ކަޅު ފިނިފެންމާ… 17 ވަނަ ބައި (ފަހު ބައި)

“މަންމަ އެބައަންނަން މި ތަށިތައް ލާފަ! 1 މިނެޓް!” ސީމަ ތެދުވެ ހިނގައިގަތެވެ. ނަމަވެސް ތަށިމުށިމަތީހުރި ދަވަ ގަނޑަކަށް އޭނާގެ ފައި އެރުމާއެކު އޭނަ ކައްސާލައިގެން ނުވެއްޓުނީ ކިރިޔާއެވެ. ފާރުގައި އަތް އަޅުވާލަމުން ހަމަޖެހިލިއެވެ. ޓައިލްސް ތަކަށް ބަލައިލިއެވެ. އެވަގުތު ފާހާނާ ދިމާއަށް ގޮސްފައި ހުރި ލޮނދި ފަށަލަ އޭނާގެ ލޮލުގައި އަޅައިގަތެވެ.

ތަށިތަށް ބެހެއެއްޓުމަށްފަހު ސީމާ ގޮސް ފާހާނަ ހުޅުވާލީ މަޑުމަޑުންނެވެ. ކުޑަކުޑަކޮށް ހުޅުވާލުމަށްފަހު އެތެރެ ބަލައިލިއެވެ. އެވަގުތު ފެނުނު މަންޒަރަކުން އޭނާގެ ހިތް ނުހުއްޓުނީ ކިރިޔާއެވެ. ބަންޑުން ޖަހާފައިވާ ބާލިދީގެ ދަށުން ނުކުމެފައިވާ ބޯވާ ފައި މަޑުމަޑުން އެތެރެއަށް ވަންނަމުންދިޔައެވެ. ސީމާއަށް ފަހަތަށް ޖެހެވުނެވެ. ހިތް ތެޅެމުންދިޔައީ އިންތިހާއަށެވެ. ހަމަރަނގަޅަށްވެސް އޭނާ ބިރުގަތެވެ. އޭނާ ޖަޒްލާ ގޮވައިގެން އެކޮޓަރިން ނުކުތެވެ. ދެން އޮޅިގެންވެސް އޭނާ އެކޮޓަރިއަކަށް ނުވަންނާނެއެވެ.

ހަމަ އެވަގުތެވެ. ބާލިދީ ދަށުން މަޑުމަޑުން އޭތި ނުކުތެވެ. ސީމާ ލެއްޕި ފާހާނައިގެ ދޮރު އޭއިރު ހުރީ ހުޅުވިފައެވެ. އޭތި ބަރުހެލި ދުވުމުގައި ދެމެމުން ކޮޓަރިތެރެއަށް ނުކުތެވެ. އަދި ދެމެމުން ގޮސް އަލަމާރީގެ ދަށުގައިވާ ހަނި ދޭތެރެއަށް އެއްވެސް ދަތިކަމެއް ނެތި ވަދެގަތެވެ.

***

ޔައީޝްވެސް މިރުސް ކޮތަޅު ހިފައިގެން އައިސް ވަނީ އެވަގުތެވެ. ސީމާއާއި ޖަޒްލާ ސިޓިންރޫމުގައި ހާސްވެފައި ތިބުމުން ވެގެން އުޅޭގޮތް އޮޅުންފިލުވާލަން ބޭނުންވިއެވެ.

“ޔައީޝް! އެކޮޓަރީގައި ޖަޒްލާ އެކިޔާކަހަލަ އެއްޗެއް އެބޮތް!” ސީމާ ދެލޯ ބޮޑުކޮށްލާފައި ޔައީޝްގާތު ރޮއެ ގަތެވެ. ޔައީޝް ހައިރާންވިއެވެ. މަންމަވެސް ޖަޒްލާ ފަދައިން ނަފްސާނީ ބައްޔެއްޖެހުނީހެއްޔެވެ؟ ޔައީޝް އަދިވެސް ހުރީ ވާނުވާ ނޭނގިފައެވެ. “ހަމަހުވާ ފާހާނަގަ އެބޮތް! މަންމަ ދެލޮލުން ދުށިން އޭތި!”

“މަންމަވެސް ދޯ! ހަމަޖެހިބަލަ! ތިވާނީ މަންމަ ބިރުގަނެފަ ހުރީމަ ހީވިގޮތަކަށް!” ޔައީޝް ކޮޓަރިއާ ދިމާއަށް ހިނގައިގަތުމުން ސީމާ ބިރުން ރޮއެ ގަތެވެ.

“ނޫން ނުދާތި އެތަނަށް!”

ޔައީޝް އަޅައިނުލާ ކޮޓަރިއަށް ވަދެގެންދިއުމުން ސީމާ ބަލަހައްޓައިގެން އިނީ ދެން ވާގޮތެއް ބަލާށެވެ. ޔައީޝް ފާހާނައަށް ވަނެވެ. އެބުނާ ބަލިދީއެއް ހިއްލައިގެން ބެލިއެވެ. އެތާކު އެކައްޗެއްވެސް ނެތެވެ. އޭނާގާތަށް އައީ ހިންޏެވެ. މަންމަވެސް ޖަޒްލާ ކިޔާއެއްޗެހި ގަބޫލުކޮށްގެން ބިރުން އެބައުޅޭވިއްޔާއެވެ.

“އެތާކު ނެތޭ އެކައްޗެއްވެސް!” ޔައީޝް ކޮޓަރިން ނުކުމެގެން އައިސް ސޯފަގައި އިށީނެވެ. “މަންމަވެސް މާބިރުންނޭ ތިއުޅެނީ!”

ސީމާ އިތުރަކަށް އެއްޗެއް ނުބުނެއެވެ. ނަމަވެސް މިގޭގައި ނުބައެއް އެބައުޅޭކަމަށް އޭނަގެ ހިތް ބުނަންފަށައިފިއެވެ. ކޮންމެވެސް ހާދިސާއެއް އޭނާއަށް ނޭނގި ހިގައިފިއެވެ. އޭނާ އެކަން ހޯދާނެއެވެ.

