އުޅެން އުމުރަށް ލޯބިން އެކީ… 1

       ތަޤުދީރު ތިމާ ގޮަވައިގެން ދާ މަންޒިލެއް ދެކެން، ދެއަތުކުރި އޮޅައި ލައިގެން ހުރެވިއްޖެ ނަމަ، ލިބިދާނެ ދެރަ މިއަދު އަހަންނަށް އިހުސާސުވެއެވެ. އެދުވަހު އަހަރެންގެ މި ނިކަމެތި ހިތަށް ބާރުފޯރުވުނު ނަމަ މިއަދު އަހަރެންގެ ޙަޔާތަށް މިފަދަ ވިއްސާރައަކާއި ކުރިމަތިލާން ނުޖެހުނީސް އެވެ. ވެހެމުން ދިޔަ ބޯވާރޭގެ ތެރެއިން އަހަރެން މަޑުމަޑުން ހިނގާލާފައި އައީ އެވިސް ނުމުގައި ހުރެގެންނެވެ. މާޒީގެ ދުވަސްތަށް އަހަރެންގެ ހިތަށް އިރުއިރުކޮޅާއި ހޫނުފެން އަޅާލާފަދައެވެ. އެދުވަސްތަށް ސިކުނޑިއަށް ތަސައްވުރު ކޮއްލެވުނަސް އަހަރެންގެ ހިތް ބާރަށް ތެޅެން ފަށައެވެ. ދެލޮލުން ކަރުނަ ފާއްދާލައެވެ. ބަޑިބަޑި ލާފައި ރޮއެގަނެވެއެވެ.

       ވަކިހިސާބަކަށް ދެވުނުތަނާ އަހަރެންގެ ފައިން ވަރުދޫވާން ފެށިއެވެ. އެއާއެކު މަގުގެ އެއްފަރާތެއްގައި ހުރު ބިޔަ ކާނިގިސް ދޮށަށް އަހަރެންތިރިވިއެވެ. އޭރުވެސް އަހަރެންގެ ދެލޮލުން އޮހެރެމުން ދިޔަ ކަރުނައަކަށް ހުއްޓުމެއްނާދެއެވެ. ހިތް އަދިވެސް އެދެމުން ދިޔައީ އިތުރަށް ރޯލާށެވެ. ދެއަތުގެ ނުފުށުން ކަރުނަތަށް ފޮހެލަމުން އަހަރެން ތެދުވަން މަސައްކަތް ކުރީމެވެ. އެކަމެއް ނުވިއެވެ. ގަހުގައި ވިއްދާލިއަތް ކައްސާލައިގެން ދިޔުމުން އަނެއްކާވެސް އެގަސް ދޮށަށް އަހަރެން ތިރިވީއެވެ. ދެންއިތުރަށް ތެދުވަން މަސައްކަތް ކުރާނެހާ ހިތްވަރެއް ނެތުމުން އަހަރެން ހަމަޖެހިލައިގެން އެތާ އިށީނދެލީމެވެ.

       ސްކޫލު ދައުރުނިމިގެން ދިޔައީ އަހަރެންގެ ނަން މުޅި ދޭހުގައި ރޯޝަން ކުރުވަމުންނެވެ. އޭލެވެލް އިން ދުނިޔޭގެ ފެންވަރުގެ ކާމިޔާބީ ތަކާއިއެކު އަހަރެން އެރޭ ގެއައަށް ދިޔައީ އުފަލުން ފޮޅިލަމުންނެވެ. ލިބުނު ކާމިޔާބީގެ އުފާ އަހަރެންގެ މުޅިއާއިލާއިން ނުހަނު ކުލަގަދަކޮށް ފާހަނގަ  ކުރިއެވެ. އަހަރެންގެ އުފަލުގައި އެއްވެސް ހިތްބުރަކަމެއްނެތި ހުރިހާ އެކުވެރިންވެސް ބައިވެރިވިއެވެ. އެންމެންގެ ހިތްތަކުންވެސް އަހަރެންގެ ފަހި މުސްތަޤުބަލަކަށް އެރޭ ދުޢާ ކުރަމުން ދިޔައެވެ. ސަރުކާރުގެ ފަރާތުން ލިބުނު ފުރުސަތެއްގައި އަހަރެން އިރުތަށް ތަޢުލީމު އުނގެނުމަށް މެލޭޝިޔާއަށް ދަތުރުފެށީމެވެ. އާއިލާއާއި އެކުވެރިން ދޫކޮށް އެކަނިމާއެކަނި އެވެ. ދަންނަމީހެއް އެކުވެރިއެއްނެތް އެމާޙަޢުލާއިމެދު އަހަރެން އެހާ ބޮޑަކަށް ޖެހިލުމެއް ނުވެއެވެ. ބޭނުން ވީހާވެސް ކަމަކީ ޑޮކްޓަރަކަށް ވުމަށް ދެކެމުން އައި ހުވަފެންތަށް ހަގީގަތަކަށް ހެދުމެވެ.

