އިމްތިހާން 3

“ތި ދަރިފުޅު އެހެންމީހަކާ ހަވާލުކުރަން ދާން ދެރައެއް ނުވޭތަ؟… އަހަރެންމީ މިދިޔަ ދުވަސްތަކަށް ތިކުއްޖާގެ ބަނޑު ފުރާދިނުމަށް އެހީތެރިވެދިން މީހާ. އަހަރެންގެ ދަރިއެއް ނޫނަސް އަހަންނާ ވަކިވެގެން ދާތީ އަހަރެން. . އަހަރެން މިއަދު ވަރަށް . . ވަރަށް ދެރަވެއްޖެ.” އާދިލާގެ އަޑަށް ސަމީރުގެ ފިޔަވަޅުތަކަށް ކުއްލި ލޮޅުމެއް އެރި ފަދައެވެ.
އާދިލާގެ އަޑަށް ސަމީރު ހުއްޓުންއެރިއެވެ. އާދިލާއާ ކުރިމަތިލާނެ ހިތްވަރު ނެތުމުން ސަމީރު ވާހަކަ ދައްކަންފެށީ
އާދިލާއަށް ފުރަގަސް ދީގެންހުރެއެވެ.
“މަރުވެފަވާ މީހަކަށް ދިރިހުރި މީހެއްގެ ވަޞިއްޔަތް ފުރިހަމަ ކޮށްދެވޭނެތަ؟ އެކަމެއް ނުވާނެއްނު ؟ މަރުވެގެންދާ މީހެއްގެ ވަޞިއްޔަތް ފުރިހަމަ ކޮށްދޭން ތިބޭބައެއްނު ދިރިތިބީންނަކީ! . . އާދިލާ! އަހަރެންގެ ހަށިގަނޑުގަ މިކަންކުރާނެ ހިތްވަރެއްނެތް. މި ދެފައިގަަ މިކަން ކުރާނެ ބާރެއްވެސްނެތް. އަހަރެންގެ ހިތަކުން މިކަމަށް މުޅިން ރުހެވޭކަށްވެސް ނެތް. މިކަމާ ވިސްނާވިސްނާ އަހަރެން ކަންނޭނގެ މޮޔަވާނީ. އެކަމަކު… އެކަމަކު… ފަރީދާގެ ވަޞިއްޔަތް ފުރިހަމަކޮށް ދިނުމަކީ އަހަންނަށް މިވަގުތު ވާޖިބެއްނު.” ފެންކަޅިވެފާވާ ލޯ ފޮހެލަމުން ސަމީރު ނޭފަތް ދަމާލިއެވެ.
ހެނދުނުގެ ދިލަ އަވިން ރަށުތެރެ ދޮންކުރަމުންދަނީއެވެ. ހަމަހިމޭން ހިނގުމެއްގާ ކުރިޔަށްދާ ސަމީރުގެ ގަޔަށް އިރުގެ ދޯދިތަކުން ހޫނުކުރަމުންދެއެވެ. ޖައްވުގެ ތެރޭގާ ދައުރުވަމުންދާ ފިނި ވައިރޯޅިތަށް އޭނާގެ ގައިގާ ފިރުމަމުންދެއެވެ. އާންމު ދިރިއުޅުމުގާ ސަމީރުގެ ހިނގުން އާދައިގެ ވަރަކަށް ހަލުވިވެފާ
ފިރެހެންވަންތަ ސިފަ ހުރެއެވެ. އެހެނަސް މިއަދަކީ ތަފާތު ދުވަހެކެވެ. މިއަދު އޭނާގެ ހިނގުން ލަސްވެފާ އެހިނގުމުގާ ޖޯޝެއްނެތެވެ. ހީވާގޮތުން ސަމީރާއެކު ނަމަވެސް ތުގާ އެރަށުން ފައިބަން އޭނާ ނޭދެނީއެވެ.
މަގުތަކުގެ ކަންކަން މަތިން ސަމީރުގެ ހަރަކާތްތަށް ބަލަންތިބި މީހުންނަށްވެސް މިއަދު ހީވަނީ ހިތާމައެއް ލިބިފާވާހެނެވެ. ބައެއް މީހުންގެ ނަޒަރުގާ ސަމީރަކީ ބޮޑު މޮޔައެކެވެ. އަނެއް ބައެއްގެ ނަޒަރުގާ ސަމީރަކީ ހިތްވަރުގަދަ ފަހުލަވާނެކެވެ. އެތައް ބައެއް ދެކޭ ގޮތުގާ ސަމީރަކީ ހިތްހެޔޮ ބުއްދިވެރިއެކެވެ. ސަމީރުގެ ހަޔާތަށް ކުރިމަތިވެފައިވާ މިބޮޑު އިމްތިހާންގެ ވާހަކަވަނީ، މިވީ ދެމަސްތެރޭ މުޅިރަށަށް ފެތުރިނިމިފައެވެ.
