ލޯބި މަވީ ބޭކާރޭ

”ވަކިވީ އަސަރާ މަންޒަރު، ހިތަކުން ހަމަ ނުފިލާނޭ.

ވޭނާއި ރިހުން އެކުވާ، މިހިތާމަ އާލާވާނޭ.”

އިވެމުން ދިޔަ މަޑުމޮޅި ހިތާމަވެރި ލަވައިގެ ސަބަބުން އަހަރެންގެ ދެލޯ ތެންމަމުން ދިޔައިރު ބޯ އަޅައިގެން އޮތް ބާލީސްވެސް ދިޔައީ ހިނދެއް ހިނދަކަށް ފޯވަމުންނެވެ. ނަމަވެސް ހިތުގައި އުފެދޭ ސުވާލަކީ މިއީ އަހަރެން ކަރުނަ އަޅައި ރޯންވީ ވަގުތު ހެއްޔެވެ؟ ނޫނީ ހިތްވަރާއެކު ކޮޅަށް ތެދުވަންނަންވީ ވަގުތު ހެއްޔެވެ؟

މާތްކަލާކޯއެވެ. އަހަރެންނަށް މިއަދު މިވަނީ ކޮންފަދަ ހާލެއް ޖައްސަވާއި ހެއްޔެވެ؟ މިއީ މިއަދު އަހަރެންނަށް މިންވަރު ކުރެއްވި ގޮތް ހެއްޔެވެ؟ ތަގްދީރުގައި އަހަރެންނާ މެދު ލިޔެވިފައިވަނީ މިފަދައިން ހެއްޔެވެ؟ ނޫނެކެވެ. ތަގްދީރު އަހަރެންނާ މިފަދަ ބޮޑު ސަމާސާއެއް ނުކުރާނެއެވެ. އޮޅުވައެއް ނުލާނެއެވެ. ނަމަވެސް މިއަދު އަހަރެންނާ ކުރިމަތި މިވަނީ ކޮން ފަދަ މުސީބާތްތަކެއް ހެއްޔެވެ؟

ކެތް ކުރެވޭނީވެސް ވަކި ވަރަކަށެވެ. ނަމަވެސް މިއަދު އަހަރެންނަށް މިވަނީ ކަށީގައި ނެތް ހިތްވަރެއްލައިގެން ކެތްކުރަން ޖެހިފައިއެވެ. ދިރިއުޅުމާގެން ކުރިއަށްދާން ޖެހިފައިއެވެ. ނަމަވެސް މިކަން ވާނެ ހެއްޔެވެ؟ މި ސުވާލުގެ ޖަވާބު އަހަރެންނަށް ވަގުތުން ލިބުނީ އަހަރެންގެ ޟަމީރުވެސް މިކަމާ ދެކޮޅު ހަދަމުންނެވެ. އާއެކެވެ. މިއަދު އަހަރެން މިވަނީ ބޮޑު އަޑިގަނޑަކަށް ވެއްޓިފައިއެވެ. ތެދުވުމަށް ހިފާލާނޭ އަތެއް ނުލިބިފައިއެވެ. ހުންގާނު ނެތް އޮޑިއެއް ފަދައިން މިސްރާބު އޮޅިފައިއެވެ.

ބުނާތީ އަޑު އަހަމެވެ. އަންހެނެއްގެ ހިތެއް ދުވަހަކުވެސް ނުފުރޭނެއެވެ. ކަނޑުގެ ފުންމިނަށްވުރެ އެމީހުންގެ ހިތް ފުންވާނެއެވެ. ނަމަވެސް މިވާހަކަ އަހަރެން ދޮގު ކުރީމެވެ. ހިތާ ފުރާނައިން އަންހެން ކުއްޖެއްދެކެ ތެދުވެރި ލޯބިވެވުމުންނެވެ. އެއީ އަޒްކާއެވެ.

ކަޅުކަންގަދަ ދިގު އެސްފިޔަތަކުގެ ހިމާޔަތުގައިވީ ފެހިކުލައިގެ ކަޅި އަހަރެންގެ ލޮލުގައި އެންމެ ފުރަތަމަވެސް އަޅައިގަނީ މަގުމަތިންނެވެ. އަހަރެންނަށް ހުއްޓާ ނުލައި އޭނާގެ ސޫރައަށް ބެލުނެވެ. ހަމައެވަގުތު އަހަރެންގެ ހިތް އޭނާއަށް ހިބައިން ދެވުނު ކަހަލައެވެ. އެސޫރަ އަހަރެންގެ ހިތުގައި ރަބަރަކުން ފުހެނުލެވޭ ވަރަށް ކުރުހާލެވުނެވެ. ހިތިފަތު ބުމައެކެވެ. ފިނިފެންމަލެއްފަދަ ފިޔާތޮށި ކުލައިގެ ތުންފަތެކެވެ. އެހައިވެސް ދޮނެވެ. އިސްތަށިގަނޑު މަޑު ދަނބު ކުލައިގެ ބުރުގަލަކުން ފޮރުވާލެވިފައިވުމުން އަހަރެންގެ ޝައުގުވެރިކަން އެ ފަންމިންޏަށް ދަމައިގަންނަން ނެގީ ސިކުންތު ކޮޅެކެވެ.

އެކި މީހުންގެ ގާތުގައި އަހައިގެން އޭނާގެ ހުރިހާ މައުލޫމާތެއް އަހަރެން ހޯދީމެވެ. މަދު ދުވަސްކޮޅެއްގެ ތެރޭގައިއެވެ. ނަންބަރު ހޯދައި މެސެޖު ވެސް ކުރީމެވެ. ހިތަށް ފިނިކަމެއް ލިބި ހިތްހަމަޖެހުމެއް ލިބުނީ އޭނާ އަހަރެންނާ ވާޙަކަ ދެއްކުމުންނެވެ. ހިނދުކޮޅެއްގެ ތެރޭގައި އަހަރެމެން ދެމީހުން އެކުވެރިންނަށް ވީމެވެ. އަހަރެން އޭނާއަށް އަހަރެންގެ ހުރިހާ ވާހަކައެއް ކިޔާދިނީމެވެ. ނަމަވެސް އޭނާއާ ބެހޭ މާ ގިނަ މައުލޫމާތެއް އަހަަރެން ނާހަމެވެ. އަހާކަށް ބޭނުމެއްވެސް ނޫނެވެ. ނަމަވެސް އެޅުނީ ދުވަހަކު ހަނދާނުން ފުހެވިގެން ނުދާނޭ ފަދަ ބޮޑު ޅަ އެއްޗެކެވެ.

އެކުވެރިކަން ލޯތްބަށް ބަދަލުވެގެން ދިޔައީ މަހެއްހާ ދުވަސް ތެރޭގައިއެވެ. އޭނާވެސް އަހަަރެންދެކެ ފުރިހަމަ ލޯބިވާ ކަމަށް ބުނަމުންނެވެ. އެތައް އަހުދަކާ ވައުދެއް ވަމުންނެވެ. އެތައް އެތައް މާބޮނޑިތަކާއި ކާޑުތަކުންނެވެ. އެހެންނަމަވެސް އޭނާގެ ހިތެއް ނުފުރުނެވެ. ނޫނީ އަހަރެންނަށް އޭނާ ބޭނުންވާފަދަ އެއްޗެހި ވަކި ކުރަން ނޭނގެނީއެވެ. އަހަރެން އޭނާ ދެކެވީ ހަގީގީ ތެދުވެރި ލޯބި ހެދީ މަޖަލަކަށެވެ. ކުޅިވަރަކަށެވެ. އެހެނީ އަހަރެން އަބަދުވެސް އަޑުއަހަނީ ފިރިހެނުން އަންހެން ކުދިންނަށް ދޯކާ ދޭ ވާހަކައެވެ. އޮޅުވާލާ ވާހަކައެވެ. ނަމަވެސް އަހަރެންނަށް ވީ މުޅިން ތަފާތުކޮށެވެ.

”އިނާން.. ތި އެޅުނީ ކަތި ފިޔަވަޅެއް.. ތި އަޒްކާއަކީ ރަނގަޅު ކުއްޖެއް ނޫން.. އަހަރެން ލޮލުން ދެކި އަތުން ހިފައިފަ މިބުނަނީ.. އަޒްކާ އެހެން ފިރިހެނަކާ އެއްކޮށް އުޅޭ.. ރެސްޓޯރެންޓުތަކަށް ގޮސް ހަދާ.. މިކަން ގަބޫލުކުރޭ.. މިއީ ހަމައެކަނި އަހަރެންގެ ބަހެއް ނޫން.. އެތައް ބަޔަކަށް މި މަންޒަރު ފެނުނު.. މިކަމާ ދޭތެރޭ ވިސްނާލާ.. އެހެންނޫނީ އިނާންގެ މުޅި ހަޔާތް ބަރުބާދުވެގެން ގޮސްދާނެ..” އެކުވެރިޔާ ބުނި ކޮންމެ ބަހެއް، ކޮންމެ ޖުމަލެއް އަހަރެންގެ ހިތަށް އައިސް ވަނީ ދުނި ތީރުތަކެއް ފަދައިންނެވެ.

