އިންތިހާ – 1

‎އުދަރެހުގައި ފެވިފައިވީ ކަޅު ކުލަ ފަނޑުވަމުން ގޮސް އިރުގެ ރަން ދޯދިތައް އުޑުމަތި އަލި ކުރަން ފެށީ، އަނދިރިކަމާއި ބިރުވެރިކަން ނައްތާލައި، އުންމީދުގެ ހުޅުކޮޅު ދިއްލައި ދެމުންނެވެ. ތެތް ފިނިކަމެއް ފަޒާގައި ހަރުލާފައި ހުރި އެ ވަގުތުގައި، އިރު އަރަމުން ދިޔަ ރީތި، ހިތްގައިމު މަންޒަރަށް ނަޒަރު ހުއްޓާލައިގެން ހުރި އިވާންގެ މޫނުމަތީގައި ވަނީ ފަނޑު ހިނިތުންވުމެކެވެ. އެ ބޮޑު ޓެރަހުގެ ރެއިލިންގެ ކައިރީ ހުއްޓި ހުރި އިވާންގެ އެއް އަތުގައި އާވީ އަރަ އަރައި ހުރި ކޮފީ ޖޯޑެއް ހުރި އިރު، ފަތިހުގެ އަމާން އެވަގުތުގައި މުޅި މާހައުލުގައިވަނީ ހަމަހިމޭން ކަމުގެ ސާލެއް އޮޅާލެވިފައެެވެ. ކޮފީ ޖޯޑުން އެތި ‎ފޮދެއް ބޯލުމަށް ފަހު އެ ތޫނު ދެލޮލުން އަތުކުރީގައި އޮތް ރޮލެކްސް ގަޑިޔަށް އިވާން ބަލާލިއެވެ.

**********************

‎ފަނަރަ ބުރީގެ އެ ބޮޑު ބިއްލޫރި އިމާރާތުގެ ކުރިމައްޗައް މަޑު ކޮއްލި ކަޅު ކުލައިގެ ބީއެމް ޑަބްލިއު ކާރުން ފޭބި ޒުވާނާއަށް އެތާގައި ހަރަކާތްތެރި ވަމުން ދިޔަ އެންމެންގެ ސަމާލުކަން ހުއްޓުނެވެ. ކަޅު ކުލައިގެ ކޯޓު ފަޓުލޫނުގައި ހުރި އެ ޒުވާނާގެ މޫނުމަތީގައި ވަނީ ސީރިއަސް ކަމެވެ. ކަޅު ކުލައިގެ ކަޅީގައި ވަނީ ތޫނު ކަމާއި ފުންކަމެވެ. ފަން ކަޅުކަން ގަދަ އިސްތަށި ކޮޅު ރީތި ގޮތަކަށް ހިއްލާ ލާފައި ހުރި އިރު، ތުނި ކޮށް ފަޅަން ފަށާފައިވާ ތުނބުޅި އެ ޒުވާނާގެ ރީތިކަމާއި ފިރިހެންވަންތަކަން އިތުރު ކޮށްދެއެވެ. ހަރު ހިނގުމެއްގައި ގޮސް ކުރިމަތިން ފެންނަން ހުރި އިމާރާތުގެ ތެރެއަށް ވަދެގެން ދިއައިރު، އޭނާ ފެނުނު ކޮންމެ މީހެއްވެސް ހެނދުނުގެ ސަލާމް އޭނާއަށް ކިޔާލަނީ އިޚުތިރާމާއި އެކީގައެވެ.

