ހިތުގެ ރިހުން

ކަނު އަނދިރީގެ ތެރޭގައި އަހަރެން މިހުރީ ކީއްވެ ހެއްޔެވެ؟ މިގޮތަށް މިކަން ވާންޖެހުނީ ކީއްވެ ހެއްޔެވެ؟ އަހަރެންގެ ޙަޔާތްވެސް އަނދިރިވެފައި މިވަނީ މިކަނު އަނދިރިގަނޑު ފަދައިންނެވެ. ލޮލުން ހުއްޓުމެއްނެތި ކަރުނަތައް ނީރަމުން ދެއެވެ. އަހަރެންގެ ހިތަކީ ހަރު ހިލަގަނޑެއް ހެއްޔެވެ؟ އަހަންނަކީ ކާކު ހެއްޔެވެ؟  މިއަށްވުރެ މަރުވުންވެސް މާރަނގަޅެވެ.
ފާހަނާތެރޭގައި ބޮކި ނިއްވާލައިގެން އަހަރެން މިހުރީ އަލިކަން ނުދެކުމަށް ހިތު އަޅައިގެންނެވެ. ފާހަނާގެ ފެންލައިޓުން އާރޓިފިޝަލް އަލި އެތެރެއަށް އެޅެމުން ދިޔުމުން އަހަންނަށް އުނދަގޫވިއެވެ. ދެލޮލުން ކަރުނަ ފޮހެލުމަށްފަހު، ފާހަނައިން ނިކުތީމެވެ. މަޑުމަޑުން ހިނގާފައިގޮސް ބަދިގޭގައި އޮތް ކަތިވަޅި ނެގީމެވެ.
“އޭތް، ކަލޭ މިތާ ކީއްތިކުރަނީ؟ ދާން އުޅޭ ކޮޓަރިއަށް. އަދި ހަނދާންކުރާތި! މިރޭވެސް ކަލޭގެ ކޮޓަރިއަށް އަހަރެން އަންނާނަން. ތައްޔާރުގަ އޮންނާތި.” ސިއްސައިގެންދިޔައީ ދޮންބައްޕަގެ އަޑު އިވުމުންނެވެ. އަވަސްއަވަހަށް ކަތިވަޅި އޮތްތާ ބޭއްވުމަށްފަހު، އަހަރެން އެނބުރި ކޮޓަރިއަށް ވަނީމެވެ.
މިހިތުގައި އަޅާ ވޭން ކިޔައިދޭނީ ކާކަށް ހެއްޔެވެ؟ ހިނދަކަށްފަހު، ހިނދެއް ފާއިތުވަމުންދާ ވަރަކަށް ރިހުން ވަނީ އިތުރެވެ. އަހަރެން ހިތުއަޅައިގެން މިހުރީ އަމިއްލައަށް މަރުވާށެވެ. އެހެންކަމުން، އެނދުމަތީގައި އޮތް ފޯނު ނަގާ، ބަސްމާއަށް ގުޅީމެވެ. އެއީ ކްލާހުގެ ކުއްޖެކެވެ. މާ ގާތް ނުވިއަސް، އިތުބާރު ނުކުރެވުނު ކަމުގައިވިޔަސް، ކޮންމެވެސް މީހަކަށް މިޚަބަރު ދޭން ބޭނުންވުމުންނެވެ.
“ހަލޯ.” ދެފަހަރަކު ރިންގުވުމަށްފަހު، އޭނާ ފަރުވާކުޑަ ގޮތަކަށް ބުނެލިއެވެ.
“އަހަރެން މިއުޅެނީ ދަންޖެހެން.” އަހަރެން، ހިތާމައާއި ރުޅީގެ ރާގެއްގައި ބުނީމެވެ.
“ކީކޭ؟؟ ދަންޖެހޭށޭ! އަސްލުވެސްތަ؟ ދެން ސަމާސާ ނުކޮށްބަލަ.” ބަސްމާ ހައިރާންވެފައި ބުންޏެވެ.
