މާފްކުރާށޭ ކަލާ 10

ކަލޭ މޮޔަވީތަ އަނެއްކާ؟” ފާލިހްގެ ބޮޑުވެފައިވާ ދެލޮލާއި ތަންމިނަށް ހުޅުވިފައިވާ އަނގަ ފެނިފައި އަޔާން ފާލިހްގެ ކޮނޑުގައި ހިފައި ތަޅުވައިގަތެވެ.
“ނިކަން ބަލާބަލަ އެއޮށް ކަމެއް؟” ފާލިހް އެހެން ބުނުމާއެކު ފަހަތަށް އެނބުރި އަޔާންއަށް ބަލާލެވުނެވެ.
އަޔާންގެ ނިއްކުރިއަށް އެރި ރޫތަކާއެކު އަނގަ ހުޅުވައިލެވުނުވެ. އެހަމަ މީތަން ބާއެވެ. ކަޅު އަތްދިގު ގަމީހަކާއި މެރޫން ކުލައިގެ ސްކާޓެއް ލައިގެން ހުރިއިރު މީތަންގެ ލޮލުގައި އޮންނަ ކަޓު އައިނުގަނޑެއްވެސް ނެތެވެ. އިސްތަށިގަނޑު އެއްކޮށް މައްޗަށް ނަގައި ހުޅިއެއް ޖަހާފައިވާއިރު ނިތްކުރި މައްޗަށް ކުޑަ އިސްތަށިކޮޅެއް ވައްޓާލާފައި އޮތެވެ. މީތަންގެ ބޮޑު ތުންފަތް ރަތް ކުލައިން ފަވާލާފައި ވާއިރު އޭނާގެ ރީތިކަމާއި ފަރިކަން އިންތިހާއެވެ.

މަޑުހިނގުމެއްގައި އިސްޖަހައިގެން ހުރެ މީތަން އޮފީހަށް ގޮސް ވަތްއިރުވެސް އަޔާންއަށް ހުރެވުނީ ބަލާށެވެ.

“އެހެމް..ހާދަ ވަރެއްތިވަނީ.” ފާލިހް ކަރުކެހިލަމުން އަޔާންގެ ކޮނޑަށް އަތްވައްޓާލިއެވެ.

އަޔާން ނޫންކަމަށް ހެދެމުން ފާލިހްގެ އަތް ދުރުކޮށްލިއެވެ.

“އަސްލުވެސް މަށަށްވެސް މިތަނަށް އަސަރުކޮށްފި. އެކަމަކު ކީއްކުރާނީ. ސިންގަލް ނަމަތާ؟” ފާލިހް އޭނާގެ މޭގައި ފިރުމާލަމުން ހީނގަތެވެ.

“އަންހެނުންނެއްނު. އެކަހަލަ ދަޅަ ދައްކާނެ.” އަޔާން މިހާރު އަންހެނުންނަށް ނަފްރަތު ކުރެއެވެ. ނުހާ އޭނައަށް ދިން ރަނގަޅު ފިލާވަޅު އަޔާންގެ މުޅި ވިސްނުން ބަދަލުކޮށްލާފައިވާ ކަހަލައެވެ. އަޔާންގެ އަޑުގައި ހުރި ސީރިއަސް ކަމުން ފާލިހް އިތުރު އެއްޗެއް ނުބުނެ އަޔާންގެ ފަހަތުން އޮފީސް ތެރެއަށް ވަންނަން ހިނގައިގަތެވެ.

“މިފައިލް ޗެކް ކޮށްލަންވީނު.” މީތަންގެ އަޑަށް އަޔާން މާބޮޑު ސަމާލުކަމެއް ނުދިނެވެ.

“ބާއްވަފަ ދޭ.” އަޔާން އިނީ މީތަން އަށް ފުރަގަސްދީގެންނެވެ. އަޔާންގެ ރާގު ހުރިގޮތުން މީތަންގެ ހިތުގައި ޖެހުނެވެ. އޭނައާއި އެހާ ސަމާސާ ކުރި މީހަކަށް ކުއްލިއަކަށްވީ ކީއްތޯ ބަލަން މީތަން ބޭނުންވިއެވެ.

“ކޮބާ ނުހާ. ރަނގަޅުތަ؟” މީތަން ބޭނުންވީ ކޮންމެވެސް ވާހަކައެއް އަޔާންއާ ދައްކަމުން ވީގޮތެއް އޮޅުންފިލުވާށެވެ.

