ޒީޝާ (ދެވަނަ ބައި)

“ދަރިފުޅާ ޒީޝާ ދޭބަލަ ފިހާހަރައަށް ގޮސް ހަވާދު ޕެކެޓެއް ގަނެގެން އަންނަން” ޒީޝާ ސިހުނީ ނާހިދާ ވާހަކަ ދެއްކުމުންނެވެ.

އިސްތަށިގަނޑު  ރީތި ކޮށްލުމަށްފަހު ޒީޝާ ފިހާރައަށް ދިޔައެވެ. “އޭ ޒީޝާ” ފިހާރަތެރެއަށް ވަންނަ އުޅުނު ޒީޝާ މަޑު ކޮށްލީ މީހަކު ގޮވާލުމުންނެވެ. އޭރު އޭނަ ހުރި ދިމާލަށް މީހަކު އަންނަތަން ފެނެއެވެ. “ޒައިން… ކޮންއިރަކު މާލެ އައިސްގެން ތިއުޅެނީ.. ހާދަ ތަފާާތޭ މިހާރު” ޒައިން އައިސް ޒީޝާގެ ކުރިމައްޗަށް ހުއްޓުމުން ހައިރާންވެފައިހުރެ ޒީޝާ ބުންޏެވެ. “ތަފާތުވާނުން. ދެއަހަރު މިވަނީ ދެމީހުން ދިމާނުވާތާ. މަންމަ ބަލިވެގެން ޑޮކްޓަރަށް ދައްކާލަން އައިސްގެން މިއުޅެނީ. ޒީ ކޯއްޗެއް ގަންނަން ފިހާރައަށް ތިއައީ” ޒައިން އަހާލިއެވެ. “މަންމަ ބުނެގެން ހަވާދު ޕެކެޓެއް ގަންނަން އައިސް. ޒޭންގެ މަންމައަށް ކިހިނެއްވީ” ދެމީހުން އެއްކޮށް ފިހާރައަށް ވަންނަމުން ޒީޝާ ސުވާލުކޮށްލިއެވެ. “މަންމަ މިފަހުން ކައްސާލައިގެން ވެއްޓުނީ. އެވެއްޓުނު ފަހުން އަބަދު އުޅެނީ ކަކުލުގަ ރިއްސާތީ. އިއްޔެ މާބޮޑަށް ގޯސްވެގެން އުޅުނީމަ ރޭގަ މާލެ އައީ.” ޒައިން ކިޔާދިނެވެ. “އެހެންތަ ؟.. މަންމައަށް ސަލާމް ބުނަައްޗޭ. ޒޭން ދެންދަނީ. ފަހުން އަދި ދިމާވާނެ” ސޭޓުއަށް ލާރިދައްކާފައި ފިހާރައިން ނިކުންނަމުން ޒީޝާ ބުނެލިއެވެ. “ޒީ ވާނެ މަންމަ ގާތަށް އަންނަން. ޒީގެ ނަމްބަރު ދީފަ ދާންވީނުން” ޒީޝާ ޒައިން އަށް ނަމްބަރ ދިނުމަށްފަހު ގެއަށް ދިޔައެވެ.

ޒީޝާ އާއި ޒައިން މީގެ ދެއަހަރު ކުރިން ދިމާވީ އޭލެވެލް ކިޔަވަން އުޅުނު ދުވަސްވަރު ސުކޫލުންނެވެ. އޭރު ޒީޝާ އުޅެނީ ގުރޭޑް އެގާރާގައެވެ. ޒައިން ޒީޝާއަށް ވުރެން އެއްއަހަރު ދޮށީ ނަމަވެސް ޒައިންވެސް އުޅުނީ އެގާރާގައެވެ. އެއީ ދިހަވަނަ ގުރޭޑްގައި ޒައިން ތަކުރާރުވުމުންނެވެ. ސުކޫލަށް އަބަދުވެސް ދެމީހުން ދަނީ އެކުގައެވެ. އިސްކޮޅުން ދިގު ޒައިން އަކީ އަންހެން ކުދިންގެ ހިތްތައް ކަތިލާފަދަ ރީތި ކަމެއް ލިބިފައިވާ ބައިމަތިފުޅާ ޒުވާނެކެވެ. އޭލެވެލް ނިމުމުން ޒައިން ބޭނުންވީ ރަށަށް ގޮސް ވަޒީފާއަކަށް ވަންނާށެވެ. ނަމަވެސް ޒީޝާ ބޭނުންވީ އިތުރަށް ކިޔަވާށެވެ. ޒައިން ރަށަށް ބަދަލުވީ ފަހުން ޒީޝާއާ ދިމާނުވެހުރެ މިއަދު ފުރަތަމަ ފަހަރަށް ދިމާވީއެވެ.