“އާނ! އަހަރެން ސަމާސާއެއް ނުކުރަން. ބޭކާރު ވާހަކައެއް ދައްކާކަށް ނޫން މިގުޅީކީ. އެހެންނޫނަސް ތިކަހަލަ މީހުންނާ ސަމާސާކުރާ ހިތެއް އަހަންނެއް ނުވޭ. މިދުނިޔޭގަ އަހަންނަށް އަޅާލާނެ އެކަކުވެސް ނެތީމަ އަހަރެން ނޫޅެން މިދުނިޔޭގަ އުޅޭކަށް.” މޮޔައެއް ފަދައިން އަހަރެން ވާހަކަދެއްކީމެވެ.
“ދެން އެކަމަކުވާ! ތީ ކިހާބޮޑު ފާފައެއްތަ؟ ގޮތް ހުހެއް ނުވާނެ. ކޮންމެވެސް ގޮތެއް އޮންނާނެ. ކިޔައިދީބަލަ ވީގޮތެއް.” ބަސްމާ ޗޮކެއް ކަނޑާލިއެވެ.
“އަހަރެންގެ ދޮންބައްޕަ، އަހަންނަށް ޖިންސީގޯނާ ކުރަނީ..” އެހިސާބަށް ބުނެފައި އަހަންނަށް ރޮވުނެވެ.
“ކީކޭ؟ އަހަރެން ފުލުހުންނަށް ރިޕޯޓުކުރާނަން. އޭރުވެސް ހީވިއޭ ތީނަ ދޮންބައްޕައަކީ ރަނގަޅު މީހެއް ނޫނޭ. ބަލާބަލަ އޭނަ މޫނުގަ ލާފަ ހުންނަ މުދިތައް. އިހަށްދުވަހަކުވެސް މަގުމަތިން ދުށިން އެއްލެމުން އެއްލެމުން ދަނިކޮށް. ބޯންވެސް ބޮއެ ދޯ އޭނަ؟” ބަސްމާ އެއްސެވެ.
“އާނ. ދުނިޔެ ލެއްވި ހުރިހާ ފާފައެއް ކުރާނެ.” އަހަރެން ބުނީމެވެ.
“ހެކި ހޯދާ.” ބަސްމާ ބުންޏެވެ.
“ކިހިނެއް؟” އަހަރެން އެހީމެވެ.
“ކޮބާތަ މަންމަ؟ ވީޑިއޯ ކޮށްބަލަ މަންމަ ލައްވާ.” އޭނާ ބުންޏެވެ.
“އޯކޭ. އަހަރެން މިރޭ ހެކި ހޯދާނަން.”
“އާނ، ދެން ނަމަނަމަ ތިކަހަލަ މޮޔަކަމެއް ނުކުރާތި އަމިއްލައަށް މަރުވާން އުޅުން ކަހަލަ. ތީ ﷲ ވަރަށް ނުރުއްސަވާ ކަމެއް. ފުރާނައަކީ އެކަލާނގެ ދެއްވާ އެއްޗެއް. އަހަރެމެން ބޭނުންވީމަ އެނަގާލަން އަހަރެމެންނަކަށް ނޯންނާނެ އިޚްތިޔާރެއް. ކިހާ ދުވަހެއް ވެއްޖެތަ މިކަންތައް ހިނގާތާ؟” ބަސްމާ ބުންޏެވެ. އޭނާ ވާހަކަދެއްކީ ވަރަށް އޯގާތެރިކޮށެވެ. އެހެންވެ، އަހަރެންގެ ނިވެމުންދިޔަ އުންމީދުގެ ހުޅުކޮޅު އަލުން ރޯވާން އުޅޭ ކަމުގެ އިޙުސާސްވިއެވެ.
“ދެތިން މަސް.”
“ދެތިން މަހޭ! ދެން ކީއްވެތަ ނުބުނީ؟ މަންމައަކަށްވެސް ނޭނގެ؟” ބަސްމާ އެއްސެވެ.
