މަންޒިލް 14

އާސެނަލް ސަޕޯޓަރުންނާއި ކުޅުންތެރިން އުފާފާޅު ކުރަމުން ދިޔައިރު ލިވަޕޫލް ކުޅުން ތެރިން މާޔޫސްވެފައި ދަނޑުމަތީ ތިއްބެވެ. އެންމެ ފަހު ވަގުތު އާސެނަލުން ލަނޑު ކާމިޔާބު ކުރުމުން ހުރިހާ ކުޅުންތެރިން ތިބީ ހިތްހަލާކުވެފައެވެ. އުޑުފައިން ވިނަގަނޑު މަތީ އިށީންދެލައިގެން މޫނުގައި ދެއަތް އަޅައިގެން ޔޫސުފް އިނެވެ. އޭނާ ވަނީ މުޅިންހެން މާޔޫސްވެފައެވެ.

އަކްމަލް ގޮސް ޔޫސުފްއާ ސަލާންކޮށްލައިފައި ދަނޑުމަތިން ނެގިއެވެ. “ދެރަނުވޭ. ޔޫ ޕްލެއިޑް ވެލް. ފުޓުބޯޅައިގައި މިހެން ވެސް ވާނެ. ޔޫސުފް ލިވަޕޫލަށް ކުޅުނަސް ޔޫސުފްގެ ކުޅުމާއި މެދު ވަރަށް ފަޚުރުވެރިވޭ” ޔޫސުފް ދެރަވެފައި ހުރުމުން އަކްމަލް ޔޫސުފް ގައިގައި ބައްދައިލައިފައި އޭނާ ހިތްހަމަ ޖައްސައިދޭން މަސައްކަތް ކުރިއެވެ. ޔޫސުފް ހަމައެކަނި ބޯ ޖަހައިލައިފައި ހިނިތުންވެލީއެވެ.

އެރިކް ވެސް އައިސް ޔޫސުފްއާ ސަލާން ކުރިއެވެ. ކުޅުނު ވަގުތު ވީ ކަންތަކަށް ދެ ކުޅުންތެރިން ވެސް މާފަށް އެދުނެވެ. ޔޫސުފް އެރިކްގެ ކުޅުމަށް ތަޢުރީފު ކުރިއެވެ. “ބުނަން ބްރޯޖެހީ ވަރަށް މޮޅު ގޯލެއް. އަހަރެން ނެތިން ދޮގު ހަދާކަށް” އެރިކް ރަކިވެފައި ހުރެ ވެސް ޝުކުރު އަދާކުރިއެވެ.

އާސެނަލް ކުޅުންތެރިން ޗޭންޖިން ރޫމަށް ދިޔައިރު ހުރިހާ ދަތްތަކެއް ފެންނަ ވަރަށް ހިނިތުންވެގެން އިޝަލް ހުއްޓެވެ. އެރިކްއަށް ޗޭންޖިން ރޫމް ތެރެއަށް ރަނގަޅަށް ނުވަދެވިގެން އުޅެނިކޮށް އޭނާ ނޭވާ ހާސްވާ ވަރަށް އައިސް އިޝަލް އޮޅުލައިގަތެވެ.

“މިއަދު ވަރަށް އުފާވެއްޖެ. ތި އެންމެންނާ މެދު ވެސް އަހަރެން ފަޚުރުވެރިވަން. މިއަދު ތި މީހުން އެންމެން ދެއްކި ހިތްވަރަށް ސާބަސްދެން. ލީގުގަ ކުރިއަށާ ހުރި މެޗުތައް ހަމަ މި ގޮތަށް ކުޅޭނެކަމަށް އުއްމީދު ކުރަން. އަހަރެން ޑޯންޓްމަންޑަށް ދިޔަޔަސް ހިތް އަބަދުވެސް ވާނީ އާސެނަލްއާ އެކު” އިޝަލް އޭނާގެ އެކުވެރިންގެ ކުޅުމަށް ތައުރީފުކޮށް އާސެނަލްދެކެ ލޯބިވާ ވަރު ހާމަކުރިއެވެ. “އޭ އެލެކް އަހަރުން އެންމެން ރޮއްވާލަންތަ ތިއުޅެނީ؟” އިޝަލްގެ ބަސްތައް ކޮންމެ ކުޅުންތެރިއެއްގެ ވެސް ހިތުގެ އެންމެ ހިމަ ނާރަށް ވެސް އަސަރު ކުރިއެވެ. އިޝަލްއަކީ ޓީމުގެ ހުރިހާ ކުޅުންތެރިންނާ ވެސް ގުޅުނު އެކުވެރި މިޒާޖެއްގެ ކުޅުންތެރިއެކެވެ. ބައެއް ކުޅުންތެރިންނަކީ ބީ ޓީމުން ފެށިގެން ވެސް އޭނާގެ އެކުވެރިންނެވެ. އެންމެ ގާތް އެކުވެރިޔަކީ އެރިކް ކަމުގައި ވިއަސް އެހެން ކުޅުންތެރިންނާ މެދު ވެސް ގާތް ގުޅުމެއް ވަނީ އުފެދިފައެވެ. އާސެނަލްއަކީ އޭނާގެ ދެވަނަ އާއިލާއޭ ބުނަކުން ދޮގަކަށް ނުވާނެއެވެ.

