ހަށިފާރަވެރިޔާ 1

ހޫނުކަން އަޒާބުގަދަ މިންވަރެއްގައި ހަންގަނޑުގައި ބީހެމުންދިޔަ މެންދުރެއްގެ ވަގުތެވެ. ބުންކަނޑާފައި ދިޔަ ޕްލޭޓު ނަންބަރު އަށެއް ސުމެއް އަށެއް ސުމެއްގެ ސައިކަލު ހީވަނީ ތާރުގަނޑު ފަޅައިލަފާނެހެނެވެ. ދުއްވަން އިން، ހުދު ގަމީސް ދަށަށްޖަހައި ފިޔާތޮށި ޓައިއެއް އަޅާލައިފައިވާ ޝައިހާންގެ ނިއްކުރިމައްޗަށް ކާށިތެޔޮ ނުފައިބާނަމަ އޭނާ ވަރަށް ސަޅިކަމަށް ދެއްކީހެވެ. އިސްތަށިގަނޑު އޮފުކުރަން ތެޔޮލެވުން އެއީ އޭނާއަށް މިއަދު އެޅުނު ޅައެއްޗެވެ. ވަޒީފާގެ އިންޓަވިއުއަށް ގަޑިނުޖެހި ދިޔުމުގެ ފޮނި އުންމީދުގައި އިން އޭނާއަށް ވިސްނެމުންދިޔައީ އެޅުނު ޓައީގެ ކުލަ ރަނގަޅުބާއޭއެވެ. ސުވާލުކުރަން އިދިކޮޅު ޕާޓީގެ ބޭފުޅެއް އިންނަމަ އޭނާގެ ދުވަސް ހިނގައިދާނެއެވެ.

އިންޓަވިއު ކުރާ ކޮޓަރި ކުރިމައްޗަށް އެރުނުއިރު ގަޑިޖެހެން ބާކީ ފަސްމިނެޓު އޮތެވެ. ޝައިހާންގެ އިތުރުން ވަޒީފާއަށް ކުރިމަތިލި އިތުރު ތިން މީހަކު އެތާ ތިއްބެވެ. ވަރަށް އަޑުގަދަކޮށްލާފައި ބިމުގައި އުސް ބޫޓުގެ ކަށިން ތަޅަމުންދިޔަ ޖޫންއަށް ޝައިހާންގެ ނަޒަރު ހުއްޓުނެވެ. މޫނުގައި ހާކައިފައިހުރި ފައުންޑޭޝަން ދަލާއިއެކީ ދިޔާވެގެން ފައިބާކަން ރޭކައިލުމެއްނެތި ޖޫން އިނީ އަތުގައި އޮތް ނޯޓުފޮތް ތެރެއަށް ވަދެއެވެ.

ޝައިހާންގެ ކަތި ނަޒަރު އިހުސާސުވެގެން ޖޫން އިސްއުފުލައި ބަލައިލިއެވެ. ހިތް އަވަސްވެފައިވީ ވަރުން ފުންނާބުން މުށިގަނޑުގައި ތެޅެމުންދިޔަކަން އެނގުމުން ފައި މައިތިރިކޮށްލިއެވެ. ފައުންޑޭޝަންއަށް ވަމުންދިޔަގޮތް އިހުސާސުވީ ޝައިހާންއަށް ބަލަން ހުރެވުނު ގޮތަކުން ކަންނޭންގެއެވެ. އަވަސް އަވަހަށް ދަބަހުން އަތްމަތީ ލޯގަނޑެއް ނަގައި މޫނަށް ބަލައިލިއެވެ. އެންމެ އެސްފިޔަ ޖެހުމަކަށްފަހު ނިންމީ އަވަހަށް ޓިޝޫއަކުން މޫނު ފޮހެންށެވެ. ފޮހެމުން ފޮހެމުން އަނެއްކާވެސް ވަށްކަޅިން ޝައިހާންއަށް ބަލައިލިއެވެ. މިފަހަރު ނަޒަރު އިހުސާސުވެެގެން ބަލައިލަން ޖެހުނީ ޝައިހާންއަށެވެ. ޖޫން ބަލަމުންދިޔައީ ނިއްކުރިއަށްކަން އެނގި، ޝައިހާން ވަރަށް ނޭންގެކަމަށް ހަދާލައިފައި އަތުގެ ބަނޑުފުށުން ނިތްމަތީގެ އޮފުކަން ފޮހެލިއެވެ. ދެވެރިންގެ ފުރަތަމަ ބައްދަލުވުން ދިޔައީ މިފަދަ ހިތަށް އުނދަގޫ ބީދައަކުންނެވެ.

