އަހަރެން 3 ވަނަބައި

ގަޑިން ބާރަޖެހުމާއެކު 16 ވަނަ އުފަންދުވަސް އައިސް މަރުޙަބާ ކިޔައިފިއެވެ. އުފަލުން ނަށަމުން ކަހަލަ ގޮތަކަށެވެ. އުފާވަނީ އަހަރެންނަށް 16 އަހަރު ފުރުނީތީއެއް ނޫނެވެ. މިއަދު އަހަރެންގެ އައިޝަތާއި ދިމާވާނެކަމުގެ ފުރިހަމަ ޔަޤީންކަން އޮތީމައެވެ. އަނެއްކާ މިއީ އައިޝަތަށްވެސް މުހިއްމު ދުވަހެއްކަން އަހަރެންނަށް ކަށަވަރުވެފައިވާތީއެވެ. ސަބަބަކީ އަހަރެންދެކެ އޭނާ ވާ ލޯތްބާއި، އަހަރެންނާއެކު ހޭދަކޮށްލެވޭނޭ ވަގުތަކަށް އަބަދުމެ ކުރަމުންދާ އިންތިޒާރެވެ. މިއީ އަހަރެންގެ މި ދެލޮލުން ދެކެ، ދެ އަތުން ހިފައިފައިވާފަދައިން ކަށަވަރުވެފައިވާ ޙަޤީޤަތެކެވެ.
އުފަލުންގޮސް އެނދުމަތީގައި ނިދަން އޮންނައިރުވެސް ހިމޭނުން އޮވެވެނީކީއެއް ނޫނެވެ. ހީވަނީ ތުންފަތުގެ ދެމިޔަކަނުގައި ހިފައި ދެފަޅިޔަށް ދަމާހެންނެވެ. އެކަމު އައިޝަތާއި ބައްދަލުކުރެވެން އޮތީވެސް ހަވީރުއެވެ. އެއީވެސް ރައްޓެހިންގެ ޙަމަލާތަކަށް ފަހުގައިކަމަށްވެދާނެއެވެ. އުފަންދުވަހެއް އައިއްސިއްޔާ، އަހަރެންގެ ރައްޓެހިން ތިބޭނީ ހޭބަލިވެފައެވެ. ކޮންމެވެސް ލަނޑެއް ދޭން ނޫނީ އެމީހުން ނުރާވާނެއެވެ. އެކަމުގެ ބިރު އޮތަސް އައިޝަތާއި އެކީގައި ގިނައިރު ހުރެލަން އަހަރެން ނުލާހިކު ބޭނުމެވެ. އެކަމަށް އެދިފިނަމަ ރައްޓެހިންގެ ފަރާތުން، އަހަރެންނަށް ވަގުތުކޮޅެއް ލިބޭނެކަމުގެ އުންމީދުގައި އޮވެ، ބޭއިޚްތިޔާރުގައިވެސް ހީލެވެއެވެ.
އިންތިޒާރުގެ ގިޓާ ހިތުތެރޭގައި އެކީ އެ ކުޅެލާ ތިންހަތަރު ރާގުގެ އަޑު ކެނޑޭނީވެސް، އައިޝަތާއި ދިމާވެވުމުން ނޫންހެއްޔެވެ؟
ދުވަހަކުވެސް ލިބިފައިނުވާހައި ބޮޑު އުފާވެރިކަމެއް ހޯދައިގަތުމަށް، ކުޑަ ހިނދުކޮޅެއްގެ އިންތިޒާރެއް އޮންނައިރު އިރު، އެ ކުރެވެނީ ހާދަހާ ފަރި ފަރި އިޙްސާސްތަކެވެ.
ނަލަ ނަލަ ދުވަހަކަށް އަލިވިލެމުން އައިއިރު، ފަޒާތެރޭގައި ހިއްޕާލާފައިވާ ޝަބްނަމްގެ ފިނި އަރާމު އެދަނީ އޮބެމުންނެވެ. ވަށައިގެން ފަތުރަމުންދާ އިރުގެ ރަން ދޯދިތައް ދިއްލަމުން ދާތީ، އޭގެ ހޫނަށް ވުރެ މާ ދުރަށެވެ.