“ސަމީރު!… ހިތްހެޔޮ ކުރާތި! ތިކުއްޖާ ސަމީރާ ވަކިވާތީ އަހަރެން ހިތާމަކުރަން. ތިވަރުގެ ނިޢުމަތެއް ލިބުނު ދުވަހު ސަމީރުއަތުން އުމުރަށް ތިކުއްޖާ ބީވެގެންދާތީ މިހެން މިބުނެވުނީ. ތީ ކިހާ ނަސީބުދެރަ ކުއްޖެއްދޯ.ހެހެ… އަންހެނުން ބުންޏޭކިޔާފަ ކުރާވަރުކަމެއްތަތީ؟ ބޯގޯސް މީހެއް. ހެހެ…” ދޯންޏަށް އަރަން ދިޔަ ސަމީރަށް ހުއްޓުންއެރީ ރަށު މީހަކު މަލާމާތައް ބުނެލި ހިތާމަވެރި ޖުމްލަތަކުންނެވެ.
“ފަހުދު! ކަލޭމެން ކަހަލަ މީހުންކުރާ ބޭކާރު މަލާމާތްތަކަށް ބޯލަނބާ ފަސްދީފަ ދާވަރަށްވުރެ އަހަރެން ހިތްވަރުގަދަވާނެ. އަހަރެންގެ ދަރިފުޅަކީ އަދިވެސް ވަރަށް ނަސީބުގަދަ ކުއްޖެއް. ކަލެއަށްވުރެ ގިނަ ނިޢުމަތްތަކުން އަހަންނާ އަހަރެންގެ ދަރިފުޅު ވަށާލަފާނެ. ނަސީބު ގަދައީވެސް އަދި ނިޢުމަތްތަށް ގިނައީވެސް ކާކުކަން ކިހިނެތް އިނގެނީ؟ އަހަރެންގެ ދަރިފުޅުގެ ލޯބި ދުވަހަކުވެސް އަހަންނާ ވަތްކެއްނުވާނެ. އަހަރެން މަރުވިޔަސް އަހަރެން ދިރިހުއްޓަސް އަހަންނާ އަހަރެންގެ ތުގާގެ ލޯތްބަކީ ހިތާ ހިތުގެ ގުޅުމެއް. މިކަހަލަ އާދައިގެ ރީތި އަޚްލާޤުތައް އިރުއިރުކޮޅުން ކަލޭމެންނަށް ޖެހޭނީ އެހެންމީހުން ވިސްނައިދޭން. އަހަރެން އަބަދުވެސް ހިތްހެޔޮވާނެ. އެކަމު އެއަށްވުރެކުރިން ކަލޭގެހިތް އަހަންނަށްޓަކާ ހެޔޮކޮށްލަބަލަ. އަހަރެންދަނީ.”
ބިޔަ ކަނޑުގެ ލޮނުގަނޑު ކަފަމުން ދުއްވާފާދާ ދޯނީގެ މިސްރާބުހުރީ ވެރިކަންކުރާ ރަށް މާލެއަށެވެ. ކަނޑު މަޑުވެފާ އާދައިގެ ވަރަކަށް މަޑުމަޑު ވައިރޯޅިތައް ދޭތެރެ ދޭތެރެއިން ޖެހެމުންދެއެވެ. އަމާން ދަތުރެއްނަމަވެސް އިރުގެ ދޯދިތަކުން މުޅިޖައްވުވަނީ ދިލަހޫނުން ލާވަށާލާފައެވެ.
ތިންގަޑިއިރުގެ ނިޔާމަ ދަތުރުމަތީ ސަމީރުގެ އިތުރުން ދެޖިންސުގެ މީހުންތިއްބެވެ. ކުދިބޮޑު މީހުންގެ އިތުރުން މުސްކުޅިންނާ ބަލިހާލުގާވާމީހުން މަދުންނަމަވެސް ފެނެއެވެ. ފުރަތަމަ ދަތުރުގަވެސް ތުގާ މަސަލަސްކުރަމުން ގެންގުޅުމަކީ ސަމީރަށް ފަސޭހަކަމަކަށް ނުވިއެވެ. އެކުޑަކުޑަ ދަރިފުޅުގެ ކުކުރާލުމާ، ރުންކުރު ބޮޑާހޭކުންފަދަ ކަންކަމުން ސަމީރަށް އިތުރު ފިލާވަޅުތަކެއް ދަސްވެއެވެ.