‎އޮފީހުގެ ތެރެއަށް ވަދެގެން އައި އިވާން ފެނުމުން ރިސެޕްޓަންގެ ކައިރީގައި ހުއްޓި ހުރި ތުގާ އައިސް އިވާން އާއި އަރައި ހަމަކޮއްލިއެވެ. ހިމަ ތޮޅި ހަށިގަނޑެއް ލިބިފައިވާއިރު، ގުދުރަތުން ތުގާއަށް ލިބިފައިވަނީ، ބުޅި އިސްތަށިގަނޑަކާއި އަލި ހަންގަނޑެކެވެ. “ވާން…މިއަދުގެ ފަސްޓް މީޓިންގް އޮތީ ނުވަގަޑި ބައިގަ…ދެޓް އިޒް ވިތް އޯލް ބޯރޑް އޮފް ޑައިރެކްޓާރސް…ދެން އާފްޓާރ ދެޓް ލަންޗް ބްރޭކްއަށް ފަހު އޭޒެޑް ސިޓީގެ ލޭންޑް ބަލަން ދިއުން….ދެން ތިން ގަޑި ފަނަރައިގަ ލޭންޑް އޯނާރސް އާއެކު މީޓިންގް އެއް….ވޯންޓް މީ ޓު ޗޭންޖް އެނީތިންގް؟” ފަރިތަކަމާއި އެކު އިވާންގެ ދުވަހުގެ ތާވަލު ތުގާ ކިޔާލަދިން އިރު އެކަމަށް އޭނާ ހޭނިފައިވާކަން ހާމަވެއެވެ. “ނޯޕް…ލޭންޑް ތަކުގެ ފައިލް ހިފައިގެން ދިހަ މިނެޓު ތެރޭ އަހަރެންގެ ކެބިންއަށް އާދޭ” ތުގާއަށް ލުއި ހިނިތުންވުމެއް ހަދިޔާ ކުރުމަށްފަހު ލިފްޓަށް އަރައި 14 ވަނަ ފަންގިފިލާއަށް ދިއުމަށް އިވާން ފިތަށް އޮއްބާލިއެވެ.

‎ފަނޑު ހިނިތުންވުމަކާއިއެކު ލިފްޓުގެ ދޮރު ލެއްޕެންދެން ބަލަން ހުރުމަށްފަހު ތުގާ ބޯ ހޫރުވާލަމުން ގޮސް އަނެއް ފަޅީގައި ހުރި ލިފްޓަށް އަަރައި ބާރަ ވަނަ ފަންގިފިލާގެ ފިތައް އޮއްބާލިއެވެ. އިވާންއާއި އެކު އިވާންގެ އެސިސްޓެންޓް އެއްގެ ގޮތުގައި އޭނާ މަސައްކަތް ކުރާތާ ފަސްއަހަރު ވެފައިވީ އިރު އިވާންގެ ގޮތް އޭނާއަށް ވަނީ ވަރަށް ރަނގަޅަށް ދަސްވެފައެވެ. ބަސްމަދު ސީރިއަސް މިޒާޖެއްގެ ވެރި އިވާންއަކީ، ހަރުދަނާ އަދި ޒިންމާދާރު ޒުވާނެކެވެ. ތުގާއާއި އިވާންއާއި ދިމާވީ ދެމީހުންވެސް ކޮލެޖުގައި ކިޔަވަން އުޅުނު ދުވަސްވަރުގައެވެ. ދެއާއިލާގެ ދެމެދުގައި އުފެދިފައިވީ ގާތް އެކުވެރިކަމުގެ ސަބަބުން އިވާންއާއި ތުގާއާއި ދެމެދުވެސް ވަނީ އެކުވެރިކަން އުފެދިފައެވެ. އެހެންނަމަވެސް އިވާންގެ އެހުންނަ ބީރައްޓެހި މިޒާޖުގެ ސަަބަބުން އެކުވެރިކަން އޮތަސް ކަމެއް ޖެހުނީމަ ނޫނީ އިވާން ތުގާއާއި ވާހަކަވެސް ދައްކާނީ އަތުން ގުނާލެވޭ ހައި މަދު ފަހަރެއްގައެވެެ.