އިޝަލް އަންނަންދެކަށް އަހާންމެން މަޑުކޮށްގެން ތިއްބެވެ. ޒާޔާ ހުރީ އަވަހަށް ދާން ބޭނުންވެފައެވެ. އިޝަލް ނުލާ ދާން ހިނގާށޭ ވެސް ބުނެވުނީ އެހެންވެއެވެ. އަނެއްކޮޅުން މިންހާ ހުރީ ދާން ބޭނުންނުވެފައެވެ. މެޗު ނިމުނު ފަހުން ލޮލަށް އެރިކްއެއް ނުފެނެއެވެ. އެރިކް ދުށުމަށް އެދި އޭނާގެ ހިތް ބޭޤަރާރު ވަމުން ދިޔައެވެ.

“ހެލޯ ޒާޔާ” ޒާޔާގެ ނަމުން މީހަކު ގޮވައިލުމާއެކު އެންމެން އެއްފަހަރާ އެމީހަކަށް ބަލައިލިއެވެ. އެ މީހާ ފެނުމުން ވަގުތުން އަހާންގެ ދެބުމަ ގޮށް ޖެހުނެވެ. އަދި އަލިފާން ބެލުމަކުން އެމީހާއަށް ބަލައިލިއެވެ. “ކަލޭ ކީއްތިކުރަނީ މިތާ؟” އެ ޒުވާނާ ލައިގެން އިން ޓީޝާޓުގެ ކަރުގައި އަހާން ހިފައިގަތެވެ. “ޖީޒް އަހާން. އަހަރެން މި އައީ ކާލޭ ހޯދާކަށް ނޫން. ޒާޔާ ހޯދަން” އެ ޒުވާނާގެ މޫނު މަތީގައިވީ މަލާމާތުގެ ހިނިތުންވުމެކެވެ. އަހާންގެ އަތް ފޮޅުވައިލައިފައި އޭނާ ޒާޔާއަށް ބަލައިލިއެވެ. “ޒާޔާ އެމީހުންނަށް އަހަރެން ތަޢާރަފެއް ނުކޮށްދޭނަންތަ؟” ނުތަނަވަސް ކަމާއެކު ޒާޔާ އަހާންއަށް ބަލައިލިއެވެ. އަހާންގެ ލޮލުން އެތައް ސުވާލެއް ޒާޔާއާ ކުރާ ފަދައެވެ. އެ ދެލޮލުން ފެންނަމުން ދިޔައީ ރިހުމެވެ. “ޒާޔާ ޕްލީޒް ނުބުނާތި އެއީ” އަހާންއަށް ޖުމްލަ ފުރިހަމަ ނުކުރެވުނީ ކުށްވެރިއެއް ފަދައިން ޒާޔާ އިސްޖަހައިލުމުންނެވެ. ޒާޔާ ބުނުމަކާ ނުލައި ވެސް އެއީ ޒާޔާގެ ކާކުކަން އަހާންއަށް ވިސްނިއްޖެއެވެ. “އަހާންއަށް ތިހީވީ ހަމަ ރަނގަޅަށް. ޒާޔާއަކީ އަހަރެންގެ ގާލްފްރެންޑް. އަހަންނަކީ ޒާޔާގެ ބޯއިފްރެންޑް” ޒާޔާގެ އުނަގަނޑުގައި އެ ޒުވާނާ އޭނަގެ އަތް ވަށައިލިއެވެ. އެ މޫނު މަތިން ފެންނަމުން ދިޔައީ ކާމިޔާބީގެ ހިނިތުންވުމެވެ. އަހާންގެ މޫނަށް ވެރިވި ހިތްދަތިކަމާއި ރުޅުވެރިކަމުން އެ ޒުވާނާގެ ހިތަށް ހަމަޖެހުން ލިބުނު ފަދައެވެ.

