ބުރިޖު ޖިންނި

ރެޔަކީ އުޑުމަތި ބަނަ ރެއެކެވެ. އިރުއިރުކޮޅުން ވާރޭ ކަނި ޖަހާލައެވެ. ޖެހެމުން ދިޔަ ވައިން ގަސްތަކުގެ ފަތްތަކުން އަޑުލައްވާލައެވެ. ވައިގައި ހިފާފައި ހުރީ ތެތް ފިނިކަމެކެވެ. މުޅި މީހާ ހުރީ ފިނިވެފައެވެ. ހަވީރު ވެހުނު ވާރެއިން މުޅި މަގުމަތި އޮތީ ތެމިފައެވެ. ކުދިކުދި ފެންގަނޑު ހެދިފައި ހުއްޓެއް ކަމަކު، ސައިކަލުގައި ދާ މީހަކަށް ދަތި ނުވާނެކަން ޔަޤީނެވެ.

ދަބަސް ކޮނޑުގައި އަޅުވާލައިގެން އަހަރެން މަގުމައްޗަށް ނުކުމެ ސައިކަކު ކައިރި މަޑުކޮށްލީމެވެ. ފުން ނޭވާއެއް ދޫކޮށްލީމެވެ. އެއަށްފަހު ސައިކަލަށް އަރާ ސްޓާޓުކޮށްލީ އައު ފެށުމަކުން އަހަރެންގެ ހަޔާތް އާރާސްތުކުރުމުގެ ފޮނި އުއްމީދުގައެވެ. ބުރަކޮށް މަސައްކަތްކޮށް ރަނގަޅަށް ފައިސާ ލިބުމުން ދިރިއުޅުމެއް ފަށައިގެން އަހަރެންގެ ހަޔާތް ކުރިއަށް ގެންދިއުމުގެ ނިޔަތުގައެވެ. ލޯބިވާ މައިންބަފައިން ދުނިޔޭގައި ތިބިހާ ހިނދަކު އެމީހުންގެ ހުވަފެންތަކުގައި ވީވަރަކުން ކުލަޖައްސައިދިނުމަކީ އަހަރެންގެ އަޒުމެވެ.

މައިންބަފައިންގެ ހުވަފެންތަކުގަ ކުލަޖައްސައިދޭށޭ ނުވަތަ ދިރިއުޅުން އާރާސްތުކުރާށޭ ކިޔާފައި ދަންވަރުގެ މިވަޤުތު އަހަރެން މިދަނީ ކޮންތާކަށް ހެއްޔެވެ؟ އާއެކެވެ. އަހަރެން މިދަނީ ވަޒީފާއަށެވެ. ކުރާނީ ކީއްހެއްޔެވެ؟ ޑިއުޓީ އޮތީ ދަންވަރު ވިއްޔާއެވެ. ދަންވަރަކަސް މެންދުރަކަސް އަހަރެންގެ ފަރުވާލެއް ނެތެވެ. މިދަނީ މަސައްކަތްކޮށް އޭގެ މޭވާ ލިބިގަތުމުގެ ފޮނި އުންމީދުގައެވެ.

އަހަރެން ދުއްވަމުން ދިޔައީ ސިނަމާލޭ ބުރިޖާ ދިމާލަށެވެ. ވާނީވެސް އެހެންތާއެވެ. މަސައްކަތް ކުރަންޖެހެނީ އެއާޕޯޓު އިންޖީނުގޭގައެވެ. އިރުކޮޅެއްގެ ދުއްވުމަށްފަހު، ސިނަމާލޭ ބުރިޖަށް އެރިއްޖެއެވެ. ވަގުތަކީ ދަންވަރުގެ ވަގުތުކަމުން ބުރިޖުމަތި އޮތީ ވަރަށް ފަޅުކޮށެވެ. އެހެންކަމުން ތަންކޮޅެއް ބާރު ސްޕީޑެއްގައި ދުއްވަމުން ދިޔައީމެވެ. ސިނަމާލޭ ބުރިޖުގެ ވަކި ހިސާބަކުން ޒާތެއްގެ ވަހެއް ދުވާހެން ހީވިއެވެ. ފަރުހަކިވަހާ ދާދި ގާތަށްދާ ވަހެކެވެ. މުޅިއަކުން ޔަގީނެއް ނޫނެވެ. އަހަރެން އެކަމަކާ އަޅައެއް ނުލީމެވެ.

ދުއްވަމުން ދިޔައީމެވެ. ބުރިޖު ނިމޭ ހިސާބުން ޓްރެފިކް ލައިޓާ އަރާހަމަވުން ދެލޯ ބޮޑުވެގެން ދިޔައެވެ. އެވަގުތު ހީވީ ކަޅުއޮށްފުންމި ކޮމަންޑޫ ފަޅާލިހެންނެވެ. ފެނުނު މަންޒަރު ގަބޫލުކުރަން ދައްޗެވެ. އަހަރެންގެ ލޯ އަހަންނާ ސަމާސާ ކުރަނީ ބާއެވެ؟ ނޫނީ މިފެންނީ ހަގީގަތް ބާއޭ ހިތަށް އެރިއެވެ. ބޭ އިހުތިޔާރުގައި އަހަންނަށް ސައިކަލު ހުއްޓާލެވުނެވެ. ކުރިމަތީ ފެންނަން އެހުރީ މީގެ ކުރިން އިންސާނަކު ދެކެފަ ނުވާ ފަދަ ހޫރު ޕަރީއެކެވެ. އަހަރެންގެ ހިތަށް ވެރިވަމުން އެދިޔަ އިހުސާސްތައް ބަޔާންކުރަން ދައްޗެވެ. ފުރަތަމަ ނަޒަރުން ވެސް ހީވީ، ބާރަށް ތަޅުވާފައި އޮތް ކޮކާކޯލާފުޅިއެއް ކަނޑާލިހެންނެވެ.