ރޭގައި މާލަހުން ނިދުނީތީ، މިއަދު މި ހޭލެވުނީވެސް މަންމަ އައިސް މޫނުގައި ފެން ކާއްތާތީއެވެ. ސުކޫލަށް ގަޑިނުޖެހި ދިއުމުގެ އުންމީދާއެކު ޔާޒޫމު ދުވެލީގައި ގަޑަގަޑައަޅާފައި ދުއްވައިގަތީމެވެ.
ކަންދިމާކުރިގޮތުން، ގަޑިޖެހުމުގެ ކުރިއަށް ސުކޫލުގެ ހަތަރުފާރުން އެތެރެވެއްޖައީމެވެ. ނަމަވެސް މިއަދު ކިޔެވޭގޮތެއް ހަމަހިލާނުވެއެވެ. ޚިޔާލީ ދުނިޔެއެއްގައި ގަނޑުވަރުތަކެއް ބިނާކުރަމުން އަހަރެންދިޔައިރު، މޫނުމަތިން ތާޒާކަމާއި، އިންތިހާ އުފާވެރިކަން ދައްކުވައިދޭ އެންމެ ބޮޑު ހެއްކަކީ ދެފަރާތަށް ދަމާލެވިފައިވާ ތުންފަތުގެ ދެމިޔަކަން ކަމުގައި ވެއްޖެއެެވެ. ކުލާހުގައި އަހަރެންގެ ޖިސްމު ހުއްޓަސް، އަހަރެންގެ ސިކުނޑީގެ ސަމުގާވަނީ، ޖައުޒާއެއް މުރިނގެއްނޭނގި، މުޅީން ޚިޔާލީ މަންޒިލަކަށް ބަހަށްޓާފައެވެ. އެހެން މީހުންނަށް އެކަން ފާހަގަކުރެވުނު ނަމަހީވެސް، އަހަރެންގެ ފަރާތުން އުނދަގުލެއް ނުޖެހޭތީ ޝުކުރުކޮށްގެން އެތިބީއެވެ. އުފާވެރި އުފަންދުވަހަކަށް އެދޭ ވާހަކަ ނޫން އެހެން ވާހަކައެއް އަހަރެންނަށް އަމާޒުވެގެނެއް ނުދެކެވެއެވެ. އެކަމަށް މާބޮޑު ސަމާލުކަމެއްދިނުމަކާއި ނުލައި، އަހަރެންނަށް ހެވިފައި މި އިނީ ބޭއިޚްތިޔާރުގައެވެ.
ރަނގަބީލުގެ އަޑުކަންފަތުގެ ކޮރުވަޅުތެރެއަށް ވަދެގެން ދިޔުމާއެކު ސިހުންވިއެވެ. މިއަދުގެ ކިޔެވުން ނިމުނީތީ، އުފަލުން ފޮޅެމުން ކުލާހުން ނިކުމެ ގެއަށްދާން ހިނގައިގަތީމެވެ. މިއަދު މިދެލޯ ހުޅުވުނު ފަހުން، މެދުކެނޑުމެއްނެތި ކުރަމުންދާ އިންތިޒާރުގައި ދެން މާކަގިނަ ވަގުތެއްވެސް ނެތެވެ. ގެޔަށް އައިސް ފޮތްދަބަސް ހޫރާލާފައި، ޔުނިފޯރމް ބޭލުމަށްފަހު، އަހަރެން އެނދުމަށްޗަށް ޖެހިގަތީ، ހަށީގައި ހުރި ވަރުބަލިކަން ފިލުވާލައި، އަރާމްކޮށްލުމުގެ ނިޔަތުގައެވެ. އިރުކޮޅެއްނުވެ ލޮލޮގެ ކުރަވި، ނިދީގެ ވަސްވާހުން ބަރާވެ، އެކީއެކަށް ދެލޯ މަރައިލެވިއްޖެއެވެ.

ސިހިގެންގޮސް ހޭލެވުނީ ޢަސުރު ނަމާދުގެ ބަންގިދޭތީއެވެ. ރަށުގެ ކުޑަ މިސްކިތާ ދިމާ ހުރަހުގައި ހުންނަނީ އަހަރެންގެ ގެއެވެ. ވީމާ ބަންގިދޭ އަޑު ވަރަށް ބާރަށް، ގޭތެރެއަށް އިވެއެވެ.
