ފޮނި ބަތުގެ އަހުވަ

އިރު އެރުމާއިއެކު އައިމިނަ ފުންމައިގެން ތެދުވެ ދުއްވައިގަތީ އިއްޔެ ކެއްކުމަށް ބޭނުން ކުރި ތާހާއި ތެލިތައް ދޮންނަން        އަތިރިމައްޗަށެވެ. އެހެން ދުވަސްދުވަހާއި ޚިލާފަށް ބައިގަނޑާއި ވަކިވެ އަތްމަތި އަވަސް ކޮއްލައިގެން އައިމިނަ ބެލީ ދުވަހުގެ މެހުމާނުން އަންނަން ވާ އިރަށް ކެއްކުމާއި އަދި އެނޫންވެސް ކުރަންޖެހޭ މުހިންމު އާލާތްތައް ކުރުމަށް އަވަސްކޮއްލައިގެން ގެއަށް ދެވޭތޯއެވެ.

އަރިރިމަތިން ގެ އަށް އައިއިރު ހުރީ 7 ޖަހާ ބޮޑުވެފައެވެ.ބޭކާރުގޮތުގައި ދުއްވާލާކަށް މިއަދަކު އައިމިނަ އަކަށް އެންމެ މިނިޓެއްވެސް ނެތެވެ. އައިމިނަގެ ފިރިހެނުން ބަކުރުގެ ދަޢުވަތަކަށްރަށުގެ އިސްބޭފުޅުންމިއަދު އެގެއަށް މެންދުރުގެ ކޭން ބެއްލެވުމަށްވަޑައިގަންނަވާނެ އެވެ. އެއީ ބަކުރުގެ އާ މަސްދޯނިން ހައްސަ ބޭނުމުގެ  މުނާސަބަތުގައިއެވެ.ނަމަވެސްު އައިމިނަ ކުރަންޖެހޭ މަސައްކަތާއި ނުކަތާ ވަރަށް ވަގުތުވެސް ވަނީ ކުޑަތަން ވެފައެވެ.ވުމާއެކު މިފަދަ  ދުވަސްތަކުގައި އާދައިގެމަތިން ވަމުންދާގޮތް ކުރިއަށް ދިޔައީ އެދުވަހުގައިވެސް ވަރަށް ފުރިހަމަ ކޮށެވެ.

ދުވަހުގެ ބުރަކަމުން އައިމިނަ ދިޔައީ އެއްފަހަރާ އެތަށް ބައިވަރު މަސައްކަތްތަކެއް ކުރަމުންނެވެ. ކެއްކުމަށް ބޭނުންވާ ވަރަށް      މަސްކަނޑާ ސާފުކޮއްގެން ބަދިގެ ތެރެއަށް ބޯ ދިއްކޮއްްލިހިނދު އައިމިނަގެ ހިތް ހީވީ ހުއްޓުނުހެންނެވެ. މުޅި ދުނިޔެ އެނބުރިގަތް ކަހަލައެވެ. ސަބަބެއް ނެތީސް އެއްނޫނެވެ.އޭނާ ކައްކަން އުދާފައި ހުރި ބަތް ތަވާއެކޭ    އެންދެރި ކޮޅެކޭ ވަކި ތަފާތެއް ނެތެވެ. އައި ރުޅީގައި އައިމިނައަށް ހުރެވުނު ތަނެއްވެސް ނޭނގުނެވެ. ނަމަވެސް ހިއްވަރު ކޮއްލައިގެން އައިމިނައަވަސްވެގަތީ މަސްކޮޅުހަލާކު ނުވަނީސް އަވަހަށް ގަރުދިޔަފޮދު ކެއްކޭތޯއެވެ. އަދި ގަރުދިޔަފޮދާއި އެކީ ބޮނޑިބަތްކޮޅުވެސް ކައްކަން އުދައިފިއެވެ.

ގަރުދިޔަ ކެއްކެން ވާއިރަށް ބަނބުކޭލާއި، ފަޅޮލާއި އަދި މާޅެސް ކެޔޮކޮޅެއް ކަައްކަން އައިމިނަ ނިންމީ ބާވަތްތައް އިތުރުކޮއްލުމުގެ  ބޭނުމުގައެވެ. އަނެއްކާވެސް ކައްކަން އުދާފައި ހުރި އެއްޗެހި އަނދާފާނެކަމުގެ ބިރު ހިތުތެރޭގައި އޮތުމާއެކު އައިމިނަ އުޅުނީ  ވަރަށް އަތްމަތި ހަލުވިކޮށެވެ. ނަތީޖާއެއްގެ ގޮތުން އޭނާގެ އަތުގެ އެތައް ތަނެއް މަށައިގެން ވެސް ދިޔައެވެ.ނަމަވެސް ތަދަކާއި    ތަދެއް އެއްފަރާތް ކޮއްލުމައްފަހު މަސައްކަތާއިގެން އޭނާ ކުރިއަށް ދިޔައީ އެއްވެސް ކަަހަލަ ލަދެއްގައި ބެދެން ބޭނުން ނުވާތީ އެވެ.