‎ނަމަވެސް، ކޮލެޖު ދައުރުއް ސުރެ ތުގާގެ ހިތްވަނީ އިވާންގެ ނަން ކުރެވިފައެވެ. އޭނާގެ ހިތުގައި އިވާންގެ ނަމުގެ ސިއްކަޖެހުނުތާ އެތައް އަހަރެއް ވެގެން ދިއައިރުވެސް ތުގާ އޭނާގެ ދުލުން އެވާހަކަ އިވާން ގާތަކު ނުބުނެއެވެ. އޭނާ އިވާން އާއި މެދު ދެކޭ ގޮތް އެ ދެއާއިލާގެ އެންމެންގެ އިތުރުން އިވާންއަށްވެސް އިނގޭކަން ތުގާ ދެނެ ހުއްޓެވެ. ނަމަވެސް އިސްވެ އެކަހަލަ ވާހަކައެއް އިވާން ގާތު ދައްކަން އޭނާއަށް ފަސްޖެހެވެނީ އެދެމެދުގައި އޮތް ކުޑަ އެކުވެރިކަން ވެސް ގެއްލިދާނެ ތީއެވެ.

‎ލިފްޓު ބާރަވަނަ ފަންގިފިލާއަށް ހުއްޓުމާއިއެކު ތުގާ އަވަސްވެގަތީ އިވާން ގެންނަން ބުނި ފައިލުތައް ހިފައިގެން އިވާންގެ ކެބިންއަށް ދިއުމަށެވެ.

***************

‎”އޭ ކަލޯ މިހުރިހާ އަންހެން ކުދިން ކޮލެޖު ދޮރު ކައިރީގަ ފާރަޔަށް އެތިބެނީ އަނެއްކާ ކާކު ވަޑައިގަންނާތީ؟” ކޮލެޖުގެ ތެރެއަށް ވައިން އިރު ފެނުނު މަންޒަރަކުންނ ޝާދިން އަހާލީ އޭނާގެ ކައިރީގައި ހުރި މުއާވިންގެ ގާތުގައެވެ. ސެންޓަރަލް ހައި ކޮލެޖުގެ ހުރިހާ އަންހެން ކުދިން ކަހަލަ ގޮތަކަށް ގޭޓު ކައިރީގައި މަޑު ކޮއްލައިގެން ތިބި ގޮތުން ހީވަނީ ކޮންމެވެސް ޚާއްސަ ފަރާތެއްގެ އިންތިޒާރުގައި ތިބި ހެނެވެ. “ހެހެހެ ކައެ އަކަށް އަދި ނޭނގޭ ދޯ….އެ ކުދިން އެތިބެނީ އެ ކުދިންގެ ހިތުގެ ރާޖާ އަންނާނެ އިރެއްގެ އިންތިޒާރުގަ….” މުއާވިންއާއި ޝާދިންއާއި ދެމީހުނަށް އެއްފަހަރާ ކޮލެޖުގެ ގޭޓާއި ދިމާލަށް ބަލާލެވުނީ އަންހެން ކުދިންގެ ހަޅޭކުގެ އަޑު އިވެންފެށުމުންނެވެ.