އަހާން އެންމެ ސިކުންތުކޮޅެއް މަޑު ކުރުމެއް ވެސް ނެތި އެ ތަނުން ދިޔައެވެ. ހިތްހަމަ ނުޖެހިފައި ހުރެ އެ ޒުވާނާއަށް ބަލައިލައިފައި ޒާޔާ އަހާން ފަހަތުން ދިޔައެވެ.

“އަހާން ޕްލީޒް މަޑުކޮށްބަ” ދުވަމުން ކަހަލަ ގޮތަކަށް ޒާޔާ އަހާންއާ ހަމަ ކުރިއެވެ. ޒާޔާ ފަހަތުން އަންނަކަން އެނގޭތީވެ ގަސްތުގައި އަހާން ބާރަށް ހިނގީއެވެ. ޒާޔާ އައިސް އޭނާ އަތުގައި ހިފެހެއްޓުމުން އަހާން ނިކަން ބާރަށް ޒާޔާގެ އަތްފޮޅުވާލިއެވެ. އަހާންގެ ލޮލެކޭ އަނގުރު އަލިފާން ގަނޑެކޭ އެއްގޮތެވެ. “މަ ބޭނުމެއް ނޫން އެއްވެސް ވާހަކައެއް ޒާޔާއާ ދައްކާކަށް. ޒާޔާއަށް ވުރެ ރަނގަޅަށް އޭނާ އަހަންނަށް ހެދި ގޮތް އެނގޭނެ ދެވަނަ މީހެއް ނުހުންނާނެ” ރުޅިއަށް ވުރެ ބޮޑަށް އަހާން ހުރީ ދެރަވެފައެވެ. އެ އަޑުގައި ރިހުން އެކުލެވިގެން ވިއެވެ. “އަހާން ޕްލީޒް” “ބުނެފީމެއްނު ބޭނުމެއް ނޫނޭ އަޑު އަހާކަށް. ކީއްކުރަން މަގޭ ފަހަތުން ތި އަންނަނީ. ޒާޔާގެ ބޯއިފްރެންޑް ހުންނާނެ ޒާޔާގެ އިންރިޒާރުގަ. ޖަސްޓް ލީވް މީ އެލޯން” އަހާންގެ ލޮލުން ފެންނަމުން ދިޔަ ވޭނީ އަސަރުން ޒާޔާގެ ހިތަށް ތަދުވިއެވެ. ދެމީހުން ކިތަންމެ ވަރަކަށް ޒުވާބުކޮށް ތޮޅެ ހެދިއަސް އަހާންއަކީ އެންމެ ކުޑަ ދުވަހުން ފެށިގެން ވެސް އޭނާގެ އެންމެ ގާތް އެކުވެރިޔާއެވެ. އަހާންއަށް ނޭންގުނު ކަމުގައި ވިއަސް އެ ހިތުން އެންމެ ފުރަތަމަ ޖާގަ ދެވުނު ކުއްޖަކީ ވެސް އަހާންއެވެ. ފުރާވަރަށް އަޅަމުން އައިއިރު އޭނާގެ ހިތުގައި އަހާންއަށްޓަކައި އިޙްސާސް ތަކެއް އުފެދެމުން އައެވެ. ނަމަވެސް އެކުވެރިޔާ ގެއްލިދާނެ ކަމުގެ ބިރަށް މިއަދާ ހަމައަށް އެކަން ސިއްރެއްގެ ގޮތުގައި އޭނާ ވަނީ ބާއްވާފައެވެ.