        ކޯހުގެ ފުރަތަމަ އެއްއަހަރު ދުވަހު އާއިލާއާއި ގާތުގައި ނެތުމުން ދަތިވިއެވެ. ދެވަނައަހަރާއި ކުރިމަތިވިއިރު އަހަރެންގެ ހިތާއި ސިކުނޑިވަނީ އެކަމަށް ހޭނިފައެވެ. ދޭތެރެދޭތެރެއިން މަންމަ އަހަންނަށް ގުޅައެވެ. އަހަރެންގެ ޚަބަރު އޮޅުން ފިލުވައެވެ. ކިޔެވުން ކުރިޔަށް ދާގޮތް ބަލައިހަދައެވެ. ބައްޕަވެސް ކޮންމެ ދެމަހުން އެއްމަހު އަހަރެންގެ ގާތަށް އާދެއެވެ. އަހަރެންގެ ދުނިޔެ އޭރު ކިތަންމެހާވެސް ފުރިހަމައެވެ. ތާއަބަދު އަހަރެންގެ މޫނުމައްޗަށް އޭރު ވެރިވެފަިއ ހުންނަނީ ހިނިތުންވުމެކެވެ. ވަށައިގެން އޭރުވަނީ އުފާވެރިކަމެވެ. އެއްވެސް އެއްޗެއްގެ އުނިކަމެއް ނުވެއެވެ. އެހާވެސް ފުރިހަމައެވެ.

       ކޯހުގެ ކިޔެވުން ނިމި އަހަރެން އެނބުރި މާލެއައީ އަހަރެންގެ ހުވަފެންތަށް ހަގީގަތަކަށް ހެދުމަށް ފަހުއެވެ. އާއިލާގެ ހުރިހާމެންބަރުންވެސް ތިބީ އުފަލުން ފުރިފައެވެ. އަަހަރެންގެ ކާމިޔާބީއަށް ފަޙުރުވެރިވެފައެވެ. މާލެއައިތާ ތިންވަނައަށް ވީދުވަހު އަހަންނަށް ވަޒީފާ ހަމަޖެހުނެވެ. ހުޅުމީދޫ ހެލްތު ސެންޓަރުން  ވަޒީފާ ހޯދީ ގަސްތުގައެވެ. މާލޭގެ ހަލަބޮލި ކަމަށް ވުރެން އެފަދަ ހިތްގައިމު ރަށެއްގެ ހަމަހިމޭންކަމަށް ހިތް ގޮވަމުން ދިޔަވަރުންނެވެ. އަހަރެންގެ ނިންމުނަށް އާއިލާއިން އާބަސް ބުނީ ހިނިތުންވެފައެވެ. ދުވަހަކުވެސް އަހަރެންގެ ނިންމުމަކަށް އިންކާރު ކޮއްފައި ނުވާތީ ކަމަށް ވުން އެކަށީގެން ވެއެވެ.

       އާބާދީގެ ގޮތުން ބަލާނަމަ މަދު ރައްޔިތެއް ދިރިއުޅޭ އެރަށުން އަހަންނަށް ނުހަނު ހިތްހަމަޖެހުން ލިބެމުން ދިޔައެވެ. މީހުންގެ ޤަދަރާއި ލޯބި ދިޔައީ އޮހެމުންނެވެ. މަދުމަދުން ނަމަވެސް ހިތްހަމަ ނުޖެހޭ ކަންތަކާއި ދިމާވެއެވެ. ދުނިޔެ ތޮށަލިދުޅައަށް ހިނގަނީނަމަ އެހެން ނުވާންވީ ސަބަބެއް ނެތެވެ. ދުވާލުގެ އިރު އެރުމަށްފަހު އެތަކެއް ބަލިމީހުންނަކަށް އަހަރެންގެ ގެ ފަރާތުން އެހީތެރިކަން ލިބެމުން ދިޔައެވެ. އޭގެތެރޭގައި ހާއްސަވެގެންދާ ބައެއްބަލިމިހުންވެސް ތބެއެވެ. ބައެއްފަހަރު އެމީހުންގެ މިޒާޖުގެގޮތުން ގާތްކަމެއް ދެމެދުގައި އުފެދޭގޮތްވެއެވެ. އެހެންނޫންނަމަ ތަކުރާރުކޮށް ދިމާވުން އެދެމެދުގައި ގާތް ގުޅުމެއް އުފެދެން މެދުވެރިވެއެވެ.

    އަޔާޒްއާއި ދިމާވީވެސް އެފަދަގޮތަކަށެވެ. އަހަންނަށް ނޭގިހުއްޓައި އަޔާޒްދެކެ ލޯބިވެވުނީވެސް އެސަބަބު މެދުވެރިވުމުންނެވެ.  އަޔާޒް އާއި އަހަންނާއި ބައްދަލުވިއިރު އެކްސިޑެންޓެއްގައި ލިބުނުގެއްލުމެއްގެ ސަބަބުން އޭނާއަށް ވަނީ ހިނގުމުން މަހުރޫމު ވާންޖެހިފައެވެ. ބަލިއެނދުގައި އަބަދުހެން ރެއާދުވާލު އެކަނިމާއެކަނި އޭނާ އޮންނަތަން އަހަރެން ވަރަށް ގާތުން ދެކެމެވެ. ހިތުގައި އަބަދުވެސް ތަފާތު ސުވާލުތަށް އުފެދެއެވެ. އޭނާގެ އާއިލާ ކޮބާބާއެވެ..؟އެކުވެރިން ނެތީހެއްޔެވެ؟ ޒިޔާރަތް ކޮއްލަންވެސް އަންނާނެ މީހަކުނެތީބާއެވެ..؟

ނުނިމޭ