‎ގޭޓުގެ ކުރިމައްޗަށް މަޑު ކޮއްލާފައި އޮތް ރަތް ކުލައިގެ ލެމްބޮގިނީ ކާރުގެ ދޮރުހުޅުވާލުމަށްފަހު ނިކުތީ ރީތިކަން ހުސްކޮއްގެން ހުރި ޖިންސުއްލަތީފެކެވެ. ލައިގެން ހުރި ކަޅުކުލައިގެ ގަމީސް އެ ކަސްރަތީ ހަށިގަނޑުގައި ހިފާލާފައި ހުރި އިރު، މަތިން ނައްޓާލެވިފައި ހުރި ތިން ގޮށުގެ ސަބަބުން އެ ތަނަވަސް މޭމަތި ފެންނަން ހުއްޓެވެ. ކަމީހުގެ އަތް އޮޅާލެވިފައިވުމުން އެ ޒުވާނާގެ އަތުގެ ވަރުގަދަ މަސްތައް ހާމަޔަށް ހުރި އިރު ގަވައިދުން ކަސްރަތު ކުރާކަން ހާމަވެއެވެ. ލައިގެން ހުރި ގަދަ ނޫ ކުލައިގެ ރިޕްޑް ޖީންސްގެ ޖީބަށް އަތް ޖަހާލައިގެން ހުރެ ފިރިހެން ވަންތަ ހިނގުމެއްގައި އެ ޒުވާނާ ކޮލެޖުގެ ތެރެއަށް ވަނުމާއި އެކު ތޫލި އަޑުތަކުން އަންހެން ކުދިން ހަޅޭއްލަވަން ފެށިއެވެ. ދެލޮލުގައި އަޅާފައި ހުރި ރޭބަން އަވި އައިނު ތިރި ކޮއްލަމުން ހިތްކަތިލާފަދަ ހިނިތުންވުމެއް ވެރި ކުރުވައިގެން ހުރެ ގޮސް އެޒުވާނާ ކޮލެޖުގެ ތެރެއަށް ވަދެގެން ދިއައެވެ.

‎”އައިއްކޯ….އައިއްކޯ….” ކޮރިޑޯ ތެރެއިން ހިނގަމުން ދިޔަ އެ ޒުވާނާ އެނބުރި ފަހަތް ބަލާލީ އައިއްކޯ އޭ ކިޔައި އަންހެން ކުއްޖަކު ގޮވާލި އަޑަށެވެ. ނަމަވެސް ފަހަތް ބަލާލުމާއިއެކު ދެވަނަ ސިކުންތުގައި އެ ޒުވާނާ އެތާގައި ހުރި ތަނބެއްގެ ފަހަތަށް ވަދެ ނިވާ ވެލީ ފެނުނު މީހެއްގެ ސަބަބުންނެވެ. ތަނބު ފަހަތުގައި ހުރެ ހިތާހިތުން އެ އަންހެން ކުއްޖާއަށް އޭނާ ނުފެނުމަށް އެދި އެ ޒުވާނާ ދުޢާ ކޮއްލިއެވެ. ކޮނޑުމަތީގައި މީހެއް އަތް ބާއްވާލިހެން ހީވުމުން ތަނބު ފަހަތުގައި ހުރި ޒުވާނާާ ފަހަތަށް އެނބުރިލިއެވެ.

‎”އައިމަން ގަނޑާ ލައި އަށް ފިލަންވެގެން ދޯ ތަނބުގެ ފަހަތަށްވަނީ….ހަނދާން ކުރާތި ކޮންމެ ތާކު އައިމަން މަހްމޫދް ފިލާ އޮތަސް މި ލައިބާ ޒާހިރަކަށް ނުފިލޭނެ” އެއް އިނގިލި އައިމަންއާއި ދިމާލަށް ދިއްކޮލައިގެން ހުރެ ލައިބާ ބުނެލި އިރު އޭނާގެ އަޑުގައިވަނީ ކެރުންތެރި ކަމެވެ. ވަށައިގެންވީ މާހައުލަށް ބަލައިލަމުން ލައިބާގެ އަތުގައި ހިފައިގެން ގޮސް އައިމަން އެތާގައި ހުރި ކުލާސް ރޫމަކަށް ވަނީ އެދެމީހުނަށް އަމާޒުވެފައ ހުރި ލޯތައް މަދު ކުރުމަށެވެ. ކުލާސް ރޫމަށް ވަނުމަށްފަހު ލައިބާ އޭނާއާއި ފާރާއި ދެމެދުގައި ހައްޔަރު ކޮއްލަމުން، އައިމަން ލައިބާއާއި ގާތަށް ޖެހިލިއެވެ.

