ހުރިގޮތްހޭމީ؟ (2ވަނަ ބައި)

އަހަރެން  ނާއިމްގެ ފަހަތުން ހިނގާފައި ގޮސް ރެސްޓޯރެންޓުގެ އޭސީ ކޮށްފައިހުރި ބައިގެ ކަނެއްގައި ހުރި ކުޑަމޭޒެއް ކައިރީގައި އިށީނީމެވެ. އަހަރެން އިނީ ނާއިމް ކުރިމަތީގައި ހުރި ގޮނޑީގައެވެ. “ބޮސް ކޯއްޗެއް ބޭނުންވަނީ” އަހަރުމެން އިށީނުމާއި އެއްކޮށް ވޭޓަރު އައިސް ނާއިމްއަށް މުހާތަބުކުރިއެވެ. މަޑުކޮށްލާ އިރުކޮޅަކުން އޯޑަރުދޭނަން. ގެނެސްދީ މެނޫ.” ނާއިމް މިހެން ބުނުމުން ވޭޓަރު އައިސް ދެމީހުންގެ ކުރިމަތީގައި ދެމެނޫ ބޭއްވުމަށްފަހު ގޮސް ފެންނަހިސާބުގައި މަޑުކޮށްގެން ހުއްޓެވެ. ރެސްޓޯރެންޓު ތެރޭގައި ދިއްލާފައިހުރި މަޑު އޮރެންޖު ކުލައިގެ ބޮކީގެ އަލީގައި އެތަނުގެ އެތެރެ ފެންނަނީ ވަރަށް ހިތްފަސޭހަ ކޮންނެވެ. މަޑުމަޑުން ޖަހާފައި ހުރި އެޑްޝީރަންގެ “ޕަރފެކްޓް” ލަވައިގެ އަޑު އޭރު ހިތްގައިމުވަރަކަށް އިވި އިވި ހުއްޓެވެ.

“ސަނާ މިރޭ ހާދަ ރީއްޗޭ.” ނާއިމް ވާހަކަ ދެއްކީ ސީދާ އަހަރެންގެ ލޮލަށް ބަލަހައްޓައިގެން އިނދެއެވެ. އަހަރެންނަށް ލަދުން އިސްޖަހާލެވުނެވެ. ތެންކިޔު އޭ ބުނަން ބޭނުންވި ނަމަވެސް އަހަރެން އިނީ ބަހެއް ބުނަން ކެރޭވަރަށް ވުރެ ބޮޑަށް ލަދުގަނެފައެވެ. “ސަނާއަށް އިނގޭތަ މީމަގޭ ބައްޕަގެ ރެސްޓޯރެންޓެއް. އެކަމަކު ބައްޕަ މިހާރު ބޮޑަށް އުޅެނީ ފިހާރައިގެ ކަންކަމާ. އެހެންވެ ނާއިމް ހިންގުމާ ހަވާލުވެ ހުންނީ.” ނާއިމް ވާހަކަ ދައްކަމުން ދިޔައިރުވެސް އަހަރެން އިނީ އިސްޖަހާލައިގެންނެވެ. “ތިހާ ލަދުން ނީނދެ ދެން ވާހަކަ ދައްކަބަލަ. ދެމީހުން އަދި ރަނގަޅަށް އިންޓްރޮޑިއުސްވެސް ނުވަމެއްނު. އޯކޭ މަ ފަށާނަން އިނގޭ . މަށަށް މިއަހަރު މިވީ 25 އަހަރު. މަގޭ މަންމައާ ބައްޕަގެ ހުންނާނީ މަށާ މަގޭ ދޮންތައާ. ދޮންތަ މެރީކޮށްގެން ހުރޭ  އެ އަހަރުގެ ގަރލް އެއް. އެމީހުންވެސް އުޅެނީ އަހަރުމެން އެކީގަ އެއްގެއެއްގަ. މަށަކީ ލާމު ފޮނަދޫ މީހެއް. ފެމެލީ އެއްކޮށް މާލޭގަ މިއުޅެނީ ތަނެއް ކުއްޔަށް ހިފައިގެން. ބައްޕަގެ ވަރަށް ގާތް ރައްޓެއްސެއްގެ ގެ އޭނަ ރާއްޖެއިން ބޭރަށް ބަދަލުވި އިރު