ކައިޝަލް

ރިޕޯޓު ފޯމް ސްޓޭޖު މަތިން ލިބުމާއެކި ސިޑިން ފައިބައިގެން އައިސް ގޮނޑީގައި އިށީނދެ ފައިލް ހުޅުވާލީ ވަރަށް ފޮނި އުންމީދަކާއެކީގައެވެ. މި އަހަރު ހާސިލް ކުރެވުން ނަތީޖާ ބެލުމަށްޓަކައި އެ ހިތުގައި އެއްވެސް ޝައުގުވެރިކަމެއް ނެތެވެ. އޭނާ ދިޔަ ކުލާސް ބަލާލާފައި ކުޑަކޮށް ކުރިއަށް ބޯދިއްކޮށްލާ ކުރިމަތީ އިން އަންހެން ކުއްޖާގެ ރިޕޯޓަށް ބޯދިއްކޮށްލިއެވެ. ކަނދުރާ ކައިރިން މީހެއްގެ ހިޔަނި އެޅުން ހެން ހީވެގެން ކައިނާ ފަސްއެނބުރުނެވެ. މޫނާ ޖެހޭނުޖެހޭ ހިސާބުގައި އިން މާޝަލް ވަގުތުން ދުރަށް އެއްލުނެވެ. ކައިނާ ލޯ އަޅާލިއެވެ. މާޝަލްއަށް ހިނިތުންވެލެވުނެވެ. އެއީ އަބަދުވެސް ކައިނާގެ އާދައެވެ. ނުރުހިފަ ނޫނީ އޭނާއަށް ބަލާލި ފަހަރެއް ނާންނާނެއެވެ.

މާޝަލް މާޔޫސްވިއެވެ. އޭނާގެ ބަދުނަސީބެވެ. ފުންނޭވާއެއް ދޫކޮށްލެވުނެވެ. މިއީ އަލްވާދު ކިޔުން ހެއްޔެވެ. ކައިނާޔާ އެއްކުލާހަކަށް ދިއަތޯ ބެލުމަކީ ރިޕޯޓު ދޭ ދުވަހު އޭނާ ސްކޫލަށް ހާޒިރުވާ މައިގަނޑު ބޭނުމެވެ. ފާއިތުވެ ދިޔަ ތިން އަހަރުވެސް އޭނާގެ އެދުން ވަނީ ފުރިހަމަވެފައެެވެ. ނަމަވެސް ގްރޭޑް ހަތެއް ނިމުން ދުވަހު އެ ދެމީހުންގެ ގުޅުމަށް ނިމުމެއް އައެވެ. އެކުވެރިންނެއް ނޫނެވެ. ލޯބިވެރިން ނުވަތަ އާއިލީ ގޮތުން ގުޅުމެއްވާ ދެ މީހުނެއްވެސް ނޫނެވެ. ދުވަހަކުވެސް ގާތް ކޮށް ވާހަކަ ދެއްކި ބަޔެއްވެސް ނޫނެވެ. ނަމަވެސް އެ އަހަރުގެ އަލްވަދާއު ކިޔުމުން ދެހިތަށްވެސް ކުރީ ނޭނގޭ އިހްސާސެކެވެ. ދެލޯ ކުރިމަތިން އަނެކާ ގެއްލެން ނޭދުނުނަމަވެސް މިއީ ހަގީގަތެވެ.

ވާހަކަ ނުދެއްކިއެއްކަމަކު ފާއިތުވެ ދިޔަ ތިން އަހަރު ސްކޫލަށް ހާޒިރުވާ ކޮންމެ ދުވަހަކު ސްކޫލުގައި ހޭދަކުރާ ހަ ގަޑިއިރު އެއް ކުލާހެއްގެތެރެއިން ލޮލުގެ ކޮޅަށް ނަމަވެސް ފެންނަ ހިސާބުގައި އަނެކާ ހުންނަ ހުރުން ބަދަލުވެގެން ދިޔުމަކީ ތަސައްވަރު ކުރަން އުނދަގޫ ކަމަކަށް ވިއެވެ. އަމިއްލަ އިހްސާސްތަށް ހާމަކުރުމުގެ ހިތްވަރު ނެތްނަމަވެސް އެންމެ ފެނިލުމަކުންވެސް ލޮލަށް ފުދޭފަދައެވެ. ގެއްލުމެއްނުލިބި ހަމައަށް ނޭވާ ލެވޭ ހާލު އޭނާ ހަރަކާތް ކުރާތަން ފެންނަފެނުމުން އެދުން ފުރިހަމަވެއެވެ.