އެދުވަހަށްފަހު އަހަރެން އޭނާގެ އުޅުމަށް ފާރަލީމެވެ. ހަފުތާއެއް ވަންދެކަށެވެ. ފެނުނީ ދުވަހަކު ބަލަން ބޭނުންނުވާ މަންޒަރުތަކެވެ. އިވުނީ އަޑު އަހަން ބޭނުންނުވާ އަޑުތަކެވެ. އަހަރެން އެއްކޮށް ގޮތް ހުސްވެގެން ދިޔައެވެ. ސިކުނޑީގައި ހީވީ މީހަކު އެއްޗަކުން ޖަހައި ޗިސްޗިސް ކޮށްލި ހެންނެވެ. ހިތުގައި ހީވީ މީހަކު ވަޅި އަޅައި ކޮށާލިހެންނެވެ. ނަމަވެސް ވަގުތުން އެނުބައި އަންހެނާއާ ދުރުވާން ބޭނުންވިއެވެ. އޭނާގެ ހަނދާންތަކުން މިންޖުވާން ބޭނުންވިއެވެ.

ވަރަށް ހިތްވަރުކޮށްފައި އަހަރެން އޭނާގެ ކުރިމައްޗަށް އެރީމެވެ. ނަމަވެސް ހުރެވުނީ އަނގަ ހުޅުވާލަން ނުކެރިފައިއެވެ. ހީވީ އޭނާ އަހަރެންގެ ހިތުގައި ހުރި ހުރިހާ އެއްޗެއް ކިޔައި ނިންމާލިހެންނެވެ. އަހަރެންނަށް ވުރެ ކުރިން އޭނާގެ ވާހަަކަ ފަށައި އަހަރެން ކުޅޭ ކުޅޭ އެއްޗަކަށް ހަދާލާފައި ދިޔައީ އެއްވެސް ރަހްމެއް ކުލުނެއް ނެތިއެވެ. އެދުވަހު އޭނާ އަހަރެންނާ ދިމާލަށް ގޮވި ހަޑިހުތުރު ބަސްތަކާއި އަހަރެން ދެރަކޮށްލުމަށް ބުނި ހުރިހާ ބަހެއް ކަންފަތުގައި އަދިވެސް، އަދިވެސް ގުގުމަމުން އެބަ ދެއެވެ. ފިރިހެނަކަށްވެ ހުރެ އެންމެ ބަހެއްވެސް އަހަރެންނަށް އޭނާއާ ދިމާލަށް ބުނާކަށް ނުކެރުނެވެ. އޭނާއަށް ކުރި އަދި ކުރެވުނު އިހްތިރާމެއްގެ ބޮޑުކަމުންނެވެ.

ހުއްޓާނުލައި އޭނާގެ ފަހުބަސް އަހަރެންގެ ކަންފަތުގައި ގުގުމަމުން ދިޔައިރު ފައިން ހީވީ ދެންމެ ދެންމެ ވަރުދޫވެގެން ހިނގައިދާނެ ހެންނެވެ. ހުރެވުނުތަނެއް ނޭނގުނެވެ. ހޭލެވުނީ މެޝިންތަކުގެ އަޑަށެވެ. އާއެކެވެ. މިއަދު އަހަރެންނަކީ އެއް ފަރާތުގައި ވާގި ގޮސްފައި އޮތް ނުކުޅެދުންތެރިއަކީމެވެ. ލޯބީގައި ނާކާމިޔާބު ވެރިއަކީމެވެ. ބަދު ނަސީބުވެރިއަކީމެވެ.

މިހާރު ހިތަށް އަރައެވެ. މީހެއް އިހްތިޔާރު ކުރުމުގެ ކުރިން އޭނާގެ ބޭރުފުޅުގެ ސިފައަށް ބެލުނުކަމީ މޮޔަކަމެކެވެ. އޭނާގެ ފަރަާތުން އަހަރެންނަށް މިލިބުނު ހިތާމަ، ހިތަށް ލިބުނު ޒަޚަމްތައް ދުވަހަކުވެސް ފިލައިގެނެއް ނުދާނެއެވެ. އަބަދުވެސް އެހަނދާންތައް ސިކުނޑީގައި އާލާވާނެއެވެ. ނަމަވެސް މި އިނާނެއް ދެނެއް އެ އަޒްކާގެ ފަހަތުން ދުވެ އާދޭހެއް ނުކުރާނެއެވެ.

~ ނިމުނީ ~