“ހީވަނީ މަންމަ ހުންނާނީ ސިންގަޕޯރ ގަހެން. އެއީ މެލޭޝިޔާގަ އުޅުނު ދުވަސްވަރު މަންމަ ވަރަށް ސިންގަޕޯރ އަށް ގޮސް ހަދާނެ. އެތާނގަ މަންމަގެ ވަރަށް ގިނަ ފްރެންޑުންވެސް އުޅޭނެ.” މުޙްސިން އެއްދުވަހު ސިޓިންގް ރޫމުގެ ސޯފާގައި މިރްޒާނާއެކީ އިނދެ އޭނައަށް ލަފާ ކުރެވުނު ގޮތް ކިޔައިދިނެވެ. އެއާއެކު މިރްޒާނަށް އެކަމާމެދު ވިސްނެން ފެށިއެވެ. މުޙްސިނާއިއެކީ އެ މަންޒިލަށް ދާން މިރްޒާނަށް ވަގުތުން ނިންމުނެވެ. އެހެނަސް އޭނައަށްވަނީ އެ އަހަރުގެ އަހަރީ ޗުއްޓީ މުޅިން ނެގިފައެވެ. ހިނގަމުން ދިޔަ މަހަކީ އޮކްޓޯބަރު މަސްކަމަށް ވުމުން ދެން އޭނައަށް ޗުއްޓީ ނެގެން އޮތީ ވެސް މަސްތަކެއް ފަހުން ކަން އެނގުންވުމުން މިރްޒާން މާޔޫސްވިއެވެ. އަދި މުޙްސިންއާއެކީ އެހާ ދުރަށް ދަތުރުކުރަން އޭނަ އިތުރަށް ލާރިވެސް އެއްކުރަން ޖެހޭނެކަން އެނގުންވުމުން އިތުރަށް ދެރަވިއެވެ. އޭނަ އެ ވާހަކަތައް މުޙްސިނާއި ޙިއްސާކުރިއެވެ.
“އިޓްސް އޯކޭ ބައްޕާ. އައިމް ޝުއާރ މަންމަ ހުންނާނީ ސަލާމަތުން. މަންމަގެ ފޮތްތައް ވިކި މަންމައަށް ލާރިވެސް ލިބޭނެވިއްޔާ. އަދި ކުރިންވެސް ބުނިހެން ބޭރުގަ އުޅޭނެ މަންމަގެ ވަރަށް ރަނގަޅު އެކުވެރިން ވެސް. ބައްޕައަށް ޗުއްޓީ ލިބޭއިރަށް އަހަރުމެން ދެމީހުންނަށް އިތުރަށް ސޭވްވެސް ކުރެވިދާނެއެއްނު ދަތުރުކުރަން؟ އިން ޝާ ﷲ އަހަރުމެން ކުރާ ފުރަތަމަ ދަތުރުން ވެސް އަހަރުމެންނަށް މަންމަ ފެނިގެންދާނެ.” މުޙްސިން އުއްމީދީ ގޮތަކަށް ބުނެލިއެވެ. މުޙްސިންގެ ވާހަކަތަކުން ހަމަޖެހުމެއް ލިބުނު މިރްޒާނަށް އޭނަގެ ދަރިފުޅަށް ބަލާލަމުން ހިނިތުންވުމަކާއެކީ ބޯޖަހާލެވުނެވެ. އެއަށްފަހު މުޙްސިން އޭނަގެ ކައިރިއަށް ގެނެސް ބައްދާލިއެވެ. އޭގެ އިރުކޮޅެއްފަހުން ދެމީހުންގެ ދެމެދުގައި ވާހަކަ ދެކެވެން ފެށީ ފައިސާ ރައްކާކުރާނެ ގޮތުގެ ރޭވުމަކާއި މެދުގައެވެ.
މިގޮތުން މުޙްސިން އޭނަ ލާރި ހޯދުމަށްޓަކައި ކުރާ މަސައްކަތް އަނެއްކާވެސް ފެށުމުގެ ހުއްދަ މިރްޒާން އަނެއްކާވެސް ދިނެވެ. މުޙްސިން އޭނައާއެކީ އުޅެން ފެށިފަހުން މިރްޒާން ވަނީ އޭނަ ލައްވައި އެ މަސައްކަތްތައް ހުއްޓުވައި މުޙްސިން ސްކޫލަކަށް ވެސް ލާފައެވެ. ސްކޫލަށްވެސް މުޙްސިން ވަންނަން ބޭނުންވީ ‘ހަސަން’ ގެ ނަމުގައެވެ. އަދިވެސް އޭނަގެ ހިތުގައި އޭނަގެ މަންމަގެ ދުޝްމިނުންނަށްޓަކައި އޮތް ބިރުވެރިކަމެއްގެ ސަބަބުންނެވެ. ސްކޫލަށް ވައްދާ ފޯމުގައި މިރްޒާން މުޙްސިންގެ ނަން ލިޔެ މުޙްސިންގެ އައިޑީ ކާޑު ވެސް އޭނަގެ އަސްލު ނަމުގައި އާ ކުރަން ނިންމުމުން އޭނަ އެހެން ނެހެދުމަށް ވަރަށް އާދޭސްކުރިއެވެ. އެހެނަސް….