ހޯލުން ނިކުމެގެން އައިސް ޕްލޭ ގްރައުންޑުގެ ބެންޗެއްގައި މާޝަލް ޖައްސާލިއެެވެ. އޭނާގެ ހަނދާނަށް އަންނަ ފެށީ ފާއިތުވީ ތިން އަހަރުގެ ތެރޭ ކައިނާޔާ އެކު ހޭދަކުރެވުން ވަގުތުތަކެވެ. އަނގަބަހުން އެންމެ ބަހެއްވެސް ނުބުނިކަމުގައިވިޔަސް ކުދި ކުދި މާނަ ފުން ހަރަކާތްތަކެވެ. ފުޓުބޯޅަ ކުޅެނިކޮށް އޭނާ ވެއްޓި ފައިމަށައިން ދިޔަ ދުވަހު ލޮލާ ލޯ ދިމާކޮށްނުލާ ޓިޝޫއަކުން ލޭ ފޮހެލާފައި ޖީބުން ބޭސްމަލަމެއް ނަގާ އޭނާގެ ފައިގައި އަޅާދީފާ ދުއްވައިގަތް ގޮތެވެ. ނިދާފައި ކަމަށް ހެދިގެން އޮތްވަގުތު އޭނާގެ މޫނަށް އަވި އެޅުމުން ކައިނާގެ އޭނާގެ އަތުން އަވި ނިވާކޮށްދިން ވަގުތުކޮޅެވެ. އެސެމްބެލީ ގަޑީގައި ކައިނާގެ ބޫޓުމައްޗަށް ކުރިން އަރާފަދައިން ކުރިއަށް އޮތް އަހަރު ނޭރޭނެޔޭ ހިތަށް އެރުމުން މާޝަލް މާޔޫސްވިއެވެ. އެފަދަ ކޮންމެ ހަރަކާތުން ދައްކުވައިދޭ އަރާރުންވުމުގެ ވަގުތުގައި ކައިނާ ގޮށްމުއްކަވާފައި އަތުން އޭނާގެ އުޅަނބޮށީގައި ޖަހާ ފަހަރުތަކުގެ ރަތްކަން އަދިވެސް އެ ދޮން ހަނގަޑުން ނުކެނޑެއެވެ. ކެނޑޭކަށް އޭނާގެ ހިތް ނުވެސް އެދޭނެއެވެ. ދެބުމަ ގޮށްޖަހާފައި މާޝަލްއަށް ކުރިން ބަލާހެން ދެން ބަލާކަށް ކައިނާއެއް ނުހުންނާނެޔޭ ހިތަށް އެރިއެވެ. ކުލާސް ގަޑި ކަޓުވާފާ ރައްޓެހިންނާއެކު ސްކޫލު ތެރޭ ދުވެފައި އަންނަ އިރު ނޯޓްސް ނަގާދީފާ އޭނާގެ ޑެސްކުތެރޭ ފޮރުވަދޭނީ ކައިނާ ނެތިއްޔާ ދެން ކާކުހެއްޔެވެ. ކިތަންމެ ރުޅިވަރިކަމެއް ދެލޮލަށް ހެކިކޮށް މޫނުމަތީ ކުލަވަރުން ދެއްކިނަމަވެސް އަޖައިބުކުރުވަނިވި ހެޔޮކަމުގެ ކުދިކުދި ހަރަކާތްތަށް ކައިނާ ދައްކާލާގޮތް އޭނާ ވަރަށް ހަނދާވާނެއެވެ. އެންމެ އަހަރެއްވެސް އެ ރުޅިގަދަ ދައިތަޔާ ނުލާ އޭނާ ހޭދަކުރެވޭނެބާއެވެ.

އިރު އަރާ އިރު އޮއްސޭ ބީދައިން ދުވަސްތަަށް ހަފްތާތަކަށް ބަދަލުވެ ހަފްތާތަށް މަސްމަހަށް ބަދަލުވެ އަހަރުތަށް ފާއިތުވަމުން ގެންދިޔައެވެ. ކައިނާޔާ ނުލާ ގްރޭޑް އަށަކާއި ނުވައެއް މާޝަލް ނިންމާލީ ވަރަށް ހާލުންނެވެ. ދެ އަހަރު ދުވަސްވީއިރު ކޮރިޑޯއިންވެސް ކައިނާ ފެންނަނީ މަހަކު އެއްފަހަރަކު ކަހަލަ ގޮތަކަށެވެ. އެ ދެމީހުންގެ ނަންނޭނގޭ ގުޅުމަކީ ސިއްރެއްކަމުން އިތުރު މީހެއް ކައިރި ކައިނާގެ ހާލު އެހޭނީ ކިހިނަކުން ކޮން ހައިސިއްޔަތަކުން ހެއްޔެވެ. އެތަށް އަންހެން ކުދިންނެއް އޭނާއަށް ހުށެއެޅުންތަށް ހުށައަޅަމުން ދިޔަނަމަވެސް މާޝަލްގެ ލޯ ކައިނާގެ މޫނަށް ދަތުރުކުރާ ނަޒަރުގައި އެހެން މޫނަކަށް ދަތުރު ނުކުރާނެއެވެ. ފަސްއަހަރު ހިތުގައި ފަސްއަޅާ ފޮރުވިފައިވާ އިހްސާސްތަކަށް ދޭނެނަމެއް އަދިވެސް އޭނާ ދިރާސާ ކުރަނީއެވެ. މިއީ އަނެއްކާ “ލަވް ސްޓޯރީ” އެއް ބާވައެވެ.

އިންތިޒާރު ކޮށްލައްވާ !

ވާހަކައިގެ މި ކުޑަ ފެށުން ކިޔާލުމައްފަހު ދެކޭ ގޮތް ކޮމެންޓް ކޮށްލަދިނުމަކީ އަޅުގަނޑަށް ލިބޭނެ ވަރަށް ބޮޑު ކުރިއެރުމެއް ! ☺☺