ހިތަކުން ހަމަނުފިލާނޭ… (03ވަނަ ބައި)

މިއަދަކީ ނާޒް ފުރުމަށް ހަމަޖެހިފައިވާ ދުވަހެވެ. ރޭގަނޑު 11 ޖެހުމުގެ ކުރިން ބޯޓަށް އަރަން ޖެހެއެވެ. ފުރަންދާންޖެހޭ ވަގުތު ކައިރިވަމުން އަންނަ ވަރަކަށް ނާޒްގެ ހިތް ނުތަނަވަސް ވަމުން ދިޔައެވެ. އިރުއޮއްސުނީއްސުރެ މުޅި މީހާ ހުންނަނީ ނެގިމަޑުވެފައެވެ. ރަށަށް ދެވޭތީ ކުރިން ފަހަރުތަކުގައިވާހާ އުފަލެއް މިފަހަރަކު ނުވެއެވެ. 7ޖަހަން އެޅެނިކޮށް ނާޒްގެ ފޯނަށް ނުދަންނަ ނަންބަރަކުން މެސެޖެއް އައެވެ. އެހެންނަމަވެސް، އެމެސެޖް ކިޔާލުމުން އެމެސެޖް ފޮނުވި ފަރާތް އެނގި، ހިތައް ކޮންމެވެސް ވަރެއްގެ އުފާވެރިކަމެއް ލިބުނެވެ.

ކުޑަކޮށް ތައްޔާރުވެލައިގެން 7:30ވުމުގެ 5 މިނިޓް ކުރިން ނާޒް ހުރީ ހެދިގޮނޑުދޮށުގައި އިރުކޮޅެއްކުރިން އޭނާއަށް ލިބުނު މެސެޖްގައި ބުނެފައިވާ ތަނުގައެވެ. އެހިސާބުގައި ފުދޭވަރަކަށް މީހުން ހިނގާބިނގާވެ އުޅޭތީ މާޙަލު ފެންނަނީ ހަލަބޮލިކޮށެވެ. ނާޒް ދެކޮޅު ހޯދާ ބަލާލުމުން ތަންކޮޅެއް ދުރުގައި ހުރި ރުކެއްގައި ލެނގިލައިގެން ހުރި ޝާން އޭނާގެ ލޮލުގައި އަޅައިގަތެވެ. އެވަގުތު ޝާން އަށްވެސް ނާޒް ފެނިގެން އަތުގެ އިށާރާތުން އެދިމާއަށް އަންނަން އެދުނެވެ. ނާޒް މަޑުމަޑުން އެދިމާއަށް ހިނގައިގަތްއިރު ބާރުބާރަށް ހިތް ނެގިނެގިފައި ޖެހެއެވެ. އެހެން ނުވާންވީވެސް ކީއްވެގެން ހެއްޔެވެ. މިއީ ނާޒް ފިރިހެން ކުއްޖަކާ މިގޮތަށް ބައްދަލުކުރާ ފުރަތަމަ ފަހަރެވެ. އަދި އޭނާ ގޭގެ މީހުންކައިރީގައި ދޮގެއް ހަދާފައި އެކަނި ބޭރަށް ނުކުތްވެސް ފުރަތަމަ ފަހަރެވެ. އަމުދުން އިރުއޮއްސުމުގެ ފަހުންނެވެ. ނާޒްމެން ދިރިއުޅޭގެ ހެދިގޮނޑުދޮށާ އެހާ ކައިރީގައި ހުންނަނީވެސް ނަސީބެކޭ ނާޒްގެ ހިތައް އެރިއެވެ.

ނާޒް ހުރީ ބިރުގަނެ ޖެހިލުންވެފައިކަން ނާޒްގެ މޫނަށް ބަލާފައި ވަރަށް އަވަހަށް ޝާން ދެނެގެންފިއެވެ. އެހެންނަމަވެސް ފުރުމުގެ ކުރިން ކޮންމެހެންވެސް ނާޒްއާ ބައްދަލުކޮށްލާހިތް ވެފައިވާލެއް ބޮޑުކަމުން ޝާން އެކަން އެނގޭކަމަށް ހަދާނުލައި ހުރީއެވެ. “ތެންކިއު އައިސްދިނީތީ. ހިއެއް ނުކުރަން އަންނާނެކަމަކަށް.” އިސްވެ ޝާން ވާހަކަ ދައްކަން ފެށިއެވެ. ޖަވާބުގައި ނާޒް ހަމައެކަނި ހިނިތުންވުމެއް ހަދިޔާކޮށްލިއެވެ. “ހިނގާ ދޯ ތަންކޮޅެއް އެކޮޅަށް ގޮސްލަން” ތަންކޮޅެއް މީހުން މަދު ހިސާބަކަށް އިށާރާތްކޮށްލަމުން އަނެއްކާވެސް ވާހަކަ ދެއްކީ ޝާން އެވެ. ޝާން އާއި ނާޒް އެކުގައި މަޑުމަޑުން ހިނގާފައިގޮސް މަޑުކޮށްލީ ތަންކޮޅެއް ދުރުގައިހުރި ހުސްގޮނޑިއެއްގެކައިރީގައެވެ. “މިތާ އިށީންނަންވީނު ދޯ. މިހިސާބު ތަންކޮޅެއް ހަމަހިމޭން ކަންނޭނގެ.” ކައިރީގައިހުރި ގޮނޑިގައި އިށީންނަން އިޝާރާތްކޮށްލަމުން ޝާންވެސް ހަމަ އެގޮނޑީގައި އިށީނެވެ. ޝާންއާއި އެހާ ގާތުގައި އިންނަންޖެހުމުން ނާޒް ހުރީ ނުހަނު އުނދަގޫވެފައެވެ. “ވަރަށް ބިރުންތަ ތިއިނީ.” ދެމީހުންވެސް އެއްވެސް އެއްޗެއް ނުބުނެ ހަމަހިމޭންކަމުގެ ކުޑަ ވަގުތުކޮޅެއް ހޭދަވެގެން ދިއުމަށްފަހު ޝާން ވާހަކަދެއްކިއެވެ. “ނޫން.” ނާޒްގެ މޫނަށް ބަލަންއިން ޝާން އާ ހަތަރުކަޅި ހަމަކޮށްލަމުން ނާޒް ޖަވާބުދިނެވެ. އެވަގުތު ޝާންގެ އެބެލުމަށް ކެތް ނުކުރެވިގެން އަވަސް އަވަހަށް ނާޒް އަށް އިސްޖަހާލެވުނެވެ. “އެހެންވިއްޔާ ކީއްވެ މާ މަޑުމަޑުން ތިއިންނަނީ.؟” ކައިރީގައި އޮތް ނާޒުގެ އަތްތިލް އަތުތެރެއަށް ލަމުން ޝާން މަޑުމަޑުން އަހާލިއެވެ. އަދި އެފިނިފިނި އަތްތިލައަށް ފިތާ ބާރުކޮށްލީ ދެން ދުވަހަކުވެސް ދޫކުރަން ބޭނުންނުވެޔޭ ބުނާފަދަ ގޮތަކަށެވެ. ޝާންގެ މި ޙަރަކާތުން ކިތަންމެ ލަދުގަތްނަމަވެސް، ނާޒްވެސް ޝާން ހުއްޓުވާކަށް މަސައްކަތެއް ނުކުރެއެވެ. ދުވަހަކުވެސް ފިރިހެނެއްގެ ބީހިލުމެއް އިޙްސާސްކުރެވިފައިނުވާ ނާޒްގެ މަޢުސޫމް ހިތައް އެކަމުން ލިބުނީ ބުނެދޭންވެސް ނޭނގޭކަހަލަ ފޮނި އިޙްސާސެކެވެ. ލަދުންގޮސް ނާޒްގެ މޫނަށް ދޮންޖަމްބު ކުލަ އަރައިގެންދިޔައިރު އެފަނޑު އަލިކަމުގެ ތެރޭގައިވެސް ޝާން އަށް އެކަން ފާހަގަވިއެވެ. “އަހަރެން ދެންމެ ސެސް.