‎”ލައި….ހޫ އޭމް އައި؟” އޭނާގެ ފިރިހެންވަންތަ ރީތި އަޑުން އައިމަން އަހާލިއެވެ. އައިމަންގެ ތޫނު ދެލޮލަށް ނަޒަރު ހުއްޓާލައިގެން ހުރި ލައިބާ ހުރީ އައިމަން އާއި އެހައި ގާތުގައި ހުންނަންޖެހުމުން ނޭވާލާންވެސް ހަނދާންނެތިފައެވެ. އެހެންނަމަވެސް ދެވަނަ ސިކުންތުގައި އަމިއްލަ ނަފްސު ހަމަޔަކަށް އަޅުވާލަމުން އޭނާގައި ލޮލުގައި އަޅާފައި އިން ކަޅު ދުނިގަނޑެއްލީ ނަމްބަރު އައިނު ލައިބާ ރީތި ކޮއްލިއެވެ. “ތީ… ތީ ދޯ…ޔެސް…ތީ އައިމަން….ނިކް ނޭމް އައިއްކޮ އެންޑް ތީ ލައިބާ ޒާހިރުގެ ބެސްޓް ފްރެންޑް” ކުޑަކޮށް ވިސްނާލުމަށްފަހު ލައިބާ ޖަވާބުދިނުމާއި އެކު އައިމަން އޭނާގެ އެއްބުމަ އަރުވާލިއެވެ. “އޯކޭ އޯކޭ….ތީ ދަ މޯސްޓް ފޭމަސް މޯސްޓް ޓެލެންޓެޑް…މުޅިރާއްޖޭގަވެސް ހުރި އެންމެ ޔަންގް އެންމެ ހޮޓް ލަވަކިޔުންތެރިޔާ….ދި ރޮކްސްޓާރ….އައި މީން ޕޮޕް ސްޓާރ އޯ ވަޓްއެވާރ… އައިމަން މަމްދޫހް” ކަޅި އަނބުރާލަމުން ލައިބާ ޖަވާބު ދިންގޮތުން އައިމަންގެ ގާތަށް އައީ ލާނެތް ހިންޏެކެވެ.

‎”ސޯ ތިހުރިހާ ކަމެއް އިނގޭ އިރު މުޅި ކޮލެޖުގެ ކުރިމަތީގަ ޔޫ ކޯލްޑް މީ އައިއްކޮ….ސީރިއަސްލީ ބީބާ….އައި ވިޝް ޔޫ ވާރ ކޫލް ލައިކް ޒޯ” އެއްލޯ މަރާލަމުން އައިމަން ވާހަކަ ދެއްކީ ލައިބާ ދުރަށްޖެހި ލަމުންނެވެ. “ފަސްޓް ސްޓޮޕް ކޯލިންގް މީ ބީބާ! ސެކަންޑް…ހަމަ އައިއްކޮ ކިޔާނީ ކީތްކުރެވޭނީ….ތާރޑް ޒޯ ކޫލް އޭ ކިޔާއިރު ތޭންކް މީ…ކޮޒް ޒޯ އިޒް މައި ފްރެންޑް…އެންޑް ޒޯހާ އެހާވެސް ކޫލް އިއްޔާ ގޮސް ޒޯހާ ބެސްޓް ފްރެންޑްއަށް ހަދާބަލަ” ލައިބާ ވެސް ޖަވާބުދިނީ ހަމަ އެރާގުގައެވެ. “ޖެލަސްވީމަ އަދި މާ ކިއުޓް….ދެން ކްލާހަށް ވަޑައިގަންނަވަން ވީނު….ތިހެން ހުއްޓާ ގަޑި ޖެހޭނީ….ގަޑި ޖެހިގެން ލައިބާ ޒާހިރު ކުލާހަށް ދިއުމަކީ ސޯ ނޮޓް ލައިކް ދަ ބަސްއަހާ ބީބާ” ހެމުން ހެމުން ލައިބާއަށް އައިމަން މަލާމާތް ކޮއްލި އިރު، ލައިބާ ހުރީ ތުންކޮޅު ދަމާލައިގެނެވެ. ލައިބާއަށް ލިބިފައިވަނީ ފަން އިސްތަށިކޮޅަކާއި، ރޫފަރީތި ހަށިގަނޑެކެވެ. ލާ ދޫ ހެދުންތަކުގެ ސަބަބުން އޭނާގެ ރީތި ބައްޓަން ފޮރުވިފައިވިޔަސް، އެދޮންމޫނާއި ބޮޑު ދެލޮލާއި ދިގު އެސްފިތަށް ލައިބާގެެ މައުސޫމުކަމާއި ރީތިކަން އިތުރު ކޮށްދެއެވެ. ބޮޑު ދެލޯ ކަޅުކުލައިގެ ނަމްބަރު އައިނަކުން ފޮރުވާލެވިފައި ވީއިރު، އެ ފަން އިސްތަށިކޮޅު އަބަދުމެ ހުންނާނީ ގަތާލާފައެވެ. ކިޔަވަން މޮޅުވެފައި ލައިބާގެ މި ސިފަތަކުގެ ސަބަބުން ކޮލެޖުގެ ގިނަ ކުދިން ލައިބާ ސިފަކުރަނީ “ނާރޑް” އެއްގެ ގޮތުގައެވެ.

