އަހަރެންނަކީ ޚިދުމަތްތެރި އަކީމެވެ.

އިސްމާޢީލް ޢަލީ ކަނދޮޅުދޫ

އަހަރެންނަކީ އިންސާނުންނަށް ބޭނުންތެރި އެއްޗަކަށް ވާތީ ވަރަށް ބޮޑަށް އުފާ ކުރަމެވެ.އަހަރެންގެ ބަދަހި ޢާއިލާގައި ތަފާތު ސައިޒުގެ އެކިކުލައިގެ އެކިބައްޓަމުގެ މެމްބަރުން ހިމެނެއެވެ. އަހަރެންގެ ޢާއިލާގެ ބޮޑެތި މީހުންނަށްވެސް ތިޔަބައިމީހުން ކިޔައި އުޅެނީ ކުޑައެވެ.މިހެން މިބުނެލީ ތިޔަބައި މީހުންގެ މުއްސަނދި ބަހުގައި އެއް ލަފްޒުން ތަފާތުމާނަ ދޭހަވާކަން ނޭގޭތީއެއްނޫނެވެ. ހަމަ މަޖާ ކޮށްލީއެވެ.

ތަންކޮޅެއްކުރީ ޒަމާނުގައި އަހަރެންގެ ބޭނުން ހިފާނީ ޚާއްސަ ބައެކެވެ. އެއިރު އަހަރެން ހުންނަނީ ވަރަށް ފޮނިވެފައެވެ. ނިކަމެއްޗަކާއި ދިމާއަށް ބަލާވެސް ނުލަމެވެ.ނިކަމެތިން މަތީން ހަނދާނެއްވެސް ނުވެއެވެ.މިއަދު ޒަމާން ބަދަލު ވެއްޖެއެވެ.ހުރިހާއެންމެންވެސް އަހަރެންގެ ބޭނުން ހިފައެވެ.އަދިމިހާރަކަށް އައިސް އަހަރެންގެ ބޭނުން ނުހިފާ މީހުން އުޅެއެވެ.އެއީ ދުނިޔޭގެ އުސޫލުދޯއެވެ.

އަހަރެން މިއީ އިންސާނުންނަށް ވާ ރައްކާތެރި ކަމުގެ ގެއެއް ފަދަ އެއްޗެކެވެ.ވާރޭ ވެހޭއިރު އަހަރެންގެ ބޭނުން ހިފައިގެން ތަންތަނަށް ދެވެއެވެ. އިރުގެ ގަދަ ހޫނުން ސަލާމަތް ކޮށްދެމެވެ. ހުރިހާ ޢުމުރެއްގެ މީހުންނަށް ބޭނުން ހިފެއެވެ.އަހަރެންގެ ޚިދުމަތަށް އެދުމުން މޫނުކުނިކޮށެއް ނުހަދަމެވެ.އޭގެ ބަދަލުގައި ފަރިވި ފިނިފެންމަލެއްހެން ފޮޅެމެވެ.ޚިދުމަތް ލިބިގަތްމީހާވެސް ސަހަލައެއް ނޫނެވެ.އަހަރެންގެ ގައިގާ ފިރުމާވަރުން ލޯލިތައް ކޮޅަށްޖެހެއެވެ.މިއީ އަޅެ ރިވެތި އުސޫލެއްހެން ހިއެއްނުވޭ ހެއްޔެވެ؟.

ބައެއް ޒުވާން ޖޯޑުތައް އަހަރެންގެ ބޭނުން ނާޖާއިޒް ގޮތުގއި ހިފާތީ ވަރަށް ދެރަވަމެވެ.މިބުނާ އެއްޗެއް ވިސްނިއްޖެދޯއެވެ.ހަމަގައިމުވެސް އެކަންކުރާ ޒުވާނުންނަށް އެނގޭނެތާއެވެ.އެއްވެސްމީހަކު ފާފައެއްކުރާއިރު ޙިމާޔަތް ދޭކަށް އަހަރެން ބޭނުމެއްނުވެއެވެ.