ހަމަ އެހިނދުކޮޅުގައި، ޖަވާބު ބޭނުންވާ އެތަށް ސުވާލެއް ހިތުތެރޭ އުތުރި އަރައިގަތެވެ. އަންހެން ކުއްޖަކު އެކަނި، މިވަގުތު، މިތާ ކީއްކުރަނީ ހެއްޔެވެ؟ އޭނާ މިތަނަށް އައީ ކިހިނެއްބާއެވެ؟ އޭނާ ގާތު އިތުރު މީހަކުވެސް ނެތީ ހެއްޔެވެ؟ ހިތަށް އެރިއެވެ. ހުރިނަމަ ވެސް ފެންނާނެތާއެވެ. “ކީއްކުރަނީ މިތާ؟ އެކަ….” އަހަންނަށް ބުނެވުނީ އެވަރަށެވެ. “ފަހުން ކިޔައިދޭނަން، ވިލްޔޫ ޕްލީސް ޑްރޮޕް މީ ޓު އެއާޕޯޓް؟” މީގެ ކުރިން ކަންފަތުގައި ޖެހިފައި ނުވާ، ނިކަން ލޯބ،ި އެހާމެ، ލަތީފީ އަޑަކުން އޭނާ ބުނެލިއެވެ. “އާން އަރާ، މަވެސް މިދަނީ އެކޮޅަށް” ހިނިތުންވެލަމުން އޭނާ ގާތު ސައިކަލަށް އެރުމަަށް އެދުނީމެވެ.

ސައިކަލު ނައްޓާލީމެވެ. ނަމަވެސް، ކުއްލިއަކަށް ދެން ލިބުނީ ކުއްލި ޝޮކެކެވެ. ބުރިޖު – ހުޅެލެ ހަލިމަގުން ތަންކޮޅަކަށް ދުއްވާލިތަނާ ސައިކަލު ކުރިމަތިން ދައްކާލީ ދެއްމެ ސައިކަލަށް އެރުވި މަންޖެއެވެ. ދުއްވީ މަޑުންކަމުން ޖެއްސި ބުރަތްކާއެކު ސައިކަލު މަޑުކުރެވުނެވެ.

ދެން ފެންނަންފެށި މަންޒަރު ކިޔައިދޭން ވެސް އަހަރެން ޖެހިލުންވެއެވެ. ފެންނަމުން ދިޔައީ އެ މަންޖެގެ ފަހަތުން އަރައިގެން އައި އަލިފާންގަނޑެކެވެ. އެ އަލިފާންގަނޑު ހުއްޓުނީ އޭނާގެ ފަހަތުންނެވެ. ދެން ފެނުނީ އަލިގުޅަތަކެއް އޭނާ ވަށާ އެނބުރޭ މަންޒަރެވެ. ހަމަ އެވަގުތު އެމަންޖެގެ ސިފަ ބަދަލުވާތަން ދުށީމެވެ. އިސްތަށިގަނޑު ހޭވި އަނަރޫފަވެފައިވާ މޫނެކެވެ. ދެލޯ ހީވަނީ ރަތް އަނގުރުގަނޑެއް ހެނެވެ. ނިޔަފަތިތައް މަޑުމަޑުން ދިގުވިއެވެ.

ލައިގެންހުރި ކަޅުކަންގަދަ ހެދުމުން ދުން އަރަންފެށިއެވެ. އޭރު މުޅި ހިސާބުގައި ދުވަމުންދިޔަ ވަހަކީ ނޯށަށް ކެތްވާވަރު ވަހެއް ނޫނެވެ. އަހަރެން އިނީ ބިރުން ވިރިވިރިއެވެ. ހޮޑުލަވައިގަތެވެ. އަހަރެން ގަސްތުކުރީ ދުއްވައިގަންނާށެވެ. ސައިކަލަކާ ސައިކަލެކެވެ. ސައިކަލުން ހުރިތާ ބަހައްޓާފައި ދުއްވައިގަތީ ނިކަން ބާރަށެވެ. ނަމަވެސް، އަހަރެން ދުވެދުވެ ހުއްޓާ ފަހަތުން އައިސް ކުއްލިގޮތަކަށް ބޮލުގައި ޖެހުނު އެތިގަނޑާއެކު މަ  ފަކީރަށް ވީގޮތެއް ނޭނގެއެވެ. ހޭލެވުނީ މަންމަ ގޮވާއަޑަށެވެ. “ދަރިފުޅާ އަޒާން، މިހާރު އެއޮއްގެން ގަޑިޖެހެނީ” މަންމަ ގޮވަމުންދިޔައެވެ. “ލައްބަ މަންމާ، މި ހޭލީ” އަހަރެން މޫނުމަތީހުރި ދާތަަށް ފޮހެލަމުން، ފުންނޭވާއެއް ދޫކޮށްލާފައި ބުނެލީމެވެ. އެވަގުތު ހިނިއަސްފައި، ހިތާ ހިތުން ކިޔާލެވުނެވެ. “ބުރިޖު ޖިންނި މަ ކާނުލިކަން ނަސީބެއްނު”