 ކޮލެޖް ބަންދު ދުވަހެއްކަމުން  ޒީޝާއިނީ ލެޕްޓޮޕް ހިފައިގެން ސޯފާގައި ފިލްމެއް ބަލާށެވެ.  އޭރު ނާހިދާވީ ޒާރާ ގޮވައިގެން ބޭރަށް ގޮސްފައެވެ. “އައްސަލާމް އަލައިކުމް” މީހަކު ސަލާމް ގޮވާލުމުން ރައްދުގައި ޒީޝާ ވަލައިކުމް ސަލާމް ބުނެލިއެވެ. ދޮރުމަތީގައި ހުރީ ޒައިންއެވެ. “ޒައިން މިގަޑީ.. ކިހިނެއްވީ؟” ޒައިން މިގަޑީގައި ގެއަށް އައުމުން ޒީޝާ ހާސްވިއެވެ. “އަޅޭ. ދެން އަހަންނަށް ޒީ ގާތަށް ވަކި ވަގުތެއްގަތަ އާދެވެން ޖެހެނީ” ޒައިން އެހެން ބުނީ ސީދާ ޒީޝާގެ ބޮޑު ދެލޮލަށް ބަލަހައްޓައިގެން ހުރެއެވެ. “އުހުން އެހެންނެއް ނުބަނަމޭނުން. މިބުނީ ގުޅާލިނަމަ އަންނަމުން.. ކޮޅަށް ނުހުރެ އިށީނދެބަލަ” އިށީންނަން ތަންދައްކަމުން ޒީޝާ ބުނެލިއެވެ. “ޒީ ހާދަ ހާސްވެފަ. އަނެއްކާ އަހަރެން އައިމަ ހިތްހަމަ ނުޖެހުނީތަ.. ފޯން ނިވިފަ އޮތީމަ ގުޅާނުލެވުނީ. ޒީ އެކަނިތަ؟ އެހެން މީހުން ކޮބާ؟ ” ޒީޝާ ނޫން އެއްވެސް މީހަކު ފެންނަން ނެތުމުން ޒައިން އަހާލިއެވެ. ބޮލުގެ އިޝާރަތުން އާއެކޭ ބުނެފައި ޒީޝާ ދިޔައީ ބަދިގެއާ ދިމާލަށެވެ. ޒީޝާގެ ފަހަތުން ޒައިން ވެސް ދިޔައެވެ. “ޒީ” ޒީޝާ އަތުގައި ހިފާލަމުން ޒައިން ގޮވާލިއެވެ. ޒައިންގެ އެއަމަލްތަކުގެ ސަބަބުން ޒީޝާ އިތުރަށް ހާސްވިއެވެ. “ޒޭން އަތުން ދޫކޮށްލަބަލަ. މީހަކު އައިސްދާނެ” ޒީޝާ ހުރީ ހިތްހަމަ ނުޖެހިފައެވެ. ޒީޝާ ޒައިން ދެކެނީ އެކުވެރިއެއްގެ ގޮތުގައެވެ. އަދި ޒައިންގެ ފަރާތުންވެސް ބޭނުމީ އެކުވެރިކަމެވެ. ސުކޫލުގައި އުޅުނުއިރު ޒައިން  ޒީޝާމެންގެއަށް އައިސް އުޅޭއިރުވެސް ޒީޝާ ހިތްހަމަ ނުޖެހޭ ފަދަ އެއްވެސް ކަމެއް ޒައިންގެ ފަރާތުން ފެނިފައެއް ނުވެއެވެ. އަދިވެސް ޒައިން ހުރީ ޒީޝާގެ އަތުގައި ހިފައްޓައިލަގެންނެވެ. (ނުނިމޭ).

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.