އިމްތިހާން

ގަދަ ކަނޑުގެ ބިޔަ ރާޅުތަކުގެ ތެރެއިން ފެންގަނޑު ކަފަމުންދާ ” ނަސީބު” ދޯނީގެ މިސްރާބުހުރީ ކ.ހުރައަށެވެ. ކަނު އަނދިރީގެ ތެރެއިން ވެހެމުންދާ ބޯވިއްސާރައަށް ކުޑަވެސް
ތުނިކަމެއް ނާދެއެވެ. ހަތަރު ފަޅުވެރިން ހަރަކާތްތެރި ވަމުންދާ، ވިއްސަކަށް ފޫޓުގެ އެކުޑަކުޑަ ރިޔަލު ދޯނީގާ ވެހެމުންދާ ވާރޭގެތެރޭ ފިކުރެއް ކުރަމުން އެދަނީ ކެޔޮޅު ސަމީރެވެ.

” ބަލަ ކެޔޮަޅާ! ކިހިނެތް ވެފަތިއިނީ. ކޮންކަމަކާ ތި ވިސްނަނީ. މަށަށް ހީވަނީ މިއޮޑީގެ މިސްރާބު ބަދަލުވަނީހެން. އާދަންބެއަށް އެއޮށްގެން ނިދެނީ. ދޭބަލަ މިވާއެއްޗެއް ބަލާލަން.”
ސިއްސައިންގޮސް ސަމީރުގެ ވިސްނުން އެއްކިބާކޮށްލީ ދޯނީގެ ފަޅުވެރިކުއްޖަކު ވާހަކަ ދެއްކުމުންނެވެ. ހަމަ އެއާއެކު ސަމީރު އަވަސްވެގަތީ ދޯނީގެ މިސްރާބު ހަމައަކަށް އަޅުވާށެވެ. ފަޖުރުގެ އަލިކަމަށް ރަށަށް ވަދެވޭވަރު ކުރުމަށެވެ.

އަނދިރީގެ ތެރެއިން އަލިކަމެއް ފާޅުވާންފެށީ ދުވާލަށް ތަންދެމުންނެވެ. ހަމަހިމޭން ކަމުގެ މެންދަމަކަށްފަހު ކ.ހުރާ “ދިއްލި ” ގެއިން އިވެމުންދަނީ އަންހެނެއްގެ ވޭނާ ކެކުޅުމުގެ އަޑެވެ. ތެތް ފިނިމަކުގެ ތެރެއިން ފަރީދާ ފޯވަމުން އެދަނީ ހާސްކަމާ ވަރުބަލިކަމުގެތެރެއިންނެވެ. ގޮތް ހުސްވެފާވާ ފޫޅުމާ މަސައްކަތްކުރަމުން ދަނީ އޭނާގެ ވާޖިބު އަދާކުރުމަށެވެ.

ގޭގެ ދޮރުން ވަދެވުމާއެކު ސަމީރުގެ ކަންފަތުގާ ޖެހުނީ ތުއްތު ދަރިފުޅު ރުުއިމުގެ ތޫލި އަޑެވެ. ބޮޑުއަށި މައްޗަށް ދަބަސް އެއްލާލަމުން ގޮސް ފަރީދާ އޮތް ކޮޓަރިކައިރިއަށް ސަމީރު މަޑުކޮށްލިއެވެ. އަފީފާގެ އަތުގަވާ ކުޑަކުޑަ ފުރާނަ ނަގާ އަތްދަނޑި މައްޗަށް ލަމުން ސަމީރު މެޔާލާ ބޮނޑިކޮށްލިއެވެ. ވަގުތުން އެ ކުޑަކުޑަ ދަރިފުޅުގެ އަޑު ކެނޑި ހަމަހިމޭންވީ އަޖައިބެއް ފަދައިންނެވެ.