***

ގަޑިން ރޭގަނޑު 8 ގަޑި ބައި ވަނީއެވެ. ޖަޒްލާ އިނީ ޓީވީ ބަލާށެވެ. ޓީވީއިން އަންނަމުން ދިޔައީ ހިންދީ ސީރީޒްއެކެވެ. ކަޅި ޖަހާނުލާ ޖަޒްލާ ޓީވީއަށް ބަލަން އިންގޮތުން ހީވަނީ ޑްރާމާގެ އެންމެ ސީނެއްވެސް ވައްޓާލަން ބޭނުންނުވާހެންނެވެ. ޔައީޝްވެސް ކައިރީގައި އިނެވެ. ސީމާ އެއިރު ގެއަކު ނެތެވެ. އޭނާ ވީތަނެއްވެސް ޔައީޝް އަކަށް ނޭނގެއެވެ.

***

ހާމައަށް ހުޅުވާލާފައިވާ ކުޑަ ދޮރުން މަޑުމަޑު ވައި ރޯޅިއެއް ވަދެގެން ދިޔައެވެ. ގޮނޑިއެއް ގައި އިށީނދެލައިގެން އިން އަލިފުޅުގެ ދިގުވެ ނުރަވެފައިވާ ތުނބުޅި ވަޔާ ވިހުރިގެންދިޔައެވެ. ދެލޯ މަރާލައިގެން ތުންތަޅުވަމުންދިޔަ އަލިފުޅު މަޑުމަޑުން ދެލޯ ހުޅުވާލިއެވެ. އަތުގައި އޮތް ތަސްބީހަ ފަތި މޭޒުމަތީ ބޭއްވުމަށްފަހު އޭނާ ގޮސް ހުއްޓިލީ ކުޑަދޮރު ކައިރީގައެވެ. އެއްވެސް ތަރުތީބެއްނެތި އުޑުމައްޗަށް އުކާލެވިފައިވާ ތަރިތަކަށް އޭނާ ނަޒަރު ހިންގާލިއެވެ. އޭނާގެ ސާފު ދޮން މޫނުން ފެނިގެން ދިޔައީ ސީރިއަސް ކުލަވަރެކެވެ.

“އައްސަލާމްއަލައިކުމް!” މީހަކު ސަލާން ގޮވާލިއަޑަށް އަލިފުޅު ބަލައިލިއެވެ. އެއިރު ދޮރުމަތީ ހުރީ ސީމާއެވެ.

“ވާލެއަކުމް ސަލާމް ވަރަޙްމަތުއްﷲ ވަބަރަކާތް!” އަލިފުޅު ސަލާމް ބަލައިގަތީ އޭގެ އެންމެ ފުރިހަމައަށެވެ. އޭނަ އަތުން ގޮނޑިއަށް އިޝާރާތްކޮށް އިށީނުމަށް ދައުވަތު ދިނެވެ. “ކީއްކުރާ ކުއްޖެއް؟”

“ވަރަށް ބޮޑު ކަމެއް ކޮށްދޭން ވެއްޖެ!” ސީމާ އައިސް އަލިފުޅު ކުރިމަތީހުރި ގޮނޑީގައި އިށީނެވެ. އުމުރުން ދުވަސްވެފައިވާ އަލިފުޅަކީ ފަނޑިތަ ހެދުމުގައި ވަރަށް ކުރީގައި އުޅޭ މީހެކެވެ. ފާލުބެލުމާއި ސިހުރު ބާތިލް ކުރުމާއި ޖިންނި ޝައިޠާނުން ނައްތާލުމުގެ ބާރު އޭނާގެ އަތުގައި އޮވެއެވެ.

“ގޭތެރެއިން ފާޑެއްގެ އެއްޗެއް ފެންނާތީ މިއުޅެނީ!” ސީމާ ސުރުހީ އަޅާލިއެވެ.

“ކޮންކަހަލަ އެއްޗެއް؟” އަލިފުޅުގެ ދުވަސްވީ ދެލޮލުން ފެންނަނީ އޭނާގެ ތަޖުރިބާއެވެ.

“ފާޑެއްގެ ބޯވާއެއް ވައްތަރު އެއްޗެއް! ފުރަތަމަ އޭތި ފެނުނީ އަހަރެންގެ ދަރިފުޅުގެ އަންހެނުންނަށް! އޭނާވެސް މިހާރު އިނީ ފާޑަކަށް ސަކަރާތްވެފަ!” ސީމާ އޭނާގެ އިނގިލަތަކާކުޅެމުންދިޔައެވެ. އެއިރުވެސް ސިކުނޑިއަށް ސިފަވަމުންދިޔައީ އެ މަހުލޫގެއެވެ.

އަލިފުޅުގެ މޫނުމަތިން ފެނުނީ ހައިރާންކަމެވެ. ކުޑަކޮށް ލޯ ބޮޑުކޮށްލިއެވެ. ވިސްނަންފެށުމާއެކު އެ ތަނަވަސް ނިތްކުރިން ދަތިކިތަށް ފަޅުވާން ފެށިއެވެ.

“ދަރިފުޅު ކުރިން އެހެން އެއްވެސް މީހަކާ އިންތަ؟” އަލިފުޅު މި ސުވާލު ކޮށްލިއިރު އޭގެ ޖަވާބު އޭނާއަށް އެނގޭފަދައެވެ.

“އާނ! ޝައިމާ! އޭނަ ބަނޑުބޮޑުވެފައި ހުއްޓާ ވީ މަރުވެފަ!” ސީމާގެ މިޖަވާބު އިވުމާއެކު އަލިފުޅުގެ ހިތުގައި ހިނގައިގަތް ޝައްކު ޔަގީނަށް ބަދަލުވިއެވެ.