“ކިހާ ދެރަކަމެއްތަ؟ އައި އޭމް ޔުއަރ ބޮސް. ޝޯ ސަމް ރެސްޕެކްޓް. އެންޑް މައިންޑް ޔޯރ އޯން ބިޒްނަސް.” އަޔާން ގޮނޑި އަނބުރާލަމުން ހަރުކަށި ބަސްތަކަކުން މީތަންގެ ހިތަށް ތަދު ކޮށްލިއެވެ.

މީތަންއަށް ރޮވެން ކައިރި ވުމުން އޭނާ ދުއްވައިގަތީ ކެބިން އިން ނިކުންނާށެވެ. އަޔާންއަށް ވީ ދެރައިން މުށް ކަވާފައި މޭޒުގައި ޖެހުނެވެ. އޭނާއަށް ކަންތައް ކުރެވުނުގޮތް ރަނގަޅު ނޫންކަން އޭނާއަށް އެނގެއެވެ. އެގޮތަށް ވާހަކަދެއްކުނީވެސް ގަސްތުގައެއް ނޫނެވެ. އެކަމަކު މާފަށް އެދެން ދާންވެސް އަޔާން ބޭނުމެއްނުވިއެވެ.

“އަޔާން ހިނގާ ސައިބޯން ދަމާ.” ފާލިހް އަޔާންގެ ކެބިންގެ ދޮރުހުޅުވާލަމުން އެތެރެއަށް ބޯދިއްކޮށްލިއެވެ. އަޔާން ބޯ ޖަހާލަމުން ގޮނޑިން ތެދުވީ ބަނޑުހައިވެގެން ސައިބޯންދާން ބޭނުންވެގެނެއް ނޫނެވެ. ފާލިހްއާ ވާހަކަ ދައްކާލާ ސިކުނޑި ހަމަ ޖައްސާލުމުގެ ބޭނުމުގައެވެ.

ސީހައުސްގައި ތައްޔާރުކުރާ މީރު ކާއެއްޗެހީގެ ވަސް މުޅި ކެންޓީން ތެރޭގައިވަނީ ހިފާފައެވެ.

“ހޫމް. މިހާރުވެސް ބަނޑުފުރިއްޖެ. އަޔާންގެ ބައްޕަ، ސީހައުސްގެ ތަނެއް މިތާގައި ހުޅުވަން ނިންމިކަން ހާދަ ރަނގަޅޭ.” ނޭފަތް އެތެރެއަށް ދަމަމުން ފާލިހް ބަނޑުގައި އަތްހާކާލިއެވެ. އަޔާންއަކަށް އެއަޑެއް އިވުނު ހެނެއް ހިޔެއްނުވެއެވެ. އޭނާގެ ނަޒަރު ހުއްޓިފައިވަނީ މާދުރުގައި ހުރި މޭޒެއްގައި އިސްޖަހައިގެން އިން މީތަން އަށެވެ. މީތަން ގެ ރަތްވެފައިވާ މޫނުން އޭނާ އެހުރީ ވަރަށް ރޮއެފައިކަން އެނގެއެވެ. ކުއްލިއަކަށް މީތަން އިސްއުފުލާލުމާއެކު އަޔާން އަވަސް އަވަހަށް ދުރަށް މޫނު އަނބުރާލިއެވެ. އެކަމާއި މީތަން ފަރުވާލެއް ނުބަހައްޓާ އެތަނުން ނިކުނަން ހިނގައިގަތެވެ. އަޔާން ހުންނަ ތަނެއްގައިވެސް އޭނާ މިހާރު ހުންނަން ބޭނުން ނުވާ ކަހަލައެވެ.