” ކޮބާ ފަރީދާ. އޭނަގެ ހާލު ރަނގަޅުތަ؟ ” ސަމީރު ސުވާލުކޮށްލީ ގޭދޮށު އަވައްޓެރިއެއް ކަމަށްވާ އަފީފާ އަށެވެ.
” ސަމީރު! ހިތްވަރުކުރާތި. ސަމީރަށްވެސް އިނގެއެއްނު. ފަރީދާއަށް ވަނީ ކޮލެރާ ޖެހިފަކަން… އޭނަ ވަރަށް ހިތްވަރުގަދަ.
ފޫޅުމާ އައިސަ ބުނީ ވިހެއުމުގެތެރޭ ވަރަށް ލޭފައިބަމުންނޯދަނީ.
ހިޔެއް ނުވެޔޯ ފަރީދާދެން… ” އަފީފާގެ ލޮލުން ކަރުނަ ހިލި
ދޫ ހިމޭންވެއްޖެއެވެ.
” ނޫން. ނޫން… އެކަމަކު.. އެކަމަކު… އަހަރެންގެ ތިން ދަރިންނަށްޓަކާ އަހަރެންް މިދުނިޔޭގަ ހުންނަން އެބަޖެހޭ. މި ތުއްތު ފުރާނައަށްޓަކާ… އަހަރެން ހިތްވަރު ކުރަންޖެހޭ. އެކަމަކު އަހަރެންގެ މި މައުސޫމު ތިންދަރިން… ފަރީދާ.. ފަރީދާއާނުލާ
އަހަރެން ކިހިނެއް މިކުދިން ބަލާނީ… ހަ އަހަރު ނުވާ ތިންކުދި…” ތުއްތު އަންހެން ދަރިފުޅު މެޔާލާ ބޮނޑި ކުރަމުން
ސަމީރު ރޮމުން ދިޔައެވެ. ހިތުގަވާ ޝަކުވާތަށް ދުނިޔެއަށް ހާމަ ކުރަމުންނެވެ. ހިތުގެ ގިލަންތައް ފަށްފަށް ކުރަމުންނެވެ.

ދޮރު ހުޅުވާލި އަޑަށް ސަމީރު ބަލާލީ ހާސް ކަމާ އެކުގައެވެ.
ފޫޅުމާ އައިސަގެ ހުއްދަލިބުމާއެކު ވަގުތުން ފަރީދާ ކައިރިއަށް ވަނީ ދެލޯ ފޮހެލަމުންނެވެ. ސަމީރުގެ އެއްއަތުން ދަރިފުޅު އުރައިން ހުރިއިރު އަނެއް އަތުން ފަރީދާގެ ބޮލުގާ ފިރުމަމުން ދިޔައެވެ.
” ސަ.. ސަމީރު… އަހަރެންގެ ދުވަސް މިދަނީ. ދެން… ދެން ސަމީރުވެސް…އުޅެންވާނީ އެކަނި.. އަހަރެންގެ ވަރަށް ބޮޑ.ު.. ވަޞިއްޔަތެއް އެބައޮތް. ތި .. ތި ފަރިފުޅަށް ދެމަސް ވީމަ .. މާލޭގަ ހުރި… އަހަރެންގެ ދޮންތައަށް ހިބައިން ދީ.. މިކަން އަހަންނަށް ކޮށްދޭނަންތަ؟ ” ފަރީދާގެ ބަލި އަޑުގެ އިތުރުން ސަމީރަށް ލިބުނީ އިތުރު ހިތްދަތި ކަމެކެވެ.

މިކެހިވެރި ދުނިޔެއަށް ދަރިފުޅު ދޫކޮށްލަންވީހެއްޔެވެ؟ ފަރީދާ ފެނުމުގެ ނަސީބު ނެތް ދުނިޔޭގާ ދަރިފުޅުވެސް ފެންނަން ނޭދެނީހެއްޔެވެ.؟ މިއީ ލެއްވި ނަސީބެއް ހެއްޔެވެ؟ ހަޔާތަށް ލެއްވި ރަޙްމަތެއްހެއްޔެވެ؟ ނޫނީ މިއީ ލެއްވި މުޞީބާތެއްހެއްޔެވެ؟. އެންމެ ދެ މަހުން ފެށިގެން ތުއްތު ދަރިފުޅު ބައްޕަގެ ނަޒަރުން ފަރުދާކޮށްލުމަކީ އިހްމާލެއްނޫން ހެއްޔެވެ؟ ނޫނެކެވެ. މިއީ ސަމީރުގެ ހަޔާތަށް ކުރިމަތިވި އެންމެބޮޑު އެއް އިމްތިހާނެވެ.
—————————————————-