ޒާޔާ އެނބުރި އައިއިރު މުޅި މޫނާއި ދެލޯ ހުރީ ރަތްވެފައެވެ. “ރިޔަން ކީއްވެ؟ އަހަރެން ބުނިން ދޯ މިހެން ނުހަދާށޭ. ދެން ކީއްވެ؟” ރޮވިފައި ހުރެ ޒާޔާ ރިޔަންއާ ކުރިމަތިލިއެވެ. “ޒާޔާ. އައި އެމް ސޮރީ. އަހަރެން ޒާޔާދެކެ ލޯބިވާތީ މިހެން ހަދަން ޖެހުނީ. އަހާންއާ ހެދި” “އޯ ޕްލީޒް. ތީއެއް ނޫން ލޯބިވާ މީހުން ކަންތައް ކުރާނެ ގޮތަކީ. ބުނަން ވާހަކައެއް އެންމެ ރަނގަޅުވާނީ ރިޔަން މިވަގުތަށް މި ތަނުން ދިޔައްޔާ” ރިޔަންގެ ވާހަކަ މެދު ކަނޑާލަން ޖެހުނީ ރުޅިވެރިކަމާއެކު މިންހާ ވާހަކަ ދައްކަން ފެށުމުންނެވެ. މިންހާއަށް ރައްދު ދޭން ރިޔަން އަނގަހުޅުވައިފައި ވެސް ޒާޔާ އިން ގޮތް ފެނުމުން އިތުރަށް ވާހަކަ ދައްކަން ނުހަދާ އެތަނުން ދިޔައީއެވެ.

އަހާން ފަހަތުން ކިތަންމެ ދަން ބޭނުންވެފައި ހުރި ނަމަވެސް ދާކަށް މިއާއަކަށް ނުކެރުނެވެ. ޒާޔާމެން ވާހަކަ ދެއްކީ ދިވެހި ބަހުން ކަމުން މާބޮޑަށް ވާނުވާ ނޭންގުނު ކަމުގައި ވިއަސް އެކުދިން މެދުގައި ރިޔަންއާ ހެދި ބޮޑު ހަމަނުޖެހުމެއް ހިނގައިފިކަން އޭނާއަށް އެނގެއެވެ. އަދި އަހާން ހިތުގައި ވަރަށް ބޮޑަށް ޖެހިއްޖެކަން ވެސް އެނގުނެވެ.

އިޝަލް އެނބުރި އައިއިރު އަހާން ފެންނާކަށް ނެތެވެ. ޒާޔާ އިނީ ރޮވިފައެވެ. އިޝަލް ތުންފަތް މަތީގައިވި ހިނިތުންވުން ވަގުތުން ފިލައިގެން ދިޔައެވެ. ވަގުތުން ޒާޔާ ގާތަށް ގޮސް ވެގެން އުޅޭ ގޮތް އޮޅުންފިލުވިއެވެ. “ބޭނުމީ ގެއަށް ދާން” އިޝަލް އިތުރު އެއްޗެއް ބުނަން އުޅުމުން މިންހާ އެކަން މަނާ ކުރިއެވެ. “އަހާން ކޮންތާކަށް ދިޔައީ؟” އަހާން ދިޔަ ތަނެއް އެކަކަށް ވެސް ނޭންގެއެވެ. އިޝަލް އަނގައިން އަޑެއް ލައްވައިލައިފައި ފޯނު ނަގައިފައި އަހާންއަށް ގުޅައިލިއެވެ. އެތައް ފަހަރަކު ގުޅައިގެން ވެސް އަހާން ފޯނެއް ނުނެގިއެވެ. އަހާން ފޯނު ނުނެގުމުން އިޝަލް ދެން ގުޅީ ނަވާރްއަށެވެ. ނަވާރްއަށް ގުޅައިފައި އަހާން ގެއަށް ގޮއްސިތޯ އެހިއެވެ.

މިންހާ އާއި ޒާޔާ އަދި މިއާ ގެއަށް ލައިފައި އިޝަލް ދިޔައީ އަހާން ހޯދާށެވެ. ލިވަޕޫލްގެ މަގު ތަކުގައި ދުއްވައިގެން ވެސް އަހާންއެއް ނުފެނުނެވެ. އެންމެ ފަހުން އިޝަލް ޔޫސުފްއަށް ގުޅިއެވެ. އެނބުރި ގެއަށް ދިއުމުގެ ކުރިން ޔޫސުފް ވެސް ނުކުތީ އަހާން ހޯދާށެވެ.

ދާނެ ވަކި މިސްރާބެއް ނެގި އަހާން ހިނގަމުން ދިޔައެވެ. އޭނާގެ ހިތަށް އެތައް އެއްޗެއް އަރައި ފައިބަމުން ދިޔައެވެ. ޖީބުގައި އޮތް ފޯނު ވައިބްރޭޓް ވާކަން އެނގި ހުރެ ވެސް އަހާން އަޅައެއް ނުލައެވެ. މި ވަގުތު އޭނަ ބޭނުމީ އެކަނި ވެލާށެވެ.