އިންޓަވިއު ނިމިގެންދިޔައީ ހިތްހަމަޖެހޭ ގޮތަކަށްކަމުން، ނަތީޖާ ރަނގަޅުވާނެކަމުގެ ޔަގީންކަމާއިއެކީ ޖޫން ހަންނާނުބިނާއިން ނުކުތެވެ. ފެށިއިރު އަރައިފައިހުރި ހިތްއަވަސްކަމާއި ދިމާ އިދިކޮޅެވެ. ސައިކަލާއި ދިމާއަށް ދިޔަ މަގުމަތީ މަޑުޖެހެވުނީ ފައިން އެއްޗަަކަށް އެރުމުންނެވެ. ފައި ދަށުގައި އޮތީ ފިޔާތޮށި ކުލައިގެ ޓައިއެކެވެ. ޖޫންގެ ހިތަށް ފުރަތަމަވެސް އައީ ދާދި ދެންމެއަކު ދިމާވި ޝައިހާންއެވެ. އެއީ އޭނާ އަޅައިގެން ހުރި ޓައިހެން ޖޫންއަށް ހީވިއެވެ. ފިޔާތޮށި ޓައި އަޅާފައި ހުރި އެހެން މީހެއް މި ހިސާބުން އޭނާ ނުދެކެއެވެ. އިންޓަވިއު ރަނގަޅަށް ނުދިޔައީތީ އައި ރުޅިން ޓައި އެއްލާލީކަމަށް ސިފަވެ ޖޫންއަށް ހިނިތުންވެވުނެވެ. އެހެން ބައިވެރިން ދަށްވި ވަރަކަށް އޭނާއަށް ވަޒީފާ ލިބޭނެކަމުގެ ފުރުސަތު ފުޅާވާނެތާއެވެ. އެ ޓައި އަތަށް ނަގައި ޝައިހާން ފެނޭތޯ ދެކޮޅު ހޯދައިލެވުނީ ކީކޭ ހިތަށްއަރައިގެން ކަމެއް ޙުދު ޖޫންއަކަށްވެސް ނޭންގެއެވެ. އަދި އެ ދުވަހު އެ ޓައި ނެގުނީތީ އޭނާ ހިތާމަކުރާނެ ކަމެއްވެސް އެ ސިކުންތަކު އޭނާއަކަށް ނޭންގެއެވެ. ކަންތައް ލައިގަތީ އޭގެ ދެތިން ސިކުންތު ފަހުންނެވެ. ބާރު ދުވެލީގައި ޖޫންގެ ފަހަތަށް ކެހުނު ވޭންއިން ހުޅުވުނު ދޮރުމަތީ ހުރި ޒުވާނަކު ޖޫންގެ އަނގަމަތީ ފޮތިގަނޑެއް އަޅައި އޭނާ އުޅަނދުތެރެއަށް ދަމައިގަތެވެ.

