ވީ ބޭވަފާ އޭ… ކުށަކީ ކޮބައި ހޭ… 1

ސާދަ ވިލޭރޭގެ ހަނދު މެދު އުޑުގައި ރަސްކަން ކުރަމުން ދިޔައެވެ. އެ ރަސްކަމުގެ ދަރުބާރުގައި އެތައް މިލިއަން ތަރިއެއް ދިޔައީ ޝާމިލްވަމުންނެވެ. ރޭގަނޑުގެ އެ ހަމަހިމޭން ވަގުތު ރަށު ފާލަން މަތީ އޮތް ކައިޒިންގެ މަޑު މުށި ކުލައިގެ ލޮލުގައި ވިދަމުން ދިޔައީ ޒުވާންކަމުގެ ރޫޙެވެ. ޖެހެމުން ދިޔަ މަޑު މަޑު ވައިރޯޅިތައް އޭނާގެ ފަން ބޯ އިސްތަށިކޮޅަށް ދިޔައީ އެކިއެކި ގޯނާކުރަމުންނެވެ. އޭނާގެ ތުންފަތުގައި އެވާ ރީތި ހިނިތުންވުން ފެންނަ ކޮންމެ މީހުއްގެ ހިތް ކައްސާލާހާވެއެވެ. ކޮންމެ ރެއަކުވެސް ކައިޒިން އިޝާ ނަމާދުކޮށްލައިގެން އައިސް އެތާ އޮންނަނީ ހިތްހަމަޖައްސާލުމުގެ ނިޔަތުގައެވެ. އެހިސާބުގަނޑަކީ ތަންކޮޅެއް ފަޅު ހިސާބެއްކަމުން އެތަނަށް މީހަކު އަންނަނީ ހާލަކުން ފަހަރަކުއެވެ. ގުދުރަތުގެ އެ ފުރިހަމަކަމަށް ގެއްލިފައި އޮތް ކައިިޒިންގެ ކައިޒިންގެ ކަންފަތުގައި ވަރަށް ރީތި އަޑެއް އައިސް ޖެހުނެވެ. ހީވާގޮތުން އެއީ އަންހެން ކުއްޖަކު ލަވަ ކިޔާ އަޑެވެ.

ކައިޒިން ބޯ ހިއްލާލުމަށްފަހު ވަށާ ބަލާލިއެވެ. އެހިސާބުގަނޑުގައި މިގަޑީގައި އަންހެން ކުއްޖަކު ކީއްކުރަނީ ބާއެވެ؟ ކައިޒިން އެކުއްޖަކު ހޯދާހޯދާ ނުފެނުމުން ވަރަށް ފަރުވާތެރިކަމާއެކު އަޑުއަހަން ފެށިއެވެ. އެއަޑުގައި ނޭނގޭ ޖާދޫއެއް ވަނީ އެކުލެވިފައެވެ. ކައިޒިންގެ އެތެރެ ހަށީގައި ރީތި މިއުޒިކެއް ކުޅެވެމުން ދިޔައެވެ. އޭނާ ދެލޯ މަރާލިއެވެ. އެއަޑުގެ ޖާދޫގައި ޖެހިފައި އޭނާއަށް އިނދެވުނެވެ. މިހެން އިންދާ އެއަޑު މަޑުމަޑުން ކެނޑެން ފެށިއެވެ. ކައިޒިން އަށް ހޭވެރިކަމެއްވީ އެއަޑު ހިނދެމުން ހިނދެމުން ގޮސް އެއްކޮށް ހިނދުނު ފަހުންނެވެ. އޭނާ ފުންމައިގެން ތެދުވެ އެއަޑުގެ ވެރިޔާ ފެނޭތޯ ވަށާ ބެލިއެވެ. މުޅި ހިސާބުގަނޑު ބެލުމުން ވެސް ނާކާމިޔާބުވުމުން ކައިޒިންގެ ހިތަށް ވަނީ މޮޅިވެރިކަމެއް ވެރިވެފައެވެ. ” އެއީ ކާކުބާ؟” އޭނާގެ ހިތަށް އެރިއެވެ. މި ޚިޔާލުތަކުގައި ހުރެ އޭނާ ބޮލަށް އަތް މަހާލިއެވެ. އަދި ގެއަށް ދާން ހިނގައިގަތެވެ.         * * * * * * * * * * * * * *

ތުނޑިމަތީ އުޅެލާފައި އަނބުރާ ގެއަށް ދާން ހިނގައިގަތް ޖެނީއަށް ފާލަންމަތީ އޮތް އަތުކުރި ގަޑިއެއް ފެނުނެވެ. ޖެނީ މަޑުމަޑުން ހިނގާލާފައި ގޮސް އެ ގަޑި ނެގިއެވެ. ޖެނީގެ މަޑު ފިޔާތޮށި ކުލައިގެ ތުންފަތަށް ލުއި ހިނިތުންވުމެއް ވެރިވިއެވެ. އޭނާގެ ހަނދާނަށް އަންނަން ފެށީ މީގެ ފަސް ވަރަކަށް މިނެޓް ކުރިން އެތާ އިށީނދެލައިގެން އިން ރީތި ޒުވާނާ އެވެ. އެ ކަޅު ބޯ ފަން އިސްތަށިކޮޅެވެ. އެ މަޑު މުށި ކުލައިގެ ޖާދުވީ ދެ ލޮލެވެ. އެ ދޮން ހަންގަނޑާއި އެ ފިރިހެން ވަންތަ ހަށިގަނޑެވެ. ޖެނީ ލަދު ރަކި ގޮތަކަށް ލޯ މަރާލިއެވެ. އަދި އެ އަތުކުރި ގަޑި މެޔާލާ ފިއްތާލިއެވެ. އޭނާގެ ހިތުގައި އެ ނުދަންނަ ޒުވާނާގު ފުރިހަމަ ސޫރަ ވަނީ ބިން ވަޅުނެގިފައެވެ.                    * * * * * * * * * * * * * * *

ސިިޓިންރޫމް ސޯފާގައި ކަސޯޓީ ބަލަން އިން މައިޒާގެ ލޮލުގައި އަޅައިގަތީ ގޭ ދޮރުން ވަދެގެން އައި ކައިޒިންއެވެ. ” އަނހަ ދަރިފުޅާ… އައީތަ!” ކައިޒިން ހީލާފައި ގޮސް އޭނާގެ މަންމަގެ ގައިގާ ބައްދާލިއެވެ. ” އަވަހަށް ދޭ ނިދާލަން… މާދަމާ މިގެއަށް އަންނާނެ ދަރިފުޅު ބައްޕަގެ ވަރަށް ގާތް ރައްޓެއްސެއްގެ ދަރިއެއް… .” ކައިޒިންގެ މޫނުމަތީ ބޮޑު ސުވާލު މާކެއް ތަތްވިއެވެ. ” ކާކު…؟ ކޮން ކުއްޖެއް…؟ ކީއްކުރަން…؟” ކައިޒިންގެ ސުވާލު ބަސްތާ އޮއްސާލިއެވެ. މައިޒާ ހީލިއެވެ. ” ނޭނގެ މަންމައަކަށް އެކުއްޖާއަށް ކިