ނޭނގި ވެވުނީ ލޮތްބޭ- ޓްރެއިލަރ

“ބޭބެ… އަން!” ޓެކްސީ ދުއްވަން އިން މީހާ އަތަށް ރުފިޔާ ކޮޅު ހަވާލު ކުރަމުން ރީމް ބުންޏެވެ. ޓެކްސީގެ ދޮރު ހުޅުވާލުމަށްފަހު ޓެކްސީ އިން ނުކުމެ ޑްރައިވަރު ނަގައިދިން ފޮށި ދަމަމުން ރީމް މިސްރާބު ޖެހީ ވ.އަތޮޅަށް ދާ ލޯންޗު އަންނަ ދިމާލަށެވެ. ދިއްލާލައިފައިވާ ރަތް ދަކައަވިން ސަލާމަތްވުމަށްޓަކައި ކައިރީގައި ހުރި ގަހެއްގެ ހިޔަލުގެ ދަށުގައި ލޯންޗު އައުމުގެ އިންތިޒާރު ގައި ރީމް ހުއްޓެވެ. އެއްއަތުން ފޮށީގެ އަތްގަނޑުގައި ހިފަހައްޓައިލައިގެން ހުރިއިރު ކޮނޑުގައި ކަޅުކުލައިގެ ރަތް ފިނިފެންމާތަކެއްގެ ޑިސައިނަށް ހުރި ދަބަހެއް އަޅުވައިލައިފައިވެއެވެ. ލައިގެން ހުރި އައިސް ބްލޫ ޖީންސާއި މަޑު ފިޔާތޮށި ކުލައިގެ ކަކުލާއިހަމައަށް އަރާ ގަމީސްވައްތަރުގެ ހެދުމަކާއި އަޅައިގެންހުރި އަޅި ކުލައިގެ ޝޯލުން ރީމް ވަރަށް ލޯބި ވައްތަރު ޖަހައެވެ. ކޮށްލައިފައިވާ ލުއި މޭކަޕާއި ތުންފަތުގައި ޖައްސައިފައި ހުރި މެރޫން ކުލައިން ރީމް ފެންނަނީ ހޫރުޕަރީއެއްފަދައިންނޭ ބުންޏަސް ގޯހެއް ނުވާނެއެވެ.

ރީމްގެ މަޑު މުށި ކުލައިގެ ލޮލުގައި އަޅައިގަތީ ދުރުން އަންނަ “ގޮމަ” ލޯންޗެވެ. އެމް.އެމް.އޭ ގެ ކުރިމައްޗަށް ވާގޮތަށް ލޯންޗުގެ ދުވެލި މަޑުކޮށްލިއެވެ. އިރުކޮޅެއް ނުވެ ރީމް ލޯންޗަށް އަރަން ހިނގައިގަތެވެ. ލޯންޗުގެ އެންމެ ފަހަތުން ދެވަނަ ޝީޓުން ބޭރު ފެންނަގޮތަށް ރީމް އިށީނދެލިއެވެ. ފުންނޭވާއެއް ދޫކޮށްލަމުން ފޯނުން ގަޑި ބަލައިލި އިރު ގަޑިން ދޭއް ޖަހަނީއެވެ. ރީމް ސިއްސައިގެންދިޔައީ ކައިރިން އެއްޗެއް ވެއްޓުނު އަޑަށެވެ. އަނެއްފަރާތަށް ބަލައިލިއިރު ރީމްއާއި އެއް އުމުރެއްގެ ޒުވާން ފިރިހެން ކުއްޖެއް ރީމް ގާތު އިށީންނަނީއެވެ. އޭނާގެ ކުރިމަތީގައި ވެއްޓިފައި އޮތް ކޮތަޅު ނަގައިދެމުން ރީމް އެ ޒުވާނާއާ ހިނިތުންވުމެއް ބައްދަލު ކޮށްލިއެވެ….

ނޯޓު- ފުރަތަމަ ބައި ގެނެސްދޭނީ ބުރާސްފަތު ދުވަހުގައެވެ. މި ވާހަކަ ކޮންމެ ހޯމަ ބުރާސްފަތި ދުވަހެއްގައި ގެނެސްދޭނެ ވާހަކަ ދަންނަވާލަން. އުއްމީދު ކުރަން މިވާހަކަވެސް ތި ކިޔުންތެރިންނަށް ކަމުދާނެ ކަމަށް.
~ޝުކުރިއްޔާ