އިމްތިޙާން 31

ލަހުމާގެ އެއްވެސް ހަރަކާތެއް ނެތް ހަށިގަނޑުން ގުނަވަނެއް ހޭލާފައި ނުވާފަދައެވެ. އެ މޫނުމަތީގައި ތާޒާ އެއްވެސް އަސަރެއް ނެތެވެ. މިލާ މޯޅިވެފައިވާ މަލެއްގައި ހުންނާނީ ދެން ކޮން ފުރިހަމަ ކަމެއް ހެއްޔެވެ؟ ލަޠީފްގެ ފިޔަވަޅުގެ ލުއިލުއި އަޑު ލަހުމާއަށް ދެނެގަންނަން ވަރަށް ފަސޭހަވިއެވެ. އެއަޑަށް ލަހުމާގެ ހުރިހާ ހިއްސެއް އެއްފަހަރާ ހޭލިހެން އޭނާއަށް އަމިއްލައަށްވެސް ހީވިއެވެ.

“އަހަރެން… ކަލޭ މަރާލާކަށްވެސް ޖެހިލުމެއްނުވާނެ.” ލަޠީފާ ދިމާލަށް ބަލާވެސް ނުލާ ލަހުމާ ބުނެލި ޖުމްލައިން ލަޠީފްގެ ހިތަށް ހީވީ ތޫނުއެއްޗެއް ހަރާލިހެނެވެ.

“އަޑުއަހާ!.. އަހަރެންގެ ވާހަކަ އަދި ނުނިމެ.. އަހަރެންގެ ވާހަކަ އަދި މިފަށަނީ….ލަހުމާގެ ޚިޔާލުތައް މާޒީގެ އެތައް ސަފުހާއެއްގެ ތެރެއަށް ގެއްލުވާލަމުން ވާހަކަތައް ކިޔައިދޭން ފެށިއެވެ.

ހޮސްޕިޓަލުން ދޫކޮށްލުމާއެކު ލަހުމާގެ ބޮޑުދައިތައާއެކު ގެއަށް އައިސް ވަނެވެ. އޭރުވެސް ލަހުމާގެ ގައިގައި އިތުރު ހަކަތައާއި ބާރެއްނެތެވެ.

“ލަހުމާ! ބޮޑުދައިތަ ދެން ދަނީ.. ބައްޕަގެ އެންމެ ފަހުގެ އެދުންވެސް މި ފުރިހަމަ ކޮށްދެވުނީ ބޮޑުދައިތައަށް… ބައްޕަ ނެތް ދުނިޔެއަކު ދެން މިގެއަށް ވަދެއުޅުމުގެ ހުއްދަ ބޮޑުދައިތައަށް ލިބޭނެހެން ހިޔެއްނުވޭ. އެކޮއެ މަންމައަކީ ކޮންކަހަލަ މީހެއްކަން އިނގެޔެއްނު؟ ބޮޑުދައިތަ ކިޔާދޭނެ އެއްޗެއް ނެތް.. ބޮޑުދައިތަވެސް މިހިރީ މުސްކުޅިވެފަ.. ބޮޑުދައިތަ ނެތް ދުވަހަކުންވެސް އެކޮއިވާނެ ބަސްއަހައިން އުޅެން.” ލަހުމާގެ ބޮޑުދައިތަ ބުނި ވާހަކައިން ލަހުމާއަށް ރޮވެން ފެށިއެވެ.

“އަހަރެންގެ ބައްޕަ މަރުވީދޯ؟ އަހަރެން އަޑުއެހިން ސިފައިންގެ މީހާ ކީއެއްޗެސް. އޭރު ހުން ހުރިވަރުން މާރަނގަޅަށް ނޭނގުނީ.. އެކަމަކު މިހާރު ޔަޤީން ވެއްޖެ..” ރޯންފަށަމުން ލަހުމާ ވާހަކަ ދެއްކިއެވެ.