ބައްޕައަށް ވިހި އަހަރަށް ކުއްޔަށް ދީފަ ދިޔައީ. މަގޭ މަންމަ އަކީ ވަރަށް ލޯބި ލޯބި މަންމަ އެއް. ވާނެ ދޯ އަދި މަންމައާ ދިމާވެލަންވެސް. ދެން ސަނާ ފަށާ!” ފައްޗަކަށް ވަނަވަރު އަމުނާލުމަށްފަހު ފުންނޭވާއެއް ލާފައި ކުރިމަތީގައި ހުރި ފެންތަށިން ފެންފޮދެއްބޯލިއެވެ. އަހަރެންކައިރި އަށް ކުޑަކޮށް ހިނިވެސްއައެވެ. ނާއިމް ވާހަކަދައްކަން ފެށުމުން އަހަރެންވެސް ކުޑަކޮށް ލަދު ފިލައި ވާހަކަ ދައްކަންފެށީމެވެ. “ސަނާގެ މަންމައާ ބައްޕަގެ ހުންނަނީ ސަނާއާ ސަނާގެ ކޮއްކޮ. އޭނައަށް މިހާއު ބާރަ އަހަރު އެވަނީ. ޝާއިން ކިޔާނީ. ބައްޕައަކީ މަސްވެރިއެއް. ސަނާމެންނަކީ ނާއިމްމެންހާ ފުދުންތެރި ބައެއް ނޫން. އެކަމަކު މަންމައާ ބައްޕަ ސަނާމެންގެ ހުރިހާކަމެއްވެސް ވަރަށް ލޯބިންކޮއްދޭނީ. ސަނާ މާލެ އައިތާ އަދި މިވީ ތިންމަސް. ދެން އެނގޭނު ޖޮބަށް ދާތަން. ސަނާގެ ނުތިބޭނެ މިކޮޅުގަ ރައްޓެހިންނެއް. ދައްތައެއް ކައިރީގަ މިހުންނަނީ ކޮންމެވެސް ވަރެއް ޕޭކޮށްގެން. ދައްތައާ ބޭބެ ސަނާއަށް ޓްރީޓްކުރަނީ އެމީހުންގެ ދަރިއެއްހެން. ” އަހަރެން ވާހަކަ ދައްކަމުންދިޔައިރު ނާއިމް ކަޅިޖަހާނުލައި އަހަރެންގެ ލޮލަށް ބަލަހައްޓައިގެން އިނެވެ. “މަ ބޭނުން ސަނާއާ ރައްޓެހިވާން . ވަރަށް ސީރިއަސްކޮށް މިބުނީ.” ނާއިމް އެހެންބުނުމުން އަހަރެންގެ މޭގަނޑު ތެޅިގަތެވެ. މީގެކުރިން އަލަށްވެސް ކުއްޖަކާ ރައްޓެހި ނުވާތީ ބުނާނެ އެއްޗެއްވެސް ނޭނގުނެވެ. “ސަނާ ބޭނުންތަ؟. އަހަރެން ސަނާ ވަރަށް ލޯބިން ގެންގުޅޭނަން ދުވަހަކުވެސް ދެރައެއްނުކޮށްލާނަން. “ނާއިމް އަހަރެންގެ ދަތްދޮޅީގަ މަޑުމަޑުން ހިފާލަމުން އެހެން ބުނުމުން ލަދުންގޮސް އަހަރެންގެ މޫނު ރަތްވެގެންދިޔައެވެ. ” އޯކޭ” ތުރުތުރުއަޅާ އަޑަކުން އަހަރެން މަޑުމަޑުން އެހެން ބުނުމާއެކު ނާއިމް ވަރަށް އުފަލުން ތޭންކް ގޯޑް އޭ ބުނެލިއެވެ. އެރޭ ދެމީހުން ކައިގެން ދުއްވާލަން ގޮސްވެސް ވަރަށް ވާހަކަ ދެއްކީމެވެ. ނާއިމް މީގެ ކުރިން ދެކުއްޖަކާ ރައްޓެހިވެ އެކުދިން ނާއިމްއަށް ދޯކާދިން ވާހަކައާ ސުކޫލު ދައުރުގެ އެކިވާހަކަ ދެކެވުނެވެ . އަހަރެން ގެއަށް ދިޔައީ އެރޭ 11 ޖަހާފައި ހުއްޓައެވެ. އޭރު އަހަރެންގެ އިންތިޒާރުގައި ދައްތަ ސިޓިންރޫމުގައި މަޑުކޮށްލައިގެން އިނެވެ. “އެކޮއި. ކޮބާ ޑޭޓު ކިހިނެއްތަ ވީ؟ މަޖާތަ؟” އަހަރެން ވަނުމާއިއެކު ދައްތަ އައިސް އަހަރެން އަތުގައި ހިފައި ގެންގޮސް ސޯފާގައި ބޭންދުމަށްފަހު ސުވާލު ކުރަންފެށިއެވެ. ދައްތަ ހުރީ އަހަރެންނަށް ވުރެ ބޮޑަށް އުފާވެފައިހެން ހީވެއެވެ. އެރޭގައި ހިނގާދިޔަ ހުރިހާ ކަމަކާއި ދެކެވުނު ވާހަކަތައް ދައްތައަށް ކިޔާދިނުމަށްފަހު އަހަރެން ގޮސް ކޮޓަރިއަށް ވަނީމެވެ. ދައްތަގެ އެދުމަށް ދައްތައާއި ނާއިމް ދިމާކޮށްދިނުމަށް އަހަރެން ވައުދުވީމެވެ. އެކަމަކު އަދި އެހާއަވަހަށް ނާއިމް ގެއަށް ގެންނާކަށް ނުކެރޭނެއެވެ.

ކޮޓަރިއަށްވަދެ ނިދަން ތައްޔާރުވެގެން އެނދުގައި އޮށޯވެލީމެވެ. އެންމެ ހިނދު ކޮޅަކަށްވެސް ނާއިމްގެ ހިޔާލުތައް ސިކުނޑިއަކުން ނުފިލައެވެ. އެރޭގައި ދެމީހުން ދެއްކި އެކިއެކި ވާހަކަ ތަކާއިމެދު ވިސްނެނީއެވެ. ނާއިމްއަށް ދެކުދިން ދޯކާދީފައި ހުރުމުން އޭނާއަށް އެކަމުގެ ހިތަދަތިކަން އެނގޭނެތާއެވެ. އެހެންވީމާ ނާއިމް މީހަކަށް ދެރައެއް ނުދޭނެކަމާމެދު އަހަރެން ޔަގީންކުރީމެވެ. އެހެން ވިސްނަން އޮއްވައި ނާއިމްގެ ކޯލެއްއައެވެ. “ދޫނި ކީއްކޮށްލަނީ؟” ނާއިމް ގެ އަޑުޖެހުމުންވެސް އަހަރެންރަކިވެއެވެ. ކުރިމަތީގައި ނެތަސް ހަމަ ލަދުގަންނަނީއެވެ. އަދިއަމުދުން ދޫނިއޭބުނުމުން ވަކިން ލަދުގަތެވެ. ” ނިދަން އޮޝޯތީ މި.” އަހަރެން ދިނީ ކުރު ޖަވާބެކެވެ. ” މީގެފަހުން ކޮންމެ ރެއަކު ނިދަމުން މަށަށް ގުޅަންވާނެ އިނގޭ. މަމިއިނީ ރައްޓެއްސަކާއެކު ކޮފީއެއްބޯން. ދޫނި ކޮބާތޯ ބަލާލީހަމަ” ނާއިމް ވާހަކަދެއްކީ ވަރަށް މަޑުމަޑުން ލޯބިންނެވެ. “އޯކޭ ގުޅާނަން މީގެފަހުން. ގުޑްނައިޓް” އަހަރެންނަށް އަދި ނާއިމް  އަހަރެންނާ އެވާހަކަ ދައްކާހެން އޭނައާ ވާހަކަ ދައަކާކަށް ނުކެރެއެވެ. ” ގުޑްނައިޓް ބޭބީ، މިސްޔޫ.މާދަމާ ގުޅާނަން އިނގޭ.” ނާއިމް ވަރަށް ލޯބިން އެހެން ބުނުމަށްފަހު ފޯނު ކަނޑާލިއެވެ.

