ހިތުގެ ފަސާނާ

ކަޅުފޮއި ރޭނގަޑެކެވެ. ފުދޭވަރަކަށް ވައި ޖެހެމުން ދިޔައެވެ. ހަމަ އެހެންމެ އުޑުމަތި ބައްދާލާފައިވަނީ ކަޅުކަން ގަދަ ވިލާތަކުންނެވެ. އިރުއިރުކޮޅާ ޖަހާލާވިދުވަރުތަކާއި ގުގުރިއެއްގެ ސަބަބުން މީހުންގެ ހިތްތަ ކަށް ބިރުވެރިކަން ވެރިވަމުން ދިޔައެވެ. ވިއްސާރަ ވުމުގެ އަލާމާތްތައް އުޑުމަތިން ދައްކަމުން ދާއިރު މިއިން އެއްވެސް ކަމަކަށް ފަރުވާލެއް ނެތި ނަގަމުންދާ ބިޔަ ރާޅު ތަކަށް ބަލައިގެން އަހަރެން ގޮޑުދޮށުގައި އިނީމެވެ. އެތޫފާނަށްވުރެ އަހަރެންގެ ހިތުގައި އުތުރި އަރަމުންދާ ތޫފާންތައް މާ ބާރުގަދަ އެވެ. ދެން އަންނާނީ ކޮން ކަހަލަ ތޫފާނެއް ކަމެއްވެސް ނޭނގެއެވެ. މިކަހަލަ ޙިޔާލުތަކުގެ ތެރެއިން އަހަރެންގެ މާޒީއަށް ފީނާލެވުނެވެ.

******************

އެއީ މީގެ 2 ވަރަކަށް އަހަރު ކުރިއެވެ. އަހަރެންނަކީ ދެރަ ނިކަމެއްޗެކެވެ. އާރެއް ބާރެއް ނެތް ބަލިކަށި މީހެކެވެ. ފަޅުކަމުގައި މިލަމުން ގޮސް އެކަހެރި ކަމުގައި އަހަރެންގެ ޙަޔާތުގެ ރޭތަކާއި މަސްތަކާއި އަހަރުތައް ވޭތުކުރަމުން ދިޔައީމެވެ. އެހެންނަމަވެސް އަހަރެންގެ ހަޔާތަށ ފާގަތިވި ބަހާތައް ގެނެސްދިނީ އެނިޔަނެތި އައިރާއެވެ. ހިތްހެޔޮ ދީންވެރި އަޅުވެރި ޒުވާނެކެވެ. އައިރާ އަކީ މަދުންނަމަވެސް ނުލިބޭނެ ފަދަ ލޮބުވެތި ނާޒުކު ޖިންސުއް ލަތީފެކެވެ. ދެމީހުން އެކުވެރިވެ ދެ ލޯބިވެރިންގެ ގޮތުގައި ގުޅިގެން ދިޔައީ ވަރަށް ކުޑަ ދުވަސްކޮޅެއްގެ ތެރޭގައެވެ. އެތަކެއް ރޭތައް އުފަލާއެކު އަހަރެމެން ހޭދަކުރަމުން ދިޔައީމެވެ. ދުވަސްތައް މާޒީއާއި އެކުވެގެން ދިޔައީ ދެހިތައް އެއްވެސް ކަހަލަ ހަމަނުޖެހުމެއް ނުލިބިއެވެ.

ދެމީހުންގެ ޙިޔާލާ އެއްގޮތަށް ޒަވާޖީ ޙަޔާތެއްގެ ބިންގާ ދެމީހުންގެ މެދުގައި އެޅީމެވެ. އިނދެގެން މާގިނަ ދުވަސްތަކެއްނުވެ ލިބުނީ އަހަރެން އެންމެ އުފާވި ޚަބަރެކެވެ. އަހަރުމެންގެ އަލަތު ދަރިފުޅަށް އަނބިމީހާ ބަލިވެ އިންކަން އެނގުނީއްސުރެ އަހަރެންގެ ހުރިހާ ވަގުތެއް އަނބިމީހާއަށާއި ލިބެން އުޅޭ ދަރިފުޅަށް ހުސްކޮށް ލީމެވެ. މޫދުގެ ދިޔަވަރާއި ކަނޑުގެ  އޮއިވަރު ބަދަލުވާ ފަދައިން އަހަރުމެންގެ ހަޔާތައް އިތުރު އާރޯކަމެއް ލިބިގެންދިޔައީ އަހަރުމެންގެ އަލަތު ދަރިފުޅު އިއާރާ ދުނިޔެއަށް އުފަންވި ދުވަހުގައެވެ . އައިރާގެ އާއިލާ އަކީ ފޯރުންތެރި އާއިލާ އެއް ކަމުން އެއްވެސް ކަމަކަށް އަހަރުމެންނަށް ދައްޗެއް ނުވެއެވެ. އަހަރުމެން އުޅެމުން އައީ އުފަލާއި މަޖަލުގައެވެ. ތަނަވަސް ކަމުގެ ތެރޭގައެވެ.