އެމް.އެސް މިފޮނުވީ އަހަރެން ބޭނުންކުރާ ނަންބަރުން. ސޭވް ކޮށްލާފައި ބާއްވާ އިނގޭ. ނާޒް ބޭނުންއިރަކު އަހަންނަށް ގުޅޭނެ. ވަރަށް ގިނައިން ގުޅައްޗޭ. ވަރަށް ވަރަށް މިސްވާނެ.” ނާޒްގެ ބީރައްޓެހިކަން ކުޑަކުރުމަށްޓަކައި ޝާން ވާހަކަ ދައްކަން ފެށިއެވެ. އެހާމެ އޯގާތްތެރިކަމާއި ލޯތްބާއެކުގައެވެ. އެހެންކަމުން ދާދި ކުޑައިރުކޮޅެއްގެ ތެރޭގައި ނާޒްގެ ހާސްކަން ކެނޑި ހަމައަކަށް އެޅުނު ކަމުގައިވިޔަސް އެނާ އަދިވެސް އިނީ ލަދުންނެވެ. ވާހަކަ ދައްކަނީވެސް ވަރަށް މަދުންނެވެ.

ނާޒް ފުރުމަށްޓަކައި ވަގުތުވެސް ކުޑަތަންވެފައިވުމާއެކު، ދެމީހުންވެސް އެކަކު އަނެކަކަށް ވަދާޢީ ސަލާމް ކިޔަމުން ޝާން އާއި ނާޒް އެކަކުއަނެކަކާ ވަކިވިއެވެ. އެހެންނަމަވެސް، އެކަކު އަނެކަކު ދެކެ ވާ ލޯބި ހާމަކުރަމުން، މުޅި ޢުމުރަށްވެސް އެކަކު އަނެކަކާ ވަކި ނުވުމަށް ވަޢުދުވަމުންނެވެ. އެހެންނަމަވެސް ތަޤްދީރުގައި ރޭވިފައިވަނީ ކޮންކަމެއްކަމެއް އެނގޭނީ ކާކަށްހެއްޔެވެ. އެކަން އެނގޭނަމަ ކޮންމެ މީހަކުވެސް އެމީހެއްގެ ތަޤްދީރު ލިޔާނީ އެމީހެއްގެ އަމިއްލަ ތަދުބީރަކަށް ނޫންހެއްޔެވެ.

ރަށަށް ދެވުމުން ނާޒް ހުރީ ވަރަށްބޮޑަށް ހިތްހަމަޖެހިފައެވެ. ދުވަސްތަކަކަށްފަހު މަންމަ އާއި ބައްޕަ އަދި ކޮއްކޮމެންނާއި ޢާއިލާގެ އެހެން މީހުންނާ ބައްދަލުވުމުން ލިބުނީ ބަޔާންކުރަންވެސް ނޭނގޭފަދަ އުފަލެކެވެ. ނާޒްގެ ރަޙްމަތްތެރިންނަށްވެސް އޭނާ ރަށަށް އައި ޚަބަރު ލިބުމުން ހިނދުކޮޅެއްވެސް ނުވަނީސް ތިބީ އެގޭދޮށަށް އައިހެވެ. ޚާއްޞަކޮށް ނޫރާއި އަފާފް އަކީ ކުޑައިރުއްސުރެ ނާޒްއާއި އެންމެ ގާތް ދެރަޙްމަތްތެރިން ކަމުގައިވާތީ ނާޒް އައުމުން އެންމެ ބޮޑަށް އުފާވީ އެދެމީހުންނެވެ. އެއްތާކު ދެފައި ހަރުނުލައިގެން އެދެމީހުން އުފަލުން ފުމޭއިރު ހީވަނީ އެހެންކަމެއް ހެންނެވެ. ނާޒް ވެސް މިހުރިހާ ދުވަހު ހިނގާދިޔަ ކަންތައްތައް ރަޙްމަތްތެރިންނާ ޙިއްޞާކުރަމުން ދިޔައީ އުފަލުންނެވެ. ތިހެން އުޅޭއިރު ހިތްކިޔާކަހަލަ ކުއްޖަކާ ދިމާނުވޭ ހެއްޔޭ ކިޔައިގެން އެމީހުން ނާޒްއާ ދިމާކޮށް ހެދިއެވެ. ނާޒްވެސް “އެކަހަލަ ކަމެއް ނެތޭ” ބުނެލީ ޝާންގެ ވާހަކަ އެއްވެސް މީހަކާ އަދި ޙިއްޞާކުރަން މާއަވަސްކަމަށް ހިތައް އެރުމުންނެވެ.