‎އަތުގައި އޮތް ބޯ ފޮތުން އައިމަންގެ ކޮނޑުމަތީގައި ބޮނޑިއެއް އަޅުވައިލުމަށްފަހު އެ ކުލާސް ރޫމުން ލައިބާ ނިކުތީ ތުންދަމައިގެން ހުރެ ކަމުގައި ވިޔަސް، ނިކުތުމާއި އެކީ އެ މައުސޫމު މޫނު މައްޗަށް ލަދުރަކި ހިނިތުންވުމެއް ވެރިވެގެން ދިއައެވެ. ތިރީ ތުންފަތުގައި ދަތް އަޅާލައިގެން ހުރެ ލައިބާ އޭނާގެ ކުލާހަށް މިސްރާބުޖެހީ ވެސް އައިމަންގެ ހިޔާލުތަކުގައި ހުރެއެވެ. ނަަމަވެސް މިނެޓެއް ނުވަނީސް ބޯ ހޫރުވާލުމަށްފަހު ގޮސް ޖެހިގެން ހުރި ފާހަނާއަށް ވަދެ ލޯގަނޑުގެ ކުރިމަތީގައި ހުއްޓިލިއެވެ. އައިނު ނަގައި މޫނު ދޮންނަ ތަށީގެ ކައިރީ ބޭއްވުމަށްފަހު ދެތިން ފެންގޮށި ނަގައި އޭނާގެ މޫނަށް ލައިބާ ޖަހައިލިއެވެ. “ޔޫ އަރ ނޮޓް ވޯރތް ހިމް…” އަބަދުމެ އަމިއްލަ ނަފްސަށް ވިސްނައިދޭން މަސައްކަތްކުރާ ވާހަކަ ލައިބާ ތަކުރާރު ކޮއްލިއެވެ.

