ނެހާ

ޖެހޭ ފިނި ވައިރޯޅިން ހިތަށް ފިނިކަން ގެނެސްދެމުން ދެއެވެ. އުދަރެސްމަތީގައި ފަވާލެވިފައިވާ ކުލަތަކަކީ ގުދުރަތުގެ އަޖައިބެއްފަދައެވެ. އިރުއޮއްސެމުން ދިޔަ ގަޑީ ގުދުރަތުގެ ރީތި މަންޒަރަށް ގެއްލިފަ އިން ނެހާ އަށް އޭނާ ވަށައިގެންވާ އެއްވެސް ކަމެއްގެ އިހުސާސް ނުކުރެވޭފަދައެވެ. ކުއްލިއަކަށް ނެހާ ސިއްސައިގެން ދިޔައީ އޭނާ އަށް ވަރަށްބާރަށް މީހަކު ގޮވާލުމުންނެވެ. “ނެހާ… ނެހާ.. އަޅެފަހޭ ކީއްތިކުރަނީ މިތާ އިނދެގެން. ހާދަ ފުން ހިޔާލަކަށް ގެއްލިފައޭ ތި އިނީ. މަ މިޙާރު ގޮވާތާ ކޮން އިރެއް؟” ނެހާ އަށް ގޮވަމުން އައި އޭނާގެ އެކުވެރި ޝިނާ ނެހާ ކައިރިއަށް އައުމަށް ފަހު ބުންޏެވެ. “ކަމެއް ނުކުރަން. މިތާ ހަމަ އިނީ. ދެން ވިސްނަން ޖެހޭ ކަންތައްތައްވެސް ހުންނާނެތާ” ނެހާ ބުންޏެވެ.