“ކިހިނެއްވީތަ އަސްލު؟” އިޝަލް އާއި ޔޫސުފް ވަކި ހިސާބަކުން ދިމާވިއެވެ. ދެމީހުން ކާރުން ޕާކު ކޮށްފައި މަގު މަތީ މަޑުކޮށްލިއެވެ. “ނޭންގެ. ހީވަނީ ޒާޔާއާ ދެމީހުން މައްސަލައެއް ޖެހުނީހެން. އަހަރެން ނުކުތް އިރު ޒާޔާ އިނީ ރޯން އަހާން ފެންނާކަށް ނެތް. ވީ ގޮތް އެހީމަ އެކަކު ވެސް ޖަވާބެއް ނުދިން. ޒާޔާ އޯކޭހެން ހީނުވީމަ މާގިނައިން ސުވާލު ނުކުރީ. އަހާންއަށް ގުޅާ ގުޅައި ވެސް ފޯނެއް ނުނެގި” އިޝަލް އޭނާއަށް އެނގިފައިވާ މިންވަރު ޔޫސުފްއަށް ކިޔައިދިނެވެ. ޔޫސުފް ދެފަރާތަށް ބޯ ހޫރާލައިފައި އަނެއްކާވެސް އަހާންއަށް ގުޅަން މަސައްކަތް ކުރިއެވެެ.

އަހާންގެ ނަފްސު ހަމައަކަށް އެޅުމުން ގަޑިން ވީވަރު ބަލައިލިއެވެ. އޭރު ރޭގަނޑު ދިހައެއް ޖަހައި ބޮޑު ވެއްޖެއެވެ. ޖީބުގައި އޮތް ފޯނު ނެގިއިރު އެއް ހާހަށް ވުރެ ގިނަ މިސްޑް ކޯލް ހުއްޓެވެ. ޔޫސުފް އިޝަލް ގެ އިތުރަށް ޒާޔާ އާއި މިންހާ ވެސް ގުޅައިފައި ހުއްޓެވެ.

އަހާން އިޝަލްއަށް ގުޅައިފައި އޭނާ ހުރިތަން ބުނެދިނެވެ. ބަލާ އައުމަށް އެދުނެވެ. އިޝަލް ވަގުތުން ޔޫސުފްއަށް ގުޅައިފައި އަހާން ގުޅިކަން އަންގައިލިއެވެ.

“ކޮންތާކު އުޅެފަ ތިއައީ؟ މަށާ ދޮންބެއާ ވެގެން އަހާން ހޯދަން މުޅި ރަށުގަ ދުއްވައިފިން. ނުފެނުނު ކަމަށް ޕޮލިހަށް ގުޅަން އުޅެނިކޮށް ތި ގުޅީ. މޭން ވަޓް ހެޕަންޑް؟” ހިތްހަމަ ނުޖެހިފައި އިޝަލް އަހާންއަށް އަޑުލިއެވެ. އިޝަލްގެ އަޑުގައިވީ ކަންބޮޑުވުމެވެ. އަހާންއަށް ގޮތެއްވިނަމަ އޭނާގެ އަމިއްލަ ނަފްސަށް ދުވަހަކު މާފު ނުކުރެވުނީހެވެ. “ކޭން ވީ ގޯ ހޯމް. އައި އޭމް ޓަޔާރޑް” އިޝަލް ކުރި އެއްވެސް ސުވާލަކަށާ އަހާން ޖަވާބެއް ނުދެއެވެ. ސީޓުގައި ބޯ ޖައްސައިލައިގެން އޭނަ ދެލޯ މަރައިލިއެވެ.