“ދަރިފުޅުގެ މިހާރުގެ އަންހެނުން ދަރިފުޅުދެކެ ވަރަށް ލޯބިވާކަން އެނގޭތަ؟”

“އަނ! ޖަޒްލާ ޔައީޝްދެކެ ވަރަށް ލޯބިވާނެ!” ސީމާ ޖަވާބުދެމުންދިޔައެވެ.

އަލިފުޅު ތެދުވެގެން ގޮސް އޭނާގެ ކޮޓަރިއަށް ވަނެވެ. އަދި ކުޑަ ލަކުޑީ ފޮއްޓެއް ހިފައިގެން އައިސް އިށީނެވެ. ފޮށީ ހުޅުވާލިއެވެ. އޭގެ ތެރޭގައި ވަނީ ފަނޑިތަ ހަދާ، ފާލުބަލަން ބޭނުންކުރާ ސާމާނުތަކެވެ.

“ދަރިފުޅުގެ އަންހެނުންގެ މައުލޫމާތު ބޭނުންވަނެ!” އަލިފުޅު ބުންޏެވެ. ސީމާ އޭނާއަށް އެނގޭ އެއްޗެހި ކިޔައިދެމުންދިޔައެވެ. ޖަޒްލާގެ އިތުރުން ޔައީޝްއާއި ޝައިމާގެ މައުލޫމާތުވެސް އަލިފުޅު އޮޅުންފިލުވިއެވެ.

ހުރިހާ މައުލޫމާތެއް ހޯދުމަށްފަހު އަލިފުޅު ދުންދަނޑިއެއް ރޯކޮށްލިއެވެ. ދެ ލޯ މަރާލަމުން ތުންތަޅުވަން ފެށިއެވެ.

ސީމާ ނުކުމެލީ ބޭރަށެވެ. ހަމަހިމޭން ރޭގަނޑުގެ ވަގުތަށްވުމުން މަގުތަށްވަނީ ފަޅުވެފައެވެ. އުޑުގައި އެތައްހާސް ތަރިތަށް ވިދާ ބަބުޅަމުންދިޔައިރު ހީވަނީ ކަޅު ފޮތިގަނޑެއްގެ މައްޗަށް ކުދި ވިދާ ޖަވާހިރު ތަކެއް އުކާލަފައި ވާހެންނެވެ.

ބައިގަޑިއިރު ފަހުން އަލިފުޅު ސީމާއަށް ގޮވާލިއެވެ. ސީމާ އެތެރެއަށް ވަނެވެ.

“ކޮބާ ކިހިނެއްވަނީ؟” ސީމާ އަހާލީ ކެތްތެރިކަން ކުޑަ ގޮތަކަށެވެ.

“އަހަރެން ބޭނުން ޔައީޝްއާ ވާހަކަ ދައްކަން! ވެގެން އުޅޭގޮތް ބުނެވޭނީ އޭނަވެސް މިތާ ހުރެގެން!” އަލިފުޅު އެދުނީ ޔައީޝް ގެނެސްދިނުމަށެވެ.

***

ޔައީޝް ޖަޒްލާއާއެކު ޓީވީ ބަލަން އިންދާ ސީމަ ގެ ކޯލެއް އަންނަން ފެށިއެވެ. ޔައީޝް ފޯނުކަންފަތުގައި ޖައްސާލިއެވެ.

“ކީކޭ މަންމާ؟”

“ދަރިފުޅާ އާދެބަލަ ވަރަށްއަވަހަށް އަލިފުޅުގެ ގެއަށް!” ސީމާ ވާހަކަދެއްކީ އަވަސް އަވަހަށެވެ.

“އެ ކީއްކުރަން!؟” ޔައީޝް ހިތުގައި ސުވާލުއުފެދުނެވެ. އަލިފުޅުގެ ގެއަށް މީހަކު ދާނި ކީއްކުރަންކަން ޔައީޝްއަށް އެނގެއެވެ. މަންމަ އަނެއްކާ އަލިފުޅުލައްވާ ޖަޒްލާ ރަނގަޅުކުރަން ފަނޑިތަ ހަދުވަނީބާއެވެ؟

“ސުވާލުނުކޮށް އަވަހަށް އާދެބަލަ!” ސީމަ ފޯނު ކަނޑާލިއެވެ.

“ޖަޒޫ! އެބައަންނަން އިނގޭ ބޭރަށް ގޮސްލާފަ! ތާކަށް ނުދާތި އިނގޭ! ބަސްއަހައިގެން ޓީވީ ބަލަން އިނދޭ އިނގޭ!”  ޔައީޝް ކުޑަކުއްޖަކަށް ނަސޭހަތްދޭފަދައިން ޖަޒްލާއަށް ނަސޭހަތްދިނުމަށްފަހު ނުކުތެވެ. ބޭރުން ދޮރު ތަޅުލީ ޖަޒްލާ ބޭރަށް ނުކުމެދާނެތީއެވެ.

***

ޔައީޝްގެ އިންތިޒާރުގައި ދެކޮޅަށް ހިނގާލަ ހިނގާލަ ހުރި ސީމާއަށް ޔައީޝް އައިސް ވަންތަން ފެނުމުން އަވަސް އަވަހަށް ގޮނޑިއެއްގައި ބޭނދިއެވެ.

“ކިހިނެއްތަ ވެގެން މިއުޅެނީ؟” ޔައީޝްއަށް ވާނުވާ ނޭނގޭތީ ސުވާލު ކުރެވުނެވެ.

“ވާނުވާ އެނގޭނެ އިރުކޮޅަކުން!” ސީމާ ބުނެލިއެވެ.

“ޔައީޝް!” އަލިފުޅު މަޑުމަޑުން ބުނެލިއެވެ. “ޔައީޝްއަށް އެނގޭތަ ޔައީޝްގެ ކޮޓަރީގައި އެއްޗެއް އުޅޭކަމެއް؟”

“މަންމަމެން އެހެން އެބަ ކިޔާ! އެކަމު އެއީ އަސްލެއް ނޫން! އަހަރެންވެސް ފެނޭތޯ ބަލައިފިން!”