“ނޫން އެނގޭނެ. އެކަމަކު ފިރިމީހާދެކެ ގަންނަ ބިރަކުން ކަންނޭނގެ އެވާހަކަ ނުދައްކަނީ. ދޮންބައްޕައާ އިނީ އޭނައާ ރައްޓެހިވިތާ ދެހަފްތާ ފަހުން. އޭނައާ ފުރަތަމަ އިން ދުވަސްކޮޅުގަ މަށަށް އަބަދު ފެންނަނީ މަންމަ ފާހަނައިން ނިކުންނަ އިރު ރޯތަން. ކިހިނެއްހޭ ވީ އެހީމަވެސް ބުނާނެ ކަމެއްނުވެއޭ. ވަރަށް ދެރަވޭ އެހެންވެ. މަންމަގެ ހަށިގަނޑުވެސް މުޅިން ހިކި އަނަރޫފަވެއްޖެ.” އަހަރެން ވޭނީ ރިހުމެއް އެކުލެވިގެންވީ އަޑަކުން ކިޔައިދިނީމެވެ.
“ދެންވެސް ތިކަހަލަ ކަންތައް ވާއިރު އަޅާނުލާ ނުހުންނާތި. ކަމާބެހޭ ފަރާތަކަށް ރިޕޯޓުކުރާތި. އެހެންވީމަ އަހަރެން މަޑުކޮށްލާނަން ތިކޮޅުން ހެކި ހޯދަންދެން. ހަނދާންކޮށް މިރޭ ތިކަންތައް ނިންމާތި! ކަމެއް ގޯސްވަންޏާ މަށަށް ގުޅާ.” ބަސްމާ އެދުނެވެ.
“ޝުކުރިއްޔާ.” އަހަންނަށް ބުނެވުނީ މިހެންނެވެ. އެކޮޅުން ފޯނު ކަނޑާލިއެވެ.

އެނދުގައި މަޑުމަޑުން އޮށޯވެލީމެވެ. މިރޭ ކަންތައް ކުރާނެ ގޮތް ހިތަށް އަރުވާލީމެވެ.

މިއަދު، އަހަރެމެންގެ ޢާއިލާއަކީ ވަރަށް ހިތްހަމަޖެހިގެން ދިރިއުޅުން ވޭތުކުރާ ޢާއިލާއެކެވެ. މަންމަ އެހެންމީހަކާ އިނދެގެން މިހާރު، އަހަރެންގެ އަންހެން ކޮއްކޮއެއްވެސް ހުރެއެވެ. އެރެއަކީ ހަނދާނުން ފިލުވާލަން އުނދަގޫވި ރެއެކެވެ. ހެކި ހޯދުމަށް ދޮންބައްޕަ އެކަން ކުރި ވީޑިއޯ، މަންމަ ނެގީ އެނދުތަންދޮށުގައި ފިލާ އޮވެގެންނެވެ. އެރޭ ފަތިހު، ބަސްމާ ފުލުހުންނަށް ރިޕޯޓުކުރުމުން، ފުލުހުން އައިސް ދޮންބައްޕަ ހައްޔަރުކޮށްގެން ގެންދިޔައީއެވެ. އަހަރެން ހިތުގެ އެންމެ ފުންމިނުން ބަސްމާއަށް ޝުކުރު އަދާކުރަމެވެ.
މިއަހަރު އަހަރެން ސްކޫލް ނިމޭނެއެވެ. އަހަރެންގެ އެދުމަކީ ކަންތަކާ ކެރިގެން ކުރިމަތިލުމެވެ. އަމިއްލައަށް މަރުވުމަކީ ވަގުތީ މައްސަލައަކަށް ހޯދޭ ދާއިމީ ޙައްލެކެވެ. ދުނިޔޭގައި އުޅޭއިރު ގޮންޖެހުންތަކާ ކުރިމަތިވާނެއެވެ. އެހެނަސް، ހިތްވަރާއެކު އެކަންކަމާ ކުރިމަތިލުމަކީ ކޮންމެ މީހަކަށްވެސް ކުރެވިދާނެ ކަމެކެވެ.

ނޯޓް: މިއީ އެތަކެއް ޙަޤީޤީ ޙާދިޘާތަކެއްގެ މައްޗަށް ބިނާކޮށް ލިޔެފައިވާ ވާހަކައެކެވެ.