ޗުއްޓީއަށް ރަށަށް އައުމުން ލިބޭ އެންމެ ބޮޑު ހިތްހަމަޖެހުމަކީ ކޮންމެ ދުވަހެއްގެވެސް ދުވަހުގެ ކެއުންތައް ހަމަޖެހިފައި އޮންނަނީ ކޮންމެވެސް ތިމާގެ މީހެއް ނޫނީ ގާތް ރަޙްމަތްތެރިއެއްގެ ގޭގެ ސުފުރާ މަތިންނެވެ. އަމިއްލަ ގޭގައި ކައްކާ އެއްޗެއްގެ ރަހަ ބަލާލަންވެސް ފުރުޞަތެއް ލިބޭނީ މަދުފަހަރެއްގައެވެ. ޚާއްޞަކޮށް ދަތުރުގެ ކުރީކޮޅުގައި ކޮންމެ ދުވަހެއްގެވެސް ދުވަހުގެ ކެއުމުގެ ތާވަލް އޮންނާނީ ކުރިއާލާ ބުކްކޮށް ނިމިފައެވެ. ނާޒްގެ ޙާލަކީވެސް މިއީއެވެ. ގޮސްފައި ނުދާނެ ގެއެއް އޮންނަނީ ނޭނގިފައެވެ. އެއްވެސް މީހަކަށް ނޫނެކޭ ބުނަން ނުކެރެނީ އެމީހުން ހިތުގައި ޖެހިދާނެތީއެވެ. ހައްތަހާވެސް ތިމާގެ މީހުންނެވެ. ހައްތަހާވެސް ގާތް މީހުންނެވެ. އަތޮޅު ތެރޭގެ ރަށްރަށުން ފެނިގެންދާ މިފަދަ އާދަކާދަ ތަކަކީ އެކަމުން ދިވެހިންގެ ތެރޭގައި ޒަމާނުއްސުރެ އޮންނަ އެކުވެރިކަމާއި އެއްބައިވަންތަކަން ދައްކުވައިދޭ ލާމަސީލު ނަމޫނާތަކެކެވެ. ކިތަންމެ އަވަދިނެތި އުފަލާއި މަޖަލުގައި އުޅެމުންދިޔަ ކަމުގައިވިޔަސް ޝާން އަށް ވެފައިވާ ވަޢުދާ އެއްގޮތަށް ނާޒް ކޮންމެ ދުވަހަކުވެސް ހަމަ ހުސްވަގުތުކޮޅެއް ވާއިރަށް ޝާން އަށް ގުޅާ މެސެޖްކޮށް ހަދައެވެ. އެގޮތުން ނާޒް ރަށުގައި ކުރަމުންދާ ކަންތައްތަކުގެ ޚަބަރު ދަބަރު ބަރާބަރަށް ޝާން އަށް ދަނީ ލިބެމުންނެވެ. އަދި އެދެހިތުގައި އުފެދިފައިވާ ލޯބި ދިޔައީ އެއްދުވަހުން އަނެއްދުވަހަކަށް ކުރިލާ ހެދެމުންނެވެ.