މެންދުރުގެ ހޫނުން މުޅި ދުނިޔެ އަނދަމުން ދިޔައިރުވެސް މަލަކާ އޮތީ ގަދަ ނިދީގައެވެ. އެއްވެސް ޚިޔާލެއް ފިކުރެއްނެތި މުޅިހަށިގަނޑު ދަމާލައިގެން މަލަކާ ނިދާފައި އޮތް އިރު ކައިރީގައި އިތުރު މީހެއް ހުރިކަމުގެ އިޙްސާސްވެސް އޭނާއަށް ނުވެއެވެ. އެމީހާ މަލަކާ ގެ ކައިރީގައި އެނދުގައި އިށީނދެލީ ވަރަށް މަޑުންނެވެ. ހީވަނީ މަލަކާ ހޭލަފާނެތީ ބިރުން އުޅުނު ހެންނެވެ. އަތުގައި އޮތް ކުޑަ ފުޅިއެއް ނަގާ މަތި ހުޅުވާލަމުން އެމީހާ ތެދުވެ މަލަކާއާ ދިމާއަށް ގުދުވެލިއެވެ. އެފުޅީގައި ހުރި ކުދިކުދި ފަނިތަކުން ފަންޏެއް މަލަކާގެ ކޯމައްޗަށް ވެއްޓުމާއެކު މަލަކާ އަތުން ފޮޅާލިއެވެ. ބިރުން ހަދާނެ ގޮތް ހުސްވެގެން ކައިރީގައި ހުރި މީހާ ދުއްވައިގަތެވެ. މަލަކާގެ ނަސީބު ކަން ނޭނގެއެވެ. ނަމަވެސް މަލަކާ ހެއެއް ނުލައެވެ. ހަމައެކަނި ފަނި ވެއްޓުނު ވަގުތު ވީ ފިނިކަމުގެ އިޙްސާސްއަކުން މަލަކާއަށް ހަރަކާތް ކޮށްލެވުނީއެވެ.

އޮފީހުގެ މަސައްކަތުގައި އަޔާން އަވަދިނެތި އުޅުނު ކަމުގައިވިޔަސް އަޔާން ގެ ބޮލުގައި ރިއްސައެވެ. ނުހާގެ އެކިއެކި ހަނދާންތައް އިރުއިރުކޮޅާއި އަޔާން ގެ ހިތާއި ކުޅެލައެވެ. ނަމަވެސް އަޔާން ހިތްވަރު އެލުވާލާކަށް ބޭނުމެއްނުވެއެވެ.

“ދަރިފުޅު. ހާދަ ބުރަކޮށްލައިގެން.” އާސިފް ހުރީ އުފާވެފައެވެ. އަބަދުވެސް އެންމެ ދެކެން ބޭނުންވާ ދުވަސް ލޯމައްޗަށް ފެންނަމުންދާތީ އާސިފް ހުރީ ހިތްހަމަޖެހިފައެވެ.

“ނޮޓް ސޯ ބިޒީ. އެބަ ޖެހޭ އިތުރު ދެމީހަކު އޮފީހަށް ވައްދަން. އޯކޭ އެކަކުވިޔަސް.” އަޔާން ވާހަކަދެއްކީ އިސްޖަހައިގެން ހުރެއެވެ. އާސިފްގެ ފަހަތުގައި ނުހާ ހުރިކަން ނުބެލިޔަސް އަޔާންއަށް އެނގެއެވެ. ނޭފަތުގައި ޖެހެމުންދިޔަ ސެންޓްގެ ވަހުންނެވެ.

“ދަރިފުޅަށް ފެންނަ ގޮތަކަށް ކުރިއަށް ގެންދޭ. ފުރަތަމަ އިއުލާން ކުރަންދޯ ޖެހޭނީ. ނުހާ ދެތަށި ކޮފީ ހަދާލަބަލަ.” އާސިފް ގޮޑި ދަމާލަމުން އިށީނދެލިއެވެ.

“ކޮފީ ދެންމެ މިބުއީ. ޑޭޑް ބޯލަންވީނު.” އަޔާން ވަގުތުން މަނާ ކުރިއެވެ. ނުހާ އަތުން ލިބޭ ކޮންމެ އެއްޗަކީ މިއަދު އަޔާން އަށް ޒަހަރެއް ކަހަލައެވެ. އަޔާން ގެ ވާހަކައިން ނުހާ ގެ ގާތަށް ރުޅިއައެވެ.

“އާސިފް. ހިނގާބަލަ ކެންޓީނަށް އެއްޗެއް ކާލަން. ވަރަށް ބަނޑުހައި.” ނުހާ ގެ އަޑުގައިހުރީ އިންތިހާ ދަރަޖައިގެ ތުއި ކަމެވެ. އަނެއްކާވެސް ނުހާ ދީފައި އެދަނީ އަޔާންގެ ފާރުވެފައިވާ ހިތަށް އިތުރު ޒަހަމް ތަކެކެވެ. އަތުގައި އޮތް ގަލަމަށް ހުރިހާ ބާރެއް ދައްކާލަމުން އަޔާން ދެލޯ މަރާލިއެވެ.

“މިހާރު ނުވާނެ ނުކައި ހުންނާކަށް. ދެމީހުންނަށް ވާވަރަށް ކާންވާނެ.” ދަމުން އާސިފް ނުހާއަށް ބުނެލި ޖުމްލައިން އަޔާންގެ މެރިފައިވާ ދެލޯ ހުޅުވުނީ އެއްވެސް އިޚްތިޔާރަކާ ނުލައެވެ. ނުހާ ވިހަ ހިނިތުންވުމެއް ވެރިކުރުވައިގެން ކަތި ނަޒަރުން އަޔާންއަށް ބަލާލިއެވެ. އަޔާން ގެ ބޮޑުވެފައިވާ ދެލޯ ފެނުމުން ނުހާ ގެ ހިތަށް ފިނިވެގެން ދިޔައެވެ. އަމިއްލަ ކުށް ފޮރުވަން އަނެއްކާވެސް މޮޅު ޕްލޭންއެއް އޭނާ ރާވަމުންދާ ކަހަލައެވެ.

ހަވީރުވަމުން ދިޔައިރު ދުނިޔެ މައްޗަށްވަނީ މާބޮޑަށްވެސް އަނދިރިކަން ވެރިވެފައެވެ. އުޑުމަތީގައިވާ ކަޅު ބޯވިލާތަކުން ހީވަނީ ދެންމެ ދެންމެ ވާރޭ އޮއްސާލަފާނެ ހެންނެވެ. މީތަން އަވަސް އަވަހަށް މޭޒުމަތި ރީތިކޮށްލިއެވެ. އަތު ކުރީގައި އޮތް ގަޑިއަށް ބަލާލަމުން މީތަން އަތްދަބަސް ނަގާ ކޮނޑުގައި އަޅުވާލިއެވެ.

“އޯހް ނޯ.” ވާރޭ އޮއްސައިގަތް އަޑު އިވުމާއެކު މީތަން އަނގަ މައްޗަށް ވައްތަރެއް ޖައްސާލީ ވީ ފޫހިންނެވެ. ވާރޭ ތުނި ކޮށްލާނެ ކަމުގެ އިންތިޒާރުގައި މީތަން ހުއްޓާ މުޅި މަގުމަތީގައި ފެންބޮޑު ކޮށްލުމަށްފަހު ވާރޭ ތުނިކޮށްލައިފިއެވެ. ލިބުނު ފުރުސަތުގެ ބޭނުން ހިފަމުން މީތަން އަށް ހިނގައިގަނެވުނީ ތަންކޮޅެއް ބާރަށެވެ. ކުއްލިއަކަށް މީތަންގެ ފައިވާން ކައްސާލިއެވެ. އެއްވެސް ހުރަހެއްނެތި ފެންގަނޑު ތެރެއަށް މީތަން ވެއްޓުމުން އޭނާ އަށް ހަޅޭލަވައިގަނެވުނެވެ. އޮފީހުން ނިކުންނަން އައި އަޔާންއަށް އެމަންޒަރު ވަރަށް ރީއްޗަށް ފެނުނެވެ. އަޔާން އަކަށް ހިނިގަނޑު ކޮންޓްރޯލެއް ނުވިއެވެ. މީތަންގެ ފަޔަށް އެރި ތަދަކުން އޭނައަށް ނުވެސް ތެދުވެވުނެވެ.

“އަދިވެސް މަށަށް ވާނޭ ކިޔާފައި ހީލްސް އަށް އަރައިގެން ހިނގާތި؟” އަޔާން މީތަން ގެ ކައިރިއަށް ހުއްޓި އަތް ދިއްކޮށްލިއެވެ.

” ހޫން… އަމިއްލައަށް ނުތެދުވެވިގެން އުޅޭ އިރުވެސް އަދި ގަދަވާތި.” މީތަން މޫނު މައްޗަށް ޖައްސާލި ވައްތަރުން އަޔާންގެ ގާތަށް އަނެއްކާވެސް ހިނިއައެވެ.

“ހެވޭ ނުތެދުވެވުނަސް. އައި ނޯ މައި ލިމިޓް.” މީތަން އަޔާންއަށް ބަހަކުން ޖަހާލިއެވެ. އަދި ދެލޯ އަޅަމުން އަމިއްލައަށް ތެދުވެވޭތޯ މަސައްކަތް ކުރިއެވެ. އެވަގުތު ވާރޭ އަނެއްކާވެސް ބޯކޮށްލިއެވެ.

މީތަން ގޮތް ދޫ ނުކުރުމުން އަޔާން ގެ ގާތަށް ރުޅިއައެވެ. އަނެއްކޮޅުން ވެހެމުންދިޔަ ވާރޭގައި އަޔާންވެސް ތެމިފޯވަނީއެވެ. އަޔާން މީތަންގެ ހިމަ އުނަގަނޑުގައި ދެއަތުން ހިފަހައްޓާލަމުން ކުއްލިއަކަށް ކޮޅަށް ނެގިއެވެ. އަދި އަޔާން ގެ އަތު ތެރޭގައި މީތަން ގެ ހަށިގަނޑު ހިފަހައްޓާލިއެވެ. މީތަން ގަދަ ހަދަން މަސައްކަތް ކުރި ނަމަވެސް ފަޔަށް ވާތަދުން އޭނާ އަށް ހިނގައިވެސް ނުގަނެވުނެވެ.

އަޔާން ގެ އަތް މައްޗަށް މީތަން ނަގާ އުރާލަމުން ސައިކަލްމަތީގައި ބޭންދިއެވެ.

“އަދިވެސް ގިނައިން ކާތި؟ މީހާ ބަރު ކަމުން ހިއްލާލެވުނީ ވެސް ކިރިޔާ.” އަޔާން ބޭނުންވީ މީތަން ރުޅިއަރުވާލާށެވެ.

“ދެން އަތް ނުލައްޗޭ މަގޭ ގައިގަ. ތީ ވަރަށް ހިކި މީހެއްނު މީހުންނަށް މަލާމަތް ތިކުރަނީ.” މީތަން އަޔާންގެ ބުރަކަށީގައި ދަތް އަޅާލިއެވެ. ވީތަދުން އަޔާން އެނބުރިލާފައި މީތަންގެ ކަރުދޮށުން އަތް ލައްވާލަމުން މީތަންގެ ލައިގެން ހުރި ގަމީހުގެ ގިރުވާނުގައި ހިފެހެއްޓިއެވެ. އަޔާންގެ ހޫނު ނޭވާ މީތަންގެ މޫނަށް އެޅެމުންދިޔައިރު އަޔާން ބަލަމުން ގެންދިޔައީ ސީދާ މީތަންގެ ދެލޮލަށެވެ. އެދެލޮލުން ފެންނަ މައުސޫކަން އަޔާންގެ ހިއްސުތަކަށް ބާރު ފޯރުވަމުން ދިޔައިރު ވެހެމުންދިޔަ ބޯ ވާރޭގެ އިހްސާސްވެސް ދެމީހުންނަށް ނުވާ ކަހަލައެވެ. ކުއްލިއަކަށް އަޔާން މީތަން ގެ ގަމީހުގެ ގިރުވާނުން އަތްދޫކޮށްލިއެވެ. ސައިކަލްގެ ފަހަތުގައި އިން މީތަން ނުވެއްޓުނީވެސް ކިރިޔާއެވެ.

“ކޮންތާކު ގެ ހުންނަނީ.” އަޔާން އެ ސުވާލު އެހީ އަޔާންއަށް ނޭނގޭތީކީ ނޫނެވެ. އަޔާންއަށް އެ ގެ ހުންނަތަން އެނގޭކަން މީތަންއަށް އަންގަން ބޭނުން ނުވާތީއެވެ.

“ސަލްސާ ކައިރީގަ.” މީތަން ސައިކަލްގެ ފަހަތު ދަގަނޑުގައި ހިފަހައްޓާލިއެވެ.

“މަގޭ ގައިގަ ހިފަހައްޓާލިޔަސް އޯކޭ.” އަޔާން ސައިކަލް ދުއްވާލިއެވެ.

މީތަން ގެޔަށް ގެންގޮސްދީފައި އަޔާންގެއަށް އައިއިރު ނުހާ އޮތީ ސޯފާގައެވެ. އަޔާންގެ އިންތިޒާރުގައި އޮތް ކަހަލައެވެ.