ހަވީރު 4 ގަޑި ބައިވުމާއިއެކު އަހަރެން ދުމެއްޖަހާފައި ދިޔައީ ތުނޑިއާދިމާލަށެވެ. އެއީ އައިޝަތާއި ދިމާވެވޭނޭ އެންމެ ހިތްގައިމު މަންޒިލެވެ. ލޯބިވެރިންގެ މެދުގައި މަގުބޫލުތަނަކަށްވެފައި، އެތުނޑި އޮތީ މިއަދަކު، ނޫނީ އިއްޔެއަކު ނޫނެވެ. މާކުރީއްސުރެ ރަށުގެ ތުނޑިއަކީ އަޖައިބުން ފުރިގެންވާ ފަރިކަމެއް ތަސައްވުރުކޮށްދެމުން އަންނަ ޤުދުރަތީ ހަދިޔާއެއް ކަމަށް އަހަރެންވެސް ޤަބޫލުކުރަމެވެ.
ރައްޓެހިންގެ ޙަމަލާތަކަށް ތައްޔާރުވުމުގެ ގޮތުން، އަހަރެން މިހުރީ އުފަންދުވަހުވެސް ބައު ޓީޝާޓުގަނޑަކާއި ސޯޓެއްލައިގެންނެވެ. ތުނޑީގައި ހެދިފައި އޮންނަ ވިނަގަނޑުމަތީގައި އަހަރެން އިށީނދެ މި އިނީ އެކުވެރިންނާއި އެކުގައެވެ. ގޮނޑުދޮށުގައި ބޯކޮށް ހެދިފައިވާ މަގޫގަސްތަކުގެ ހިޔާ، ވިނަގަނޑަށް އެޅިފައި އޮތުމުން، އެ ވިނަގަނޑުގައި ހިފާފައިވާ ތެތްފިނީގެ އުފާ އަހަރެމެން ލިބިގަންނަމުން ދިޔައީ، މޭފުރާލާފައި ނިކުންނަ ސިގިރެޓްގެ ދުމާއިވެސް އެކުގައެވެ. އައިޝަތަށް މިކަން އެނގިއްޖިއްޔާ، ނުރުހުންވާނެކަންވެސް އަހަރެން ދެނަހުރީމެވެ. މީ އަލަށް މިކަން ހިނގާ ފަހަރެއް ނުމެ ނޫންމެއެވެ. ކޮންމެ ދުވަހެއްގައިވެސް ޤަވާއިދުން މިކަމެއް ހިނގާތާ އަހަރެއްވަރު ވާނެއެވެ.
އައިޝަތު އަންނަތަން އެބަ ފެނެއެވެ. އޭނާގެ އެކުވެރިންނާއިވެސް އެކުގައެވެ. މާދުރުންވެސް ފަރިހިނިތުންވުމެއްގައި އަންނާތީ، އާޝޯޚުވެފައި ބަލަހައްޓައިގެން ހުރެވުނެވެ. އެ ހިނިތުންވުމަކީ އަހަރެންގެ ހިތުގެ ކާނާއެވެ.
ރަކިހިނިތުނވުމެއްގައި ހުރެ އުފަންދުވަހުގެ ތަހުނިޔާތައް ބަންޑުންކުރުވަމުން އެގެންދަނީ އެ ލޮބުވެތި އަޑުންނެވެ.
ދެން އައިޝަތުގެ އަތުން އަހަރެންގެ އަތަށް ލައިދިނީ އޭނާގެ ފަރާތުން ދޭ އުފަންދުވަހުގެ ހަދިޔާއެވެ.
މިހާރު އައިޝަތު އެއިނީ އަހަރެންގެ ކައިރީގައެވެ. އެ ފިނިފިނި އަތް، އަހަރެންގެ އަތުގައި ބާއްވާލައިގެންނެވެ. އަހަރެންގެ ޙިމާޔަތުގައި އެ އިނީ އުފަލުން ހެވިފައެވެ. އެ ދެލޮލުގެ ތެރެއިން ފެންނަމުން އެދަނީ އަހަރެންގެ ސޫރައެވެ. ތޫނުފިލިކަމުން އެހައިމެ އަޖައިބުކުރުވާފަދަ
ފުންލޮލުގެ ތެރެއަށް އަހަރެންވެސް މިއިނީ ގެނބިފައެވެ.

އެ ހަމަ ހިމޭން ވަގުތު ނަގައިލީ، ބަޔަކުން އައިސް އަހަރެންގެ ގައިގައި ފަހަތުން އަޮޅުލައިގަތުމުންނެވެ. އެ ވަގުތު ހަމަވީއެވެ. މި މީހުންނާހެދި މާފޮޅުވައިލަން އިނދެވޭވަރެއް ނުވާނެއެވެ. އަހަރެންގެ އެކުވެރިންގެ ލަޝްކަރު ތައްޔާރުވެ އެ ތިބީ، އަހަރެން ގަޔަށް ބިސްޖެހުމަށެވެ. އެމީހުން، އަހަރެން ނަގައިގަނެގެން އެ ދެންދަނީއެވެ.
އުފަންދުވަހުގެ ސަކަރާތުގެ ވަސްއޮބުނުތާ ދުވަސްކޮޅެއްވެއްޖެއެވެ. ނަމަވެސް ދެން، އަހަރެންގެ ކަންފަތުގައި އެ ޖެހުނީ ޙައިރާންވެ އަންތަރީސްވާވަރުގެ ވާހަކައެކެވެ. ހިތާމައިގެ ކަރުނަ ދެލޮލުގެތެރޭން އޮހޮރިގެން ނުދިޔަކަމުގައިވިޔަސް، ހިތް އެދަނީ މަރުވަމުންނެވެ.
އައިޝަތު އަހަރެން ގާތުގައި އެބުނީ އޭނާ ހަނދާނުން ފޮހެލާށޭވިއްޔާއެވެ. އަހަރެން އެކަން ކުރާނީ ކިހިނަކުންހެއްޔެވެ؟ އަދި އެހެން އެބުނި ސަބަބެއް ބުނުމަކާއި ނުލައި މިގުޅުން ނިންމައިލުން މާރަނަގަޅުވާނޭކަމަށްވެސް ބުންޏެވެ.
އޭގެ އަނެއްދުވަހު، އަހަރެން މިކަމުގެ ޙަޤީޤަތް ހޯދީމެވެ. ޖެހިގެން މި އުޅޭ މައްސަލައަކީ، އަހަރެންގެ އުފަންދުވަހުގައި، އައިޝަތު ދިން ހަދިޔާއެވެ. އެކަން އޭނާގެ މަންމައަށް އިނގުނު ހިސާބުން މައްސަލަ ގޯސްވީއެވެ.

އެހެން ނަމަވެސް، އޭއްޗެކޭ މީއްޗެކޭ ކިޔައިގެން، އަހަރެން އައިޝަތު ހަމަޔަކަށް އަޅުވައިފީމެވެ. މިއީ އަހަރުމެންގެ ގުޅުމުގައި އެންމެ ފުރަތަމަ ލައިގަތް ކޮޅިގަނޑެވެ.
މެސެޖުކޮށްގެން ވާހަކަ ދެއްކުމާއި، ބައްދަލުވެލައި ހެދުން އުނދަގޫނަމަވެސް، އަހަރުމެންގެ ގުޅުމަކަށް ބަދަލެއް ނާދެއެވެ. ހަމަ އެހާ ލޯބިވެތި ހުވަފެންތަކެއްގައި، ދެހިތުންވެސް ދިޔައީ ކުލަޖައްސަމުންނެވެ.
ދެން އަހަރެމެންގެ ގުޅުމަށް އައި ތޫފާނީ ކޮޅިގަނޑު ތަން ހުރަސްކުރި ހިސާބުން، އައިޝަތުގެ ޓިކާނާ ފުނޑުފުނޑުވެދާނޭ ކަމުގެ އިލްހާމް ކުރެވެންފެށުނެވެ.
އެކޮޅިގަނޑުގެ ވާހަކަ “އަހަރެން” (ފުރަތަމަ ބައި) ގައި ފަހުމުކޮށްދީފައިވާނެއެވެ.
