ލޯތްބަކީ؟

ލޯތްބަކީ ކޯއްޗެއް ހެއްޔެވެ؟ ލޯތްބަކީ ވެވޭ އެއްޗެއް ހެއްޔެވެ؟ ލޯތްބަކީ ވާ އެއްޗެއް ހެއްޔެވެ؟ ވަރަށް އާންމު އެހެނަސް ޖަވާބު ދިނުމުގައި ގިނަ ބަޔަކު ނުކުޅެދިފައިވާ ސުވާލުތަކެކެވެ. ނޫންތޯއެވެ؟ ޖަވާބު ދެވުނަސް އެކި މީހުންނަށް ދެވެނީ އެކި ޖަވާބެވެ.

މި ލިޔުމުގައި މި އަލި އަޅުވާލަނީ އަހަންނަށް ލޯބި މާނަކުރެވޭ ގޮތަށެވެ. ގިނަ މީހުން ބުނާ ގޮތުގައި، ލޯތްބަކީ އިޚުތިޔާރެއް ނެތި ވެވި ދާ އެއްޗެކެވެ. އެހެނަސް އަހަރެންގެ ޒަމީރު އެކަން ދޮގުކުރެއެވެ. އަހަރެންގެ ސިކުނޑި ބުރަވަނީ، ލޯތްބަކީ ވާ އެއްޗެއް ކަމަށެވެ. ތިމާގެ އަމިއްލަ އިޚުތިޔާރާ އެކުގައެވެ.

ލޯތްބަކީ ގޮތް ނޭނގޭ އިހުސާސެކެވެ. އެއީ ބުނެދޭން ނޭނގޭ އިހުސާސެކެވެ. އެ އިހުސާސަކީ އަނެކާއަށް އެދެވޭ ހިނދު އެކުރެވޭ އިހުސާސް އެވެ. ތިމާ އަށް، ތިމާ އަށް ވާ ގޮތެއް ނޭނގި، ވާނުވާ އެއް ބުނެދޭން ނޭނގި، ހިތުގައި “ލޯބި”ގެ ނަން ދެވިފައިވާ އިހުސާސް އުފެދިފާނެ ކަމަކަށް އަހަރެން އެއްވެސް ހާލެއްގަައި ގަބޫލެއް ނުކުރަމެވެ. އެއީ ލޯތްބެއް ނޫނެވެ. އެއީ އަނެކާ އަށް ގަޔާވުމެވެ. ލޯބިވުމެއް ނޫނެވެ.

ލޯބިވުމަކީ އަނެކާ އެނގި ދަސްވުމެވެ. ހަގީގީ ލޯބި ވެވޭނީ ކައިވެންޏަށް ފަހު ކަމަށް ބުނާ ބުނުމަކީ ހަގީގަތެކެވެ. ބައިވެރިޔާ ރަނގަޅަށް ދަސްވާނީ ކައިވެނީގެ ގޮށް ޖަހާލައި އެކުގައި ދުވަސްތައް ހޭދަކުރަން ފެށުނީމައެވެ. ދެން އޭނަގެ ހުންނަ ގަޔާވާ ސިފަތަކަށް ތިބާ ތިމާގެ ހިތް ދޭނެއެވެ. އެ ސިފަތަކުގެ މައްޗަށް ހިތް ދޭދިނުމަކީ ލޯބި ދިނުމެވެ. ލޯބި ވުމެވެ. އެކަމަކު އެއީ ތިމާ ބޭނުން ވީމައެވެ.

ސައިންސްވެރިން ބުނަނީ ލޯތްބަކީ ފޮނި އެއްޗަކަށް ވާ ފަދައިން ގެއްލިއްޖެ ނަމަ ހަބަރަށްވުރެވެސް ހިތި އެއްޗެއް ކަމަށެވެ. ހަގީގީ ލޯބި ވާނީ އެންމެ މީހަކު ދެކެ ކަމަށެވެ. އެކަމަކު އެތައް ބަޔަކު ދެކެ އިންތިހާ އަށް “ލޯބިވާ” ކަމަށް ބުނާ  އަދި އެކަން ދެއްކުމަށް މަސައްކަތްކުރާ މީހުންވެސް ފެނެ އެވެ. އިސްވެ ދެންނެވުނު ފަދައިން ވިސްނާ ނަމަ، އެއީ ލޯތްބެއް ނޫނެވެ. ހަމަ ގަޔާވާ ގަޔާވުމެކެވެ. ލޯބި ކަމަށް ހީކުރެވެނީއެވެ. އެއީ ތިިމާގެ މޮޔަ ކަމެވެ.