‘ސިކް’

ސިއްސައިގެން ދިޔައީ ފައިގެ ބޮޑުވާ އިނގިލި ތެޅިގަތީމައެވެ. ހަންގަޑު ދޫވެ ނާރުއަރާ ދެއަތަށް ގަދަޔަށް ހޫރެނީއެވެ. ނިޔަފަތިގަނޑު ނުލާހިކު ގަދަ ހުދުކުލަޔަކަށް ބަދަލުވިއެވެ. ނިޔަރޮދި ބޭރަށް ނިކުންނަން ފެށިއެވެ. އެއަށްވުރެ ތިރިން ފަޅާފައިހުރި ދެތިން ލޯލި ދިގުވެ ބޯވެ ކަޅުވާން ފެށިއެވެ. ދެފަރާތަށް ގިނަވެފަ ހުރިހަންތަކުން އުފެދެންފެށީ ކަރުންމަތީގެ ގުނަވަނެއްގެ ސިފައެވެ. ހުދުކަން ގަދަވަމުން ދިޔަ ނިޔަފަތި ދެބަޔަށް ބެހެން ފެށިއެވެ. ވަށްކޮށް އަނެއްކާވެސް އެއްކަހަލަ ދެގުނަވަން އުފެދިގެން ދިޔައެވެ. ނިޔަރޮދި ދެބައިވެއްޖެއެވެ. މެދުތެރެއިން ނިޔަފަތީގެ ހުދުކަން ދެބަޔަކަށް ފެނެއެވެ. އެތެރެއިން ކުޑަ ކަޅު ތިއްކެކެވެ. އެއިރުވެސް އެ ބޮޑުވާ އިނގިލި ހަމަ ތެޅެނީއެވެ.
ތެޅުން މައިތިރިވިއިރު ކުރިމަތީގައި އިނީ ބޮލުގައި ފަތްގޮސްފައިވާ ތުނބުޅި ދިގު، މޫނަށް ރޫއަރާފައިވާ، މަސްނޫއީ ދަތްޕިލައެއް އަނގައަށް ލައިގެން އިން މުސްކުޅި ފިރިހެނެއްގެ ކަރުން މައްޗެވެ.
އެވަރުގެ މީހުންގެ އާދައިގެ މަތިން ‘ކޮއްކޯ’ އޭ ކިޔައި ގޮވާލިއެވެ.
އަހަރެން ޖަވާބެއް ނުދެމެވެ.
އޭނާ ފެށިއެވެ.
” ކޮށްކޮއަށް ޗޮކްލެޓް މީރުތަ؟ ” އިރުކޮޅަކު ދެދަތްޕިލަ ދައްކައިގެން އިނުމަށްފަހު އަނެއްކާވެސް ފެށީއެވެ.
” ގަލްފުގަ އަހަރެން އުޅުނުއިރު، އުޅުނީވާ ބޯޓެއްގަ. އެބޯޓުގަ ކޮއްކޮމެން ތިކާ ޗޮކްލެޓް އޮލަ ޖެހެންދެން ހުންނާނެ. މިމުޅި މާލެވަރުގެ ބޮޑުތަނެއް އެބޯޓުގަ ހުންނާނެ ހަމަ ހުސް ޗޮކުލެޓުން ފުރާފަ. ހަމަ ހުސް ޗޮކްލެޓް. ޗޮކްލެޓް މަތީގަ ނަށަންވީ. ޗޮކްލެޓް ތެރޭގައި ފީނަންވީ. ޗޮކްލެޓްތެރެއަށް އެރެންވީ. ޗޮކްލެޓް. ޗޮކްލެޓް. ”
އޭނާ ދެންފެށީ ހޭށެވެ. ވަރަށްވެސް ބާރަށެވެ. އަހަރެން ރުޅި ގަދަވާން ފެށިއެވެ. މުޅި ހަށިގަނޑު ކުރުގެޅޭން ފެށިއެވެ. ކަންފަތުގައި އަތްއަޅައި ބަންދުކުރީމެވެ. ލޯމަރައި ފިއްތީމެވެ. އޭނާގެ ހުނުމުގެ އަޑު ކެނޑުނުހެން ހީވިއެވެ.
ލޯހުޅުވާލީމެވެ. ކަމަކުދާކަށްނެތެވެ. ކުރިމަތީގަ އޭނަ އަދިވެސް އެބައިނެވެ.
“ކޮއްކޯ. މަތިންދާ ބޯޓު ދުއްވާނަންތަ. ވަރަށް ބޮޑު މަތިންދާބޯޓެއް ދުއްވާނަންތަ. ހިނގާ ބޭބެޔާއެކު މަތިންދާ ބޯޓުދުއްވަން. މަތިމަތިން ވިލާގަނޑުމަތިން. މުޅި ދުނިޔޭގެ ހުރިހާތަނަކަށް އޭގަ ދެވޭނެ. ބޭނުންތަ ދުއްވަން. ” އޭނަ އަނެއްކާވެސް ފެށިއެވެ. ހަމަ އެ މުސްކުޅި އަޑުންނެވެ.
އަހަރެންގެ ރުޅި އިންތިހާއަށް ގޮއްސިއެވެ. ދެފަރާތަށް ބަލާލިއިރު ކޮޓަރީ ކަނުގައި އޮތީ އަހަރުމެންބޭނުންކުރާ ވަޅިއެވެ. ބަލާކަން ނީނދެ ނަގާ އޭނަގެ ކަރު ބުރިކޮށްލަން އަތް ގެންދިޔަ ވަގުތު ، ކުއްލިޔަކަށް ސިއްސައިގެން ދިޔައީ މޯޑު މަގޭ އަތުގައި ހިފާ ދަމާގަތީމައެވެ.
“އޭ ބުރޯ. ކައޭ އޯކޭތަ؟”
އަހަރެން މޯޑުގެ މޫނަށް ބަލާލީމެވެ. އޭނަ އިނީ ހައިރާންވެފައެވެ. އޭނަގެ އަތުގައި ދެންމެ އޭނަނަގަން ދިޔަ ‘އެތި’ އޮތެވެ. އެއްކަލަ މުސްކުޅި މީހާ އަށް އެނބުރި ބަލާލިއިރު އޭނައެއްނެތެވެ.
މޯޑަށް ބަލާލާފަ ކުޑަކޮށް ހީލަންކަމަށް ތުންފަތް ދެފަރާތަށް ދަމާލާފައި ‘އެތި’ އަތުލައި ނިޔުޅާލީމެވެ. ‘ސިކު’ ފިލުވާލުމަށް އަވަސްވެގަތީމެވެ.