“އާނ ދަރިފުޅާ ދެން ހުއްޓާލާ! ދަރިފުޅު ހުންގަދަކަމުން ދުނިޔޭން މޮޔަވާ ވަރުގެ ވަގުތުތައްވެސް ދިޔަ.. އެހެންވެ ހާލަތު ރަނގަޅު ނޫންވީމަ މޫނު ބަލާލަންވެސް ޑޮކްޓަރުން ދޫނުކުރީ..” ލަހުމާއަށް އެ ހާދިޘާ ހިނގާ ދިޔަގޮތް ތަފްޞީލު ކޮށްދެމުން ލަހުމާގެ ބޮޑުދައިތަ ކިޔައިދިނެވެ.

“ދެން ބޮޑުދައިތަ މިދަނީ.. ހީވަނީ އެކޮއެ މަންމަވެސް އިރުކޮޅަކުން އަންނާނެހެން.. ރަނގަޅަށް ބޭސް ކާތި އިނގޭ.” ލަހުމާގެ ބޮޑުދައިތަ އެގޭން ނުކުމެގެން ދަމުން ބުނެލިއެވެ.

މުޅި ގައިގާ ރަޖައެއް އޮޅައިން އިން ލަހުމާގެ ނަޒަރު އިރު އިރުކޮޅާ ހުއްޓާލެވެނީ ފާރުގައި ހުރި ގަޑިއަށެވެ. ލަހުމާގެ ބޮޑުދައިތަ އެގޭން ދިޔަފަހުން ބަރާބަރު ހަ ގަޑިއިރުވާން ކައިރިވީއެވެ. ތާނިޔާ ސްކޫލަށް ދިޔަސް ގެޔަށް އަންނާނީ އަންނާނެ އިރަކުންނެވެ. އެއީ ތާނިޔާގެވެސް އާދައެވެ. ގަޑިއަށް ބަލައިލުމަށްފަހު އަނެއްކާވެސް ލަހުމާއަށް ވިސްނެން ފެށީ ރަޝީދާ ގެއަށް އައުން ލަސްވަމުން ދާތީއެވެ. ކުއްލިޔަކަށް ގޭގެ މައިދޮރު ހުޅުވާލިއަޑު ލަހުމާއަށް އިވުނެވެ.

“މަ.. މަންމާ! އާދެބަލަ ގައި މޮޑެލަދޭން.. އަދިވެސް ވަރަށް ހުންގަދަ.. ފިރުމާލަ ދީބަލަ..” ލަހުމާއަށް އޭނަގެ މަންމަ ރަޝީދާ ފެނުމާއެކު ހިނިތުންވުމެއް ވެރިކޮށްލަމުން ބުނެލެވުނެވެ. އެހެން ނަމަވެސް ލަހުމާގެ އެ އެދުމުގައި ވަނީ އާދެހެވެ. އޯގާތެރި ފިރުމުމަކަށް ބޭނުންވެފައިވާ ލަހުމާގެ އުންމީދުތައް ފޮންޏެވެ.

“ނުވާނެ މަށަކަށް.. ކަލެޔާހެދި މިއުޅެން ޖެހުނީ ނޭވާލާނެ ވަގުތެއް ނުލިބި.. ކަލޭ ބައްޕަ މަރުވީމަ ގޮސް ހޮސްޕިޓަލުގަ.. ސަހަރާގަ.. ފުލުސް އޮފީހުގަ.. ނޫނީ ކޮންމެސް ރަސްމީ އޮފީހަކަށް ދުވަން..” ރަޝީދާގެ ދެކޮޅު ނުޖެހޭ ޝަކުވާތައް ލަހުމާގެ ކަންފަތު ހިނދުރީގައި ގުގުމަން ފެށިއެވެ. ލަހުމާއަށް އޭނަގެ ދެލޯ މަރާ ބާރުކޮށްލެވުނެވެ. އިރުކޮޅެއް ތެރޭގައި ލަހުމާގެ ލޮލުން ކަރުނަ އޮހޮރިގެން ދާންފެށިއެވެ.

“ނޫން.. ނޫން މަންމާ.. ތިހެން ނުބުނޭ.. އަހަރެން ބަލިވީމަ އެހީވާން މިތާހުރި..” ލަހުމާގެ އަޑުގައި ވަނީ އޯގާތެރި ކަމެވެ.