“ދަރިފުޅު….ދަރިފުޅު ދެން އިތުރަށް ކަންބޮޑުވަނީ ކޮންކަމަކާ؟ ދަރިފުޅު ތިހިރީ ބައްޕަގެ ކައިރި. އެމީހުން ދަރިފުޅުގެ ގައިގަ އިނގިލި ކުރިވެސް ޖެއްސިޔަ ނުދޭނަން ބައްޕަ! ބައްޕަ ބޭނުންވަނީ ވެސް އެމީހުންނަށް ދަރިފުޅު އެނގި ބައްޕަގެ ކުރިމައްޗަށް އެމީހުން އަންނަން. ދަރިފުޅު ބިރުގަތަސް ބައްޕަ ބިރެއްނުގަނޭ. އެހެން ނޫނަސް އެންމެ މޮޅު ރައްކާތެރިއަކީ ﷲ އެއްނޫންތަ ދަރިފުޅު؟ އަހަރުމެންނަށް އަމިއްލަ ނަފްސުތައް ދިފާޢުކުރެވޭނެ ގޮތް އޮތްއިރު ކީއްކުރަން އިތުރު ދޮގުތަކެއް ހަދަންވީ؟” އެދުވަހު ކޮޓަރީގެ ކިޔަވާ މޭޒުދޮށުގައި އެ ފޯމުތައް ފުރަން އިނދެ އޭނަގެ ކައިރީގައި ހުއްޓިހުރި މުޙްސިނާއި މިރްޒާން ވާހަކަ ދެއްކިއެވެ. އެ ވާހަކަތައް އަޑުއަހާފައި މުޙްސިން އިސްޖަހާފައި ބޯޖަހާލިއެއްކަމަކު ދެންވެސް އޭނަގެ ހިތުތެރޭގައި ނުތަނަވަސްކަމެއްވިއެވެ. މަންމައަށް އެމީހުން ހެދިގޮތް އޭނައަށް ހަމަލޮލުން ފެނިފައިވާތީވެއެވެ. އޭނަ ހުރީ ބައްޕައާއެކީގައި ކަން އެނގިއްޖެނަމަ އޭނަ މަންމަ ހުރެދާނެ ތަނެއް ބައްޕައަށް ކިޔައިދޭނެކަން އެމީހުންނަށް ޔަޤީންވާނެއެވެ. އަދި އޭގެ ނަތީޖާއެއްގެ ގޮތުން ބައްޕަ މަސައްކަތް ކޮށްފިނަމަ ބައްޕައާއި މަންމަ އެއްތަންވުމުން އެމީހުންނަށް މަންމަ އިތުރަށް ބަލިކަށި ނުކުރެވޭނެކަން ވެސްމެއެވެ. އޭނަގެ ޝަޚްޞިއްޔަތު ފޮރުވަން މުޙްސިން އެހާ ބޮޑަށް ބޭނުންވީ އެހެންވެއެވެ. އެހެނަސް ބައްޕަ ދެންމެ ދެއްކި ވާހަކަތަކުން ހިތަށް ކޮންމެވެސް ވަރެއްގެ ތަސައްލީއެއްވެސް ލިބުނެވެ. އެންމެ މޮޅު ރައްކާތެރިއަކީ ﷲ ކަން ހަނދުމަކޮށްދެވުމުންނެވެ. އަދި ސަބަބެއްނެތި ދޮގުވެސް ހަދައިގެން ނުވާނެކަން އެނގުންވުމުންނެވެ.
ސްކޫލްގެ މާޙައުލުގައި މުޙްސިން، މުޙްސިންގެ ގޮތުގައި ދެކެފަރިތަވެގެން ދިޔައެއްކަމަކު މިރްޒާން ދެންވެސް އޭނަގެ އޮފީސް މާޙައުލުގައި އެފަދަ ވާހަކައެއް ނުދައްކަން ނިންމީ މުޙްސިންގެ އިޙްސާސްތަކަށް ވެސް އިޙްތިރާމް ކުރުމަށެވެ. ބޮޑު ސަބަބަކާއި ލައިގެން ނޫނީ އޭނަގެ ނަން ފޮރުވަން މުޙްސިން ނުއުޅޭނެކަން މިރްޒާނަށް ޔަޤީންވާތީވެއެވެ. އެހެންކަމުން މިރްޒާންގެ އެންމެ ގާތް އެކުވެރިޔާ އާތިފަށް ވެސް މުޙްސިންގެ ޙަޤީޤަތް ނޭނގެއެވެ. މިރްޒާނަށް ނޭނގުނުކަމަކީ އޭނައަށް ޙަޤީޤަތް ފޮރުވެން އުޅުނީ ވެސް ފޮރުވަންޖެހޭ މާޙައުލުންކަމެވެ. އެހެނަސް ޙަޤީޤަތް އެނގޭ ބަޔަކު އޮފީހާއި ނުހަނު ގާތް ޞަރަޙައްދެއްގައި ހުރި ސްކޫލްގެ މާޙައުލުގައި އުޅޭތީ، އެކަން އެނގެން ނުޖެހޭ މީހެއްގެ ކަންފަތާއި ހަމައަށް އެ ވާހަކަ ފޯރުން މާ ލަހެއްނުވިކަމެވެ. އެހެނަސް މިފަހަރު އެމީހުންނަށް ކުރިމަތިވެފައިވި ޙާލަތުގެ ނާޒުކުކަމުން އެމީހުން ފިޔަވަޅުތައް އަޅަން ނިންމީ މިރްޒާނަށް ހިލަމެއްވެސް ނުވާނެ ފަދައަކުން ލަސްލަހުން ފަރުވާތެރިކަމާ އެކީގައިކަމެވެ. އެހެންކަމުން މިރްޒާނާއި މުޙްސިން ދުވަސްތައް ގުނަން ފެށީ ކުރިމަތިވެދާނެ ޙާލަތެއްގެ ބިރުވެރިކަމާއި ނުލައެވެ. ނުހަނު ގާތް މުއްދަތެއްގައި އެމީހުންގެ ޢާއިލާ ފުރިހަމަވާނެ ކަމުގައި އުއްމީދުގައި ދެމީހުން ދުވަސްތައް ހޭދަކުރަމުން ދިޔައީ ހިނިތުންވުންތަކާއި އެކީގައެވެ.
މުޙްސިނާއި މިރްޒާން އުއްމީދީ މުސްތަޤްބަލެއްގެ ހުވަފެންތައް ދެކެން ފެށިއިރު އައްޒާމް ވެސް އޭނަގެ މުސްތަޤްބަލަށްޓަކައި މަސައްކަތް ފަށައިގެން އުޅެއެވެ. މާލެއަށް އާދެވުނު ފުރަތަމަ ރެއިން ފެށިގެން ވެސް އޭނަ އޭނަގެ ޚިދުމަތްތައް އިތުރަށް ފުޅާ ކުރެވޭނެ ގޮތްތަކާއިމެދު ހޯދައި ބަލައި އެކި މީހުން ކައިރިން ސުވާލުކުރަން ފެށިއެވެ. ހަމަ އެ ހަފްތާ ތެރޭގައި މަސްމަހުން ލާރި ދައްކާ ގޮތަށް އޭނަގެ ސާރވިސް ސެންޓާރ އިތުރަށް ބޮޑުކުރުމުގެ މަސައްކަތް ފެށޭނެ ގޮތަށް ކޮންޓްރެކްޓް އުޞޫލުން ހަމަޖެއްސިއެވެ. ޢިމާރާތުގެ މަސައްކަތް ކުރަމުން ދިޔައެއްކަމަކު އައްޒާމް އޭނަގެ ޚިދުމަތްތައް މެދުކަނޑައެއްނުލައެވެ. ބަދަލުގައި އޭނަ ކުއްޔަށް ހިފި ކުޑަ ތަނެއްގައި އޭނަގެ ޚިދުމަތްތައް އޭނައަށްވީ އެންމެ ފުރިހަމައަށް ފޯރުކޮށްދިނުމަށް އޭނަގެ އެސިސްޓުންނާއި އެކީގައި އަމިއްލައަށް ވެސް އިތުރު ގަޑިއިރުތައް ހޭދަކުރަން ފެށިއެވެ. ނަތީޖާއެއްގެ ގޮތުން އައްޒާމް ކުރިން ނޭނގޭ އެތައް ބަޔަކަށް އައްޒާމް އެނގެން ފެށިއެވެ. އަދި ތަންކޮޅެއް ކުރިން އޭނަ މިރްޒާނަށް ދިން އިންޓަވިއު ޓީވީއިން ދައްކާލެވުމުން އޭނަގެ ޚިދުމަތްތަކުގެ ވާހަކަ ކުރިން މަޝްހޫރުނުވާ ވަރަށް މަޝްހޫރުވެގެން ދިޔައެވެ. އައިޓީ އެއްވެސް މައްސަލައެއް ޖެހިއްޖެނަމަ މީގެ ކުރިން އޭނަގެ ނަން ހަނދާންވާނީ ހަމައެކަނި އޭނަ އުޅޭ އަވަށުގައި އުޅޭ މީހުންނެވެ. އެހެނަސް ފަހަކަށް އައިސް މުޅި މާލެއިން ވެސް އެފަދަ މައްސަލައެއް ފެންމަތިވެއްޖެނަމަ އެންމެ ފުރަތަމަ ގަނެވެނީ އައްޒާމްގެ ނަމެވެ. އެކަމަށްޓަކައި އައްޒާމް ޙަމްދުކުރަނީ ﷲ އަށެވެ. އޭނައަށް އެހާ ހިސާބަށް ދިޔުމަށް ހިދާޔަތް ދައްކަވައި ސާބިތުކަން ދެއްވީ ހަމައެކަނި ﷲ ކަން އެނގުންވާތީވެއެވެ.