ކާމިޔާބު ކަމާއިއެކު ބޮނޑިބަތްކޮޅު، ގަރުދިޔަ އަދި ފަލަމަޑީގެ ބާވަތްތަކާއި ކުރިން އެނދި ބަތްކޮޅުވެސް ކައްކާ ނިމިއްޖެއެވެ.އޭރު    މެހުމާނުން އަންނަން ހުރީ ކުޑަ އިރުކޮޅެކެވެ . އެހެންކަމުން ނުހަނު އަތްމަތި އަވަސް ކަމާއެކު ސައި ކައްކާލުމައްފަހު  ޖެހިގެން ހުރި ސަކީނާމެންގެއިން މިރުސްކޮޅެއް ބިނދެގެން ގެއަށް އައިސް ވަނުމާއެކު އޭނާގެ ފަހަތުން ކަހަލަ ގޮތަކަށް ބަކުރު، ކަތީބާއި އަދި އެހެން 5 ބޭކަލަކު ގޮވައިގެންު ގެއަށް ވަނެވެ. އެހެންކަމުން ދެން އައިމިނަ އަވަސްވެގަތީ އެބޭފުޅުންނަށް ބޭނުންވާ ކަންތައް ކޮއްދިނުމަށެވެ.

6 ފިރިހެނުން ލަސްކުރުމެއްނެތި އަވަހަށް ކެއުމަށް އިންސާފު ކުރިއެވެ.ފުރަތަމަ  ބަތްސުވާ އިންވެސް ކަތީބާއި ބަކުރުގެ ތޫނު ނަޒަރު އޭނާއަށް ހުއްޓުނުކަން އައިމިނައަށް ފާހަގަ ވިއެވެ. އޭނާ ބަލާލުމާއެކު ކަތީބު ހިނިތުންވެލި ނަމަވެސް ބަކުރުގެ ދެލޯ ފެނި އައިމިނަ ބިރުގަތެވެ.އެވަގުތު އެތަނުގައި ހުންނަން ފަސްޖެހުމުން ބޮނޑިބަތްކޮޅު  ބަލާ ދިޔުމުގެ ބަހަނާގައި އައިމިނަ ބަދިގެއަށް ދިޔައެވެ. އޭރު އޭނާ ހުރީ ވަރުބަލިވެގެންގޮސް އެކޮޅުކޮޅުން ޖެހިފައެވެ.

ބޮނޑިބަތްކޮޅު ހިފައިގެން އައިމިނަ އަނބުރާ އައި ވަގުތަކީ މުދިންބެ ބަނބުކެޔޮތަށި ހުސްކޮއްލުމައްފަހު އަަލުން ތަށްޓައް ބަތް އެޅި ހިތާމަވެރި ވަގުތުކޮޅެވެ. އަނގަޔައްލި ފުރަތަމަ ބަތްސުވާވެސް އަރުތެރެއިން ނުގޮސް ޕޫސް ކިޔާފައި ބޭރުވީއެވެ.އާދެ! ކުރިމަތީގައި ހުންނެވި ކަތީބުގެ މޫނުކޮޅަށެވެ. ވަގުތުން ކަތީބު ނުރުހިފައި ތެދުވިއެވެ. ހަމަ އެވަގުތެވެ. ބޮނޑިބަތް ދޮލަނގު ހިފައިގެން އައި އައިމިނަ އަށް ހުރެވުނީކަތީބުގެ ފަހަތުގައެވެ. ކަތީބު ހިންދެމިލި ބޮނޑީގައި  ނުވިސްނާ ހުރި އައިމިނަގެ އަތުގައި ހުރި ބޮނޑިބަތް ދޮލަނގު ކަތީބުގެ ކޮނޑުފުޅުގައިޖެހިފައި  ވެރުނީ ބިންމައްޗަށެވެ.މުޅި ގޭތެރޭގައި  ބޮނޑިބަތުގެދޫލައެއް އެޅިފައިވާ ކަހަލައެވެ. އެވަގުތު ކަންތައްހިނގައިދިޔައީވަރަށް  ހަލުވިމިނެއްގައެވެ. ވީނުވީއެއް ނޭނގި ގޭތެރެއިން  މީހުންހުސްވެއްޖެއެވެ.ހައިރާަަންވެފައި ހުރި އައިމިނަ އަށް ވީގޮތް ރޭކާލާކަށްމާ  ގިނަ އިރެއް ނުނެގިއެވެ. ވަރަށް ބިރުން އަދި އެހާމެ  ލަދުން ހުރެ އައިމިނަ އޭނަ ކައްކާފައި ހުރި ބަތުގެ ރަހަ ބަލައިލީކުރެވުނު ހީއަކީ ހަޤީގަތެއްތޯ ޔަޤީން ކޮއްލުމަށެވެ. އާނއެކެވެ.  އޭނާއަށް ބަތައް ލޮނުގެ ބަދަލުގައި އެޅުނީ ހަކުރެވެ. މިހުރިހާއިރު ބުރަކަށި ބިންދައިގެން ކުރެވުނުހާވެސް ކަމަކީ ފޫނެތް ފަޔަށް  ފެންފުރުންކަން އެނގު ނުހިނދު، ބަކުރުގެ ރުޅީގެ އަމާޒު ފަށްގަނޑަކަށް ވެފައިހުރި އައިމިނަ، ގަތްލަދުންނާއި  ވީ ދެރައިން ހުރެވުނު  ތަނެއްވެސް ނޭނގުނެވެ. ލިބުނު ޝޮކެއްގެ ބޮޑުކަމުން ކަނޑާ ވައްޓާލި ރުކެއްހެން ވަގުތުން ބިންމައްޗައް ދެމުނެވެ.

• ނިމުނީ