“ހުއްޓާލާ..! އެހީވާން މިތާހުރުމުގެ ބޭނުމެއް ނެތް.. އަހަރެންވެސް މިނިވަން މާހައުލެއް ބޭނުންވޭ.. ރައްޓެހިންނާއެކީ މަޖާކުރަން ބޭނުންވޭ.. އެމީހުނޭ އަހަންނަށް މިގެވެސް ރަޖިސްޓްރީ ކުރަން މޮޅެތި ޚިޔާލު ދިނީ.. ކަލޭބައްޕަވެސް އެމީހުން ދެއްކި ވާހަކަތަކަށް ހެއްލިގެން މަށަށް މިކަންވެސް ކޮށްދީފި.. ހެހެ..” ރަޝީދާ ހިނިގަނޑެއް ޖަހާލިއެވެ.

“މަންމާ!” ލަހުމާ ވަރަށް ބާރަށް ހަޅޭއްލަވައިގަތެވެ. އޭނާގެ މުޅި ހަށިގަނޑުގައި ހިނގަމުން ދިޔަ ތާޒާާ ލޭ ކުއްލިޔަކަށް ކެކެން ފަށައިފިއެވެ. ލަހުމާގެ ހިތުގާ ރަޝީދާއަށްޓަކާ ބަދަލު ހިފުމުގެ ރޫޚު އާލާވަމުން ދާންފެށިއެވެ.

“ތީ އެއްވެސް އިރެއްގަ އަހަންނާ ތާނިޔާ ކޮއްކޮއަށް ލޯބިން ވާހަކަ ދެއްކި މީހެއް ނޫން. އަހަރުމެންގެ އިހުސާސްތައް ނޭނގޭ މީހެއްތީ.. އަހަރެން މި ބައްޔާ ހަނގުރާމަ ކުރާނީ އަހަރެން އެކަނި.. ދެން މީގެފަހުން އަހަރެން ކަލެޔާ ކަލޭގެ ދިރިއުޅުމާވެސް ހަނގުރާމަ ކުރާނަން.. އަދި ބުނަންތަ؟ މީގެ ފަހުން.. މީގެ ފަހުން އަހަރެން ބޭނުމެއް ނޫން ކަލެޔަށް މަންމަ ކިޔާކަށްވެސް.” ލަހުމާގެ ދެއަތްތިލަ މުށުތެރެއަށްލާ ބާރުކޮށްލަމުން ރަޝީދާއަށް ރައްދު ދިނެވެ.

ދުވަސްތައް ވޭތުވާންފެށީ ހަލުވި މިނުގައެވެ. އިރުއަރާ އޮއްސޭ ހަމަ ކޮންމެ ދުވަހަކީވެސް ލަހުމާގެ ހަޔާތުގައި އެތަކެއް ދަތި ތަޖުރިބާތައް ކުރަންޖެހޭ ދުވަހެކެވެ. ލަހުމާގެ ދިރިއުޅުމަށް ހުރަސް އަޅަމުންއައި އެންމެ ބޮޑު ގޮންޖެހުމަކީ ރަޝީދާގެ ފަރާތުން ލަހުމާއަށާ ތާނިޔާއަށް ލިބެމުން ދިޔަ އެކަނިވެރިކަމެވެ.

މަންމަގެ ފަރާތުން އިވެމުންދިޔަ އިޙްތިރާމް ކުޑަ ބަސްތަކެވެ. އެއިން ކޮންމެ ކަމަކަށްވެސް ލަހުމާ ދިޔައީ ކެތްކުރަމުންނެވެ. އެހެނަސް… އެހެނަސް ލަހުމާގެ ހިތުގައި އަވަސް އަވަހަށް ގިނި ރޯވަމުންދާންފެށިއެވެ. ބަދަލު ހިފުމުގެ ރޫޙާއެކު ނުބައިހެން ހީވާ ރޭވުންތައް ރާވާހަދަން އޭނާގެ އަމިއްލަ ނަފްސު އޭނައަށް ދަސްކޮށްދޭން ފަށައިފިއެވެ.