އައްޒާމަށް ކާމިޔާބީތައް ލިބެމުން ދިޔަ ފަދައިން މާޝާއަށް ވެސް އޭނަ ރަނގަޅު ނިޔަތެއްގައި ކުރަން ފެށި ބުރަ މަސައްކަތުގެ ފޮނި މީރުކަން އިޙްސާސްކުރެވެން ފެށިއެވެ. މާޝާ އައްޒާމަށް ވަޢުދުވީ ފަދައިން އޭނަ ބައެއް އިމްތިޙާންތައް އެހެން ދަރިވަރުންނަށްވުރެ އަވަސް މުއްދަތެއްގައި ނިންމަން ތައްޔާރުވަމުން ދިޔައެވެ. މާޝާއަކީ މޮޅު ކުއްޖަކަށްވުމުން ސްކޫލުން ވެސް އެގޮތަށް ކަންތައް ކުރުމުގެ އިޒުނަ ދިނެވެ. ހާފިޒާއާއި ލަތީފް އެކަމާމެދު މާޝާއާއި ވަކި ސުވާލެއް ނުކުރީ، މާޝާ އަވަހަށް އިމްތިޙާންތައް ނިންމުމުގެ ފަހަތުގައިވީ ހަމައެކަނި އޭނަ އަވަހަށް ސްކޫލް ނިންމަން ބޭނުންވެފައިވުމުންހެން ހީވެފައި އޮތުމުންނެވެ. މާޝާއަކީ ކުރީއްސުރެ ވެސް އެ ޒާތުގެ ވާހަކަތައް ދައްކާ ކުއްޖަކަށްވާތީވެއެވެ. މަންމައާއި ބައްޕަގެ އެ ހީތައް ފިލުވައިދިނުމަށް މާޝާ ވަކި ނުއުޅުނީ އޭނަގެ ޙަޤީޤީ ނިޔަތުގެ ވާހަކަ ދުލާއި ހަމައަށް ގެންނަން ވެސް ނުކެރުމުންނެވެ. އަދި މަންމަމެން ކައިރި ބުނެފިނަމަ އެވާހަކަ އޭނަގެ އެކުވެރިންގެ ކަންފަތަށް ފޯރުމުން އޭނައަށް ހަމަޖެހިގެން އުޅެން އެމީހުން ނުދޭނެކަން އެނގުންވާތީވެސްމެއެވެ. އެހެންކަމުން ރީތިވެގެންވާ ކެތްތެރިވުމަކުން މާޝާ އޭނަ ހުވަފެންތަކުން ދެކެމުން އަންނަ ދުވަސްތަކަށްޓަކައި އިންތިޒާރު ކުރަމުން ދިޔައީ، އެ ދުވަސްތައް އަންނާނެ ކަމާމެދު ޝައްކެއްވެސް ނެތިއެވެ. ﷲ އޭނަގެ ދުޢާތައް އިޖާބަކުރައްވާނެ ކަމާމެދު އޭނަގެ ހިތުގައި އޮތް ޔަޤީންކަން އެހާވެސް ބޮޑުވުމުންނެވެ.
ދުވަސްތައް ހަފްތާތަކަށް ހަފްތާތަކަށް މަސްތައް ބަދަލުވަމުން ގޮސް ޖެހިގެން އައި އަހަރު ފެށިގެން ދިޔައިރު މާޝާއާއި އައްޒާމްގެ ޙަޔާތަށް ބޮޑެތި ބަދަލުތަކެއް އައިސްފައިވިއެވެ. އައްޒާމްގެ ސާރވިސް ސެންޓަރު ބޮޑު ކުރެވިފައިވީއިރު އޭނަގެ 20 ވަރަކަށް މުވައްޒަފުން އެ ސެންޓަރުގައި މަސައްކަތް ކުރަމުންދެއެވެ. އެ ސެންޓަރަށް ގެނެވޭ އާލާތްތައް ރަނގަޅު ކުރުމުގެ އިތުރުން ފަހަކަށް އައިސް އެ ސެންޓަރުގެ ހޮޓްލައިން މެދުވެރިވެގެން މާލެ ނޫން ޞަރަޙައްދުތަކުގައި އުޅޭ މީހުންގެ އާލާތްތަކަށް ދިމާވާ ކުދިކުދި މައްސަލަތައް ހައްލުކުރެވޭނެ ގޮތްތައް އެމީހުންނަށް ކިޔައިދިނުމުގެ ޚިދުމަތް ވެސް ފޯރުކޮށްދެވެއެވެ. މީގެ އިތުރުން އެ ސެންޓަރަށް ޚާއްޞަ އެޕެއް މެދުވެރިވެގެން ޑިޖިޓަލް އާލާތްތަކަށް ދިމާވާ އާއްމު މައްސަލަތައް ހައްލުކުރެވޭނެ ގޮތްތަކާއި ވެބްސައިޓެއް އެންމެ ރަނގަޅަށް ހަދައި ގެންގުޅެވޭނެ އުކުޅުތައް ކިޔައިދެވެއެވެ. އަދި އެކަންތައްތަކާމެދު އެއްވެސް ޝައްކުވާ ކަމެއް އޮތްނަމަ އެ އެޕް މެދުވެރިވެގެން އެ ބޭނުންކުރާ މީހުންނަށް ޖަވާބު ލިބޭގޮތަށް ހުރެއެވެ. އައްޒާމްގެ ކަމަކީ އެ ހުރިހާ މަސައްކަތްތައް މަތިމަތިން ބެލުމުގެ އިތުރުން އޭނަގެ ހިތްވަރުން ތަމްރީނުކޮށްފައިވާ ޒުވާން މުވައްޒަފުންނަށް ޙައްލު ނުކުރެވޭ މައްސަލަތައް ޙައްލުކޮށްދިނުމެވެ. މިގޮތުން ސެންޓަރަށް އަންނަ ބައެއް ކޯލުތައް ވަކި ވަގުތުތަކެއްގައި އޭނައަށް ފޮނުވާލެވޭ ގޮތަށް