—————————————-
މަޖަލާއި އުފަލުގައި ދުވަސްތައް ހޭދަވަމުންގޮސް ޗުއްޓީ ނިމިގެންދިޔައީ ހީވެސް ނުކުރާހާ އަވަހަށެވެ. ނާޒް އެނބުރި މާލެދާން ފުރީ ސްކޫލް ހުޅުވެން އެންމެ 03 ދުވަހަށް ވީފަހުންނެވެ. މާލެ އައުމާއެކު ނާޒް އަށް ލިބިގެންދިޔަ ޚަބަރަކީ އޭނާ ހުންނަ ގޭގައި، އެގޭގެ ތިމާގެ ކުދިންތަކެއް ބައިތިއްބަން ޖެހިގެން މިހާރު އެގޭގައި ނާޒް ހުންނާނެ ޖާގައެއް ނެތްކަމެވެ. މަދީހާ ކިތައްމެވަރަކަށްވެސް ނާޒް ބަހައްޓަން ބޭނުންވިއެވެ. އެހެންނަމަވެސް، މަދީހާގެ ފިރިމީހާގެ ތިމާގެ ކުދިންތަކެއް ބަހައްޓަން އޭނާ ބޭނުންވުމުން އެކަމުގައި މަދީހާއަށް މާބޮޑު ކަމެއް ނުކުރެވުނެވެ. ޖާގަ ނެތްކަން އެނގުނީވެސް ކުއްލިގޮތަކަށް ކަމަށްވުމާއެކު ހުންނާނެ ތަނެއް ހަމަޖައްސަން ނާޒްގެ ޢާއިލާއަށްވެސް ވީ އުނދަގޫކަމަކަށެވެ. އެދަނޑިވަޅުގައި ޝާންގެ މަންމަ ސީމާ އެގޭގައި ނާޒް ބަހައްޓައިދީފާނެކަމަށް ބުނުމުން މަދީހާވެސް އެކަމަށްޓަކައި ވަރަށް ބޮޑަށް ޝުކުރުވެރިވިއެވެ. އެހެން ގޮތެއް ނެތުމާއެކު ލިބުނު ފުރުޞަތަށް ހަމްދުކުރަމުން ނާޒްގެ ޢާއިލާއިން އޭނާ ސީމާ ގާތުގައި ބަހައްޓާގޮތަށް އެއްބަސްވިއެވެ. މަންމަ އާއި ބައްޕަ އަދި މަދީހާދައްތަގެ ނަޞޭޙަތާއެކު ނާޒްވެސް އެގޮތާ އެއްބަސްވީނަމަވެސް، ޝާން އާ އެއްގެއެއްގައި ހުރެވޭތީ ހިތައް ލިބުނު އުފާވެރިކަމާއެކު ގޮތްނޭނގޭ ހާސްކަމެއް ނާޒްގެ ހިތައް ވަނީ ވެރިވެފައެވެ.

ނާޒްއަށް ހީކުރެވުނީ ހަމަ މުޅިން ރަނގަޅަށެވެ. ސީމާ ނާޒް އެގޭގައި ބަހައްޓަން ބޭނުންވީ އެގޭގައި ގެންގުޅޭ މީހާ ނެތުމާއެކު މަދީހާގެ ގޭގައި ނާޒް އުޅުނުއިރު ނާޒްގެ އުޅުމާއި ގޭތެރޭގައި ކުރާ މަސައްކަތްތައް ފެނިފައިވާތީ ނާޒް ބެހެއްޓުމުން ސީމާއަށް ލިބޭނެ ފަސޭހައަށްޓަކައެވެ. ބޭރުމީހަކު ގެންގުޅޭނަމަ މުސާރަ ދޭންޖެހުމާއި ހުރިހާ ގޮތަކުންވެސް ބޭރުމީހަކު ގެންގުޅުމަށްވުރެ ނާޒް ބެހެއްޓުމުން ޖީބަށްވެސް ލުއިވާނެތީއެވެ.