ދޭތެރެ ދޭތެރެއިން ބަނޑުހައިވެގެން ރޯލާ ހިތްދަތުކަމުންނާ ގިސްލުމުގެ އަޑުން ސަމީރު ގޮތްހުސްވެ ހާސްވާންފަށައެވެ. ނިދަން ބޭނުންވެގެން ތުގާ މޫނުމަތީއަތް ހާކަމުން ރޯއިރު ސަމީރުގެ ހިތުގަޖެހެއެވެ. އެމައުސޫމު މޫނުމަތިން ކުޑަނަމަވެސް ހިނިތުންވުމެއް ފެންނަނީ މަދުފަހަރެއްގައެވެ. އެއިން ކޮންމެ ހިނިތުންވުމެއްފެނި ސަމީރުގެ މުޅި ހަށިގަނޑަށް އިތުރު ބާރެއްލިބިދެއެވެ. މާލެ ފަޅުތެރެއަށް ވަދެވެންދެން ސަމީރުގެ ކުޑަކުޑަ ތުގާއަށް އެކިފަހަރުމަތިން އެހީތެރިކަން ފޯރުކޮށްދިނީ ދޯނީގަތިބި މަދު އަންހެންވެރިންނެވެ.
ތޮށްޖެހިފަވާ މާލެއަށް ސަމީރުފޭބީ އެހެން މީހުންނާވެސް ދާދި އެކީއެވެ. ހަލުވިކަމާއެކު ދުއްވާފަދާ ތަފާތު އުޅަނދުތަކުން ޖައްވު ނުސާފުކުރަމުންދަނީ އެއްވެސް ފަރުވާލެއްނެތިއެވެ. މަަގުމަތީގެ ހަލަބޮލިކަން އިހުސާސްވަނީ ތަފާތު އަޑުއަޑުން ގުގުމަމުންދާ ބަރުގަނޑުގެ އަޑުންނެވެ. އާދައިގެ ދުވެއްޔެއްގާ ކަޅުކުލައިގެ ކާރެއްއައިސް ސަމީރު ހުރިހިސާބަށް މަޑުކޮށްލިއެވެ.
“ކޮންތާކަށް ދާން؟” ކާރުގެ ލޯގަނޑު މަޑުމަޑުން ތިރިކޮށްލަމުން ޑްރައިވަރު އަހާލިއެވެ.
“ހެންވޭރު ޑްރީމްސްއަށް.” ޑްރައިވަރުގެ އެދުމުގެމަތިން
ކުޑަކުޑަ ތުގާ ގޮވައިން ސަމީރު ކާރަށްއަރާ ހަމަޖެހިލިއެވެ.
ދުއްވަމުންދިޔަ ކާރުތެރޭ ސަމީރުގެ ނަޒަރު ހުއްޓިފާވަނީ ތުގާ
ކުރަމުންދާ ކުދިކުދި ހަރަކާތްތަކަށެވެ. ސަމީރުގެ ހަޔާތުން ތުގާ ބީވެގެން އެހެން ބައެއްގެ އަތްމައްޗަށް ދޫކޮށްލަން މިއަދު މަޖުބޫރެވެ. އެހެނަސް، ބައްޕައަށް ކުރަމުންދާ އަސަރު އެ ޅަސިކުނޑިއަށް ވިސްނާދޭނެ ގޮތެއް ޚުދު ސަމީރަށްވެސް ނޭންގެއެވެ. ބައްޕައެއްގެ ހައިޞިއްޔަތުން ދަރިފުޅަށް ދޭންބޭނުންވާ އެތައް ނަޞޭޙަތެއް ސަމީރުގެ ދުލުގާވެއެވެ. އެހެނެއްކަމަކު އެކަންކުރާނީ ކީއްހެއްޔެވެ؟ އެވާހަކަތަށް ސަމީރުގެ ދުލުން އިއްވާދެވޭ ވަރަށްވުރެ ތުގާ ކުޑައީއެވެ.
އެންމެ ކުޑަމިނުން ސަމީރުގެ ސިފަ ތުގާއަށް ފެނިލަން އޭނާބޭނުމެވެ. ނަމަވެސް ތުގާގެ ލޮލަށް ސަމީރުގެ ސިފަ ތަޞައްވަރު ކޮށްލެވޭނީ އަމުދުން ކިހިނެއްހެއްޔެވެ؟ ތުގާއަށް ދުވަހަކުވެސް އޭނާގެ ބައްޕަ ފެނުމުގެ ނަސީބު ލިބޭނެބާއެވެ؟

– ނުނިމެ –
—————————————————-
ނޯޓް : إن شآءالله ކޮންމެ ހަފްތާއަކު އެއްދުވަހު މިވާހަކަ އަޕް ކުރާނެ ވާހަކަ ދަންނަވަން. ކިޔުންތެރިން އަޅުގަނޑުގެ މިވާހަކައަށް ދެއްވާ އެއްބާރުލުމުގެ ސަބަބުން، “ހަފްތާގެ މަޤްބޫލު” ވާހަކަތަކުގެ ތެރޭގައި ހިމެނިފާވާތީ، ތިޔަ ކިޔުންތެރިންނަށް ހިތުގެ ފުންމިނުން ޝުކުރު ދަންނަވަން.