މިކަންތައް ދިމާވުމަށްފަހުގައި، އައިޝަތުގެ އެންމެ ގާތް ރަހުމަތްތެރިޔާއާވެސް ގުޅުން ކުޑަ ވުމާއެކު، އަހަރެންނާއި އައިޝަތާއި މި އޮތް ގުޅުން އަލުން އިޔާދަކުރުމަށް ދަތިވެއްޖެއެވެ. އައިޝަތުގެ އެންމެ ގާތް ރަޙުމަތްތެރިޔާ، އާމިނަތަކީ އަހަރެންގެ ވަތުބަތާނެވެ. ގޮންޖެހުންތަކާއި ކުރިމަތިލައިގެން ނަމަވެސް، އަހަރެން އައިޝަތު ނުލާހިކު ބޭނުމެެވެ. އައިޝަތާއި އާމިނަތުގެ ރައްޓެހިކަމުގެ ގުޅުމަށް ހުޅުލެވި ރޯވަމުން އެދަނީ އެދެމީހުން ބޭނުންވެގެންހެނެއް ހިޔެއްނުވެއެވެ. އެނގޭހައިވެސް އެއްޗަކީ، އައިޝަތުގެ މަންމަ އާމިނަތުގެ ބޮލުގައި ތުހުމަތުތަކެއް އަޅުވައިގެން، މައްސަލައިގެ އުނދުނަށް ދަރުލަމުންދާކަމެވެ. އެކަމަށްފަހު، އާމިނަތުވެސް ހުންނަނީ އައިޝަތުދެކެ ހިތްހަމަ ނުޖެހިފައިކަން އެނގެއެވެ. ދޮގު ތުހުމަތުތަކެއް ކުރުވި އިރު، ރަޙްމަތްތެރިޔާގެ ދިފާޢުގައި ބަހެއް ނުބުނީތީ އަހަރެންވެސް ކަންބޮޑުވެއެވެ.
ކުރީގައިވެސް އަހަރެންނާއި އައިޝަތު ބައްދަލުވަނީ، އާމިނަތުގެ އެހީތެރިކަމާއި އެކުގައެވެ. އެކަމުގައި ގޯހެއްވާނަމަ، ކުއްވެރިވާން ޖެހޭނީ އަހަރެންކަމުގައިނުވެ ނުދާނެއެވެ. އަހަރެންގެ ރޫޙުގައިވާ ޖޯރާއި އުފާ އޮބައިލައިފިއެވެ. އެކިއެކި ގޮތްގޮތުން އައިޝަތާއި ބައްދަލު ވެވޭތޯ، ނޫނީ ވާހަކަ ދެކެވޭތޯވެސް ބަލައިފީމެވެ. ކާމިޔާބުވާގޮތެއް ނުވެއެވެ. ދިމާވެވޭނީވެސް ގެއިން ނިކުމެގެންތާއެވެ. ޖަލެއްގައި ޖެހިފައި އެފަކީރު އެއިނީ، އަހަރެންދެކެ ލޯބިވީތީއެވެ. މިކަމާހުރެ، އަހަރެންގެ ބޯއިތުރަކަށް ގޮވާނެ ޖާގައެއް ނެތެވެ. ގޮވާނެ ވަރަކަށް މިހުރީ ގޮވާފައެވެ. ކޮންމެ ރެޔަކު އަހަރެން ގިސްލައި ރޯރުއިން އައިޝަތަށް ފެންނަނަމަ އައިސް އަހަރެންގެ ގައިގައި އޮޅުލައިގަންނާނެއޭވެސް ހިތަށް އަރައެވެ. އެހެންވާނޭނަމަ ކިހާ ރަނގަޅުވީސް ހެއްޔެވެ؟

ދުވަސްގަނޑެއްފަހުން ރަށުތެރޭގައި ފާޑުފާޑުގެ ވާހަކަތައް ދެކެވެން ފަށައިފިއެވެ. އަހަރެން ދަންވަރު އައުޝަތުމެންގެއަށް ދާކަމަށްބުނެ، ދޮގު ވާހަކަތަކެއް ފެތުރެމުން އެބަ ދެއެވެ. ދަންވަރު ދެވޭނީވެސް އެފަކީރުގާތުގައި ބުނެފައި ނޫންހެއްޔެވެ؟ ވާހަކަ ނުދެއްކޭ އިރު ދަންވަރު އަހަރެން އެގެޔަށް ވަންނާނީ ކިހިނެއްހެއްޔެވެ؟ މިއިންދުވަހަކުވެސް އެގޭގެ ހަތަރު ފާރުން އަހަރެން އެތެރެވެފައި ނުވާނެއެވެ.