ސީމާގެ ގާތަށް ބަދަލުވުމާއެކު ނާޒް ކުރިން އުޅެމުންއައި ދިރިއުޅުން މުޅިން ބަދަލުވެއްޖެއެވެ. ސްކޫލަށް ދާންޖެހެނީ ހެނދުނު 6:45ގައި ކަމަށްވީނަމަވެސް ހެދުނު ސްކޫލަށް ދާންޖެހެނީ ފަތިހު ފަތިހާ ހޭލައިގެން އެގޭގައި އުޅޭ އަށެއްކަ މީހުންނަށް ވާވަރަށް ފޮށިފިހެ، ރިހަކައްކައި، ހެނދުނު ސައި ހެދުމަށްފަހުގައެވެ. ހެނދުނު ސްކޫލަށް ދާންޖެހޭތީ ފަސޭހަކޮށްލަންވެގެން ރޭގަނޑު ހަމައެކަނި ރިހަ ކައްކާފައި ބެހެއްޓުމުންވެސް ސީމާގެ ފިރިކަލުންނާއި ބޭފުޅުންނަށް ރޭގަނޑު ކައްކާފައިހުންނަ އެއްޗިހި ތާޒާނުވާނެކަމަށް ބުނެ އެގޮތް ކަމަކު ނުދިޔައެވެ. ކޮންމެ އިރަކު ކާންވީމަ ކޮންމެ މީހަކަށްވެސް ކާއެއްޗިހި ހޫނުކޮށްދޭންޖެހެއެވެ. އެގޭގައި އުޅޭ އެންމެންގެ އަންނައުނު ދޮވެ އިސްތިރިކުރުމާއި، ކައްކައި ކާންދިނުމާއި، ގޭތެރެ ސާފުކޮށް ތަންމަތި އެޅުމާއި އަދި މިނޫނަސް ގޭގޭގައި ކުރަންޖެހޭ ހުރިހާ ކަމެއް ކުރަންޖެހެނީ ނާޒް އެކަނިމާއެކަންޏެވެ. އެފަކީރު ހުންނަނީ އރުއެރީއްސުރެ އޮއްސެންދެން ހިންދަމާލާނެ ވަގުތެއް ނުލިބިއެވެ. ތެޅިތެޅި ވަރުބަލިވެގެން ރަނގަޅަށް ފިލާވަޅުތައް ދަސްނުކުރެވުމުގެ ސަބަބުން ނާޒްގެ ކިޔެވުމުގެ ނަތީއްޖާތައް މަޑުމަޑުން ދަށްވާންފެށިއެވެ. ރޭގަނޑުގެ ހަމަނިދި ނުލިބުމުގެ ސަބަބުން ކްލާސް ގަޑީގައި ގިނައިން ނާޒް އިންނަނީ ނިދިފައެވެ. އިންޓަވަލް ގަޑިޖެހުމާއެކުވެސް ވޫސްލާފައި ނާޒް އަންނަންޖެހެނީ ގެއަށެވެ. ހެނދުނު ގަޑީގައި ސްކޫލަށްދާ ސީމާގެ ކުދިން އިންޓަވަލް ގަޑިއަށް އަންނަންވާއިރަށް ކާއެއްޗިހި ހޫނުކޮށް މޭޒުމަތި ތައްޔާރުކުރުމަށެވެ. އެވަރުން އުޅެފައި ގިނަދުވަސްދުވަހު ނާޒް ހުންނަނީ ހުސްގޮހޮރާއެވެ. ކިތަންމެ ރަނގަޅަކަށް ކަމެއް ކުރިޔަސް ސީމާއަށް އެކަމެއް ރަނގަޅުވާ ކަމަކަށްނުވެއެވެ. އަބަދުވެސް ހިތްހަމަނުޖެހިގެން ކޮންމެވެސް އެއްޗެކޭ ބުނެލާނެއެވެ.