ހަދާފައިވެއެވެ. މިހާ ތަނަށް އައިއިރު ގިނަ މީހުން އޭނަ ނުހަނު މަތީ މީހެއްގެ ގޮތުގައި ދެކުނެއްކަމަކު އައްޒާމް އޭރުވެސް އޭނަ ޚިދުމަތް ފޯރުކޮށްދޭ މީހުންނާއި ވާހަކަ ދައްކަނީ އޭނަ އެ މަސައްކަތް ފަށައިގަތް ދުވަސްވަރުވެސް ދެއްކިހާ މަޑުމައިތިރި ކޮށެވެ. ތިމާގެ އަމިއްލަ ނަފްސާއިމެދު މާ މަތީކޮށް ދެކި ފަޚުރުވެރިވާ މީހުންދެކެ ﷲ ލޯބިވެވޮޑިގެންނުވާކަން ހަނދާން ހުންނާތީވެއެވެ. އެ ވާހަކަ އޮންނަ އާޔަތް ވެސް އޭނައަށް ނުހަނު ޖޯޝާއެކީ ކިޔައިދިނީ މާޝާކަން ހަނދާންވާ ކޮންމެ ފަހަރަކު އައްޒާމަށް ހިނިތުންވެލެވެއެވެ. ފަހަކަށް އައިސް އެ ހިނިތުންވުންތައް އޭނަގެ މޫނުމަތިން ފެންނަމުން ދަނީ މާ ގިނައިންނެވެ. އޭނައަށް އައިސްފައިވާ ކުރިއެރުންތައް ފެނި އޭނަ ދެން މާޝާއާއި ގުޅެން މާ ދިގު އިންތިޒާރެއްކުރަން ނުޖެހޭނެ ކަމަށް ހިތް ބުނަމުން ދިޔަވަރުންނެވެ.
ޖެނުއަރީގައި ނެގެމުން ދިޔަ އޭނަގެ ފަހު އިމްތިޙާންތައް އޮމާންކަމާއެކީ ނިންމަމުން ދިޔަ މާޝާގެ ހިތް ވެސް އުފަލުން ނަށަމުން ދިޔައީ އެ ސަބަބާހެދިއެވެ. އިމްތިޙާންތައް ނިމުމުގެ ކުރިން ވެސް އޭނަ ކުރިއަށް ދާން ބޭނުންވާ ދާއިރާ އޭނައަށް ކަނޑައެޅުނެވެ. ކައުންސެލިންގް ގެ ދާއިރާއިން އޭނަ ކުރިއަށް ދާން ބޭނުންވީ ސްކޫލް ދައުރުގައި އޭނައަށް ކުރެވުނު ތަޖުރިބާތަކެއްގެ ސަބަބުންނެވެ. އޭނަ ތައުބާވިފަހުން ގިނަ ކުދިން އެކި ކަންކަމުގައި އޭނަ ދެކޭ ގޮތް ހޯދައި އޭނަގެ ނަޞޭޙަތްތައް ހޯދަން އަންނަމުން ދިޔަކަން އޭނައަށް ފާހަގަވިއެވެ. އަދި އޭނަ ކަމަކާމެދު ވިސްނައިދޭން އޭނައަށް ވެވުނުހާ ރަނގަޅަށް މަސައްކަތް ކޮށްފިނަމަ އެކަން ﷲ ގެ އިރާދަފުޅުން ކުރެވޭކަން ވެސް އެނގުންވުމުންނެވެ. މާޝާ އޭރުއްސުރެ މާލޭގައި ހުންނަ ޤައުމީ ޔުނިވާރސިޓީއިން އެ ދާއިރާއާއި ގުޅޭ ކޯހެއް އޮތްތޯ ބަލައި ހޯދީ، ދާދި ކައިރި މުސްތަޤްބަލެއްގައި އޭނަ އައްޒާމާއެކީ މާލޭގައި އުޅޭ މަންޒަރު ސިކުނޑީގައި ކުރަހަމުންނެވެ. އޭނަ އެ ހުވަފެންތައް ދެކެމުން ދިޔައީ އަންނަން އުޅޭ ޠޫފާނެއްގެ ހިލަމެއްވެސް ނުވެއެވެ.
މާޝާއާއި އައްޒާމްގެ ޙަޔާތްތަކަށް ކަޅު ވިލާގަނޑެއް ވެރިވީ މާޝާ އޭނަގެ ފަހު އިމްތިޙާން ހެދި ދުވަހުއެވެ. ހެނދުނުގެ ވަގުތު އިމްތިޙާން ނިންމާފައި މާޝާ ސްކޫލްގެ ގޭޓުން ނިކުތީ އުޖާލާވި ހިނިތުންވުމަކާއި އެކީގައެވެ. ދުވަސްވަރަކީ އަދި ސްކޫލްގެ ކިޔެވުން ނުފެށޭ ދުވަސްވަރަށްވުމުން އެ ޞަރަޙައްދަށް ވެރިވެފައިވީ ހިމޭންކަމެކެވެ. އެކި ޚަބަރުތަކުން ފެންނަމުން ދިޔަ އައްޒާމްގެ ކާމިޔާބީގެ ވާހަކަތައް ހަނދާން ކުރަމުން ޚިޔާލުތަކަށް ގެއްލިފައިވަނިކޮށް މާޝާ ކުއްލިއަކަށް ސިއްސައިގެން ދިޔައީ ބާރު ސްޕީޑެއްގައި އައި ސައިކަލެއް އައިސް އޭނައާއި ނުހަނު ކައިރިން ގޮސް އޭނަ ވަށާލާފައި އޭނަގެ ކުރިމައްޗަށް މަޑު ކޮށްލުމުންނެވެ. ސިހުމުގެ ސަބަބުން ފިޔަވަޅުތައް މަޑުޖައްސައި ދެލޯ މަރައި ތަގުޅި ކޮށްލި މާޝާއަށް ލޯ ހުޅުވާލެވުނީ ލަސްލަހުންނެވެ. އެ ހިނދު ސައިކަލު މަތީގައި ހުރި މީހަކު ފެނިފައި މާޝާ ވަގުތުން ރުޅިން ރަތްވިއެވެ.
