އާދަޔާ ޚިލާފު މަރެކެވެ.

ހަޤީޤީ ހާދިސާ
އެދުވަހު އަހަރެން ޔުނިވަރސިޓީގެ ފާހާނާ ތެރެއަށް ވަނީ އެފަދަ މަންޒަރެއް ފެނިދާނެ ކަމަކަށް ނޫނެވެ. އެހެނަސް، ﷲ އީ ހުރިހާ ކަމަކަށް ކުޅަދުންވަންތަ ރަސްކަލާނގެއެވެ. އަހަރެންނާ އެއްކޮށް ކިޔަވާ މާޒިން ނަމަކަށް ކިޔާ ސާޅީހަކަށް އަހަރުގެ ފިރިހެނެއް ފާހަނާ ތެރެއަށް ވެއްޓިގެން އެތަނަށް ބައިވަރު މީހުން ޖަމާވެފައި ތިއްބެވެ.
“ކިހިނެއްތަވީ؟” އަހަރެން އެމީހުން ގާތު އެހީމެވެ. ” އޭނަ ނޭވައެއް ނުލާ. މުޅި ގައި ފިނިވެފަ. ހީވަނީ ދިރުމެއް ނެތް ހެން. ވަރަށް ނުބައިވަސް އެބަދުވާ. އެކަމަކު އޭނަ ހަމަ ދެންމެ ފާހަނަ ތެރެއަށް މަރުވެގެން ވެއްޓުނީ. ނޭނގެ އެހާ އަވަހަށް ނުބައިވަސް ދުވަންވީ ސަބަބެއް.” އެތާ ހުރި މީހެއް ޖަވާބުދިނެވެ.
އަހަރެން އެމްބިއުލެންސަށް ގުޅާފައި މާޒިން ނެގޭތޯ އުޅުނީމެވެ. އެމީހާ ބުނިގޮތަށް މާޒިން ނޭވައެއް ނުލައެވެ. ހާސްވެފައިވާ ވަރުން މުޅިގައިން އޮށްދާތިކިތައް ފައިބަން ފެށިއެވެ.
“އަހުމަދު، އެމްބިއުލެންސަށް އަވަހަށް މީނަ އަރުވަން ހިނގާ. ދިރޭނެ ކަމުގެ އުންމީދެއް ނެތް.” ކަރީމް މިހެން ބުނުމުން އަހަރެންނާ އަދިވެސް ހަތަރު މީހުން ވެގެން މާޒިން އެމްބިއުލެންސަށް އެރުވޭތޯ އުޅުނީމެވެ. ބަރުކަމުން މާޒިންގެ ހަށިގަނޑު އުފުއްލަން ޖެހުނީ ގައިގައި ހުރިނަމަ، ހުރި ބާރެއް ލާފައެވެ.
ހޮސްޕިޓަލަށް މާޒިން ގެންދެވުނު ފަހުން ބައިގަޑިއިރު ވަނީއެވެ. އަހަންނާ ކަރީމް ތިބީ ޑޮކްޓަރުން ދޭނެ ޖަވާބެއްގެ އިންތިޒާރުގައެވެ. ކަރީމް، މާޒިންގެ އަންހެނުންނަށް ގުޅާފައި އެވާހަކަ ބުންޏެވެ. މާޒިންގެ އަންހެނުން، މުފީދާ ވަރަށް އަވަހަށް ހޮސްޕިޓަލަށް އަންނާނެ ކަމަށް ބުންޏެވެ.
“މުހައްމަދު މާޒިންގެ ދިރުމެއް ނެތް. މަރުވެފައި ވަނީ ޤުދުރަތީ މަރަކުން. ވީމާ އަވަހަށް މީނަ ހިނަވަން ގެންދަންވީ. މަރު ސާބިތުކުރެވިއްޖެ.” ޑޮކްޓަރު އައިސް އެހެން ބުނުމުން އަހަރެންގެ ފައިދަށުން ބިންގަނޑު ދެމިގެން ދިޔަހެން ހީވިއެވެ. ނޮރޯން ވަރަށް ހިތްވަރު ކުރީމެވެ.
