ސިއްރު (ދެވަނަ ބައި)

“އެންމެ ރަނގަޅު.. އަހަރެން ޒާރާ ވަރިކޮށްފަ ވީއެންމެ އަވަހަކަށް ޝިއަމްއާ އިންނާނަން.” އެންމެފަހުން ރިއާންއަށް ބުނެވުނެވެ.

ޒާރާ އިންތިޒާރު ކުރަމުން ދިޔައީ ރިއާން އަންނާނެ އިރަކަށެވެ. އުފާވެރި ހަބަރު ރިއާންއަށް އަޑު އިއްވާލާހިތުން ދެކޮޅަށް ހިނގާލަ ހިނގާލަ ހުންނަތާ ކިތަންމެ އިރެކެވެ. ދެތިންފަހަރަކު ފަރިތަވެސް ކޮށްލައިފިއެވެ. މަންމައަކަށް ވާތީ އުފަލުން އުޅެވޭ ނޫޅެވޭގޮތްވެސް ޒާރާ އަށް ނޭނގެއެވެ.

ރިއާން ގެއަށް އައީ މެންދުރުން އަނބުރާ ތިނެއްވެސް ޖެހިފަހުންނެވެ. ގެއަށް އައިގޮތައްއައިސް ރިއާން ގޮސްވަނީ ކޮޓަރިއަށެވެ. ސިޓިންގރޫމްގައި ޓީވީ ބަލަން އިން ޒާރާ ރިއާންއަށް ނުވެސް ފެންނަކަހަލައެވެ. ރިއާންގެ އެއަމަލުން ޒާރާއަށް އުނދަގޫވިނަމަވެސް މާބޮޑުކަމަކަށް ނުހަދާ ރިއާންގެ ފަހަތުން ޒާރާވެސް ހޮސް ކޮޓަރި އަށްވަނެވެ.

“އާން.. ކޮންތާކުން ތިއައީ. ބަނޑުހައިތަ؟.” ޒާރާގެ އޯގާވެރިކަން އިންތިހާއެވެ. އެހެންނަމަވެސް ރިއާންގެ ބޮލުގެ ރިހުން އެއަށްވުރެ ބޮޑެވެ. ޒާރާއަށް ހަގީގަތް ކިޔައިދޭން ރިއާން ކިތަންމެހާވެސް ބޭނުމެވެ. އެކަމަކު ހިތްވަރެއް ނެތެވެ. އެކަމަކު ކިޔައި ނުދީވާކަށްވެސްނެތެވެ.

“އާން. ކިހިނެތް ވެފަތަތިހުރީ..” ރިއާން ޖަވާބެއް ނުދިނުމުން ޒާރާ ތަކުރާރު ކުރިއެވެ.

“އަހަރެން ވަރަށް ބޮޑަށް ބޮލުގައި ރިއްސަނީ” ރިއާން ހަގީގަތް ކިޔައިދޭން ޖެހިލުންވަނީއެވެ. ޒާރާގެ ހިތުގައި ޖެހޭނެވަރު އިހުސާސްވެސް ނުކުރެވޭނެއެވެ. ދުވަހަކުވެސް ރިއާން ކުރިމަތީ ބާރަށް އެއްޗެއް ނުބުނާނެއެވެ. ދެރަވިއަކަ ނުދޭނެއެވެ. ދެންވަކި ރިއާން މިއަދު ޒާރާ ރޮއްވާލާނީ ކިހިނެތް ހެއްޔެވެ؟..

ރިއާން ބޮލުގައި ރިއްސާވާހަކަ ބުނުމާއެކު ޒާރާއައިސް ރިއާންގެ ބޯ މޮޑެންފެށިއެވެ. ބަނޑުބޮޑު ވާހަކަ ބުނަން އުޅެފައި ރިއާން ބޮލުގައި ރިއްސާތީ އުޅޭ އިރު އެފަދަ އުފާވެރި ހަބަރެއް ދިނުމަށްވުރެ ހަމަޖެހިލައިގެން ހުންނަ ވަގުތެއްގައި އެވާހަކަ ދެއްކުން މާރަނގަޅުވާނެ ކަމަށް ޒާރާއަށް ވިސްނުނެވެ.

ޒާރާގެ ކޮންމެ އަމަލެއް އޯގާތެރިވެފައި މަޑުމައިތިރިއެވެ. ނުރޯން ކިތަންމެ މަސައްކަތެއް ކުރި ނަމަވެސް މިފަހަރު ރިއާންއަށް ކެތެއްނުކުރެވުނެވެ. ރޯންފެށުނެވެ. ޒާރާއަވަސް އަވަހަށް ގޮސް ބޭސް ހިފައިގެންއައިސް ރިއާންއަށް ބޭސްދީފައި އަރާމު ކޮށްލުމަށް ވަގުތުކޮޅެއް ދިނުމަށްފަހު ބޭރަށް ނުކުތެވެ.