ގަޑިން ރޭގަނޑު ނުވަގަޑި ބައިވެއްޖެއެވެ. ޝައިހާންއަށް ލޯ ހުޅުވައިލެވުނީ އޭނާގެ ކޮޓަރި ސީލިންގަށެވެ. ލޯމައްޗަށް ކޮކާބުރާފައި އިރުކޮޅަކު އޮވެވުމަށްފަހު އޭނާ ތެދުވިއެވެ. ދެ އަތް ތަތްތަތްލަވާހެން ހީވެގެން ބަލައިލެވުނުއިރު ވަނީ ލެއިން ރަތްވެފައެވެ. ލައިގެން އިން ގަމީހުގައިވެސް ލެއެވެ. އިންޓަވިއު ކޮޓަރިއަށް ވަނުމާއި މިވަގުތާއި ދޭތެރޭ ހިނގި ހުރިހާ ކަމެއް އޭނާގެ ސިކުނޑީގެ ދޮރުގައި ޓަކިޖަހައިލިއެވެ.

*************************

ނަން ގޮވުމުން އެތެރެއަށް ވަތް ޝައިހާންއާއި މޭޒުދޮށުގައި އިން ރަމީޒްގެ ކަޅި ހަމަވުމާއިއެކު ކޮޓަރިތެރޭގެ ފިނިހޫނުމިން ހޫނުވެގެންދިޔަ ކަހަލައެވެ. ވަޒީފާއަށްވުރެ ބޮޑަށް ވިސްނަންޖެހޭ ކަންތައް ޝައިހާންގެ ބޮލަށް ޖެހިއްޖެއެވެ. އައި ކޮޅަށް އެނބުރި، ހަށީގައި ހުރި ބާރެއް ލާފައި ދުވެ ފިލަން އޭނާގެ މުޅި ނަފްސު ގޮވައިގަތެވެ. ނަމަވެސް ގޮސް ހަތަރު ބޮޑުންގެ ކުރިމައްޗަށް ވާގޮތަށް ގޮނޑިގައި އިށީނީ، މިހާރު ފިލިޔަސް ފަހުން ފިލިޔަސް ތަފާތެއް ނުވާނެކަން އިނގޭތީއެވެ. އަލިފާންކަނި ބުރުވަމުންދިޔަ ރަމީޒްގެ ލޯ ޝައިހާންއިން ދުރުނުކޮށްލައެވެ. މެދުގައި އިން ދެބައި އުމުރުގެ އަންހެންމީހާ ޝައިހާން ގާތުން ސުވާލުކުރަންފެށިއެވެ. މި ވަޒީފާ ބޭނުންވަނީ ކީއްވެތޯއާއި، ކުރީގެ ވަޒީފާއިން ކެނޑުނު ސަބަބުފަދަ އާދައިގެ ސުވާލުތަކެވެ. ޝައިހާންގެ ޖަވާބުތައް ފުރިހަމަކަމުގެ ނިޝާނަކަށްވީ ކަނާތްފަޅީގައި އިން ދޮށީ އުމުރުގެ ފިރިހެންމީހާ ރުހޭކަމުގެ ކުލައެއް ދައްކުވައިދޭ ބޯ ޖެހުމެއް ޖަހައިލާތީއެވެ.

އިންޓަވިއު ނިމުނުއިރު ޝައިހާންގެ މޫނުން އޮށްދާ ހިއްލަނީއެވެ. ނިމުނުކަމަށްޓަކައި ކަލާނގެއަށް ޝުކުރުއަދާކުރަމުން، އެހާ ހާލުން ހޯދުނު ވަޒީފާ ހަމަޖެހޭތޯ ދުއާ ކުރެވެމުންދިޔަ އެއްފަޅިއާއި، ވަޒީފާ ނުލިބޭތޯ ދުއާ ކުރެވެމުންދިޔަ އަނެއްފަޅި އޮތް ހިތާއިގެން އެ ތަނުން ނުކުތެވެ.