‎އައިމަންއާއި ލައިބާގެ އެކުވެރިކަމުގެ ބިންގާ އެޅުނީ ދެމީހުންވެސް ގުރޭޑު ހަތެއްގައި ކަޔަވަމުން ދިޔަ ދުވަސްވަރުގައެވެ. އެއީ ރަށުގައި އުޅުމަށްފަހު މާލެއަށް ލައިބާގެ އާއިލާ އެމީހުންގެ ދިރިއުޅުން ބަދަލުކުރި އަހަރުގައެވެ. އޭރު އައިމަންއަކީ މުޅި ކުލާހުގައިވެސް އެންމެ މަޑުން ނުހުރެވޭ ބަސްނާހާ ކުއްޖާއޭ ބުނުމަކުން ދޮގަކަށް ނުވާނެއެވެ. އެއާ ހިލާފަށް ލައިބާއަކީ ބަސްމަދު މަޑުމައިތިރި އަދި އެހާމެ ބަސްއަހައިގެން ކިޔަވާ މޮޅު ދަރިވަރެކެވެ. ފުރަތަމަ ދެމީހުންގެ ދެމެދުގައި ވާހަަކަ ދެކެވެން ފެށީ ކުލާސް ޓީޗަރު އައިމަން ލައިބާއާއި ޖެހިގެން އިންނަ ޑެސްކުގައި ބޭންދުމުގެ ސަބަބުންނެވެ. ބަސްމަދު އެހެންމީހުނާއި ވާހަކަ ދައްކައި ނޫޅޭ ލައިބާއަށް އައިމަންގެ އެހުންނަ ސަކަ މިޒާޖުގެ ސަބަބުން އައިމަންއާއި ވާހަކަ ދެއްކުން ފަސޭހަވިއެވެ.

‎ އައިމަންއަށް ވެސް އެހެން އެކުވެރިންނަށް ނުކުރެވޭ މިންވަރަށް ލައިބާއަށް އިތުބާރު ކުރެވެން ފެށިއެވެ. އެކަކު އަނެކަކާއި ކަންކަން ހިއްސާކޮށް ސުކޫލު ދައުރު ނިމުނީވެސް އެންމެ ގާތް އެކުވެރިންގެ ގޮތުގައި ދެމީހުން ތިބެއެވެ. އައިމަންގެ ދިރިއުޅުން ބަދަލުވެގެން ގޮސް އެންމެންގެ މެދުގައި މަގުބޫލު ޝަހުސިއްޔަތަކަށް އައިމަން ވެގެން ދިއައީވެސް ލައިބާ އައިމަންގެ ގާތުގައު މިތުރެއްގެ ހައިއްސިޔަތުން އެއްބާރުލުންދޭން ހުއްޓައެވެ. މިހާރު ދެމީހުންގެ އުމުރުންވެސް ބާވީސް އަހަރުފުރި ދެމީހުންވެސް ކިޔަވަމުން އަންނަނީ ސެންޓަރަލް ހައި ކޮލެޖުގައެވެ. ނަމަވެސް ކިޔަވަމުން އަޔަސް އައިމަންގެ ސަމާލުކަން ދެވިފައިވަނީ ލަވަކިއުމަށެވެ.

**************

‎ކެބިންގެ ދޮރުގައި ޓަކިދިން އަޑު އިވުމާއިއެކީ އެތެރެއަށް ވަނުމުގެ ހުއްދަ އިވާން ދިނެވެ. ފައިލެއް ހިފައިގެން ތުގާ އެތެރެއަށް ވަދެގެން އައި އިރު އޭނާގެ މޫނުމަތީގައި ވަނީ އަބަދުމެ ހުންނަ ސާދާ ރީތި ހިނިތުންވުމެވެ. ތުގާއަށް އިށީންނުމަށް އިޝާރާތް ކޮއްލަމުން، ތުގާ ގެނައި ފައިލަށް އިވާން އޭނާގެ ސަމާލުކަން ހުއްޓާލިއެވެ. އެއީ އެ ކުންފުންޏަށް ވަރަށް މުހިންމު އަދި ވަރަށް ކުރިން ސުރެ އެ ޕްރޮޖެކްޓަކަށް އެ ކުންފުނި ތައްޔާރުވަމުން އަންނަ ޕްރޮޖެކްޓެއްގެ ބިމާއި ބެހޭ ފައިލެވެ. ބިން ހަމަޖެހުމާއި އެކު އޭޒެޑް ސިޓީގެ މަސައްކަތް ފެށިގެންދާނެއެވެ. މި ޕޮރޮޖެކްޓަށް އޭޒެޑް ސިޓީގެ ނަމުން ނަން ދެވުނީ، މި ޕްރޮޖެކްޓަކީ ބޮޑު ބިންތަކެއް އެއް ކޮއްލައިގެން ބައިވަރު ފްލެޓުތަކަކާއި މޯލްތަކެއް ހެދުމަށް ކަނޑައެޅިފައިވާ ޕްރޮޖެކްޓަކަށް ވާތީއެވެ. އޭޒެޑް ޤްރޫޕް އޮފް ކޮމްޕެނީސްގެ މި ޕްރޮޖެކްޓަކީ މިހާތަނަށް އެ ކުންފުނިން ފަށަން އުޅޭ އެންމެ ބޮޑު އަދި އަގުބޮޑު ޕްރޮޖެކްޓު ވެސްމެއެވެ. މީގެއިތުރުން އޭޒެޑް ސިޓީއަކީ އިވާންގެ ހުވަފެނެވެ. ބައްޕަ އުޒާމްއާއި ހުރިހައި އިންވެސްޓަރުންނަށް އިވާން ވެފައި އޮތް ވަޢުދެކެވެ.

