ހުޅެވި ހަނދު (ހަށިގަނޑު ރީތިކޮށް ބެހެއްޓުން)

ހަށިގަނޑު ރީތިކޮށް ބެހެއްޓުމަކީ ހަމަ ކޮންމެ މީހަކުވެސް ކުރަން ބޭނުންވާނެ ކަމެކެވެ. މިކަމުގައި ވަކި އުމުރެއް ނެތެވެ. ކުޑަޔަސް، ބޮޑަސް، ފުރާވަރުގެ ކުއްޖަކަސް، ޒުވާނަކަސް، ހަރުމީހަކަސް، މުސްކުޅިއަކަސް ވަކި ތަފާތެއް ނެތެވެ. މިމަޒުމޫނުގައި އަޅުގަނޑު ބަލައިލާނީ ހަށިގަނޑު ރީތިކޮށް ބެހެއްޓުމަށްޓަކައި ކުރެވިދާނެ ބައެއް ކަންތައްތަކަށެވެ. ފުރަތަމަ މިބަލައިލަނީ އިސްތަށިގަނޑަށެވެ.
*އިސްތަށިގަނޑު:
އިސްތަށިގަނޑުގެ ތެޔޮކަން ހިފެހެއްޓުމަށްޓަކައި ކޮންމެ ދުވަހަކު ބޯދޮވުމުން ދުރުހެލިވާށެވެ. ކޮންމެ ދުވަހަކު ބޯދޮވުމަކީ އިސްތަށިގަނޑުގެ ތެޔޮކަން ނެތިކޮށްލާ ކަމެކެވެ. އިސްތަށިގަނޑު ތެތްކޮށް ހުންނައިރު ފުނާއެޅުމަކީ އިސްތަށި ފޭބުމުގެ މައްސަލަ ކުރިމަތިވާ ކަމެކެވެ. ބޮލުގައި ލާން ރަނގަޅު ތެލުގެ ތެރޭގައި އެވޮކާޑޯ ހިމެނޭ ތެލާއި ކާށި ތެލާއި އޮލިވް އޮއިލް ހިމެނެއެވެ.
މީގެ އިތުރުން އިސްތަށިގަނޑު ހެދިބޮޑުވުމަށް ބަދަނުގެ ބާވަތްތަކާއި މަހުގެ ބާވަތްތައް އަދި ކިރާއި ސްޕިނެޗް، ދޮންކެޔޮ، އަލުވި، ވިލާތު ބަށި\ޓޮމާޓޯ އަދި ބީންސް ނުވަތަ ތޮޅިއަކީ ބޭނުންކުރުން މުހިއްމު ބާވަތްތަކެވެ.
އިސްތަށިގަނޑު ދޮންނައިރު ކޮންޑިޝަނަރއަކާއެކީ ދޮވުން މުހިއްމެވެ. ކޮންޑިޝަނަރއަކީ އިސްތަށިގަނޑު ވަރުގަދަކޮށް، އިސްތަށިތައް ފޭބުމުގެ މައްސަލަ ކުޑަކޮށްދޭ އެއްޗެކެވެ. މިގޮތަށް، ކޮންޑިޝަނަރ ބޭނުންކުރާއިރު އެ ޝޭންޕޫއާ އެއް ބްރޭންޑެއްގެ އެއްޗެއް ބޭނުންކުރަންވާނެއެވެ. ސަބަބަކީ ދެބްރޭންޑެއްގެ ޝޭންޕޫއަކާ ކޮންޑިޝަނަރއެއް ބޭނުންކުރުމުން އިސްތަށިގަނޑަށް އޭގެ ނޭދެވޭ އަސަރު ކޮށްފާނެތީއެވެ.
އިސްތަށިގަނޑު ދޮވުމަށްފަހު ތުވާއްޔަކުން ރަނގަޅަށް ފެންހިއްކަން ވާނެއެވެ. އަދި ބްރަޝްއިން އިސްތަށިގަނޑު އޮމާންކުރުމުން ދުރުހެލިވާށެވެ. އެއީ އޭގެން އިސްތަށިގަނޑު އޮމާންކުރުމުން، ނޭނގިނަމަވެސް އިސްތަށިތައް ބުޑުން ނެއްޓޭ ގޮތްވާތީއެވެ. އިސްތަށިގަނޑު އޮމާންކުރުމަށް ރަނގަޅީ ފުނަލެކެވެ.