ހަންނާނުބިނާއިން ނުކުމެ ޝައިހާން އޭނާގެ ސައިކަލު ޕާކުކޮށްފައި ހުރި ހަނި ގޯޅިގަނޑަށް ވަތްއިރު، މޫނު ހުރި ފަރާތުން ދިމާކޮށްލީ ހަޔާތުގެ ކަސިޔާރު މަގު އިޙުތިޔާރުކޮށްގެން ތިބި ޒުވާނުންގެ ބައިގަނޑެކެވެ. ބަހެއް ބުނުމަކާއިނުލައި އެ މީހުން ޝައިހާންއާއި ދިމާއަށް އައެވެ. އެންމެ ކުރީގައި ތިބި ދެ މީހުންގެ އެކަކު ޖީބުން ނެރުނީ ފިޔޮކެކެވެ. އަނެކަކު ކަޓަރެކެވެ. ފިޔޮއް ހިފައިގެން ހުރި އަލީ، އަތުގައި މޮޅު ޒާތްޒާތަކަށް އެ އަނބުރައިލީ، ތިމަންނައަށް މި ގެންގުޅެން އެނގެއޭ ބުނާފަދައަކުންނެވެ. ޝައިހާންއަށް ދޫކޮށްލެވުނީ ފުން ނޭވާއެކެވެ. މިއަދަކީ އޭނާ ދުވެ ފިލަން ބޭނުންވާ ދަނޑިވަޅުތައް ގިނަ ދުވަހެކެވެ. ބިރަކުން ނޫނެވެ. ކުރިމަތިލާން ބޭނުންނުވާތީއެވެ.

“ރަމީޒު ތަ ފޮނުވީ؟” ޝައިހާން އިސްވެ ވާހަކަދެއްކީ ކުރި ބެދުމުންނެވެ.

“އާނއެކޭ ބުނެފިއްޔާ؟…” ކަޓަރު ހިފައިގެން ހުރި ނާއިމް ޝައިހާންއާއި މޫނު ގާތޮކޮށްފައި އަހައިލިއެވެ.

“ތިކަހަލަ ބިރުވެރި އެއްޗިހި ނުނެރެ، ތަންކޮޅެއް އަމާންކަމާއެކީ ހަމަޖެއްސޭކަށް ނެތްތަ؟” ޝައިހާންވެސް ކޮށްލީ ސުވާލެކެވެ.

“އަމާނޭ؟ އަމާނޯ!…” ނާއިމް މަލާމާތުގެ ރާގަކަށް ހިނިގަނޑެއް ޖަހައިލުމުން ދެން ތިބި މީހުންވެސް މިޔަކަނުން ހުނެވެ. އަލީ ފިޔަވައެވެ. އޭނާ ހީވަނީ މުޅި ހަޔާތުގައި ހިނިތުންވެނުލާން ގަދަ އަޒުމެއްގައި ހުރިހެނެވެ. ކުއްލިއަކަށް ފަހަތުގައި ހުރި މީހަކު އުޅުނީ ޝައިހާންގެ މޫނުމައްޗަށް އަތްމަޅަންށެވެ. ނަމަވެސް ޝައިހާން ވަރަށް ހުޝިޔާރުކަމާއެކު އެ އަތް ހުއްޓުވިއެވެ. މޫނުމަތީގެ ކުލަވަރަށް ބަދަލެއް ނައިސް، ސިހުމެއްގެ އަސަރެއް ނުދައްކައެވެ. ހަމަ އެ ހިނދުކޮޅުގައި އަނެއް އަތުން އެ ޒުވާނާގެ ނޭފަތްމައްޗަށް ހަމަލާ ދީ އޭނާ ބިމަށް ވައްޓާލައިފިއެވެ.