ނާޒް އުޅެމުންދާ ޙާލާއި އޭނާ ކުރަމުންދާ އިޙްސާސްތައް އެންމެ ކައިރިން ފެންނަ އެކަކީ ޝާން އެވެ. ނާޒްގެ ކަންކަމާ ގުޅިގެން ކިތަންމެ ހިތްހަމަނުޖެހުނު ނަމަވެސް މަންމަ ކައިރީގައި އެކަމާގުޅޭގޮތުން އެއްޗެއް ބުނާކަށް ޝާން އަށް ނުކެރެއެވެ. އެހެންނަމަވެސް ނާޒް ހިތްހަމަ ޖައްސައިދިނުމުގެ ގޮތުންނާއި އޭނާގެ މަސައްކަތްތަކަށް ލުއިކޮށްދެވޭތޯ ޝާން އަށް ކޮށްދެވެން އޮންނަ ކަމެއްވިއްޔާ އޭނާ އަންނަނީ ކޮށްދެމުންނެވެ. ޝާން އަށް ރޮށި މީރީ ވަޅިން ކޮށައިގެންކަމަށްވާތީ އޭނާ ކާން މޭޒަށް އަރާއިރު ރޮށި ހުންނަނީ ކޮށައިދީފައެވެ. ކުރިން އެކަން ކުރަނީ އެގޭގައި ގެންގުޅޭ ބިދޭސީ މީހާ ނުވަތަ އެމީހާ ނެތްނަމަ އޭނާގެ މަންމައެވެ. ނާޒް އައިފަހުން ކުރީކޮޅުގައި ނާޒް ވެސް އެކަން އެގޮތަކުން ކުރި ކަމުގައިވިޔަސް އިންޓަވަލް ގަޑީގައި އައިސް ސައިބޯއިރު ރޮށި ކޮށައި ނުދިނަސް އެންމެ ރަނގަޅުކަމުގައި ނާޒް ގާތުގައި ޝަން އޮންނަނީ ބުނެފައެވެ. އެއީ އެގަޑީގައި ނާޒް އަށް ވެސް ލިބެނީ ކުޑަ ވަގުތުކޮޅެއްކަމުގައިވާތީއެވެ. އެހެންނަމަވެސް އެކަން އެނގިގެންވެސް ސީމާ ހީވަނީ އެހެންފަދަ ކަމެއް ހެންނެވެ. ނާޒް އާ ދިމާއަށް އެވަރަށް އަޑުލައި އެއްޗިހި ކިޔާލިއެވެ. ބައެއްފަހަރު ސީމާގެ ކަންތައްތައް ހުންނަގޮތުން ނާޒްދެކެ ސީމާ ޚާއްޞަ ރުޅިއެއް އަންނަހެން ބައެއްފަހަރު ނާޒްއަށް ހީވާން ފެށިއެވެ. އެހެންނަމަވެސް ސީމާ ކިތަންމެ ރުޅިއައިސްގެން އެއްޗެހިކިޔަސް ނާޒް އޭނާގެ ދިފާޢުގައި ޗުޕްވެސް ބުނެނުލައެވެ. މިކަމުންވެސް ސީމާއާއި އެހެން މީހުންނަށްވެސް ނާޒް ކުރާ އިޙްތިރާމާއި ޤަދަރު ފެނިގެންދެއެވެ. ނާޒްގެ ކިބައިގާ ހުންނަ މިފަދަ ރީތި ސިފަތައް ފެނުނު ފެނުނުހެން ޝާންގެ ހިތުގައި ނާޒްއަށް ދެވިފައިވާ ޤަދަރު ދިޔައީ އެތައް ގުނައެއް އިތުރުވަމުންނެވެ.