ދުވަސްތައް މާޒީއާ އެކުވަމުން ގޮސް ލަހުމާގެ އުމުރުން ފަނަރަ އަހަރު ފުރިއްޖެއެވެ. ޒުވާންކަމުގެ ތާޒާ ލޭ ލަހުމާގެ ގަށިގަނޑުގައި ހިނގަންފެށިއެވެ. ފުރާވަރުގެ މަސްތީ ހުޅު އެންމެ ގަދަޔަށް ރޯވާންފެށި ދުވަސްވަރުކަމުން އެހެން ކުދިން ފަދައިން ލަހުމާވެސް ޙަޔާތުގެ ބައިވެރިޔަކު ހޯދިއެވެ. އެއީ މާލޭގައި ގެދޮރު ނެތް މީހަކަސް ރާއްޖެތެރޭ ރަށެއްގައި އެންމެ ފުދިގެން އުޅޭ އާއިލާއެއްގެ ޒުވާން ފިރިހެނެކެވެ.

“އަހަރެން ބޭނުން ވަރަށް އަވަހަށް ކައިވެނި ކުރަން.. މަންމަ ޤަބޫލިއްޔާ ހިނގާ މިކަން އަވަސް ކުރަމާ؟” ލަހުމާ ވަރަށް ހާސްވެފައި އިނދެ އޭނާގެ ޙަޔާތުގެ ބައިވެރިޔާއާ ވާހަކަ ދެއްކިއެވެ.

“ނޫން ކީއްކުރަން ތިހާ އަވަސް އަރުވާލަނީ؟ އަދި މިކަމަށް ވަގުތު ބޭނުންވާނެ ލަހުމާ.. އެހާ އަވަހަށް ކައިވެނި ނުކުރިޔަސް އަހަރުމެން ބޭނުން ގޮތަކަށްނު މިއުޅެނީ.. ކަމެއް ބަލާނެ މީހަކު ކަމެއް މަނާ ކުރާނެ މީހަކު ނެތެއްނު.. ރަނގަޅުވާނެޔޭ..” އެ ފިރެހެންމީހާ ކައިވެންޏަށް ދެކޮޅު ހަދަމުން ވާހަކަ ދެއްކިއެވެ.

“އަހަރެންގެ ހަށިގަނޑުގަ މިހާރު ތަފާތު އިހުސާސްތަކެއް ހިނގާހެން ހީވޭ.. އަހަރެން.. އަހަންނަށް ހީވަނީ އަހަރެން..” ލަހުމާ ވާހަކަ ދައްކަން އުޅުމުން އެފިރެހެން މީހާ އެކަން ހުއްޓުވިއެވެ.

“ހޫމ.. ހޫމްހޫމްމް.. ޕިސް. އެންމެ ރަނގަޅު ލަހުމާގެ ރަހުމަތްތެރިޔާ ފޮނުވާ މަންމަ ކައިރި މިވާހަކަ އަހަން.. އަހަރެން ވަރަށް ލޯބިވާ މީހެއްތީ.. އަހަރެން ވަރަށް އަވަހަށް ކައިވެނި ކުރާނަން..” އެމީހާ ކައިވެންޏަށް އެއްބަސް ވަމުން ގޮތް ނިންމިއެވެ.

ލަހުމާ އޭނަގެ ލޮލުން ފައިބަމުން ދިޔަ ކަރުނަތައް ފޮހެލަމުން ލަޠީފަށް ބަލައިލިއެވެ. އޭރު ލަހުމާގެ ކުރިމަތިން ހުރި ގޮނޑީގައި ހަމަޖެހިލައިން ލަޠީފް އިނެވެ.

“އަހަރެން ކައިވެނީގެ ވާހަކަ އަހަރެންގެ ބައިވެރިޔާ ކައިރި ބުނިއިރު އަހަރެން އިނީ އޭނަގެ ދަރިއަކަށް ބަލިވެ. އަހަރެން ބަލިވެ އިންކަން އިނގޭނީވެސް އަހަރެންގެ ރަހުމަތްތެރިޔާއަށް އެކަނި. އަހަރެންގެ ވާން އުޅުނު ފިރިމީހާއަށްވެސް އަހަރެން ބަލިވެ އިންކަން ނޭނގޭނެ.. އަހަންނަށް ސީދާ ސީދާ އަވަހަށް ކައިވެނި ކުރަން ބޭނުންވި ސަބަބު އޭނަކައިރި ބުނާކަށް ނުކެރުނު..” ލަހުމާ ކަރުނަތައް ފޮހެލަމުން ނޭފަތް ދަމާލިއެވެ.