“ނުފެންނާނެ! ޔައިޝްއަކަށް ނުފެންނާނެ! އޭތި ފެންނާނީ އޭތި ފެންނަން ބޭނުންވި މީހަކަށް!” އަލިފުޅުގެ ވާހަކައިން ޔައީޝްގެ ދެ ބުމަ އަރައިގެން ދިޔައެވެ. “ޔައީޝްގެ ކޮޓަރީގައި ބޯވާއެއްގެ ސިފައިގަ އެއުޅެނީ ކާކުކަން އެނގޭތަ؟ އެއީ ޔައީޝްގެ ކުރީގެ އަނބިމީހާ ޝައިމާގެ ބަނޑުން ވިހޭ ދަރިއެއް!”

އަލިފުޅުދައްކަމުން ދިޔަ ވާހަކަ އަޑުއަހަން ސީމާއާއި ޔައީޝް ތިބީ ހައިރާންވެފައެވެ.

“މިހާރު ޔައީޝް ތި އިނދެގެން އުޅޭ ޖަޒްލާ ވަނީ ޝައިމާއާއި ޝައިމާގެ ދަރިފުޅު މަރާލަން ދޮންއަހުމަދު ލައްވާ ސިހުރު ހަދުވާފަ! އެ ސިހުރު ދޮންއަހުމަދު ހެދީ މުޅިން ރަނގަޅަކަށް ނޫން!”

އަލިފުޅު ފުންނޭވާއެއް ދޫކޮށްލިއެވެ.

“އަލިފުޅު އުޅުނީ ޝައިމާގެ ބަޑުތެރެއަށް އޭނާގެ ބާރުގެ ދަށުގައިވާ މަހުލޫގުންގެ ތެރެއިން މަހުލޫގެއް ވައްދާ ދަރިފުޅު ބަނޑުތެރޭ އޮއްވާ މަރާލަން! އަދި ޝައިމާވެސް ވޭން ދެނިވި ގޮތަކަށް މަރާލަން! ކުއްޖާ ވިހާވަގުތު އެ މަހުލޫގުވެސް ކުޑަކުއްޖާއައެކު ނުކުންނާނެ! ދޮން އަހުމަދު ރާވާފައިވާ ގޮތުން އެ މަހުލޫގުވެސް އެ ހިސާބުން މަރުވާނެ! އެކަމު އެސިހުރު ފުރިހަމަ ނުވުމުން އެ މަހުލޫގު މަރުވެގެންނެއް ނުދިޔަ! މިކަން ކުރަން އުޅުނީ އެ މަހުލޫގުގެވެސް ނުގަބޫލުގައި މަޖުބޫރުކޮށްގެންކަމުން އޭތި ޖަޒްލާގެ ކިބައިން ބަދަލު ހިފާނެ! ތި ކޮޓަރީގައި އޭތި އެ އުޅެނީ އެ ބޭނުމުގައި! މި ހުރިހާކަމެއް ކުރުމަށް ދޮންއަހުމަދު ބޭނުންކުރީ ކަޅުކުލައިގެ ފިނިފެންމަލެއް!”

ހަމައެވަގުތު ޝައިމާ ގެންގުޅުނު ކަޅު ފިނިފެންމާ ޔައީޝްގެ ސިކުނޑިއަށް ވެރިވެގެންދިޔައެވެ. ސީމާއަށްވެސް އެ ދުވަސް މަތިން ހަނދާންވިއެވެ. ހީވާ ގޮތުން އަދިވެސް އެ މަލުގެ ހިކިފައިވާ ތަނޑި ކޮޓަރީގެ ވާސްއެއްގައި އެބައިނެވެ.

ޔައީޝްއަށް އިނީ ބުނާނެ އެއްޗެއް ނޭނގިފައެވެ. ޖަޒްލާގެ ހުރި ނުބައިކަމާއި އޭނާ ކަންތައްކޮށްފައިވާ ގޮތް އެނގުމުން އަތް މުއްކެވިގެންދިޔައެވެ. ކޮންފަދަ ނުބައި އަންހެން ކުއްޖެއް ހެއްޔެވެ؟ ޔައީޝްގެ މުޅި ދިރިއުޅުން ހަލާކުކޮށްލުމަށްފަހު އެވަރުނުވެގެން ޔައީޝްގެ އަންބެއްގެ ގޮތުގައި އިންނަން އޭނާ ލަދު ނުގަތީތީ ޔައިޝް ހައިރާންވިއެވެ. އެ ރީތި ދެލޮލުން އަލިފާން ކަނި ބުރަމުންދިޔަ ގޮތުން ހީވަނީ ހަމަމިހާރުވެސް އެ ސުންޕާ ކުއްޖާ އަތުކޮޅަށް ނަގާ ހޫރާލަފާނެހެންނެވެ. ޝައިމާގެ ހަޔާތް ނަރަކައަކަށް ހަދާލުމަށްފަހު ޖަޒްލާއަށް އުފަލުގައި އުޅޭކަށް ލާހިކެއް ނޫނެވެ. މިހާރު އޭނާ ކުރިމަތުންލަމުން އެދަނީ އޭނާ ކުރި އަމަލުގެ ޖަޒާއާއެވެ. އޭނައަށް އެ ތަކުލީފުތަށް ހައްގެވެ. ވެގެންވަންޏާ ޔައީޝް މިހާރު ޖަޒްލާ މި ދުނިޔެއިންވެސް ނައްތާލައިފީހެވެ.