މީހުން ދައްކާވާހަކަތަކުން އަހަރެންނަށް އިތުރު ހިތްދަތި ކަމެއް ލިއްބުވައިދެއެވެ. އެކަމު އަހަރެން ހިތްވަރުކޮަށްގެން ހުރީ ހަމަ އައިޝަތަށްޓަކައެވެ. ރުޅިއިސްނުކޮށް މަޑުމަޑުން ހުރީމެވެ. ދިފާޢުގައިވެސް ބުނެވޭ ބަހަކުން، އިތުރަށް މައްސަލަ ގޯސްވާން ނޭދޭތީ
ކެތްތެރިވެގެން ހުރީމެވެ.
އަމިއްލައަށް މިކަމުގައި ކުރެވޭނޭ އެއްކަމެއްވެސް މިހާރަކު އޮތީކީއެއްވެސް ނޫނިއްޔާއެވެ. މި ގުޅުން އިޔާދަކުރުމަށް، އަމިއްލައަށް ކުރެވެން ހުރި ކަމެއް ވިއްޔާ ކޮށް، އަހަރެން އެންމެފަހުން މިހުރީ، ނާކާމިޔާބީގެ ކަސްތޮޅުގައެވެ.
ދެންވެސް މިހިތުގައި އޮތް ޢަޒުމް ގުޑައެއް ނުލައެވެ. ކަރުނައިން ފޮރުވިފައިވާ ދެލޮލާއި އޮއްސިފައިވާ އުފާތައް ފިލައިގޮސްފައިވާ މޫނަކާއިގެން ނިކުމެވޭނީ، ހުރި ހިތްވަރެއްގެ ސަބަބުންނެވެ.
އަހަރެންގެ ގާތް އެކުވެރިއެއްގެ ފަރާތުން ދެން އަދި ލިބުނު ކުއްލި ޚަބަރަކުން ކޮންމެސް ވަރެއްގެ ޔަޤީންކަމެއް ހިތަށް ވެރިވެއްޖެއެވެ.
އެ ޚަބަރަކީ، އައިޝަތުގެ މަންމަ އައިސް އަހަރެންގެ ގާތް ރަޙުމަތްތެރިޔާއާ ބައްދަލުކޮށް ދެއްކި ވާހަކައެވެ. އަހަރެން ދެން ނިންމީ، އައިޝަތުގެ މަންމައާއި ބައްދަކުކޮށް، މި ޖެހިގެން އުޅޭ މައްސަލަ ޙައްލުކުރުމަށެވެ. އައިޝަތުގެ ކިޔެވުން ނިމިމެންދެން، އަހަރެން އިންތިޒާރުކުރާނެ ކަމަށް ބުނަން ނިންމައިގެން ހުރީމެވެ. އިހަށް މަޑުކޮށްގެން މި ހުރީ ރަނގަޅު ދަނޑިވަޅަކަށް ބަލަބަލައެވެ.
ރަށުން ފުރައިގެން އަހަރެން ހުޅުމާލެ އައީ، އެ ހަނދާންތަކުން، ހިތްރޮއްވަމުންނެވެ. އަނެއްކާ މިހާރު މިހުރީ އައިޝަތާއި މާދުރުގައެވެ. މާސިންގާ ކަނޑެއްގެ ފަރުދާގެ އަނެއް ފަރާތުގައެވެ.
ހުޅުމާލެ އައުމުގެ ކުރިން، އަހަރެން ގެންދިޔައީ އައިޝަތުގެ ދައްތައެއްގެ އެހީތެރިކަން ނިހާޔަތަށް ހޯދަމުންނެވެ.
އެ އެހީތެރިކަމަށް، އަހަރެންގެ ހިތުގެ އެންމެ ފުންމިނުން އަބަދުވެސް ޝުކުރުވެރިވަމެވެ.
އަހަރެންގެ ޝުކުވެރިކަމުގެ ވެދުންތައް އޮއްސަމުންދިޔަ، އައިޝަތުގެ ދައްތަގެ ޚަބަރެއްނުވާތާ ދުވަސްގަނޑެއް ފަހުން، މެސެޖެއްކޮށްފައި އޮތީތީ ދެކުނީމެވެ.
