ލޯގަނޑު

‍‍‍‍‍‍‍ފޮޓޯގައި އެ ވަނީ މިލާގެ ސިފަ އެވެ. ހަމުގެ އެ ކުލަވެރެވެ. ފަޅު ރީނދޫވެރިކަމެކެވެ. އުމުރުގައި ޅަފުރާވެރިކަމެވެ. ބާރަ އަހަރެވެ. ހިނިތުމުން އެ ޒަމާނެއް ކަށަވަރުކޮށްދެއެވެ. ލޮލުގެ ކަޅިރަވުން ދެއްކުވިފައިވި އެ މައުސޫމު މިޒާޖެވެ. ފަރުދަލެއް ނެތެވެ. ކަށިތަކުގެ ބާރުން ބައްޓަމެއް އުފުލެވިފައެވެ. އިނގިލތައް އެ ސިފަ އެއްގައި ތަތްކުރެވޭން ފެށުނެވެ. ދެން ހަރަކާތްތެރިކަމެކެވެ. ތުރުތުރު ލުމެކެވެ. ހިއްސުތައް އައްސި ކުރެވިއްޖެ އެވެ. އެއީ ގަނޑުފެންގަނޑެކެވެ. ހައިސިއްޔަތެއް ނުނެރެވުނެވެ. ތަޅުންގަނޑަށް ވައްޓާލެވި ބޭރުފަށް ޗިސް ކުރެވުނެވެ. އެއަށްފަހު ހީލެވުނެވެ. އެއްފަދަ ދެ ވަނަ ރޫޙަކަށެވެ.

ކުރިމަތީ ހުއްޓި އެ ވީ ލޯގަނޑެވެ. ފުސްވެފައި ކިލަނބެވެ. މަލަމަތި ސާފުކުރުމަށް ހިތް ގޮވަަައިގަތެވެ. މަންޒަރެއް ނުފެނިވީތީ އެވެ. ކަނުވީ ލޮލެއް ނޫނެވެ. ސިފަކުރެވުމެވެ. ސިކުނޑީގެ ނުކުޅެދުން ހަމަ އެހާ ބަރުވީހެވެ. ފާއިތުވެ މި ދިޔައީ އަދި އެންމެ ވިހި އަހަރެވެ. މިއީ ހަމަ އެ މިލާ ހެއްޔެވެ. ނުވާނެ އެވެ. ކޮންމެވެސް ގޯހެއް އެބަ އުޅެއެވެ. ލޯގަނޑު މަކަރުހަދަނީ އެވެ. ހިއްސުތައް ތަޣައްޔަރު ކުރުވުމުގަ އެވެ. ހަށިގަނޑު ބަލި ކުޅައުމަށެވެ. އެއަަށް ދިރުމެއް ގެނުވައިފި އެވެ. ގުޑުގުޑު އަޅައިގަތެވެ.

މިއީ ހަޤީޤަތެވެ. އެއީ ނަސްލުން ބޭރުވެފައިވި އެއްޗެކެވެ. މިލާ އެއް ނޫނެވެ. އެބައިމީހުންނަށް އެ އުޅެވެނީ ކުށުގެ ވެއްޓެއްގައެވެ. ހަޔާތުގެ ފާރުތަކުން އީޖާދު ނުވެވިގެންނެވެ. ބޯފުސްވެފައި ވަނީ އެތެރެފުށިތަކެވެ. ފައުޅުވަމުން ދިޔަ ފެވުންތަކެއް ނޫނެވެ. އެކަމަކު އެ ލޯގަނޑެވެ. ކުރެހުންތައް ހަޑިކޮށްފި އެވެ. އަޅާކިޔުމުގައި މިންތަކެއް ނުހޯދުނެވެ. ލޮލުން އަނެއްކާ ވެސް އެ ފޭދި ކުރެވީ އެވެ. މިއީ ކޮންފަދަ ގަނާވެރިކަމެއް ހެއްޔެވެ. މިލާގެ ހޭނެތް ކުރުވިއްޖެ އެވެ.

………….

މިހާރު އެ ހުރެ ހިނިތުންވަނީ ކާކު ހެއްޔެވެ. އެއްކަލަ ރޫޙު ހެއްޔެވެ. އަނބުރާ އެ ޙާޟިރުކުރުވީ ކޮން އެއްޗެއްބާވައެވެ. ޔަޤީނެވެ. އެ ލޯގަނޑެވެ. އެކަމަކު އެ ތަޅާލެވިއްޖެ ނޫން ހެއްޔެވެ. އާންއެކެވެ. ހަށީގައިވި އެ ދިރިތީންނެވެ. ޖިސްމު އެކަހެރިކޮށް ބަވަނަކުރުމުގެ ފާއްގަތިކަން ހޯދައި އެ ގަތީ މާއްދިއްޔަތުންނެވެ. ވަރަށްވެސް ޗާލާކުތާ އެވެ. ހީކުރަނީ ފިލޭނެކަމަށް ހެއްޔެވެ. ސަންދޯކަކާ ނުލާ ފަސްލުމަށް ހެއްޔެވެ. ކީކޭތޯ އެވެ. ވިންދު އަދިވެސް ޖަހައެވެ. ފުރާނަ ހައްޔަރު ކުރެވިއްޖެ އެވެ. ކުރަންވީ އަދު ކީއްހެއްޔެވެ. މިލާ އަށް ފެންފޮދެއްގެ ބޭނުން ޖެހިއްޖެ އެވެ.

…………..

ޗިސްކުރެވުނެ އެ ގަނޑުފެންގަނޑެވެ. ސިފަ ކެނޑި އޮލަަކުރުވައިފި އެވެ. ދޫކޭތުމަށް ތައްޔާރު ކުރެވިފައިވި ސަލާމަތުގެ ބުއިމެވެ. އަލީގެ ލޫޅާފަތި ކަމަކުން ދިއްލުންތަކެއް އަލި ކުރެވިފަ އެވެ. ނަމަވެސް ލޮލެއް ނުހުޅުވުނެވެ. ވަޤުތު ހިތުގެ ބާރު ފެއި ކުރުވައިފި އެވެ. އަދި ނަފުސުގެ ޤައިދުން ފުރާނައިގެ ހިމާޔަތްތެރިކަން ޔަޤީންކޮށްދެވިއްޖެ އެވެ. އެ ރޫޙެއް ފިލައިފި އެވެ. އަދި މައުޖޫދުގަައި, ބާރުފޯރުވުމަށް ހަމައެކަނި ވަސީލަތުގައިވީ ލޯގަނޑުގެ ޙާޟިރެވެ. ފޫހިކަމެއްނެތެވެ.

(ނިމުނީ)