ހެޔޮކަމުގެ ބަދަލު

ހިޔަޅެއްގެ ކަރުގައި ކަށްޓެއް ޖެހުނެވެ. ހިންވެސް ދިރުވައިނުލެވި ކަންބޮޑވެގެން އެކަށި ނެގޭނެ ގޮތެއް ފެނޭތޯ ކޮޅުކޮޅަށް ދުވަނިކޮށް މާކަނައަކާ ދިމާވެ، އެކަށިނަގާދެވިދާނެތޯ ސުވާލު ކުރި އެވެ.

މިހާރު ވަރަށްގިނަ ޖަނަވާރާ ދޫނިތަކަށް އާދޭސް ކުރެވިއްޖެ ވާހަކައާއި ކަށިނައްޓާލަ ދީފިނަމަ ވަރަށް ރަނގަޅު ހަދިޔާއެއް ދޭނެކަމަށް ބުނުމުން މާކަނާ އޭތީގެ ތުންގަނޑަ ބޮލާއެކު ހިޔަޅުގެ އަނގައިގެ ތެރެއަށް ބާނައިގެން ކަރުގައިހުރި ކަށި ތުނބުން ހިފައި ނައްޓާލައިގެން ނަގައިފިއެވެ.

މާކަނާ ހިޔަޅުގާތު އަހާލިއެވެ.”ކަލޭ ދޭން ބުނި ބޮޑު ހަދިޔާ ކޮބައި ހެއްޔެވެ.” ހިޔަޅު ޗޮކެއް ޖަހާފައި ބުންޔެވެ.”ހިޔަޅެއްގެ އަނގައިގެ ތެރެއަށް ތިއަކަހަލަ ދޫންޏެއްގެ ބޯވައްދާފައި ސަލާމަތުން ނެރެން ދޮކޮށްލިކަން އެއީ ކުޑަ ހަދިޔާއެއް ހެއްޔެވެ. ހަދިޔާގެ ބޭނުން ކުރެވޭނީވެސް، ފުރާނަ ސަލާމަތް ވެގެންތާއެވެ. އެކަން ކޮށްދީފީމެވެ.”

***ނިމުނީ***

—ނުބައިމޭހަކަށް ހެޔޮކަމެއް ކޮށްދިނަސް އޭގެ ބަދަލު ލިބޭނެ ކަމަށް އުންމީދު ނުކުރާށެވެ. ދީފާނެ ގެއްލުމަކަށް ވިސްނާހުރުން ބުއްދިވެރިއެވެ.—