ލޯތަކަށް ކަރުނަ ގެނުވި2020

ހަވާއެރުވުމާއި ބޮޑެތި މިއުޒިކް ޝޯތަކާއެކު އުފަލުން ފޮޅޭހާލު 2020 ވަނަ އަހަރަށް ގިނަބަޔަކު ބިސްމިކިޔައި ފައިނެގިއެވެ. ނިމުނު 2020ވަނަ އަހަރަށްވުރެ ފެށޭ އާއަހަރަކީ ހުރިހާ ގޮތަކުންވެސް ކާމިޔާބު އަހަރަކަށް  ހެދުމަށެވެ.

ކޮންމެޔަކަސް 2020 ވަނަ އަހަރު ފެށިގެންދިޔައީ ރަނގަޅަށެވެ. އެހެނަސް އުއްމީދާއި އަޒުމާއެކު ފެށި އާއަހަރު ވަޔަށް ބުރައިގެން ދިޔައީ ކޮވިޑް-19ޔަށް ދިވެހިރާއްޖެއިން ފަތުރުވެރިޔަކު ފައްސިވެގެންދިޔަ ހިސާބުންނެވެ. ވާނުވާބުނެދޭން ތިބި ސިއްހީދާއިރާގެ ފަރާތްތަކުުުުން ކޮންމެ ދުވަހަކު އެތައް ފަހަރަކު ޓީވީތަކަށް އަރައި ޕުުުުުުުރެސް ކޮންފަރެންސުތައް ދިޔައީ ހުއްޓުމެއް ނެތި ބާއްވަމުންނެވެ.

ކޮންމެހެން މަޖުބޫރީ ހާލަތުގައި މެނުުވީ ބޭރަށް ނުދިޔުމަށް ރާއްޖޭގެ ކޮވިޑަށް ކަނޑައަޅާފައިވާ އެޗް އޯސީއިން ދިޔައީ އިލްތިމާސްކުރަމުންނެވެ. ކޮވިޑަށް ބިދޭސީން ފައްސިވަމުންދާ މިންވަރުު މަޑުުމަޑުން ދިޔައީ އިތުރުވަމުންނެވެ. އެހެނަސް ދިވެއްސަކު ކޮވިޑު ވައިރަހަށް ފައްސިވެފައި ނުވާތީ ދިވެހިންތިބީ  ހިންހަމަޖެހިގެންނެވެ.

އޭޕްރީލްމަހު ފަނަރަވީ ދުވަހު ދިވެހި އަންހެނަކު ފުރަތަމަ ފަހަރަށް ކޮވިޑަށް ފައްސިވިކަން އެޗްޕީއޭއިން ހާމަކުުރި ހިސާބުން ދިވެހިންގެ ހިތްތަކުުގައި ބިރުވެރިކަން ފެތުރިގެންދިޔައެވެ. ނަތީޖާއަކަށްވީ މާލެ ފުރަބަންދުު ކުރުމުގެ އިތުރުން މުޅި ރާއްޖެވެސް އެކީ ފުރަބަންދު ކުރުމެވެ. ރަމްޟާން މަހާއި ދިވެހިން ކުރިމަތިލީ ކޮވިޑްގެ ބިރުުވެރިކަމުގެ ތެރޭގައެވެ.

ގެއިން ބޭރަށް ދިޔުން މަނަލެވެ. ނަމާދަށް މިސްކިތައްދިޔުުން މަނަލެވެ. ރަށްޓެހިންނާއެކީ ބުރެއްޖެހުމުގެ ފުރުސަތެއްނެތެވެ. ގާތްތިމާގެ އައުލާދަކާއި ބައްދަލުކުރުމަކަށްވެސް ހުއްދައެއްނެތެވެ. ކޮވިޑާއެކު ސަރުކާރުގެ އިދާރާތަކާއި އަމިއްލަ ކުންފުނިތަކާއި ވިޔަފާރިތަކާއި ރިސޯޓްތަކުގައި ބޮޑު ތަޅުއެޅުނެވެ. ނަތީޖާއަކަށްވީ ދިވެހިންގެ ވަޒީފާތައް ގެއްލިގެންދިޔުމެވެ. ދިވެހިން ބިކަވުމެވެ.

އަނބިދަރިން ބިކަވީއެވެ. ކާނެ  އެއްޗެއްވެސް ލިބޭނެ ވަރެއް ގިނަދިވެހިންގެ ނެތެވެ. ސަރުކާރުން އެހީތެރިކަން ނުދިންނަމަ އެތަކެއް ދިވެހިންނެއް އުޅޭނެ ހާލެއް ބުނެދޭންވެސް ދައްޗެވެ. ކޮވިޑްގައި ފުރަތަމަ ދިވެއްސަކު ދުނިޔެ ދޫކުރި ޙަބަރުވެގެންދިޔައީ ރާއްޖޭގެ ރައްޔިތުންގެ ލޮލުން ކަރުނަ ހިލުވާލި ޙަބަރަކަށެވެ.

ކޮވިޑަށް ގިނަ އަދަދެއްގެ ދިވެހިންތަކެއް ފައްސިވަމުންދިޔައެވެ.  ކޮވިޑްފެސިލިޓީތަކަށް އެފަރާތްތައް ގެންގޮސް ފަރުވާދެވުނެވެ. ޑޮކުޓަރުންނާއި ނަރުހުން ދުވާލާއި ރޭގަނޑު ހުސްކުރަމުން ގެންދިޔައީ ކޮވިޑްގެ ބަލީގައިވީ ފަރާތްތަކަށް ފަރުވާކުރުމަށެވެ. ކޮވިޑް ޓެސްޓުކުރުމަށެވެ. ކޮވިޑް ޓެސްޓުތަކުގެ ނަތީޖާ ތަހުލީލު ކުރުމުގައެވެ.

އަހަރުގެ ނިމޭ ހިސާބަށް އައިއިރު މާތްﷲގެ ރަޙުމަތުން ކޮވިޑަށް ފައްސިވާ މިންވަރު ދިޔައީ ބޮޑުތަނުން ދަށަށެވެ. ނަތީޖާއެއްގެ ގޮތުން ބަންދުކުރި ގައުމުގެ ވައިގެބަނދަރު ހުޅުވާލިއެވެ. ރިސޯޓުތައްވެސް ވަކިމިންގަނޑުތަކެއް ކަނޑައަޅައި ހުޅުވަންފެށިއެވެ. ރަށްތަކައްވެސް ދެވުމުގެ ހުއްދަ ލިބިގެންދިޔައެވެ.

ވުމާއެކު ޖުމްލަކޮށް ނިމިގެން މިދިޔަ 2020 ވަނަ އަހަރަކީ  ދިވެހިރާއްޖެއަށާއި މުޅި ދުނިޔެއަށް ބަނަ އަހަރެކެވެ. ހިތާމައިގެ އަހަރެކެވެ. އެތަައްލޯބިވާ ފަރާތްތައް ވަކިވެގެން ދިޔައަހަރެކެވެ. އަހަރެމެންގެ ހިތުގައި ތަކުރާރުވާ ދުޢާއަކީ ފެށިގެން މިދިޔަ 2021 ވަނަ އަހަރަކީ ހުރިހާ ގޮތަކުންވެސް ކާމިޔާބު ފާގަތި އަހަރަކަށް ވުމެވެ. ޔާﷲ އަޅަމެންގެ މުޅި އިންސާނީ އުންމަތް ކޮވިޑްގެ ވަބާއިން މުއްތިކުރައްވާންދޭވެ. އާމީން