އެއީ އަހަރުމެންގެ ލޯބީގެ ގުޅުން ފެށުނު އުފާވެރި ރެއެވެ. ދުވަސްތަށް ފާއިތުވަމުންދިޔައީ އުފާވެރި ހުވަފެނެއް ފަދައިންނެވެ. އަހަރެން މަންމަ ކައިރީގައި ނާއިމްގެ ވާހަކަ ބުނުމުން މަންމަ އަހަރުމެންގެ ގުޅުމަށް އެއްބަސްވި ނަމަވެސް ގޯސްމަގަކުން ނުދިއުމަށް އެތައް ނަސޭހަތެއްދިނެވެ. އެކިދުވަސްމަތިން ދައްތައާއި ނާއިމްއާއި ދިމާވެ ނާއިމްއަކީ ދައްތައަށް ވަރަށްކަމުދާ މީހަކަށްވިޔެވެ. އަހަރެންނާއި ނާއިމްގެ ލޯބީގެ ގުޅުން ބަދަހިވަމުންގޮސް ކޮންމެ ރެއަކު ދުއްވަންގޮސް އުޅެންފެށީމެވެ. ނާއިމް އަހަރެންނަށް ވަރަށް ރަނގަޅެވެ. އަހަރެންދެކެ ވަރަށް ލޯބި ވެއެވެ. ނަމަވެސް ދުވަހަކުވެސް އޭނާގެ ރައްޓެއްސަކަށް ނުވަތަ އާއިލާ މީހަކަށްވެސް އަހަރެން ނުދައްކައެވެ. އަހަރެން ނާއިމްގެ މަންމަ ކައިރިއަށް ދިއުމަށް ބުނުމުން އަދި ދާނަމޭބުނެ ފަހަކުން އެވާހަކައެއް ނުދައްކައެވެ. ދޭތެރެއަކުން ހަނދާން ކޮއްލައިދިނުމުގެ އިތުރުން އެކަމާ އެއްވެސް ޝަކުވާއެއް އަހަރެން ނުކުރަމެވެ.

ދެމީހުންގެ ލޯބީގެ މާބަގީޗާ ހެދެމުން ދިޔައީ ވަރަށްވެސް ޗާލުކޮންނެވެ. އެގުޅުމަށް ދެމަސްވީއިރު ދެމީހުންނަށް އެކަކު އަނެކަކު ދަސްވެ އޭރު އަހަރެންނަށް ނާއިމްދެކެ ވަރަށްބޮޑަށް ލޯބިވެސް ވެވިއްޖެއެވެ. ނާއިމްވެސް އަހަރެންދެކެ ހަމައެހާ ލޯބިވާކަމަށް އަހަރެން ގަބޫލުކުރީމެވެ. އެއްވެސް ކަމަކާ ޝަކުވާއެއް ކުރަން ފުރުސަތު ނުދީ ނާއިމް އަހަރެންނާއި ދޭތެރޭގައި ކަންތައް ކުރަމުންދިޔައީ ވަރަށް ލޯބިންނެވެ.