“ތެމުނީތަ؟” ނުހާގެ ގޮތެއް ނެތް ކަމާމެދު އަޔާން ކޮސްވިއެވެ. ލަދެއްނެތި އަޔާންއާ ވާހަކަ ދައްކަން ނުހާ އަށް ކެރުނީތީވެސް އަޔާން ހައިރާންވިއެވެ.

އަޔާން ދުރަށް މޫނު އަނބުރާލަމުން ކޮޓަރި އާ ދިމާއަށް ހިނގައިގަތެވެ. ދޮރު ލައްޕަން އުޅުނުތަނާ ނުހާ ކުއްލިއަކަށް އައިސް ކޮޓަރިއަށް ވަނެވެ.

“ހާދަ ގޮތެއްފޮތެއް ނެތް އަންހެނެކޭ ދޯ. މިގޮވަނީ ބައްޕައަށް. އަމިއްލަ އަށް ލަދުގަންނަން ބޭނުން ނެތިއްޔާ ނިކުމޭ.” އަޔާންގެ ލޮލުން ނަފްރަތުގެ އަލިފާން ކަނި ބުރަމުންދިޔައެވެ.

“ގޮވާ. އެކަމަކު އަޑު އިވިގެންތާ. އެކަކުވެސް އުޅޭ ނަމައެއްނު.” ނުހާ އަޑުގައި އެއްވެސް ހާސްކަމެއްނެތެވެ. ނަމަވެސް އަޔާންއަކީ އެހާ ފިޑިއެއްނޫނެވެ. ނުހާއަށްޓަކައި ހިތުގައި އެއްވެސް ރަހުމެއް މިހާރަކު އަޔާންގެ ހިތަކު ނެތެވެ. ނުހާގެ ދިގު އިސްތަށިގަނޑު އަތަށް އޮޅާލަމުން އަޔާން ނުހާ ކޮޓަރިން ބޭރަށް ކޮށްޕާލިއެވެ. ނުހާގެ މޫނު މަތިން އެވަރުންވެސް ފާޅުވީ ހިނިތުންވުމެކެވެ. އޭނާ ބޭނުންވި ކަންތައް އޭނާކޮށްފިއެވެ. ކޮޓަރީގެ ދޮރު ބަންލާފައި ޖަހަމުން އަޔާން ގަމީސް ބާލާ އަތުކޮޅަށް ހޫރުވާލިއެވެ.

ނުހާގެ ހިތްފުރޭ ވަރު އަދިވެސް ނުވަނީބާއޭ އަޔާންގެ ހިތަށް އެރިއެވެ. ދެފަރާތަކަށް ބޯހޫރާލަމުން ޓައިލްސް މައްޗަށް އެއްލާލި ގަމީސް ނަގަން ގުދިވެލިތަނާ އަޔާންގެ ލޮލުގައި އަޅައިގަތީ ބަންދުކޮށްފައި އޮތް ސިޓީ އުރައެކެވެ. ދެބުމަ ގޮށް ޖަހާލަމުން އަޔާން އެސިޓީ އުރަ ނަގާ އެފުށް މިފުށަށް ޖަހާލިއެވެ.

“އޭޑީކޭ ހޮސްޕިޓަލް.” ސިޓީ އުރައިގެ ބޭރު ބަލާލަމުން ލިޔެފައިވާ ނަން އަޔާން އަށް ކިޔާލެވުނެވެ. ބޮލު ތެރޭގައި ޖެހެމުންދިޔަ ސުވާލުމާކް ތަކާއެކު އަޔާން އެސިޓީ އުރަ ކަނޑާލިއެވެ. ނުހާގެ ޕްރެގްނެންސީ ރިޕޯޓް ފެނިފައި އަޔާން ގަނޑުވި ކަހަލައެވެ. އަވަސް އަވަހަށް އަޔާން ރިޕޯޓްގައި އިން ޑޭޓް ޗެކްކޮށްލިއެވެ.

“އޯ. މަގޭދަރިއަކަށް ނުހާ.” އަޔާން އަނގަމަތީގައި އަތް އަޅަމުން ދޮރާ ދިމާއަށް ދުއްވައިގަތެވެ.

ނުނިމޭ