ސީމާވެސް އިނީ އަނގަ ހުޅުވުނުގޮތަށް ހުއްޓުން އަރާފައެވެ. އޭނާގެ ދަރިފުޅު މި ދެވުނީ ކޮންފަދަ ޝައިޠާނަކާހެއްޔެވެ؟ މީގެ ކުރިން އޭނާ އަޑުއަހަނީ ފިރިހެނުން އަންހެނުންގެ ހަޔާތަށް އުނދަގޫކުރާ ވާހަކައެވެ. ނަމަވެސް ޝައިމާގެ ދިރިއުޅުން ހަލާކުކޮށްލީ ހަމަ ޝައިމާ ކަހަލަ އަންހެން ކުއްޖެކެވެ. ޖަޒްލާއަށް އަންހެންކުއްޖެއްގެ އިހުސާސްތަށް ނޭނގެނީހެއްޔެވެ؟ އެހެން ނޫނަންމަ އަންހެން ކުއްޖަކަށް އެފަދަ ބޮޑު އަނިޔައެއް ދޭކަށް ނުކެރުނީހެވެ؟ ސީމާވެސް އިނީ ޖަޒްލާ ދެކެ އައިރުޅީގައި ވަގުތުން ގެއަށްގޮސް އެ ދައިތަ ގަނޑު ގެއިން ނެރެން ބޭނުންވެފައެވެ.

“އޭތި އަބަދުވެސް ބަލަމުންދާނީ ޖަޒްލާ ގޭގައި އެކަނި ވާ ވަގުތަކަށް!” އަލިފުޅު ނިތްކުރިމަތިން ދާ ފުހެލުމަށްފަހު ގޮނޑީގައި ހަމަޖެހިލިއެވެ.

ޔައީޝްއަށް ބަލާލެވުނީ ސީމާގެ މޫނަށެވެ. ސީމާގެ ވިސްނުމަށްވެސް އައިސްފައިވަނީ ހަމަ ޔައީޝްގެ ވިސްނުމުގައި ވާ އެއްޗެވެ. ޖަޒްލާ މިހާރު އިންނާނީ ގޭގައި އެކަންޏެވެ. ނުވިތާކަށް ގޭގެ ދޮރުވެސް ހުންނާނީ ތަޅުލާފައެވެ. ސަލާމަތްވާކަށް ދުވާނެ ތަނެއްވެސް ނުހުންނާނެއެވެ.

“އޭތި ނައްތައެއް ނުލެވޭނެތަ؟” ސީމާ އަހާލިއެވެ.

“އެއީ މާކަށް އުނދަގޫ ކަމެއް ނޫން! ހާސްވާން ޖެހެނީ އޭތި މީހަކަށް ހަމަލާ ދީފާނެ ކަމާމެދު! ގޭގައި ޖަޒްލާ މިވަގުތު އިންނާނީ އެކަނި ދޯ!” އަލިފުޅު އަހާލިއެވެ……..

***

ޓީވީއިން އަންނަމުންދިޔަ ސީރީޒް ނިމުމާއެކު ޖަޒްލާ ފޫހި ވާންފެށިއެވެ. ބޭރަށް ނުކުމެލަން ބަލަލިއިރު ދޮރު ހުރީ ތަޅުލާފައެވެ. އޭނާ ޗޮކެއް ކަނޑާލުމަށްފަހު ކޮޓަރިއަށް ވަންނަން ދިޔައީ އޭނާ ގެ ފޯނުބަލައެވެ. މަޑުމަޑުން ކޮޓަރީގެ ދޮރު ހުޅުވަލުމަށްފަހު އެތެރެ ބަލައިލިއެވެ. ބޮކި ހުރީ ނިއްވާލާފައެވެ. އަނެއްކާ އަނެއް ހަ ކަންތަކެވެ. ކޮޓަރިއަށް ވަދެގެން ނޫނީ ބޮކިވެސް ނުޖެއްސޭނެއެވެ. ބިރުން ހުރެގެންވެސް ލަސްފިޔަވަޅުތަކެއްގައި އޭނާ އެތެރެއަށް ވަނެވެ. މަޑުމަޑުން ފިޔަވަޅުތަށް އަޅަމުން ދަނިކޮށް ކުއްލިއަކަށް ލޮނދިގަނޑަކަށް އެރި ކަހާލައިފިއެވެ. ކޮންޓްރޯލުން ނައްޓާލައިގެން ގޮސް ތަށިމުށިތައްމައްޗަށް ޖެހިއްޖެއެވެ. ބޯ ޖެހުނުލެއް ބަރުކަމުން ކުޑަކޮށް އެނބުރުން އަރަމުންދިޔައެވެ. ފެން ލައިޓުން އެޅިފައިވާ ފަނޑު ހަނދުވަރުގެ އަލި ނޫނީ އެކޮޓަރިއަށް އެއްވެސް އަލިކަމެއް ވެރިވެފައެއް ނެތެވެ. ޖަޒްލާ ލޯ ހުޅުވާލީ އިރުކޮޅެއް ފަހުންނެވެ. ލޯ ވަނީ ކުޑަކޮށް ފުސްވެފައެވެ. ލޯ ހުޅުވަލުމާއެކު އޭނާގެ ލޮލުގައި ފުރަތަމަވެސް އަޅައިގަތީ ކައިރީގައި އިން ކުޑަކުޑަ ރަތް ދެ އަލިކޮޅެވެ. ފުސްކަމުން މާބޮޑަށް ފާހަގަނުވިއަސް އެއީ ކޯއްޗެއްކަން ޖަޒްލާއަށް އެނގިއްޖެއެވެ. ތެދުވަން މަސައްކަތް ކުރުމާއެކު އަނެއްކަވެސް އަތް ކައްސާލިއެވެ. އެ ދެ އަލިކޮޅު މަޑުމަޑުން ޖަޒްލާއާ ދިމާއަށް އަންނަންފެށިއެވެ. ޖަޒްލާ އަށް ކުރެވުނުހާވެސް ކަމަކީ ބިރުން އޮށޯވެ އޮވެ ފަހަތަށް ފިރުކުމެވެ.