*************************************************************

އެއީ ބުރާސްފަތި ދުވަހެއްގެ ރެއެކެވެ. ނާއިމް ރައްޓެހިންނާއި އެކު ކާންދާ ވާހަކަ ބުނުމުން އަހަރެން ދައްތައާއިއެކު ޝޮޕިންއަށް ދާން ތައްޔާރުވީމެވެ. ދެކޮއްކޮ ނިންދެވުމަށްފަހު ބޭބެ ކައިރީގައި ގޭގައި މަޑުކޮށްދިނުމަށް ބުނެ ދައްތަ އަހަރެންގޮވައިގެން ނިކުތީ ދައްތައަށް ހެދުމަކާއި އެއްޗެހި ގަންނާށެވެ. ވަރަށްގިނައިރު ފިހާރަތަކަށް ހިނގުމަށްފަހު ދިހައެއްޖެހުމުން ދައްތަ ބޭނުންވީ ކާންދާށެވެ. އަހަރެން އަބަދު ނާއިމް ހިންގާ ރެސްޓޯރެންޓުގެ ކާއެއްޗެހީގެ މީރު ވާހަކަ ދައްކާތީ ދައްތަ އެތަނަށް ދާން ބޭނުންވެފައި ހުންނަތާ ކިތަންމެ ދުވަހެކެވެ. އަހަރެންނާ ދައްތަ ވިޔަފާރިކުރި ކޮތަޅުތައް ހިފައިގެންގޮސް ރެސްޓޯރެންޓުގެ އޭސީބައިގެ ދޮރުމައްޗަށް ހުއްޓުނު ވަގުތު އަހަރެންގެ މޭގަނޑު އިންތިހާއަށް ބާރަށް ގުޑައިގެންދިޔައެވެ. އެއީ ނާއިމްއެވެ. ނާއިމް އެއިނީ ކާކާއެއްކޮށް ހެއްޔެވެ؟ އެއީ އަހަރެންނާ ނާއިމް އަބަދުވެސް އިށީންނަ މޭޒެވެ. ބުރުގާއަޅައިގެން އަހަރެންނެކޭ ދާދި އެއްވަރަކަށް ފެންނަ އެއަންހެން ކުއްޖާގެ އަތްތިލަ އެއޮތީ ނާއިމްގެ އަތުތެރޭގައެވެ. ކިތަންމެ ގާތަސް ދެރައްޓެހިންނެއް އެހެންނެއް ނުތިބޭނެކަން އަހަރެންނަށްވެސް އެނގެއެވެ. ހުރި ފިޔަވާޅު މަތީގައި ހުއްޓިގެން އިރުކޮޅަކުއަހަރެންނަށް ހުރެވުނެވެ. މީހާ އެއްކޮށް ފިނިވީއެވެ. އެއްވެސް ހަރަކާތެއްވެސް ނުކުރެވުނީއެވެ. ދުއްވައިގަންނަން ބޭނުންވީނަމަވެސް ހުރިތަނުން ގުޑިވެސްނުލެވުނެވެ. އެވަގުތު އެކުރެވުނު އިހުސާސްތައް ދުލުންކިޔައިދޭނެގޮތެއް ނޭނގެއެވެ. އަހަރެން ސިއްސައިގެން ދިޔައީ ދައްތައަހަރެންގެ އަތުގައި ހިފާ ދަމައިގަތުމުންނެވެ. ” ބަލާބަލަ ހުންނަ ހަޔާތްކުޑަކަން. އެއިނީ އެހެން އަންހެނެއް ގޮވައިގެން. ހިނގާ މިތަނުންދާން.” ދައްތަ އަހަރެން އަތުގައި ހިފާ ހިނގައިގަތް ވަގުތު ނާއިމްއަށް އަހަރުމެން ފެނުނެވެ. ނާއިމްގެ މުނުމައްޗަށް އަރައިގެން ދިޔަ ކުލަވަރުން އަހަރެން ހިތުގައި އުފެދުނު ހުރިހާ ސުވާލެއްގެ ޖަވާބު ލިބުނުކަހަލައެވެ. އަހަރުމެންނަށް ގެއަށް ދެންވެސް އަހަރެންނަށް ރޮވުނެވެ. އަހަރެންނަށް ރޮވޭތި ދައްތަވެސް ހުރީ ވަރަށް ދެރަވެފައެވެ. ނަމަވެސް ދައްތަ އެކަމާ އެއްވެސް ވާހަކައެއް ނުދައްކައެވެ. އަހަރެން އިތުރަށް ދެރަވާނެކަން އެނގޭތީ ކަންނޭގެއެވެ.