ޝައިހާން ފަހަތަށް ޖެހިލީ ހަތިޔާރުތަކުގެ ހަމަލާއަކަށް ސަމާލުވަމުންނެވެ. ދެން ތިބި މީހުން އާޝޯހުވެފައި މާ ގިނައިރަކު ތިބޭކަށް ނަހަދައެވެ. ހަތިޔާރު ހިފައިގެން ތިބި ދެ ބޮޑުން ފަހަނައަޅައި އައިސް ބައިގަނޑު އެކީ އަރައިގަތީ ފުއްލާއެއް ޖަހައިގަންނަން ތެޅިގަތް ސިންގާތަކެއް ފަދައިންނެވެ. ނަމަވެސް ޝައިހާން ނުހަނު ކުޅަދާނަކަމާއިއެކު ފަހަރަކު މީހަކު ބަލިކުރިއެވެ. އެންމެ ފަހު މީހާގެ މައިކަށި ތާރުގަނޑުގައި ޖެހުމާއިއެކު ނާއިމްއާއި އަލީ ކުރިއަށް އައެވެ.

ތޫނު ދެ ހަތިޔާރުން ދިފާއުވާން ޝައިހާންއަށް ހިސާބަކަށް އުނދަގޫވިއެވެ. ބާރުގަދަ އަދި އަވަސް ހަރަކާތްތަކަކުން ކަޓަރު އަތުލައި ނާއިމްގެ އަތް ބިންދައިލުން ޝައިހާން ކާމިޔާބުކުރިއެވެ. ރޮއެ ހޭރިގަތް ނާއިމް އަތުގައި ހިފަހައްޓައިގެން ބިމަށް ތިރިވިއެވެ. ދެން ހުރީ އަލީއެވެ. ޝައިހާންގެ އަތުގައިވެސް މިހާރު ހަތިޔާރެއް އެބަ އޮތެވެ. އަލީ ހޫރައިލި ފިޔޮއް، ކަޓަރުން ޝައިހާންއަށް މަތަކުރެވުނީ ކަންކަށިގައި ލޭ ކޫރެއް އެޅުނު ފަހުންނެވެ. ހޫނު ހަމަލާތަކެއް ބަދަލުކުރެވުމަށްފަހު ޝައިހާންގެ ކުޅަދާނަ ހަރަކާތަކުން ޖެހުމުން އަލީގެ އަތުން ފިޔޮއް ވިއްސައިގެންދިޔައެވެ. އެ ވަގުތުކޮޅުގެ ބަލިކަށިކަމާ ދިމާކޮށް ޝައިހާން، އަލީ އަތްދަށުކޮށް އޮބާބޭއްވިއެވެ. އަދި އުޅަނބޮށި ދަށުވެފައި އޮތް އަލީގެ ކަނދުރާއާއި ކަޓަރު ގާތްކޮށްލިއެވެ. ނަމަވެސް އޭގެން އަލީގެ ފުރާނައަށް އެއްވެސް ގެއްލުމެއް ދިނުމުގެ ނިޔަތެއް ޝައިހާންގެ ނެތެވެ. ބިރުން ސަލާމަތަށް ގޮވުމުގެ ބަދަލުގައި އަލީ ދައްކައިލީ ކާމިޔާބީގެ ހިނިތުންވުމެކެވެ. ފުރަތަމަ ފަހަރަށް ޝައިހާންގެ މޫނުމަތިން ބިރުވެރިކަން ފާޅުވީ، ޒުވާނާ އަމިއްލައަށް ހަރަކާތްކޮށް އޭނާގެ ކަރަށް ކަޓަރު ވައްދައިލުމުނެވެ. ފައިބައިގަތް ލޭތައް އަތް ތެންމައިލުމުން ފަހަތަށް ވެއްޓިގަނެވުނު ޝައިހާންގެ ބޮލަށް އެނބުރުން އަރައިގަތެވެ.