***

އަލިފުޅު ލޯ މަރައިގެން އިނދެ ތުން ތަޅުވަމުންދިޔައެވެ. މުޅި ގޭތެރޭގައިވަނީ ދުން ދަނޑިހަރުކޮށްފައެވެ. ކުރިމަތީހުރީ އަލިފާން ގަނޑަށް އިރުއިރުކޮޅާ ކޮންމެވެސް ކަހަލަ ކުޑިތަކެއް އަޅަމުންދިޔައެވެ. އެއްއަތުގައި އޮތީ ތަސްބީހަ ފައްޗެވެ. އަނެއްއަތުން ކުޑިއަޅަމުންދިޔައިރު، އެ އަލިފާންގަނޑު ބޮޑުވަމުންދިޔައެވެ.

***

ސީމާއާއި ޔައީޝް ބާރުހިނގުމެއްގައި މިސްރާބު ޖަހާފައިވަނީ ގެއާދިމާއަށެވެ. ދެމީހުންގެ ހިތްވެސް ތެޅެމުން ދިޔައީ އިންތިހާއަށެވެ. މޫނުމަތިން ފެންނަނީ ކަންބޮޑުވުމުގެ އަސަރުތަކެވެ. ކުރިމަތި ލާން މިއުޅެނީ ކޮންފަދަ ހައިޖާނު ގަނޑަކާ ބައެވެ؟

***

ޖަޒްލާ ހަޅޭލަވަންފެށިއެވެ. އަޑު އިވޭނީ ކާކަށްހެއްޔެވެ؟ އެ ބޮޑު ގޭގައިވަނީ އޭނާ އެކަންޏެވެ. މިއީ އޭނާ އަމިއްލައަށް ލިބިގަތް އަޒާބެކެވެ. އެހެންމީހުންނަށް ދެރަދީފައި އަމިއްލައަށް އުފާހޯދަން އުޅުމުން ވާނީ ހަމަ މިކަހަލަ ގޮތެކެވެ. ތިމާ ފޭހުނު އިލޮށިގަނޑު ހެރޭނީ ހަމަ ތިމާގެ ލޮލަށެވެ. އެވަގުތު އޭނާ ޝައިމާގެ މައްޗަށް ކޮށްފައިވާ ބަދު ދުޢާތައް މަތިން ހަނދާންވިއެވެ. އެ މައުސޫމް ކުއްޖާގެ ދިރިއުޅުން ބަރުބާދު ކޮށްލީ ޖަޒްލާގެ މި ދެއަތުންނެވެ. ވީއިރު މި ސަޒާ އޭނާއަށް ހައްގެވެ.

ފަހަތަށްޖެހެމުންގޮސް ޖަޒްލާ ލައްވީ ފާރުގައެވެ. އެވަގުތު އެ މަހުލޫގު އައިސް ޖަޒްލާއާއި ދެ ފޫޓު ދުރުގައި މަޑުކޮށްލިއެވެ. ޖަޒްލާ ފުންކޮށް ނޭވައިލަމުންދިޔައީ ދެން ވާނެ ގޮތް ނޭނގޭ ހާލުގައެވެ. އެ ހަމަހިމޭން މާހައުލުން އިވޭ ހަމައެކަނި އަޑަކީ ޖަޒްލާ ލަމުންދިޔަ ފުންނޭވައިގެ އަޑެވެ. އޭނާގެ ހިތުގެ ތެޅުން ބާރުކަމުން ހީވަނީ އެހެން ކަމެއް ހެންނެވެ. އޭނާ އަޑެއްވެސް ލައްވާލަން ނުކެރިފައި އިނީ އެ މަހުލޫގު ދެން ކަންތައްކުރާނީ ކިހިނެއްކަމެއް ނޭނގޭތީއެވެ.

އެ މަހުލޫގު މަޑުމަޑުން ކުރުޖެހިލިއެވެ. އަދި ހުށިޔާރުވެލުމަށްފަހު ފުންމައިގެ އައިސް ތަތްވީ ޖަޒްލާގެ މޫނުމަތީގައެވެ……

***

އަލިފުޅު އަވަސް އަވަހަށް އަލިފާންގަނޑަށް ކުނޑިތަށް އަޅަމުން ކިޔަމުންދިޔަ އެއްޗެހިތައް ބާރު ކުރަމުންދިޔައެވެ. އޭނާ ވަނީ ދާ ހިއްލާ ފޯވެފައެވެ. މޫނުމަތިން ފެނިގެން ދިޔަ ހާސްވުމުގެ އަސަރު ކެނޑި ހަމަޖެހުމުގެ ނޭވާއެއް ލެވުނީ، ކުރިމަތީ ހުރި އަލިފާން ގަނޑު ކުޑަ ވާން ފެށުމުންނެވެ. އަލިފުޅު މަޑުމަޑުން ހަމަޖެހިލިއެވެ. ކުނޑި އެޅުން ހުއްޓާލުމަށްފަހު އަލިފާން ގަނޑަށް ކަޅި ހުއްޓާލައިގެން އިނެވެ. އެއިރު އެ އަލިފަން ގަނޑު އައީ ކަނި ވަމުންނެވެ.

***

ޖަޒްލާ ތެޅިފޮޅެން ފެށިއެވެ. އަތުން ދަވަގަނޑު ނެއްޓުވޭތޯ މަސައްކަތްކުރަމުންދިޔައެވެ. ނަމަވެސް އެ މަހުލޫގު އޭނާގެ މޫނުމަތީ ތަތްވެގަނެގެން އޮތީ މާ ބާރަށެވެ. އޭގެ ދިގު ފައިތައް ޖަޒްލާގެ ބޯ ފަށައިގެން އޮޅާލާފައިވެއެވެ.