“އަހާން އިޒް ފައިން. އިޝަލްއާ އެއްކޮށް ގެއަށް އެބައާދޭ” ޔޫސުފް ގުޅައިފައި އަހާން އިޝަލްއާ އެއްކޮށް ގެއަށް އަންނަމަން މިންހާ ގާތު ބުނުމުން މިންހާ ޒާޔާ ގާތު ބުންޏެވެ. ޒާޔާއަށް އަހާން ހެޔޮ ހާލުގައި ހުރިކަން އެނގުމުން ބޮލުން ބޮޑު ބުރައެއް ލުއިވި ކަމުގެ އިޙްސާސް ކުރެވުނެވެ. “މިންނު އަހާން ދުވަހަކު މަށަށް މާފު ކުރާނެތަ؟” ޒާޔާގެ ދެލޯ ހުރީ ފެންކަޅިވެފައެވެ. އެ އަޑުގައި ވެސް ތުރުތުރުލުމެއް ވިއެވެ. ޒާޔާގެ އެ ސުވާލަށް ދޭނެ ޖަވާބެއް މިންހާއަކަށް ނޭންގުނެވެ. ރިޔަންއަށް އަހާން ނަފްރާތު ކުރާކަން އެއީ އެކަކަށް ވެސް އޮޅިފައި އޮތް ކަމެއް ނޫނެވެ. ރިޔަންއާ ކައިރިވާ މީހެއް ދެކެ ވެސް އަހާން ނަފްރަތު ކުރެއެވެ.

އަހާން ގެއަށް އައި ގޮތަށް ވަނީ އޭނާގެ ކޮޓަރިއަށެވެ.
ކިހިނެއްތޯވީ އަހާން ކިޔައިދިންތޯ ޔޫސުފް އިޝަލް ގާތު އެހިއެވެ. އިޝަލް ދެފަރާތަށް ބޯ ހޫރައިލައިފައި އަހާން އެއްވެސް އެއްޗެއް ނުބުނާކަމަށް ބުންޏެވެ.

ޒާޔާއަށް ރަނގަޅަށް ނިދުމުން މިންހާ ކޮޓަރިން ނިކުތެވެ. ރިޔަންގެ ކަންތަކުން އޭނާއަށް އެރިކްއާ ބައްދަލު ނުވުމުން ހިތާ ހިތުން ރިޔަންއަށް ކުދި ކިޔުނެވެ. ބަނޑުހައިވެފައި ހުރުމުން މިންހާ ކޮފީއެއް ބޯން ބަދިގެއަށް ވަނެވެ.

މިންހާ އެކަނި މާ އެކަނި ސިޓިންރޫމްގައި ކޮފީ ބޯން އިނެވެ. ޓީވީ ހުޅުވައިގެން އިނެއް ކަމަކު އެއަކަށް ސަމާލުކަމެއް ނުދެއެވެ. ގޭގެ ބެލް ޖެހި އަޑު އިވުމާއެކު މިންހާ ސިއްސައިގެން ދިޔައެވެ. ސޯފާ މަތީ އޮތް ފޯނުން ގަޑި ބަލައިލިއިރު އެގާރަ ޖަހަނީއެވެ. މޭޒު މަތީ ކޮފީ ތަށި ބައިންދައިފައި މިންހާ ވަރަށް ސިއްރުން ސޯފާއިން ތެދުވިއެވެ. ގޮސް ދޮރު ހުޅުވަންވީތޯ ނޫނީ ނޫންތޯ ވިސްނަން އިނެވެ. ދެވަނަ ފަހަރަށް ބެލް އެޅުމުން މިންހާ ބިރުގަތެވެ. މިންހާ ބިރުން ހުރެ ކުރިއަށް ހިނގައިގަތެވެ. ދޮރާ ހަމައަށް ދިއުމުގެ ކުރިން އަތު ޖެހުނު ދަނޑިބުރިއެއް ހިފައިގެން ގޮސް މަޑު މަޑުން ދޮރު ހުޅުވިއެވެ.

ކަޅު ހުޑީއަކުން މޫނު ނިވައިކޮށްގެން ހުރި މީހާ ފެނުމުން މިންހާ ގަތީ އަމަށަކު ބިރެއް ނޫނެވެ. މުޅިތަނަށް އަނދިރިކަން ވެރިވެފައި އޮތުމާއެކު މިންހާއަށް އެމީހާ ފެނުނީ ވަރަށް ބިރުވެރިކޮށެވެ. ދަނޑި ގަނޑު ނިކަން ރަނގަޅަށް އަތަށް ހެޔޮވަރުކޮށްފައި ލެވުނުހާ ބާރެއް ލައިފައި އެ ދަނޑިން އެމީހާ ބޮލުގައި މިންހާ ޖެހިއެވެ. އެމީހާ ނުވިސްނާ ހުރުމުން މިންހާ ޖެހުމާއެކުހެން ވެއްޓުނެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.