ ކާރުގެ ފަހަތުސީޓުގައި އަރޫނީ އިނީ ބޭރު ބަލާށެވެ. އެދެބެން އަމިއްލަވާހަކައެއްގައި ތިބީ އަރޫނީ އިންކަމަށްވެސް ހަދާނުލައެވެ. އެކުދިންގެ ބައްޕަގެ އެދުން ބޮލާލައި ނުޖަހަންވެގެން އޭނަ ގެނައީ ކަން އެކުދިންގެ އަމަލް ތަކުން ކިތަންމެ ރަނގަޅަކަށްވެސް އެބަ ސާފުވެއެވެ. ޖައިޝް އިރުއިރުކޮޅާ ލޯގަނޑުން އޭނާއަށް ބަލާ ކަމެއް އަރޫނީ ނުދެނަހުއްޓެވެ.

“ކޮއްކޮއާއެކު ހޭދަކުރާ ،އުފާވެރި ވަގުތުކޮޅުވެސް މިއަންހެނާ ފޭރިގަތީ ހެއްޔެވެ؟ ވަރެއްގެ ކުއްޖާ ގަނޑެކެވެ. އަދި މާނޫން ކަމަށް ހެދިގެން އެބަ އިނެއްނޫހެއްޔެވެ؟ ” ކުއްލިޔަކަށް ހިތައް އެރި އެއްޗަކުން ޖައިޝްއަށް ހުންގާނަށް ބާރުކޮށްލެވުނެވެ. ދެދަތްޕިލަ ޖައްސާ ބާރުކޮށްލިރު ދެލޯވަނީ ވައްވެފައެވެ.