އަތް ބިންދައިލި ނާއިމް ފުންމައިގެން ތެދުވެ ކަރުން ލޭ އޮހޮރިފައި އޮތް އޭނާގެ އެކުވެރިޔާ ގާތަށް އައެވެ. އެ މީހުންގެ ތެރެއިން ކިރިޔާ ހޭވެރިކަމެއް ވި މީހަކު ބަނޑުލައި ލޫދެމުން އައިސް އަލީ ގާތަށް އެއްވިއެވެ. އެ މީހުންގެ ސަމާލުކަން ގެއްލުނު ދަނޑިވަޅު ބަލާފައި ޝައިހާން ދެ ފައިގައި ނެތް ބާރެއް ލައި ގޮސް ސައިކަލަށް އަރައި ދުއްވައިލީ، އަވަހަށް އެތަނުން ސަލާމަތްވުމަށެވެ. އެ ވަގުތު އެ ގޯޅިއަށް ވަތް ޖުވޭރިޔާއާއި ޝައިހާންގެ ކަޅި ހަމަވިއެވެ. ސައިކަލު ފަސްދީ ދިޔައިރު ދެން އޮތް މަންޒަރު ފެނިފައި ޖުވޭރިޔާގެ ދެލޯ ފުޅާވެ މޫނުން ލޭކޮޅު ހުސްވިކަހަލައެވެ.

ގެއަށް ދިޔަ މަގުމަތީ އެތައް ފަހަރަކު ސައިކަލު އަރިއަޅައިލަން އުޅޭހެން ހީވިއެވެ. ޝައިހާން އިނީ އެއް ގޮތަކަށްވެސް އެ ދުއްވޭ ހާލެއްގައެއް ނޫނެވެ. މުޅި މީހާ ބިރުން ތުރުތުރު އަޅައެވެ. މޫނުމަތީ ސިފަވަމުންދިޔައީ އޭނާގެ މާޒީގެ ބައެކެވެ. އެވެސް ހަމަ މިފަދަ ލެއިން ތަތްތެޅިގެންވީ މަންޒަރެކެވެ. ގެއަށް ވަދެވުމާއެކު ނެރުނު ކަށިހިއްވަރު މުޅިން އެލިއްޖެއެވެ. އެނދުމައްޗަށް ދެމުން އެއީ އޭނާގެ އެންމެ ފަހު ހަނދާނެވެ.

**************************

ހިޔާލުން ނުކުމެވުނު ޝައިހާން އަވަސްއަވަހަށް ގޮސް ފާހަނައަށް ވަދެ އިސްކުރު ދޫކޮށްލިއެވެ. ލޭތައް ފިލުވަން އޭނާ އަތް ހާކައިގަތް ގޮތުން ހީވީ ހަންގަނޑުއެކީ ދުއްވާލަން އުޅުނުހެނެވެ. އަދިވެސް ދެ އަތް ތުރުތުރުލައެވެ. ރަތްކަން ފިލުމުން ލައިގެން ހުރި ހުދު ގަމީހާއި އަޅި ފަޓުލޫނު ކޮތަޅަކަށް ލައި ޑަސްބިނަށް ލިއެވެ. ދެވަނަ ފަހަރަށް އެނދުގައި އޮށޯތީ ނިދޭތޯއެވެ. ނަމަވެސް އެރޭ ހަމަ ނިދި ލިބޭނެކަމުގެ އެއްވެސް ޔަގީންކަމެއް ނެތެވެ.

މާ ގިނައިރެއް ނުވެ، ޑަސްބިން ތެރެއިން ފޯނު ރިންގުވާން ފެށި އަޑަށް ޝައިހާން ތެދުވިއެވެ. ހަމައިން ނެއްޓިފައި ހުރެ ފަޓުލޫނު އެއްލައިލެވުނީ ފޯނާއި ވޮލެޓު ޖީބުގައި އޮއްވައެވެ. ފޯނު ނެގުނުއިރު ގުޅީ ނުދަންނަ ނަަންބަރަކުންނެވެ.

“ހަލޯ؟” ކުރަކި އަޑަކުން ޝައިހާން ގޮވައިލިއެވެ.

“ސަލާމަތްކޮށްދީ!” ފޯނުގެ އަނެއް ފަޅިން އަންހެނެއްގެ އަޑު އިވުނެވެ.

-ނުނިމޭ-