އޭގައި އެވަނީ ކީކޭތޯ ބެލުމަށް ތެޅުފޮޅިގަތީމެވެ.
އޭގައި އެވަނީ، އައިޝަތުގެ މަންމަ ދުނިޔޭގައި ހުރިހާ ހިނދަކު، އަހަރެންނާއި އައިޝަތުގެ ގުޅުމެއް ނުބޭއްވޭނެ ކަމަށެވެ. ދެން ބުނާނީވެސް ކީކޭ ހެއްޔެވެ؟ ދެލޯ ފޮރުވައިލި ކަރުނަތައް ހޯސްލާފައި ކަންކަށިމަތީގައި ބީހެމުންދާއިރު، އެނދުމަތިން ތެދުވެވޭނެހާ ހިތްވަރެއްވެސް ނެތެވެ. ހިނދިވަޅުތެރޭގައި އެ އަޅަމުންދާ ވޭން، އަރުތެރޭން ބަހެއް ބޭރުވެދިނަކަ ނުދެއެވެ. ވާނީވެސް އެހެންތާއެވެ. 501 ދުވަސްވޭތުވެ އެ ދިޔައީ މި އިންތިޒާރުގައެވެ. އިންތިޒާރުގެ ގިޓާ، ހިތުގައި އެކުޅެލާ ރާގުތައް އަދިވެސް ނުހުއްޓި އެހުރީއެވެ. ވޭނާއި އުދާހާއި އެކުގައެވެ. އެންމެފަހުން، ކުރި އުންތިޒާރުގެ ހިތިކަން ކަރުބުޑުގައި ލައިފިއެވެ.

އައިޝަތުގެ މަންމަ އެ ބުނީ އޭނާ މި ދުނިޔޭގައި ހުއްޓައި، މި ގުޅުމަށް ޖާގަ ނުދޭނެކަމަށް ވިއްޔާއެވެ.
އެހެނެއް ކަމަކު، އައިޝަތުގެ މަންމަ އެހެން ދުނިޔެއަކަށް ގެންދެވޭހެއްޔެވެ؟ އެހެން ނޫނަސް، ރާޖާއިންނާއި ރަސްރަސްކަލުންގެ ދައުރުގައި، އެކެއް އަނެކެއް މަރާފައި މީހުނާ އިންނަހެން، އަހަރެންނަކަށް ލާހިކު ކުޅަދާނައެއް ނޫނެވެ.
އެފަދަ ދައުރެއްގައިނަމަ އެކަން ވީސްތޯއްޗެކެވެ.
އެންމެ ދެރަވަނީ އައިޝަތު މިގުޅުން ދަމަހަށްޓަން ނޫޅޭތީއެވެ. ފަހަރުގައި، ކޮންމެވެސް މަންކާރައެއްގައި ޖެހިގެން ކަމަށްވެސް ވެދާނެއެވެ.
އެކަމު ދެން އޮތީވެސް ކޮން ގޮތެއް ހެއްޔެވެ؟
މައިންބަފައިންގެ ނުރުހުމުގައި، މިކަން ކުރަން އަހަރެންވެސް އެއްބަހެއް ނޫނެވެ.
އައިޝަތުގެ މަަންމަ އަހަރެންނާއި ދޭތެރޭގައި އޮތީ ކޮން ރުޅިވެރިކަމެއްތޯވެސް ނުދެނަ ހުރީމެވެ. އެނގޭހާވެސް އެއްޗަކީ، އަހަރެންގެ ހިތުގައި އެއްވެސް ހިތްބުރަ ކަމެއް ނެތްކަމެވެ.
ހިތާމައިގެ ކަނޑުގައި އަހަރެން އަދި އައްސޭރިއަކަށް ދާނެކަމުގެ އުންމީދުގައި ދެމިހުންނަމެވެ.
އަދިވެސް ހިތުގައި ޖަހާލާ ކޮންމެ ވިންދަކާއެކު އެ އިވެނީ އިންތިޒާރުގެ ގިޓާގެ އަޑެވެ. “އިންތިޒާރޭ އޮތީ ހިތް އެދޭތީ…”
-ނިމުނީ-