ދޭތެރެއަކުން ޝާން ދަނޑިވަޅެއް ބަލާލާފައި ނާޒްއާ ވާހަކަ ދައްކާލާ ސަމާސާކޮށްލާ ހަދައެވެ. ނާޒްދެކެ ވާ ލޯބި ހާމަކުރަމުން ގެންދެއެވެ. ކުދިކުދި ހަދިޔާތަކާއި ކުލަކުލައިގެ ކާޑުތަކުންނެވެ. އަދި ބައެއްފަހަރު ލޯބީގެ ފޮނިފޮނި ޢިބާރާތްތަކުން ލިޔެ ނާޒްއަށް ފޮނުވާ ކުރު ނޯޓްތަކުންނެވެ. ޝާންގެ އަޅާލުމާއި ލޯބި ލިބޭތީ ހުރިހާކަމެއްގެ ފަރުވާއަކަށްވެސް ނާޒްއަށް އެކަން ފުދެއެވެ. ދިމާވަމުންދާ ދަތިއުނދަގޫ ކަންތައްތަކަށް ކެތްކުރަމުން ދުވަސްތައް ގުނަމުންދިޔައީ އެނޫން ދުވަހެއް ދައްކަވާތޯ ހެއްދެވިފަރާތް ހަދުމަކުރަމުން، އެއުންމީދުގައެވެ. އެހެންނަމަވެސް އެގޮތުގައި ކެތްކުރެވޭނީ ކިހާދުވަހެއް ވަންދެންބާވައޭ އެއީ އަބަދުވެސް މިހާރު ނާޒްގެ ހިތަންއަރާ ސުވާލެކެވެ.
———————-
ދަންވަރު ވަގުތެވެ. ގަޑިން މެންދަމުން އަލިވެ 3ޖަހާ ބޮޑުވީއެވެ. އާދައިގެ މަތިން ނާޒް އިނީ އޭނާ ނިދުމަށް ޚާއްޞަކުރެވިފައިވާ ކޮޓަރީގައި ހުރި މޭޒުކައިރީގައި، މޭޒުގައި ބޯޖަހާލައިގެން ނިދިފައެވެ. އެއީ މިހާރަކަށް އައިސް އޭނާގެ އާދައެވެ. ރޭގަނޑު އެގޭ މީހުން ކައިގެން ނިމުމުގެ ކުރިއަކުން ނާޒްއަށް ފިލާވަޅުހަދަން ކީއްކުރަން ނިދިގެން ވެއްޓުނަސް ކޮޓަރިއަށް ނިދަން ދިއުން އެއީ ފާޑަކަށް މަނާކުރެވިފައި އޮންނަކަމެކެވެ. އެހެންކަމުން އެކަން ކަމުން އަވަދިވެގެން ނާޒް ދެން ފަށަނީ ފިލާވަޅެއް ހަދަން އޮތިއްޔާ އެކަން ނިންމާލާފައި ކުޑަކޮށް ފިލާވަޅުތައް މުޠާލިއާ ކުރުމަށެވެ. އެހެން އިންނައިރު ކޮންމެ ރެއަކުވެސް ނިދެނީއެވެ. ދެން ހޭލެވެނީ ފަތިހު ގަޑި އެލާމްވާ އަޑަށެވެ. އެހެންކަމުން އެނދުގައި ނިދާލެވެނީ ހަމައެކަނި ސްކޫލް ޗުއްޓީ ރެއެއްގައެވެ. މާދަމާ ޔުނިޓް ޓެސްޓެއްވެސް އޮތުމާއެކު މިރޭވެސް ފިލާވަޅު ދަސްކުރަން ފެށިތަނާ ނާޒް އަށް ނިދުނީއެވެ. މަޢުސޫމްކޮށް ނިދިފައި އިން ނާޒްއަށް އެކޮޓަރީއަށް އެހެން މީހަކު ވަން ކަމެއް ނޭނގެއެވެ. ތަޅުލާފައިވާ އެކޮޓަރިއަށް ސިއްރު ސިއްރުން އެމީހަކު ވަނީ ކޮޓަރީގެ ޑަބަލް ތަޅުގަނޑިއަކުންނެވެ. އެމީހެއްގެ ފިޔަވަޅުތަކުގެ މިސްރާބު ހުރީ މަޢުސޫމްގޮތަކަށް ނިދާލާފައި އޮތް ނާޒްއާ ދިމާއަށެވެ.