ގެއަށްގޮސްވެސް އަހަރެން ވަރަށް ރުއީމެވެ. އަދި ނާއިމް އަހަރެން ނަށް ގުޅައި މާފަށް އެދޭނެކަމަށް ހީކުރީމެވެ. ނަމަވެސް އަހަރެން ހީކުރި ގޮތާ ޚިލާފަށް އެރެއަށްފަހު އަހަރެންނައް ނާއިމްގެ މެސެޖެޖެއްވެސް ކޯލެއްވެސް ނައިސް މަސްދުވަސް ފާއިތުވެގެން ދިޔައީއެވެ.  އަހަރެންވެސް ނާއިމްއަކަށް ނުގުޅަމެވެ. ނާއިމް އަހަރެންނާއި އެއްކޮށް ގުޅުން ކަނޑައިލުމުން، އޭނާ އަހަރެންނަށް އިތުރަށް ކިޔައިދޭނެ އެއްވެސް ވާހަކައެއް ނެތީކަން އަހަރެންނަށް ޔަގީން ވިއެވެ. ނާއިމް ހަގީގަތުގައިވެސް އަހަރެންދެކެ ލޯބި ވީނަމަ މިހެން ކަންތަކެއް ނުކުރީހެވެ. މިއޮއްހުރިހާ ދުވަހު ލޯބިވާކަމުގެ ކުލަ ދައްކައިގެން އުޅުނީ ކީއްވެބާއެވެ؟. ލޯބި ނުވާނަމަ ލޯބި ވެޔޭ ކިޔައި އެވަރުގެ ބޮޑު އޮޅުވާލުމެއް އޮޅުވާލުމުގެ މަޤްސަލަކީ ކޮބާހެއްޔެވެ؟ އެއިން އެއްވެސް ސުވާލެއްގެ ޖަވާބު ނުލިބި ފާއިތުވެގެންދާ ކޮންމެ ދުވަހަކީ އަހަރެންގެ ހިތަށް އުދާސްކަން ވެރިވެފައި ހުންނަދުވަހަކަށް ވިޔެވެ. ކުރީގެ އުފާވެރި މަޖާގޮތްގަނޑު ބަދަލުވެ ގިނަވަގުތު މާޒީގެ ހިޔާލުތަކަށް ގެއްލިފައި އިނދެވެން ފެށުނެވެ. ވަޒީފާގައި ހޭދަވާ ވަގުތު ތަކަކީވެސް އަހަރެން ހިތްދަތިވާ ވަގުތުތަކަކަށް ވީއެވެ.

ކޮންމެ ދުވަހަކު ކަހަލަ ގޮތަކަށް އަހަރެންނަށް ނާއިމް މަގުމަތިން ފެނެއެވެ. އޭނާ އަހަރެންގެ ކިބައިން މާފަށް ނޭދޭ ތާނގައި އިސް އުފުލާ ބަލާވެސް ނުލައެވެ. ބައެއް ދުވަސް ދުވަހު އެއަންހެން ކުއްޖާއާއި އެކުވެސް ފެނެއެވެ. އެއީ ކޮންކަހަލަ ގޮތެއް ފޮތެއްނެތް އިންސާނެއްބާއޭވެސް އަހަރެންގެ ހިތަށް އަރައެވެ. އޭނާގެ ހިތުގައި އަހަރެންނާއި ދޭތެރޭގައި އެއްވެސް ގަދަރެއް ދެވިފައިވީނަމަ ލަދުވެސް ގަންނާނެ ނޫންހެއްޔެވެ. އެހިތި ހަނދާނުގައި ދުވަސްތައް ފާއިތުވަމުން ދިޔައެވެ.ހަނދާން ކުރަން ބޭނުން ނުވިޔަސް އެހަނދާންތަކާ ދުރެއްނުވެވުނެވެ. މާޒީވެގެންދިޔަ އެއުފާވެރި ދުވަސްތައް ހިތަކުން ފިލުވައެއްވެސް ނުލެވުނެވެ. ލޮލުން އޮހޭހާ ކަރުނައެއް ފޮހެފޮހެ މިހެން އިނދެވިދާނެއެވެ. އެހެނަސް ހިތުގައި މިވާ ފާރުގަނޑު އަދިވެސް ހެވެއްނުވެއެވެ. ހިނިތުންވާން މިކުރެވެނީ ކިހާ މަސައްކަތެއް ހެއްޔެވެ. އެހެނަސް މޫނުމަތިން ހިތުގައިވާ އުދާސްތައް ފޮހެލާނެ ގޮތެއް ނޭނގުނެވެ. މީ އަހަރެންނައް ހުރިގޮތް ހެއްޔެވެ؟ ލޯބި ވިޔަސް އެލޯބި އަހަރެންގެ ތަގުދީރުގައި ނެތީބާއެވެ.

-ނުނިމޭ-