“ލިއާމް!” މާޝާއަށް އެ ނަން ކިޔާލެވުނީ ވެސް ދަތްކުނޑި ވިކަމުންނެވެ. އެ ހިނދު ލިއާމް އޭނަގެ މޫނުމައްޗަށް ވެރިކުރުވީ އެއްމިޔަކަނުގެ ހިނިތުންވުމެކެވެ. މާޝާއަށް އޭނަގެ މާޒީގައި އެ ހިނިތުންވުން ރީތިވީ ފަދައިން ގިނަ އަންހެން ކުދިންނަށް މިއަދުވެސް އެ ހިނިތުންވުން ރީތިވެދާނެއެވެ. ކަރަންޓު ޖައްސާފައިވި ފަދައަކުން މައްޗަށް އަރުވާފައިވި އިސްތަށިގަނޑާއި އޭނަގެ ކަރުގައި އެޅުވެފައި އޮތް ޗޭނު އެކުދިންނަށް ރީތިވެދާނެއެވެ. އެހެނަސް މިއަދު މާޝާގެ ހިތުގައި ލިއާމަށްޓަކައިވީ ސާފު ނަފްރަތެވެ. ލިއާމާއި އޭނައާއި ދެމެދު ހިނގި ކަންތަކަށްފަހު ލިއާމް ވަނީ ސްކޫލުން ވަކިވެގެން ގޮސްފައެވެ. އޭގެ ފަހުން ލިއާމާއި ބެހޭ އެތައް ނޭދެވޭ ވާހަކައެއް ރަށުތެރޭގައި ފެތުރިގެން ދިޔައެވެ. އޭނަ ޕާޓޭއިންނާއި އެކީ އުޅޭ ވާހަކައާއި މަސްތުވާތަކެތީގެ މައްސަލައިގައި ހައްޔަރު ކުރެވުނު ވާހަކައާއި އަދިވެސް އެ ޒާތުގެ އެތައް ވާހަކައެކެވެ. އެ ވާހަކަތައް އިވިފައި ލިއާމާއި ވަކިވެވުނު ކަމަށްޓަކައި މާޝާއަށް ހިތާހިތުން ޙަމްދުކުރެވެއެވެ. އެހެނަސް ދޭތެރެދޭތެރެއިން އޭނައަށް ލިއާމްގެ އުދަގޫތަކާއި ކުރިމަތިވެއެވެ. އައްޒާމް ދިޔަފަހުން އެ އުދަގޫތައް ވަނީ އިތުރުވެފައެވެ. އޭނަ މާޝާއާއި ދިމާކުރާ ކޮންމެ ފަހަރަކު ދައްކާނީ އައްޒާމާއި މާޝާގެ ގުޅުމުގެ ވާހަކައެވެ. މިހާތަނަށް އައިއިރު އޭނަ ދެއްކި ވާހަކަތަކުން މާޝާއާއި އައްޒާމް އިންނަން ރޭވިކަން ވެސް އޭނައަށް އެނގޭކަން މާޝާއަށް އެނގުންވެފައިވެއެވެ. ލިއާމް އޭނައަށް އެހާވެސް ބޮޑަށް ފާރަލަނީތޯ މާޝާގެ ހިތް ސުވާލުކުރެއެވެ. އެއީ ކީއްވެކަމާމެދު ޙައިރާންވިއެއްކަމަކު އޭގެ ފަހަތުގައިވި ސަބަބު ލިއާމްގެ ވާހަކަތަކުން މާޝާއަށް ދޭހަކުރެވެއެވެ. ލިއާމް އޭނަ ކަހަލަ އަންހެން ކުއްޖެއްގެ އަތްދަށުން ‘ބަލިވީ’ ކަމުގެ ރުޅި އަދިވެސް އެ ހިތުގައި އަށަގެންފައިވަނީއެވެ. އެ ރުޅި ބޭލުމަށްޓަކައި އޭނަ މާޝާއަށް މަލާމާތްކޮށް މާޝާއަށް އުފާވެރި ޙަޔާތެއް ނުލިބޭނެކަމުގެ އިންޒާރު ދެނީއެވެ. އެ މަލާމާތްތަކުން ހިނދުކޮޅަކަށް ވެސް މާޝާ ރުޅިއަރުވާލެވުމުން އެ މޫނުމަތިން އުފާވެރިކަން ފިލައިދިޔުމުން އެއީ އޭނައަށް ލިބޭ ކާމިޔާބީއެއްހެން ލިޔާމަށް ހީވަނީއެވެ.
“ލޯބިވެރިޔާ އަންނާނެ ދުވަހަކަށް އިންތިޒާރުކޮށް ދުވަސްތައް ގުނަނީދޯ؟ މާ އަވަހަކަށް އިމްތިޙާންތައް ނިންމީ ކީއްކުރަންބާ؟ މާޝް ބޭބީއަށް ހީވަނީ މެރީކޮށްގެން ކުރާ ކަންތައްތަކަކީ މާ……އުދަގޫ ކަންތައްތަކެއްހެންތަ؟” ލިއާމް މަލާމާތުގެ ހިނިތުންވުމަކާއެކީ ލަދުކުޑަ ރާގަކަށް ދެއްކި ވާހަކައިން ރުޅި ނާންނަން ހުރި މާޝާގެ ގާތަށް ރުޅިއައެވެ. ސައިކަލުމަތީގައި ލިއާމް އޭނައާއި ނުހަނު ގާތްކޮށް ހުއްޓިގެން އިންއިރު އޭނަގެ އަނގައިން އަރަމުން ދިޔަ ސިނގިރޭޓި ވަހުން މާޝާއަށް އެތާ ހުރެވުނީއެއްވެސް ނޫނެވެ. އޭނަ ވަގުތުން ބާރު ފިޔަވަޅުތަކެއްގައި އެ ސައިކަލު ފަހަނަޅައި ދާން އުޅުނު ވަގުތު ލިއާމް ރުޅިވެރިކަމާއެކީ މާޝާގެ އަތުގެ ކުޑަ ހުޅާއި ދިމާލުން ހިފަހައްޓާލިއެވެ. ވީ ތަދާއެކީ މާޝާގެ އަނގައިން ލުއި އާހެއްގެ އަޑު ނިކުތެވެ. އޭގެ ދެވަނަ ސިކުންތުގައި އޭނަ ލިއާމަށް ފަސްއެނބުރި ބަލާލީ ދުވަހަކުވެސް ރުޅި ނާންނަ ވަރަށް ރުޅި އައިސްފައި ހުރެއެވެ.
“ދޫކުރޭ!” ހަރުއަޑުން މާޝާ އެހެން ބުނެ އޭނަގެ ގައިގަ ހުރި ބާރު މިނަކާއެކީ ކުއްލި ގޮތަކަށް އަތް ދަމައިގަންނަން އުޅުނެވެ. އެ ހިނދު ލިއާމްގެ އަތުން އެ އަތް ދޫނުވެ ދިޔައީ ހަމަ ކިރިޔާއެވެ. މާޝާގެ އެ ޙަރަކާތުން އިތުރަށް ނުރުހުންވި ލިއާމް އިހުނަށްވުރެ ބާރަށް އެއަތުގައި ހިފަހައްޓާލިއެވެ.