ކުއްޖަކު ލިބުމުން އައިރާގެ ހަޔާތް ބަދަލުވެގެން ދިޔައެވެ. ގޭތެރޭގެ ކަންތައްތަކާއި އިއާރާ ގެ ކަންތައްތައް ކުރުމުގައި އާއި އަހަރެންގެ ކަންކަމުގައި އައިރާ އެކަނި އުޅޭތީ ގިނަފަހަރު ހުންނަނީ ވަރު ބަލިވެފަ އެވެ. ގިނަ ދުވަސް ތަކުގައި އުޅެން ޖެހޭނީ ބަލިވެ އެވެ. މިހެންކަންތައް ވުމުން އަހަރެން ވަރަށް ހިތްދަތި ވެއެވެ. ހަމައެހެންމެ އުފާވެސް ވެއެވެ. އެފަދަ ކިޔަމަންތެރި އަންބެއް ލިބުމުން ފަޚުރުވެރި ވެއެވެ. އެފަދަ ލޮބުވެތި އަންބެއް ލިބުނު ކަމަށްޓަކައި މާތް ﷲ އަށް ޝުކުރު ކުރަމެވެ.

ދުވަސްތައް ހަލުވިކަމާއެކު ފާއިތުވަމުން ގޮސް އެއްދުވަހަކު ޅިޔަނުބެ ދިން ޚިޔާލަކާއި މެދު ވިސްނާލީމެވެ. ހަމައެހެންމެ އައިރާ އާއި ވެސް މަޝްވަރާ ކޮށްލުމަށް ފަހު ގޭގެ ކަންތައްތައް ކޮށްލުމުގައި އަތް ގާތް ކޮށްލަ ދޭން ގެއަށް ކުއްޖަކު ގެނައުމަށް ނިންމީމެވެ. އެހެންކަމުން ޅިޔަނުބެ ގެ އަންހެން ދަރި ގެއަށް ގެނައީމެވެ.

އަންނަން އޮތް ރާޅުގެ ބޮޑުކަމާއި ނުރައްކާތެރި ކަމެއް ނޭނގެއެވެ. ކޮންމެއަކަސް ކަންތައް ވެގެންދާނެ ގޮތް އެނގޭނީ ފަހެ ކަމަށް ހެއްޔެވެ؟ ކޮންމެ މީހަކީވެސް އަމިއްލަ އުސޫލުތަކަކަށް އުޅޭ މީހެކެވެ. ނައިލޯނު ވަލުން މަރުދަން ޖެހުނަސް ގޮސް މަގަކުން ނުހިގާނެ ކަމަށްވެސް އަހަރެން ބުނީމެވެ. އެހެންނަމަވެސް ޝައިޠާނާގެ ވަސްވާހަށް ހެއްލި އަހަރެންނަށް ޅައެއްޗެއް އެޅުނެވެ. ގެއަށް ގެނައީ ޅިޔަނުގެ ދަރިޔާ ނަހަމަ ގުޅުމެއް ހިންގުނެވެ. ހަމައެހެންމެ އަނބިމީހާއަށް މިކަންތައް އެނގުމުން އަހަރެން ބޭޒާރުވިއެވެ. ކުރި އިތުބާރު އަހަރެންގެ މި ދެއަތުން ވެއްޔާ މޮޑެލީއެވެ. ހަމައެހެންމެ ދެމެދުގައި ވަރުގަދަ ހައިޖާނެއް އުފެދުނެވެ.

ދުވަސްތައް ހަލުވިކަމާއެކު ވޭތުވަމުން ގޮސް އެކަންތައް ހައްލު ނުވެ ކަންތައްތައް ގޯހުން ގޯހަށް ގޮސް ބޮއްސުންލައިގެން ދިޔައެވެ. ދެމީހުންގެ މެދުގައި ޒުވާބު ކުރުންތައް އިތުރުވިއެވެ. މިއާއެކު އަނބިމީހާ ރަށު ކޯޓަށް ގޮސް ސުލްހަވެރިކަމާއެކު ދެމީހުންގެ ކައިވެނި ރޫޅުނެވެ. ގޯއްޗަށް އަނބުރާ އަންނަން ޖެހުނީ އެކަންޏެވެ. އަނބިމީހާ ދިޔައީ އަހަރެމެންގެ ދަރިފުޅު އިއާރާ ގޮވައިގެންނެވެ. އަހަރެންނަށް އަނެއްކާވެސް މަރިޔަބު، ކަތިވަޅި އަދި ކޮށިދަނޑު ވެސް ގެއްލި ބާކީ ވެގެން ދިޔައީ ސިހުމެއް ގެނުވާފައެވެ.

މިޚިޔާލުތަކުގެ ތެރެއިން ބޭރުވެވުނީ ޖަހާލި ހޮނު ގުގުރިއެއްގެ ސަބަބުންނެވެ. އަހަރެން ވިސްނާނުލާ ކުރި ކަމަކުން އަހަރެންގެ ހަޔާތް ކުދި ކުދިވި ގޮތް ހޯދައި އެގޮތަށް ނޫޅުމަކީ މިއަދުގެ މުޖުތަމަޢުގެ މީހުން ކައިރިން އެދޭ ވަރަށް ބޮޑު އެދުމެކެވެ. މިކަހަލަ އެތައް ހާދިސާއެއް ދިމާވެ އެތަކެއް ބައެއްގެ ދިރިއުޅުން ހަލާކުގެ ތެރެއަށް ވެއްޓިގެން ދެއެވެ. އެފަދައިން އަހަރެންނަކީ މިއަދު، އޭރު އުޅެވުނު ގޮތަކުން އެކަނިވެރިވެ ދެރަވާ މީހެކެވެ. އެހެންނަމަވެސް އަދިވެސް ހިތްވަރާއެކު ދިރިއުޅުމާއިގެން ކުރިއަށް ދާނަމެވެ. މިއީ އަހަރުމެން އިބްރަތް ލިބިގަންނަންޖެހޭ ކަންތައްތަކެވެ.