އިސްތަށިގަނޑު ތެތްކޮށް ހުންނައިރު ނިދުމަކީ ރަނގަޅުކަމެއް ނޫނެވެ. ބޯ ދޮވެގެން އައިސް ކޮންމެހެން ނިދަންޖެހިއްޖެނަމަ، އިސްތަށިގަނޑު ދެފަރާތަށް ނުވަތަ އެއް ފަރާތަށް ގަތާލާނީއެވެ. ނުގެތޭ ވަރުގެ އިސްތަށިގަނޑެއްނަމަ، ހުޅިއެއް ޖަހާނީއެވެ.
އިސްތަށިގަނޑުގައި ފާޑުފާޑުގެ ކުލަ ޖެއްސުމަކީ އިސްތަށިގަނޑު ހަލާކުވެ، ވީރާނާވާ ކަމެކެވެ. އޭގެ ބަދަލުގައި ހީނާފަތް ހޭކުން ރަނގަޅުވާނެއެވެ. ފިހާރަތަކުގައި އެކިކުލަކުލައިގެ ހީނާފަތް މިހާރު ވިއްކަން ހުންނަކަން ފާހަގަކޮށްލަމެވެ.
އިސްތަށިގަނޑު ވަރުގަދަކުރަން ބޭނުންނަމަ ބޯދޮންނައިރު ފިނިފެނުން ބޯދޮވުން ރަނގަޅުވާނެއެވެ. އޭގެ އިދިކޮޅު، ހޫނުފެނުން ބޯދޮވެފިނަމަ އިސްތަށި ފޭބުމުގެ މައްސަލަ ވަރަށް އަވަހަށް ކުރިމަތިވާނެއެވެ. ބޯދޮންނައިރު އަބަދުވެސް ތާފަނާ\ ތާ ފެނާ ނުވަތަ ފިނިފެން ބޭނުންކުރާށެވެ.
ރިސިޕް:
ބޭނުންވާނީ: ދެބިސް.
ބިހުގެ އެތެރޭގައިވާ ހުދުބައި ( އެގް ވައިޓްސް) ނަގާށެވެ. އެއަށްފަހު ތަށްޓަކަށް އޭތި އަޅާލާށެވެ. ބޯ ދޮންނައިރު ފުރަތަމަ އިސްތަށިގަނޑު ތެންމާލުމަށްފަހު، ( އެގް ވައިޓްސް) އިސްތަށިގަނޑުގެ ބުޑުތަކަށް ފޯރާނެހެން އިސްތަށިގަނޑުގައި ހާކާށެވެ. އެއަށްފަހު އަނެއްކާވެސް އިސްތަށިގަނޑު ހުސް ފެނުން ދޮވެލާށެވެ. ދެން ޝޭންޕޫ ލައިގެން އިސްތަށިގަނޑު ދޮންނާށެވެ. މިގޮތަށް ހަދާއިރު ކޮންމެހެން ހެއަރ ކޮންޑިޝަނަރއެއް ބޭނުންނުކުރިއަސް ރަނގަޅުވާނެއެވެ. ސަބަބަކީ ބިހުގެ އެތެރޭގައިވާ ހުދުބަޔަކީ ކޮންޑިޝަނަރއެއް ގޮތުގައި ބޭނުންކުރާ އެއްޗަކަށްވާތީއެވެ. ބޯ ދޮންނަ ކޮންމެ ފަހަރަކު މިހެން ނުހެދިއަސް، ދެހަފްތާއިން ދެހަފްތާއިން މި ރިސިޕް ބޭނުންކުރުން ރަނގަޅުވާނެއެވެ.
( ސަމާލުކަމަށް: މި ރެސިޕް، އަށާރަ އަހަރުން ދަށުގެ ކުދިން ބޭނުންކުރުމަކީ ރަނގަޅުކަމެއް ނޫނެވެ. އެކުދިންގެ އިސްތަށިގަނޑަކީ އަދި ހަމަކީވެސް އުފެދެމުން، ބަދަލު އަންނަމުން ދާ އެއްޗަކަށް ވާތީ މިފަދަ ރެސިޕްތައް ބޭނުންކުރުމުން އިސްތަށިގަނޑަށް ނުވަތަ ހަމަށް ނުފައްތަރު ބަދަލެއް އައުމަކީ ވެދާނެކަމެކެވެ. )
( ނުނިމޭ..)