“ހީނުކުރާތި ކަލޭ މަށާއި ދޭތެރޭ ހެދިގޮތް މަ ހަނދާން ނައްތާލީ ކަމަށް! ކޮންމެ ގޮތެއް ހަދާފަ ވެސް އެކަމުގެ ހިތި ރަހަ ކަލޭގެ ކަރުބުޑުގަ ލައްވާނަން! މަށާއި ކަލޭ ނުއިންނަންޏާ ކަލެއަކަށް ނީނދެވޭނެ އޭނައަކާ. ހަނދާންކުރާތި!” ލިއާމް ދަތްކުނޑި ވިކަމުން އެ އެނގުން އަންގައި މާޝާގެ އަތް ހޫރާލަމުން ދޫކޮށްލިއެވެ. އަތަށްވީ ތަދާއެކީ މާޝާއަށް އެ އަތް ހިއްލައި އަނެއްއަތުން ފިރުމާލެވުނެވެ. އެ ހިނދު ލިއާމް އަނެއްކާވެސް ޒޫމް ލައްވާފައި އޭނަގެ ސައިކަލު އަނބުރާލަމުން ބާރަކަށް ދުއްވާލިއެވެ. ލިއާމް ދިޔަ މަންޒަރު ބަލަން ހުރި މާޝާއަށް އޭނަ ދެއްކި ވާހަކަތަކާއިމެދު ވިސްނުނެވެ. އެހެނަސް ކޮންމެ ފަހަރެކޭ އެއްފަދައިން އެ އިންޒާރުތަކުގެ މަތިން ހަނދާން ނައްތާލީ ލިއާމަކީ ގިނަފަހަރު އޭނަގެ ބަހާއި ޢަމަލު އެއްގޮތްވާ މީހެއްނޫންކަން އިޙްސާސް ކުރެވިފައިވާތީވެއެވެ. އެ އިންޒާރުވެސް އޭނަ ދޭތާ ކިހާ ދުވަހެއް ހެއްޔެވެ؟ އެހެނަސް އޭގެ އެއްވެސް އަސަރެއް އަދި މާޝާއަށް ފެނިފައެއްނުވެއެވެ. ލިއާމްގެ ބަސްތައް ޙަޤީޤަތަކަށްވާނީ މިފަހަރު ކަން މާޝާއަށް ރޭކާނުލިއެވެ. ލިއާމްގެ ‘ވަޢުދު’ ފުއްދުމަށްޓަކައި އޭނައާއި އެއްޒާތެއްގެ އެދުމެއް އޮތް އެހެން މީހެއްގެ އެހީތެރިކަން އޭނައަށް ލިބެން އުޅޭތީވެކަން ވެސްމެއެވެ.
އެދުވަހު ހަވީރުގެ ވަގުތެއްގައި އައްޒާމް އޭނައަށް ޚާއްޞަ ކުރެވިފައިވި ކެބިންއިން ނިކުމެ ސެންޓަރުން ނިކުތް ވަގުތަކީ ކާފަ އޭނައަށް ގުޅި ވަގުތެވެ. އެ ދުވަސްކޮޅު މާލޭގައި އުޅެމުން ދިޔަ ކާފަ އޭނަގާތު އެދުނީ ވަކި ވައްތަރެއްގެ ކަދުރު ގެނެސްދިނުމަށެވެ. ކާފަ އުޅެނީ މިދިޔަ ހަފްތާގައި ކޮންމެވެސް ރަށަކަށް ގޮސް އެނބުރި އައިފަހުން ބަލިވެއެވެ. ބަލިވުމުގެ ސަބަބުން އާދައިގެ މަތިން ކާފަގެ ކެއުން މަދުވެފައިވީތީ ކާފަ އެދުނު އެއްޗެއް ހޯދައިދިނުމަށް އައްޒާމް އަވަސްވިއެވެ. މިގޮތުން ކާފަ އެ ބުނި ވައްތަރެއްގެ ކަދުރު ތިބޭނެހެން ހީވި ބޮޑު ފިހާރައަކަށް ގޮސްވަނެވެ. އޭނަ ފިހާރައަށް ވަން ވަގުތަކީ އޭނަގެ ފޯނަށް ސެންޓަރުން ކޯލެއް އަންނަން ފެށި ވަގުތެވެ. ބޮޑު މައްސަލައެއް ދިމާވެގެން ނޫނީ އޭނަ ގެއަށްދާ ވަގުތު އެތަނުން އޭނައަށް ނުގުޅާނެކަން ޔަޤީންވާތީ އައްޒާމް ފޯނު ނެގިއެވެ.
“ހެލޯ ޒާމް….ކޮންމެވެސް ދީނީ ސައިޓެއް ހަދައިގެން އުޅޭ އަންހެނެއް އޭނަގެ ސައިޓް ހެކްކޮށްގެން ވަރަށް ގިނައިން އެބަ ގުޅާ. ބުނަނީ އެ ސައިޓް ހެކްކުރި ބަޔަކު މިހާރު އެ ސައިޓުގައި ޝާއިއުކުރަނީ ދީނާއި ދެކޮޅު ލިޔުންތަކޭ. އަހަރުމެން ވަރަށް ޓްރައި ކޮށްފިން ރަނގަޅުކުރެވޭތޯ. އެކަމަކު ހަމަ ރިޕީޓެޑްލީ އެ ހުރިހާ ކަމެއް އަންޑޫވަނީ މިދިޔަ 3 ދުވަހުވެސް. ވަރަށް ކަންބޮޑުވެގެން އެ މީހާ އުޅެނީ. ކޯލް ފޮނުވާލަންތަ ޒާމްއަށް؟” އެކޮޅުން އައްޒާމްގެ މުވައްޒަފަކު ވާހަކަ ދެއްކިއެވެ. އޭނަ އާއްމުގޮތެއްގައި ތަނަކަށް ގޮސްފައި ހުންނައިރު ކޯލްއެއް ލިބުނަސް އޭތި ފަސްކޮށްލައެވެ. އެހެނަސް ދީނީ ސައިޓަކާއި ދެކޮޅަށް އެފަދަ ޙަމަލާއެއް ލިބުނު ވާހަކަ އިވި އެކަމުގައި އޭނަގެ އެހީއަކަށް އެދުމުން އައްޒާމަށް ވަގުތުން އާނއެކޭ ބުނެލެވުނެވެ. ފޯނުން ވާހަކަ ދައްކަމުން ފިހާރައިގެ ތެރެއަށް ވަން އައްޒާމްގެ ފަހަތުން އެ ފިހާރައަށް އެހެން ބަޔަކުވެސްވަނެވެ.