‎ބިންތަކާއި ބެހޭގޮތުން މަޝްވަރާ ކުރުމުގައި ތިބުމަށްފަހު އެ މަޝްވަރާ ކުރު ކޮއްލަން ޖެހުނީ މީޓިން ފެށޭގަޑި ޖެހުމުންނެވެ. ކުންފުނީގެ މިހާރުގެ ވެރިޔާގެ ހައިސިއްޔަތުން ދައްކަންޖެހޭ އަދި އޮޅުން ފިލުވައިދޭންޖެހޭ ކަންތައްތައް ބޯރޑް އޮފް ޑައިރެކްޓަރުން ނުވަތަ ކުންފުނީގެ ހިއްސާދާރުންނަށް އޮޅުފިލުވައިދީ މީޓިންގް ނިމުނު އިރު މެންދުރުގެ ކެއުމުގެ ގަޑިޖެހޭކަށް އެހައި ގިނަ ވަގުތެއް ނެތެވެ. މީޓިންގް ރޫމް އިން ނިކުމެގެން ގޮސް އަމިއްލަ ކެބިންއަށް ވައިން އިވާންގެ މޫނުމަތި އުޖާލާ ވެގެން ދިއައީ ކެބިން ތެރޭގައި ހުއްޓި ހުރި ޒުވާނާ ފެނުމުންމެވެ.

ނުނިމޭ

އައްސަލާމު އަލައިކުމް. ހުރިހާ ކިޔުންތެރިން ވެސް ތި ތިބީ ފުރިހަމަ ރަނގަޅު ސިއްހަތެއްގައި ކަމަށް އުންމީދުކުރަން. މީ އަޅުގަނޑު މި ސައިޓަށް ލިޔާ ދެވަނަ ވާހަަކައިގެ ފެށުން. ތިޔަ ހުރިހާ ކިޔުންތެރިންގެ ސަޕޯރޓާއި އެއްބާރުލުން މި ވާހަކައަށް ލިބޭނެ ކަމަށް އުންމީދުކުރަން އަދި، ތިޔަބޭފުޅުންގެ ފާޑުކިޔުން އަޅުގަނޑު އުފަލާއި އެކު ބަލައިގަންނާނެ ވާހަކަ ވެސް ދަންނަވަން. ވާހަކައާއި މެދު ތިޔަ ކިޔުންތެރިން ދެކޭ ގޮތް އަދި ހިޔާލުތައް ކޮމެންޓުގެ ޒަރިއްޔާއިން އަޅުގަނޑާއި ހިއްސާ ކޮއްލައްވާ.

ޝުކުރިއްޔާ!

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.