ޝިއަމްގެ ކޯލެއް ރިއާންއަށް ލިބުނީ އެވަގުތުއެވެ. ޝިއަމް ޝަކުވާ ކުރާނެ ވަރު އެނގުމުން ހިތައް އުނދަގޫވިއެވެ. އަނެއްކާވެސް ރިއާން ހިތައް އެރީ ޑޮކްޓަރު ބުނިވާހަކައެވެ. އެއާއެކު ރިއާން ތެދުވިއެވެ. ކޮޓަރިން ނުކުތް އިރު ޒާރާ ސިޓީ އުރައެއް ހިފައިގެން ހުރެ އެކަނި ވާހަކަ ދައްކަނީއެވެ. ދައްކާވާހަކައެއް ރިއާން އަކަށް އަޑެއް ނީވެއެވެ.

“ޒާ.. އަހަރެން… މާފް….ޑިވޯރޒް…” ރިއާންއަށް ކިޔުނު ނުކިޔުނު އެއްޗެއްވެސް ނޭނގުނެވެ. ރިއާން ދެމިފަތިވަރުން ޒާރާ ގާތައްއައީ ހިންޏެވެ. ރިއާން ބުނަން އެއުޅޭއެއްޗަކުން ޒާރާގެ މުޅި އުމުރުގައި ވެސް ރޯން ޖެހިދާނެ ކަމަކަށް ޒާރާ ހިތައްވެސް ނާރައެވެ.

“އެހެންނޭވާނީ ތިހާ ބޮޑަށް ބޮލުގައި ރިއްސާ އިރުވެސް ތެދުވެ އުޅެންޏާ.. ހިނގާ ކޮޓަރިއަށް..” ޒާރާ ރިއާންގެ އަތުގައި ހިފައިގެން ކޮޓަރިއާ ދިމާލަށް ހިނގައިގަތެވެ.

“ޒާ.. އަހަރެން މިސާލަކަށް އެހެން މީހެއް އަހަރެންގެ ދަރިއަކަށް ބަލިވެ އިނދެއްޖޭ ބުނެ ފިއްޔާ އަހަރެން ދެކެ ރުޅިއަންނާނަންތަ؟” ރިއާންއަށް އެވާހަކަ ބުނާނެ ގޮތެއް ނުވިސްނުނެވެ.

“ހެހެ… ޔަގީނެއްނު. މިސާލަކަށް ބަނޑުބޮޑު ވިޔަސް އަސްލަކަށް ނުވާނެ ކަން އަހަންނަށް އެނގޭ.. އާން އެއަށްވުރެއް ބޮޑަށް އަހަރެން ދެކެ ލޯބިވާނެ..” ޒާރާ ރިއާން އަށް އިތުބާރު ކުރެއެވެ.

‘ޒާ… ޝިއަމް.. ޕޮރެގް.. ބޭބީ އިޒް. މައިން…” ކުއްލިއަކަށް ރިއާން ބުނިއެއްޗަކުން ޒާރާ ހުއްޓުން އެރިއެވެ. ޒާރާއަށްޓަކައިމުޅި ދުނިޔެވެސް އެނބުރިގެން ދިޔަހެންނެވެ. އަތުގައި އޮތް ސިޓީ އުރަ އަތުން ދޫވެގެން ވެއްޓުނެވެ.

“ސަމާސާ ކުރަނީދޯ…” ޒާރާއަށް ރޮވުނެވެ.

“ނޫން މީސަމާސާއެއްނޫން.. އަސްލު އައި ވޯންޓް މެރީ ހަރ… އެކަމް އޭނަ ބޭނުންވަނީ ޒާ ޑިވޯރސް ކޮށްފަ.. ބަދުނާމު ވެދާނެތީ އޭނަ ޑިޕްރެސްވަނީ… ހަރޓިން ހަރ ސެލްފް.. އައި ޑޯންޓް ވޯން ލޫޒް މައި ފަސްޓް ބޭބީ..” އެއް ނޭވާއިން ރިއާން ހުރިހާ އެއްޗެއް ކިޔާނިންމާލިއެވެ. އޭރު ރިއާންއަށް ގިސްޖެހެއެވެ.

ޒާރާއަށް ހަދާނެ ގޮތެއް ނުވިސްނުނެވެ. އަވަސް އަވަށް ގޮސް ވަނީ ބަދިގެއަށެވެ. އަދި އުދުން ރޯކޮށްލުމަށްފަހު ޒާރާގެ އަތުގައި އޮތް އޭނާގެ ޕްރެގްނެންސީ ރިޕޯޓް އަންދާލިއެވެ. އޭރު ޒާރާގެ ދެލޯވަނީ ކަރުނުންފުރިފައެވެ.

(ނުނިމޭ)