**
މިރްޒާނާއި މުޙްސިން އެދުވަހު ހަވީރު މާލޭގެ ބޮޑެތި ފިހާރަތަކަށް ގޮސް ހޯދަމުން ދިޔައީ ދެމީހުންނަށް އޮންލައިންކޮށް ފެނުނު ރެސިޕީއެއް ހެދުމަށްޓަކައި ބޭނުންވާނެ ތަކެތި ފެނޭތޯއެވެ. ދެމީހުން އެކީގައި މިޒާތުގެ ކަންތައް ކުރުމަކީ އާދައިގެ ކަމަކަށްވަނީ ވެފައެވެ. މުޙްސިން ސަމާސާއަކަށްޓަކައި އެފަދަ އެދުމެއް އެދުނަސް މިރްޒާން އެ އެދުމާއިގެން ކުރިއަށްދަނީ އޭނަ މުޙްސިނާއި ދުރުގައި އުޅެންޖެހުނު ހުރިހާ ދުވަސްތަކުގެ ބަދަލު ހޯދުމަށެވެ. އޭނައަށް ނުފެނި ގޮސްފައިވަނީ މުޙްސިންގެ ޙަޔާތުގައި ދިޔަ ކިތައް ލޯބި ދުވަސްތަކެއްތޯ އޭނަގެ ހިތް ސުވާލުކުރާ ހިނދު މިރްޒާންގެ މޭގައި ރިއްސާލައެވެ. އެހެނަސް އޭނަ ހިނިތުންވެލަނީ މުސްތަޤްބަލުގައި އޭނައަށް މުޙްސިން އަބަދުވެސް ފެންނާނެ ކަމުގެ އުފާވެރިކަމުންނެވެ.
ފިހާރައަށް ވަންތާ މާގިނައިރެއްނުވެ މިރްޒާން ކިރާ ބާވަތުގެ އެއްޗެހި ހޯދަން މިޞްރާބުޖެހިއިރު މުޙްސިން ބާކީހުރި އެއްޗެހި ފިހާރައިގެ ބޮޑެތި ހަރުތަކުން ހޯދަންފެށިއެވެ. މިގޮތުން އޭނައަށް ފުރަތަމަ ވެސް ހުއްޓި ހުރެވުނީ ކަދުރު ޕެކެޓުވެސް ބަހައްޓާފައި ހަރުގަނޑުގެ ކުރިމައްޗަށްވާ ގޮތަކަށެވެ.
**
ސެންޓަރުން އައި ކޯލު ނިންމުމަށްފަހު އައްޒާމް ފިހާރަތެރެއިން ހިނގަމުން ގޮސް އޭނަގެ ކަންފަތުން ފޯނު ވަކިކުރިތާ މާ ގިނައިރެއްނުވެ އަނެއްކާވެސް އޭނައަށް ފޯނެއް އަންނަން ފެށިއެވެ. މިފަހަރު އޭނަގެ ސްކްރީނަށް އެރީ ދިގު ނަންބަރެކެވެ. ސައިޓްގައި މައްސަލައެއް ޖެހިގެން އުޅެނީ ބޭރު މީހެކޭ ހިތައި އައްޒާމް ފޯނު ނަގައި ކަންފަތުގައި ޖައްސާލިއެވެ.
“އައްސަލާމްޢަލައިކުމް…އައްޒާމް ދެއްތޯ؟” އެކޮޅުން އިވުނު އަންހެން މީހާގެ އަޑުއިވިފައި އައްޒާމްގެ ފިޔަވަޅުތައް ލަސްވިއެވެ. އެ އަޑު އޭނައަށް އިވުނީ ކޮންތަނަކުންތޯ ހިތް ސުވާލުކުރި ވަގުތު އޭނަގެ މަންމަމަތިން ވެސް ހަނދާންވީ ކީއްވެކަމެއް ނޭނގެއެވެ.
“ވަޢަލައިކުމުއްސަލާމް.” އައްޒާމަށް ބުނެވުނީ ހަމައެކަނި އެހާވަރަށެވެ.
“އަޅުގަނޑަށް ދިމާވެގެން އުޅޭ މައްސަލަ އައްޒާމަށް އެނގިލައްވާ ދެއްތޯ؟” އެކޮޅުން އަދަބުވެރިކަމާއެކީ ސުވާލުކުރި އަޑު އިވުނެވެ.
“އާދެ…” އައްޒާމް ވިސްނުމެއްގެ ތެރެއަށް ގެއްލިފައިވި ވަރުން އިތުރަކަށް ވާހަކައެއް ނުދެއްކެއެވެ.
“ހުރިހާ އައިޓީ މީހުންގެ ތެރެއިން ވެސް އައްޒާމް މި ޚިޔާރުކުރީ އައްޒާމް މި ކަންތަކަށް ކިހާ ޤާބިލުކަން އެނގޭތީ…..އަދި އެ ހެކަރުންނަށް ހެޔޮ ވިސްނުން ވިސްނައިދެވޭނެ މީހަކީ ވެސް އައްޒާމްކަން އެނގޭތީ.” އެ އަންހެން މީހާ ދެއްކި ވާހަކައިގެ ޒާތުން އައްޒާމްގެ ނިތަށް ރޫގިނަވިއެވެ.
ނުނިމޭ
މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.
Other Articles
ވިންދޭ ލޯބި ތީ އެދޭ 22
ހުވާ ކޮށްފާ ބުނަން ލޯބި ވޭ 2
32 Comments!
Comments are closed.
Assalaam’alaikum. In Sha Allah next part tuesday ga 🙂
Blog post:
وَلَا تُصَعِّرْ خَدَّكَ لِلنَّاسِ وَلَا تَمْشِ فِي الْأَرْضِ مَرَحًا إِنَّ اللَّـهَ لَا يُحِبُّ كُلَّ مُخْتَالٍ فَخُورٍ
“And do not turn your cheek [in contempt] toward people and do not walk through the earth exultantly. Indeed, Allah does not like everyone self-deluded and boastful.” Surah Luqman, 18
Someone may not be able to file a case against us in this world if we are insulting them just with our facial expressions. Or we put them down with just the way we walk in front of them. But Allah, being the most Just of the judges, will hold us accountable even for this crime. Subhaanallah!
May Allah make us of those who are humble and thankful even with all the blessings He gives us. Ameen!
Subhanallah!
