ފުރަތަމަ ލޯބި

އެއީ ލޯތްބެވެ. އަހަރެންގެ ފުރަތަމަ ލޯތްބެވެ. ފުރަތަމަ ފަހަރަށް މިހިތުގައި ލޯބީގެ ވިންދެއް ޖަހަންފެށީ އެހިސާބުންނެވެ. އެއީ ފޮނި، އެހެނަސް ހިތި އަސަރުތަކެކެވެ. އަހަރެންގެ ޙަޔާތުގެ ޑައިރީގައި ލިޔެވިފައިވާ، އެހެނަސް އެސަފުޙާތައް އަލުން ބަލުން އިޔާދަ ކުރުމުގެ ބޭނުމެއް ނެތް މާޒީއެވެ.

އޭރު އަހަރެންގެ އުމުރުން ވާނީ ސާދަފަނަރަ ވަރަކަށް އަހަރެވެ.ފުރާވަރުގެ ޖޯޝާ، ޅައުމުރުގެ މަޖަލުގައި އުޅެމުންދިޔަ ދުވަސްވަރެވެ. ސާނަވީ ތަޢުލީމުގެ ފަހު ހަރުފަތްތައް ގިރާކޮށް މައިންބަފައިން ފަޚުރުވެރި ވާނޭފަދަ ދަރިއަކަށް ވުމަށްޓަކައި އަހަރެން ގަދަ އަޅާ މަސައްކަތް ކުރަމުން ދިޔައިމެވެ. ކުޅިވަރާ އިތުރު ޙަރަކާތްތަކުގައި ބައިވެރިވުމަށް އޮތް ބަހަނާ ކަމުގައި އެކަމެއް ނުހަދަމެވެ. މައިންބަފައިންނާ، ޢާއިލާ އަދި އެކުވެރިންގެ ފަރާތުން މެދުކެނޑުމެއްނެތި އެހީތެރިކަމާ އެއްބާރުލުން ލިބެމުން ދިޔައެވެ. އަހަރެންގެ ދިރިއުޅުން ދުވަހެއް ދުވަހަކަށް އުޖާލާ ކުރަމުންނެވެ. ނަމަވެސް އުނިވަމުން ދިޔަ ކަމެއް އޮތެވެ. ހަމަ އެންމެ ކަމެކެވެ. އަހަރެންގެ ދިރިއުޅުން ފުރިހަމަކޮށްދޭނޭ ލޯތްބެކެވެ.

އުމުރުގެ ހަގުކަމާ، އަބަދުވެސް އިވެމުންދާ ލޯބީގެ ޖަޒުބާތީ ވާހަކަތަކުން އަހަރެން އެކަން ތަޖުރިބާ ކޮށްލާނެ ފުރުސަތެއް ލިބުމަށްއެދި އިންތިޒާރުކުރަމުން ދިޔައިމެވެ. ކެތްތެރި ކަމާއެކުއެވެ. ހުވަފެންތަކުގައި ދެކެމުން އައި ޒުވާނާ ޙަޤީޤަތަކަށްވެ އަހަރެންގެ ޙަޔާތަށް އޭނާ އަންނާނެކަމުގެ އެއްމީދުގައެވެ. ބޭނުންވަނީ އަޅާލާނެ، ހިތްހެޔޮ ޒުވާނެކެވެ. އިސްކޮޅުން ދިގު، ހަމުގެ ކުލަ އަލި، ހައިބަތު ހުރި ފިރިހެނެކެވެ. ލޯބީގެ ކުލަ ރީތި އެކި މަންޒަރުތައް ދައްކައިދިނުމުގައި ދެމިހުންނާނޭ ލޯބިވެރިއެކެވެ. ނޫންނަމަ ކޮންމެ އަންހެން ކުއްޖެއްވެސް ‘ލިސްޓް’ގައި އެހިމަނާލާ ސިފަތަކާ ކުޅަދާނަކަން ހުރި ބައިވެރިއެކެވެ.

މިޒަމާނަކީ ސޯޝަލް މީޑިއާއިން މުޅި ދުނިޔެ ގުޅާލާފައިވާ ދުވަސްވަރެއްކަމުން އަހަރެންވެސް އެއާ އަހުލުވެރިވަމުން ދިޔައިމެވެ. ތިމާގެ މީހުންނާ، އެކުވެރިންނާ، ދެންވެސް ދަންނަ މީހުންގެ އިތުރުން ނުދަންނަ  ބީރައްޓެހިންނާވެސް ވާހަކަ ދެކެވި ހީ ސަމާސާ ކުރަމުން ދިޔައިމެވެ. ސޯޝަލް މީޑިއާގެ ‘ބިރުވެރި’ ކަމާމެދު ސަމާލުވުމަށް ދެމުން ދިޔަ ނަޞޭޙަތްތަކަށް އަހަރެން ބީރުކަންފަތެއް ނުދެމެވެ. ޙާލަތާ މުޖުތަމަޢަށް ފެތެމުން، ދިމާވަމުންދިޔަ ތަފާތު މީހުންގެ ގޮތް ފޮތް ދެނެގަންނަމުން ދޔަދިޔުމުގައި ދިމާވީ ނިލާމްއެވެ. އެއީ އަހަރެންގެ އެކުވެރިންގެ ފަރާތުން ކޮންމެވެސް ވަރަކަށް ދަންނަ، އެމީހުންގެ ރައްޓެއްސެކެވެ.