 އެވަގުތު އޭތީގެ ލޮނދި ހަށިގަނޑުން މަޑުމަޑު ދުންއަރަށްފެށިއެވެ. އެ ދިހުންއަރާ ހަށިގަނޑުން އޮލަ ދިޔަތަކެއް ވިރިގެން ފައިބަންފެށިއެވެ. ގަނޑު ރަބަރު ގަނޑެއްގައި އަލިފާން ރޯކޮށްލުމުން ވިރިގެން ދާ ފަދައިންނެވެ.

ޖަޒްލާގެ ތެޅިތެޅި އޮތް ހަށިގަނޑުވެސް މައިތިރިވީ ހަމަ އެވަގުތެވެ. ހީވާގޮތުން އޭނާގެ ފުރާނަ އޭނާގެ ހަށިގަނޑާ ވަކިވެގެން ދިޔައީއެވެ.

މަހުލޫގުގެ ގެ ކުޑަ ހަށިގަނޑުން އަރަމުންދިޔަ ދުންތަށް އޮލަވާންފެށިއެވެ. އެ ދުންތަކާއެކު އޭތި އަޅިއަށްވެގެން ޖައްވުގެތެރެއަށް ވިހުރިގެން ދާންފެށިއެވެ. އިރުކޮޅެއްވީއިރު އެމަހުލޫގު ވައިގެތެރެއަށް ހުސްވެގެން ގޮސް ގެއްލުނެވެ.

***

ޔައީޝްއާއި ސީމާ ދުވަމުން ކަހަލަގޮތަކަށްއައިސް ގޭގެ ދޮރު ތަޅުދަނޑިން ހުޅުވާލިއެވެ. ގޭތެރޭގައި ރަސްކަން ކުރަނީ ހަމަހިމޭންކަމެވެ. ޔައީޝް ގޭގެ އެކިތަންތަނަށް ނަޒަރު ހިންގާލީ ޖަޒްލާ ކޮބައިތޯއެވެ. ފެންނަން ނެތުމުން އޭނާ ވީ ކޮޓަރީގައިކަން އެނގުނެވެ.

ނަމަވެސް ކޮޓަރީގެ ބޮކި ނިއްވާލަފައިވުމުން ޔައީޝްގެ ހިތުގައި ސުވާލު އުފެދުނެވެ. އޭނާ ކޮޓަރިއަށް ވަންއިރު ވެއްޓިފައި އޮތް ޖަޒްލާއެއް އޭނާއަކަށް ނުފެނެއެވެ. ކޮޓަރިތެރޭގައި ވަނީ އަނދިރިކަމެވެ. ބޮކި ދިއްލިގެން ދިޔަވަގުތު ފެނުނު މަންޒަރުން ސިމާ އޯކަށް ދަމައިގަތެވެ. ޔައީޝްއަށް އެނބުރިލެވުނީ އަނެއް ފަޅިއަށެވެ.

ޖަޒްލާގެ މޫނުގެ ސިފަ ވަކިވާވަރެއްނޫނެވެ. ދެލޯ ވަނީ ބޯލާފައެވެ. ތުންފަތުން ތަންގަނޑެއް އިރައިގެން ގޮސްފައިވާއިރު ދަތްޕިލަ އޮތީ ދިމާލަށެވެ. ނޭފަތުގެވެސް ފެންނަން އިނީ އެއްބައެވެ. ކޮލު ކަށިގަނޑުވެސް އޮތީ ފެންނާށެވެ.

********

ޔައީޝް ހުއްޓިލައިގެން ހުރީ ސަހަރާގައެވެ. އޭނާގެ ކުރިމަތީ ތަންކޮޅެއް އާ ކޮށްހުރީ، މިއަދު މަރުވި ޖަޒްލާގެ މަހާނަ ގަލެވެ.

އެއާޖެހިގެން ބިއްދޮށަށްހުރީ ޝައިމާއާއި އޭނާގެ ދަރިފުޅުގެ މަހާނަގަލެވެ. ޔައީޝްގެ ލޮލުން ކަރުނަ އައީ އެ މަހާނައަށް ނަޒަރު ހުއްޓާލި ހިސާބުންނެވެ. ޝައިމާ މަތިން އިންތިހާއަށް ހަނދާންވި ވަގުތު ޖަޒްލާގެ ނުބައިކަން މަތިން ހަނދަންވުމުން ރުޅިވެސް އައެވެ. ނަމަވެސް ކުރާނީ ވަކި ކީއްހެއްޔެވެ؟ އެ ދެމީހުންވެސް ވަކިވެގެން ދިޔައީ އެހާމެ ބިރުވެރި މަރަކުންނެވެ.

******************

ޔައީޝް ދެޖީބަށް އަތްޖަހާލައިގެން އަތިރިމަތީގެ ދޮންވެލިގަނޑުމަތީ ހިނގާލާފައި ދިޔައިރު އެ މޫނުމަތިންފެންނަމުން ދިޔައީ އެކަނި ވެރިކަމެވެ. އެ ދެލޮލުން ފެންނަމުންދިޔައީ ހުސްކަމެވެ. އޭނާގެ ހަޔާތުގެ ވާހަކައަކީ ނުހަނު ގިނަ ކުލަތަށް އެކުލެވޭ ވާހަކައެކެވެ. ލޯތްބާއި އަޅާލުމެވެ. އުފާވެރިކަމާއި ހިނިތުންވުމެވެ. ލޯބީގައި ހައްދުފަހަނަ އަޅާގޮސް ދިވާނާވުމެވެ. ހިތާމައާއި، ވަކިވެ ދިޔުމެވެ. ހަމައެހެންމެ ޒީލަގަދަކަމާއި އޮޅުވާލުމެވެ. ބިރުވެރިކަމާއި ސިހުމެވެ. މި ހުރިހާ ކުލަތައްއެކުވެގެން އައި ޔައީޝްގެ ހަޔާތް މިހާރު މިވަނީ ނިމުމަކަށް އައިސްފައެވެ.