Blog post: (Dhivehi)
وَلَا تُصَعِّرْ خَدَّكَ لِلنَّاسِ وَلَا تَمْشِ فِي الْأَرْضِ مَرَحًا إِنَّ اللَّـهَ لَا يُحِبُّ كُلَّ مُخْتَالٍ فَخُورٍ
“އަދި މީސްތަކުންނަށް ކިބުރުވެރިވެ، ތިބާގެ ކޯތާފަތް އަނބުރައިނުލާށެވެ! (އެބަހީ: މޫނު އަނބުރައި ނުލާށެވެ!) އަދި ބޮޑާވެގެންވާ ޙާލު، ބިމުގައި ނުހިނގާށެވެ! ހަމަކަށަވަރުން، ކިބުރުވެރިވެ، ފަޚުރުވެރިވާ އެއްވެސް މީހަކުދެކެ اللَّه ލޯބިވެވޮޑިގެނެއް ނުވެތެވެ.” ސޫރަތް ލުޤްމާން، 18
މި ދުނިޔޭގައި އަހަރުމެން މީހަކަށް މަލާމާތް ކުރުމުގެ ގޮތުން މޫނަށް ގޮތެއް ހަދާލިޔަސް އެ މައްސަލަ އެ މީހަކަށް ކޯޓަކަށް ހުށަނޭޅޭނެއެވެ. އެހެންނޫނީ މީހަކު ދަށްކުރުމަށްޓަކައި އެ މީހެއްގެ ކުރިމަތީގައި ހިނގާލާ ގޮތާއި ދެކޮޅަށް ވެސް އަޑު ނުއުފުލޭނެއެވެ. އެހެނަސް އެންމެ ޢަދުލުވެރި ރަސްކަލާނގެ ޙަޟްރަތުގައި އެ ކުށަށްޓަކައި ވެސް އަހަރުމެންގެ ހިސާބު ބެއްލެވޭނެއެވެ. ސުބްޙާނަ ﷲ!
މާތް ﷲ އަޅަމެންނަކީ އެކަލާނގެ ކިތަންމެ ގިނަ ނިޢުމަތްތައް ދެއްވިޔަސް ހިތްތިރިކޮށް ޝުކުރުވެރިވާ ބަޔަކު ކަމުގައި ލައްވާށި. އާމީން!.
Aameen
Me first dhw ??..masha allah❤❤????..vrh vrh rythi mi prt vx..curiously waiting for the next
yay congratulations! 😀 next part tuesday ga In Sha Allah. Alhamdhulillah! (All praise and thanks belong to Allah) 🙂
Masha Allah mibaives varah reeethi. Adhi mibai furathama kiyaalevuneetheeves varah ufaavehji.
Anonymous comment kuri iru matheega oiy comment approve nuve dho othy? hehe….ekamaku hama first of the readers ge thereyga ingey 😀 Alhamdhulillah! 🙂
Yey me 2nd dho. Shifraa busy koh ulheythy comment nukurevenee. But mi vaahaka baraabarah kiyan. Masha allah. Mi part vx hama varah reethi. When next part?
shifrraa third. massala eh noon ingey comment nukuriyas. 🙂 hama ahaaly maa dhuvas fahun fenunyma. Alhamdhulillah! next part tuesday ga In Sha Allah 🙂 <3
Janaa ge story thakun gina bayakah idhaayai dhahka vaashi eve
Aameen
I love your story’s
Ameen! Maai Allah alhamenge therein komme meehaku ves kuraa komme heyo ‘amaleggai barakaaiy lavvai alhamen emmennah hidhaayaiy ithuru kohdhevvaashi. Ameen!
Alhamdhulillah! 🙂
Magey hitha arany mirzan ehaa loabi vaa anbi meeha nifenigen ulhey iru social media thru koh contact veytho masakaiy nukurany tho emme faharakuves..
Alhe jana bunebala mirazan kairy egotha try kohbalaa shey..?
Author eh kan ves enge eh nun..dhn liyefa huri vahaka thah ves search koh kuda namaves hint eh libeytho try nukurany tha ?
adhi thi kanthakah ves ali alhuvaaleveyne ingey fan 😀 no worries 🙂
Masha allah. Wow. Mi part vx varah varah reethi. Shifoo akee teenager ekey?. Adhi 13 years.? But mi vaahaka akee dheenee vaahaka akah veema kiyanee. Abadhu vx dheenee vaahaka kiyan dho. But mi jana sis ge vaahaka thah hama varah kiyaa hiythun kiyanee. Thanks jana sis ah. Aslu ga teenagers ah amaaz kohgen mikahala iburaitheri vaahaka thah genesdhey theeve. May allah bless u sis. LY jana sis.
Mi part vx aslu varah kiyaa hithun indha nimunee. Alhe dhn vaanee kihinei baa ey mi hithah aranee. But jeheynee tuesday ah wait kuran dho. Ehenma dhn wait kuraanee. Curiously waiting….
Ma Sha Allah! varah ufaavejje thi umurugaives dheenah shauquverikan huri kujjaku fenifa. make the best use of it sister. aammugothegga gina meehun tawba vany umurun gina dhuvas gosfaivanikoh. ekamaku umuruge bodu bai oiy iru adhi hakatha huri iru dheen dheke loabivejje nama Allah attakai gina kanthah kurumuge furusathu libigen dhaane In Sha Allah 🙂 May Allah bless you more sister. May Allah increase you in beneficial knowledge and thereby guidance. May Allah keep our hearts firm on His deen and not let our hearts deviate after He has guided us. Ameen!
next part tuesday ga yes. kudakoh inthizaaru kolla dhen. 😀 inthizaaru kurumuga ves vaguthu beykaaru nukurahchey sis. vaguthuge beynun veehaaves heyo gothuga hifan vaane. kuraa komme kameh emme furihama ah kureveytho balaathi In Sha Allah. ey Allah sis ah dhevvi niumaiy thakah shukuruveri vumattakai. 🙂 Alhamdhulillah! <3 <3 <3
Maashaa Allah v iburaitheri story eh
Alhamdhulillah! 🙂 <3 Thoo ah faidha eh kuriyya ey libunu ufaleh 😀 faidha eh kuriyya kuraany hama ekani Allah ge iraadhafulhun. hidhaayaiy dhakkavany hama ekani Allah 🙂
Wowww masha Allah hama habeys ingey Mi part ??? varah ufaa vejje Amna fenunima ???? Mi in libey morals as usual varah reethi and inspiring ??? eagerly waiting for the next part ????
Amna fenijjetha? not quite dho? 😀 balamaa vaagotheh In Sha Allah. Alhamdhulillah! 🙂
Jahaa sis surprise eh dheebala..??@?❤❤❤
thihen bunyma jana dheraves vejje. mi hedhi gothun surprise akah ves ummeedhu kureven fashaifi dho? hehe….ekamaku varah hiyey nuvey ingey Yal. So next part hama tuesday ga In Sha Allah 🙂
ماشاء الله ! هذه قصة جميلة.أنا سأنتظر في اليوم الثلاثاء. إنشاء الله
الحمد لله 🙂 انتظر حتى مساء الغد إنشاء الله
Masha allah??vv reethi… nixu kiyan ingey story.. but mi dhuvas kolhuge gothun comment nukureveny…. jana me story vvv reethi… awesome….
Alhamdhulillah! 😀 comment nukuriyas massala eh neh ingey niz 🙂 niz ah faidha eh kuranya e nimuny 🙂
Assalaam’alaikum. next part maadhamaa (tuesday) ge haveeru In Sha Allah 🙂
Alhey moyoh hedhunaa ves ethah faharaku belijje up vejje thw…??
Alhugandu ves mibalanh up veytho hedhunussure…..btw I’m teenage
waiting waiting….
Kobatha story. Waiting…..