އާދައިގެ މަތިން އަހަރެން އޭނާއާ ވާހަކަ ދައްކަމުން ދިޔައިމެވެ.ނަމަވެސް އޭނާ އަހަރެންނާމެދު ދެކެމުން އައި ގޮތް ތަފާތެވެ. ސީދާ ލޯބި ހުށަހެޅީއެއް ނޫނެވެ. ނަމަވެސް އޭނާއަށް އަހަރެން ކަމުދާންފެށިކަމުގައި ބުނުމީ ދޮގެއް ނޫނެވެ. ކޮންމެއަކަސް އޭނާ އެހާމަ ކުރީ، ސަމާސާއެއްގެ ގޮތުގައި ގިނަ މީހުން ދައްކާ ވާހަކައަކަސް އޭނާގެ ވާހަކައިން ތެދުވެރިކަމުގެ އަސަރު ފެނެއޭ ހިތަށް އަރަމުންދިޔައެވެ. ކީއްވެ ކަމެއް ނޭނގުނެވެ.އެހެނަސް، ބައެއްފަހަރަށް އޭނާގެ ވާހަކަ ޤަބޫލުކުރަން ހިތަށް އަރާ ކަމާމެދުވެސް މޮޔަ ހީވެ، އޭނާއާމެދު ޝައްކާ ވަހުމު އުފެއްދީމެވެ. އަހަރެންގެ ކިބައިގައި ވަކި ހުރީ ފިރިހެނަކު ހިތްކިޔާފަދަ ކޮން ސިފައެއްބާއޭ ހިތާހިތާ ސުވާލުކުރީމެވެ. އަހަންނަކީ ލޫޅާފަތި، ހިމަތޮޅި ހަށިގަނޑެއްގެ ވެރިއެއް ނޫނެވެ. ޖަންބު ކުލައަރާ ކޯތާފަތެއްގެ ވެރި، ދޮން ބައްޓެއްވެސް ނޫނެވެ. އެކަމަކު މީހަކު އަހަރެން ހުތުރޭ ބުނެފިނަމަ އެކަން އޮތީ އެގޮތަށްކަމަށްވެސް ޤަބޫލެއް ނުމެކުރާނަމެވެ. އަހަރެންގެ ނަޒަރުގައި އަހަރެން ރީއްޗެވެ. އެކަމަކު އޭނާއަށް ފެނުނީ ކޮންރީތިކަމެއް ބާވައެވެ؟ މީގެ ޖަވާބު އަދިއަދަށް ދާންދެންވެސް ނޭނގެއެވެ.

އޭނާގެ ވާހަކަ އަހަރެން ކަނުލާ އަޑު އަހަމުން ދިޔައިރުވެސް އޭނާއަށް އެކަމެއް ނުދައްކަމެވެ. އޭނާއަށް ދެލޯ ފާރަލައި ބަލަމުން ދިޔަނަމަވެސް ފެނިދެނިވެ، ދިމާވާން ބޭނުމެއް ނޫނޭ ބުނީމެވެ. އަހަރެންގެ ހިތް ވަށައި އޭނާ މުގޯލި އަޅަމުން ދިޔައިރު، އެލޯބީގައި ޖެހެވެމުން ދިޔަކަން އޭރު ކުޑަކޮށްވެސް ނުދައްކަމެވެ. ފޫހިވެގެން ދާން ދޫކޮށްލީއެވެ. އަހަރެންގެ އިހުސާސުތަކާމެދު ޔަޤީންކަން ނެތުމާވެސް އެކުގައެވެ. އެއީ ތެދުވެރި ލޯބިކަން ކަށަވަރު ނުވާތީ، ބޭކާރު ގޮތުގައި ނިލާމްއަށް ދެރައެއް ދޭން ބޭނުން ނެތީމައެވެ. އަހަރެން ކުރިމަތިލާންއޮތް ތަޤުދީރުގެ މޮޅު ރޭވުންގަނޑުގެ ހިލަމެއް ވެފައިވެސް ނުވާތީއެވެ. ނިލާމް އެއީ އަހަރެންގެ ފުރަތަމަ އަދި އެންމެ ފަހުގެ ލޯބި ކަމުގައި ވާނެ ބާވައެވެ؟  ނުވަތަ އަހަރެން އެދިއެދި ހުރި ފުރުޞަތު ދޮރުގައި ޓަކިދިން އިރު އެކަމަށް ފުރަގަސް ދިނުން މިއީ އަހަންނަށް އެޅުނު ޅައެއްޗެއްބާވައެވެ؟

(ނުނިމޭ)

.