ތިޔަ ލޯބި މިހިތަށް ލިބުމެއް ނެތީއޭ..

.

އެއީ މީގެ ގާތްގަނޑަކަށް ތިން އަހަރު ކުރިއެވެ.އޭރު އަހަރެން އުޅުނީ ގްރޭޑް 12ގައެވެ.ހަމަ އެހެންމެ އެއީ ސޯޝަލް ނެޓްވޯކްގެ ދުނިޔޭގައި އަހަރެން އުދުހުނު ދުވަސްވަރެވެ. އޭރު ގިނަ ޒުވާނުންގެ މެދުގައި މަގުބޫލީ ފޭސްބުކެއްނޫނެވެ. މިގް33 އެވެ. ރެޔާ ދުވާލުގެ ގިނަ ވަގުތުތަކެއް އަހަރެން ޗެޓްކުރުމުގައި ހޭދަކުރަމެވެ. ވަކި ޚާއްސަ މީހަކާ ބައްދަލެއްނުވެއެވެ.

އާދައިގެމަތިން އެދުވަހުވެސް ވަދެ މެއިލް ބަލާލީ މުހިންމު އެއްޗެއް ފެނިދާނެ ކަމަކށް ނޫނެވެ. އެހެނަސް އަހަރެންގެ ސަމާލުކަން ގޮސް ހުއްޓުނީ “މިސް ޔޫ” ޖަހާލާފައި އިން މެއިލް އަކަށެވެ. ފޮނުވާފައި އިނީ ކާކުކަން މާރަނގަޅަށް ނޭނގުނަސް އެއީ އަހަރެންގެ އެކުވެރިންގެ ލިސްޓުގައި އިން މީހެކެވެ. އެކުޑަކުޑަ އިބާރަތްކޮޅުންވެސް އަހަރެންގެ ސަމާލުކަން އޭނައަށް ދެވުނެވެ. ގިނަދުވަސްތަކެއްނުވެ އަހަރެމެން ދެމީހުންގެ ދެމެދުގައި ވާހަކަ ދެކެވެން ފެށުނެވެ. “އަހަންނަށް ކިޔަނީ ސާމީ!”، އަހަރެންގެ ނުދަންނަ އެކުވެރިޔާ ބުނެލިއެވެ. އަހަރެންގެ ޝައުގުވެރިކަން އެނަން އަޑުއިވުމުން ވެސް އިތުރުވިއެވެ.

2 މަސް ފަސް

ދައުރުވަމުން ދިޔަ ވަގުތާއެކު އަހަރެމެންގެ ގުޅުންވެސް ދިޔައީ ބަދަހިވަމުންނެވެ. ކިޔެވުމަށް ދޭވަގުތު ފިޔަވައި ދެން ގިނަވަގުތު އަހަރެން ހޭދަކުރަނީ ސާމީއާއި ވާހަކަ ދެއްކުމުގައެވެ. އަހަރެންގެ ހިތް މަޑުމަޑުން އޭނައާއި ދިމާލަށް ލެނބެމުންދާކަމުގެ އިހުސާސްކުރެވެމުން ދިޔައެވެ. އެއްދުވަހަކު ދެކެވުނު ވާހަކައެއްގެ ތެރެއިން އަހަރެންގެ ލޯބިވެރިޔެއް ނުހުންނަ ކަމުގައި އަހަރެން ބުނީމެވެ. ހަމަ އެއާއެކެ ސާމީ ދިން ޖަވާބުން އަހަރެންގެ ހިތް އުފަލުން ނަށައިގަތެވެ. އާއެކެވެ. އޭނާގެވެސް ލޯބިވެރިޔެއް ނުހުންނަ ކަމުގައި ބުނީއެވެ. ކުރީގެ ލޯބިވެރިޔާއާއި ވަކިވުމުގެ ހިތާމައިގައި ދުވަސްތައް ގުނަމުންދާކަމުގައި ބުންޏެވެ. އަހަރެންގެ ހިތް ޙަމްދަރުދީއިން ފުރުނެވެ. ކޮންމެވެސް ދުވަހަކުން ސާމީގެ ހިތް ލޯބިން ފުރާލަދިނުމަށް އަޒުމް ކަނޑައެޅީމެވެ. ރެޔާއި ދުވާލު ކުރާ މެސެޖްތަކުން ނުސީދާކޮށް އަހަރެން އޭނަޔާ މެދު ގަޔާވާކަން ހާމަކުރަމުން ދިޔައިމެވެ.

ދުވަސްތައް ފާއިތުވަމުން ދެއެވެ. އަހަރެންވެސް އޭލެވެލް ނިންމާލުމަށްފަހު ރަށަށް ބަދަލުވީމެވެ. ސާމީއާއި ދެމީހުންގެ ގުޅުން ދިޔައީ ދުވަހަކަށްވުރެ ދުވަހެއް ކުރިއަރަމުންނެވެ. ފޯނުން ގުޅައިގެންވެސް ވާހަކަ ދައްކާހަދަމެވެ. ދިރިއުޅުމުގައި ދިމާވެފައިވާ ކަންތައްތައް ދެމީހުންވެސް ހިއްސާ ކުރަމުން ދިޔައިމެވެ. އެހެން އެއްވެސް މީހަކަށް ނުކުރާ އިތުބާރު ސާމީއަށް ކުރެވުނެވެ. (ނުނިމ)