ހިނަވާ އާސަހަރާއަށް މާޒިންގެ ހަށިގަނޑު ގެންދެވުނެވެ. މުފީދާއާއި އޭނަގެ އާއިލާގެ މީހުން ހަމަ އަޑުން އަޑުނަގާ ރޮނީއެވެ. ކަން ދިމާކުރި ގޮތުން މާޒިންގެ ހަށިގަނޑު މާ ބަރުވުމުން ހިނަވަން ތިބި ދެމީހުން، އަހަރެންނާ ކަރީމްގެ އެހީއަކަށް އެދުނެވެ.
މާޒިންގެ ހަށިގަނޑު މިވަގުތު ފެނުމުން އަހަރެމެން ދެމީހުންނަށް ހައިރާންކަމެއް ލިބުނެވެ. ކުރިއާ ޚިލާފަށް އޭނަގެ މޫނު ވަނީ ދެލިގަނޑެއް ވަރަށް ކަޅުވެފައެވެ. ސިފަ ގެއްލިފައެވެ. ދެއަތް ހުދުކަމުން ގޮސް ހީވަނީ ހުދު އައްޔެއް އޭނަގެ އަތުގައި ވާހެންނެވެ. ނުވީތާކަށް، ގައިން ދުވަނީ ކުނި ވަހެވެ.
މާޒިން ގައިން ދުވާ ވަހުން ކެތްނުކުރެވިގެން ހިނަވަން ތިބި ދެމީހުންނާ އަހަންނާ ކަރީމަށް ޖެހުނީ މޫނުގައި މާސްކް އަޅައިގެން ތިބެ ހިނަވާށެވެ. މާޒިން ހިނަވާ ނިމުނުއިރު އަހަރެމެން އަވަދި ވެއްޖެއެވެ.
އަސުރު ނަމާދަށް ފަހު، މާޒިންގެ ހަށިގަނޑު ވަޅުލިއެވެ. އާސަހަރާއިން ނިކުތްއިރު ބޭރުގައި މުފީދާއާއި އޭނަގެ މަންމަ ތިއްބެވެ. ހިނަވަން ވަންއިރު މާޒިންގެ ހަށިގަނޑުން ފެނުނު އާދަޔާ ޚިލާފު ކަންތައް، މުފީދާއާ ހިއްސާކުރީމެވެ.
މުފީދާ ރޮއެގަނެފައި ބުންޏެވެ. “އޭނާ ނަމާދެއް ނުކުރެއެވެ. އޭނާ ނަމާދެއް ނުކުރެއެވެ.” މާނައަކީ މާޒިން ނަމާދަށް ފަރުވާކުޑަކޮށް ނަމާދު ވަގުތު އެޅިއެވެ.
އަހަރެންނަށް ގެއަށް އާދެވުނީ މާޒިނާ އޭނަގެ އަންހެނުން އެދެއްކި ވާހަކަތަކާ ދޭތެރޭ ވިސްނަމުންނެވެ. ނަމާދު އަޅާމީހުންގެ ނިމުންވެސް ހިތިވާނެކަން އަހަންނަށް ތަޖުރިބާ ކުރެވިއްޖެއެވެ. މާޒިނަކީ އޭނަގެ ރަހްމަތްތެރިންނަށް ވަރަށް އޯގާތެރި މީހެކެވެ. އެހެނަސް އޭނާ ނަމާދަށް ވަނީ ފަރުވާ ކުޑަ ކޮށްފައެވެ.
ނަމާދަކީ ހުރިހާ ހެޔޮކަމަކަށް މަގުފަހިކޮށްދޭ، ނުބައި ކަންތައްތައް ނަހީކުރާ އަޅުކަމެކެވެ. ވީއިރު ނަމާދުކުރުމުން އެލިބޭ ހިތްހަމަޖެހުން ހޯދުމަށްޓަކައި ފަރުޟު ފަސް ނަމާދުގެ ވަގުތުތަކަށް ފަރުވާތެރިވަމާތޯއެވެ.
” އަދި އެބައިމީހުން ބުނާނެއެވެ. ތިމަންމެންނީ ނަމާދުކޮށް އުޅުނު މީހުންގެ ތެރޭގައި ވީ މީހުންނެއް ނޫނީމެވެ.”
( ނިމުނީ )