“އެހެންވެ އަހަރެން.. އަހަރެންގެ އެންމެ ގާތް ރަހުމަތްތެރިޔާ ކައިރި އެދުނީން އަހަރެންގެ ޙާލަތު ކިޔައިދިނުމަށްފަހު އަހަރުމެން ބޭނުންވާ ގޮތަށް ކައިވެނީގެ ވާހަކަ މަންމަ ގާތު ބުނުމަށް. އެކަމު.. އެކަމު.. އެއީ އަހަރެންގެ ހަޔާތް ބަރުބާދު ކޮށްލި މީހަކީ.. މަންމަ ކައިރި އަހަރުމެންގެ ވާހަކަ ދައްކާ ދޭތެރެ ޖައްސަމުން ހިނގީވެސް އޭނަ.. އަހަރެން އަބަދުވެސް އޭނައަށް ނަފުރަތު ކުރަން.” ލަހުމާގެ ވާހަކަ ކުޑަ އިރުކޮޅަކަށް މަޑު ޖައްސާލިއެވެ.

“މަންމަގާތު އޭނަ ބުނީ އަހަރެމެން އަވަހަށް ދުރު ކުރުވާށޭ. އެ ފިރިހެން މީހާ އުޅެނީ އަހަރެން މަންމަގެ މުއްސަނދިކަމާ ގެދޮރަށް ފެން ބޮވައިގަނެގެންނޭ.. މަންމައަށް އޭނަ ވިސްނައިދިނީ އަހަރެންގެ ލޯބިވެރިޔާއަކީ އެތައް މަލަކުން ފޮނި ބޮމުންދާ މާބޫރެއް ކަމަށް.. އަދި ބުނި ލަހުމާއާ ކައިވެނި ކުރުމަށްފަހު އެމީހާ އެއުޅެނީ ރަޝީދާ ދައްތަގެ ކަރަށް ފައިން އަރަންނޭވެސް.. އަހަރެން އެއްވެސް އިރަކު ހިޔެއް ނުކުރަން އެވަރުގެ ވިހަގަދަ ރައްޓެއްސެއް ކަމަށް އެއީ.. އެހުރިހާ ވާހަކައެއް އަހަރެންގެ މަންމަ ކައިރި ދައްކަނިކޮށް އަހަންނަށް އަޑު އިވުން.” ލަހުމާ އަނެއްކާވެސް މޫނު ފޮހެލިއެވެ.

( ނުނިމެ )

އަންނަ ހަފްތާގައި!! ?

“ވާހަކައެއް ބުނަންތަ؟ ކުރިން ދުވަހެއްގަ އަހަންނަށް ފެނިއްޖެ ފާއިދުގެ ކުރަހާ ފޮތް.. ވަރަށް ދުވަސް ވެއްޖެ އެ ފެނޭތޯ ފާރަލާތާވެސް.. އޭނަގެ އުމުރާބަލާފަ އެ ކުރަހާފަ ހުރި އެއްޗެސް ހަމަ ރަނގަޅަށް ދޭހަވޭ.. އެ ކުރެހުންތައް އެންމެ މޮޅު ނޫނަސް އޭގެން ބުނެދޭ މެސެޖްތަށް އަހަންނަށް އިނގޭ.. އިނގޭތަ އޭގަ ކުރަހާފަ ހުރީ ކޯއްޗެއްކަން..؟؟” އެނދުމަތީ އިން ތުގާ ކުޅެމުން ދިޔަ ބޯޅަ ވެއްޓުމާއެކު އެ ބޯޅަ ނަގައިދެމުން ސީމާ ވާހަކަ ދެއްކިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.