ޔައީޝް އިށީންދެލީ ވެލިގަނޑުމަތީގައެވެ. ދެކަކޫމަތީ އުޅަނބުށި ވިއްދާލުމަށްފަހު ނަޒަރު ހުއްޓާލީ ވެލިގަނޑުމައްޗަށް ބީއްސަމުންދިޔަ މަޑުމައިތިރި ރާޅުތަކަށެވެ. ޝައިމާވެސް އޭނާގެ ހަޔާތަށް އައީ އެފަދައަކުންނެވެ. ލޯތްބާ އަޅާލުމަކީ ކޮބައިކަން ދަންނަ ހީވާގި އަތްބެކެވެ. އެފަދަ ދެވަނައެއް ނުވާ ނަމޫނާ ކުއްޖެކެވެ. އޭނަ ދޫކޮށްދިޔައީ ރާޅުވެސް ދޮންވެލިގަނޑުމަތީ ބީހިލުމަށްފަހު ދާފަދައިންނެވެ.

ދެން އޭނާގެ ހަޔާތަށް ބިންދާލީ ހޮޅިލާނެގި ރާޅެކެވެ. އެއީ ޖަޒްލާއެވެ. ލޯބިން ހައްދުފަހަނަ އަޅާދިއުމުގެ ސަބަބުން އަނެކާގެ އުފާތައް ފޭރިގަންނަންވެސް ފަސް ނުޖެހުނު ކުއްޖެކެވެ. އޭނާ ޔައީޝްގެ ހަޔާތުން އެ ދިޔައީ އޭނާގެ ދިރިއުޅުމުން އެއްބައި ހިފައިގެންނެވެ. ހޮޅިލާނެގިރާޅެއް ވެލިގަނޑުމައްޗަށް ބިންދާލުމަށްފަހު އެނބުރިދާއިރު ވެލިގަނޑުން ބައެއް ގެންދާފަދައިންނެވެ.

***

އެވަގުތު ޔައީޝްއާއި ފަނަރަވަރަކަށް ފޫޓު ދުރުގައި ކުޑަކުއްޖަކު ގޮވައިގެން އިން 19 ވަރަކަށް އަހަރުގެ އަންހެންކުއްޖާގެ ނަޒަރު ހުއްޓިފައި ހުރީ ޔައީޝްގެ މޫނަށެވެ. އެއީ ޝިއާނާ އެވެ. އޭނާގެ މޫނުމަތިންފެންނަނީ ސުވާލު މާކެކެވެ.

ކޮންފަދަ ފިރިހެންވަންތަ ހަށިގަނޑެއްހެޔެވެ؟ އެ ރީތި ޒުވާނަ ހިތާމަ އެކުރަނީ ކޮންކަމަކާހެއްޔެވެ؟ “ގާލް ފްރެންޑް” ބޭވަފާތެރިވީހެއްޔެވެ؟ އެހާރީތި ސްމާޓް ފިރިހެނަކަށް ބޭވަފަތެރިވާނީ މޮޔައެއްނޫނީދެން ކާކުހެއްޔެވެ؟

 ޝިއާނާގެ ހިތުގައި އާ ވިންދެއް ޖަހަންފެށިއެވެ. އެ ޒުވާނާގެ ހިތާމައަކީ ކޮބައިތޯ ބަލަން ބޭނުންވިއެވެ. އެ ހިތާމަތައް ފިލުވައިދީ އުފާކޮށްދޭން ބޭނުންވިއެވެ. ޝިއާނާ މަޑުމަޑުން ތެދުވުމަށްފަހު ޔައީޝްއާ ދިމާއަށް ހިނގައިގަތީ އޭނާއާ ވާހަކަ ދައްކާލުމަށެވެ. ހިމުން ދޮނވެލި ގަނޑުމައްޗަށް ފިޔަވަޅުތަށް ދޫކުރަމުން ޝިއާނާ ގޮސް ޔައީޝްގެ ކައިރިއަށް ހުއްޓިލިއެވެ. އެވަގުތު ޔައީޝް އިސްއުފުލާލަމުން ޝިއާނާއަށް ބަލައިލިއެވެ…….

ޔައީޝްގެ އެކަނިވެރި ހަޔާތަށް އަނެއްކާވެސް އަންހެންކުއަޖެއްގެ ހިލަންވީއެވެ. އޭނާގެ ހަޔާތުގެ އާ ބާބެއް ފެއްޓުނީއެވެ…….

ނިމުނީ

(ވާހަކައިގެ ސީޒަން 2 އަކަށް އިންތިޒާރު ކޮށްލައްވާ!!)

‘ކަޅު ފިނިފެންމާ’ އަކީ އަޅުގަނޑު ލިޔުނު ފުރަަތަމަ ދިގު ވާހަކައެވެ. މި ވާހަކައިގެ އެޕިސޯޑުތައް މިހާ އަވަހަށް އަޕްލޯޑު ކޮށްދިނުމުގައި އެހީ ވެދިން ހުރިހާ ބޭފުޅުންނަށް ޝުކުރު ދަންނަވަމެވެ. އަދި މި ވާހަކަ ޝައުގުވެރިކަމާއެކު ވިދާޅުވަމުން ގެންދެވި ހުރިހާ ކިޔުންތެރިންނަށްވެސް ވަރަށް ހާއްސަ ޝުކުރެއް ދަންނަވަމެވެ. އަދި ވަކިން ހާއްސަކޮށް މި ވާހަކަ ލިޔަމުން ދިޔައިރު އަޅުގަނޑުގެ އާއިލާ ގެ ފަރާތުން ލިބިގެން ދިޔަ އެހީތެރިކަމަށްވެސް ފަށްފަށުން ޝުކުރުދަންނަވަމެވެ. މި ވާހަކައިގެ ސީޒަން 2 އަވަސް މުސްތަޤުބަލެއްގެ ތެރޭގައި ކިޔުންތެރިންނާ ހަމައަށް ގެނެސް ދެވޭތޯ ވަރަށް މަސައްކަތް ކުރާނަމެވެ.!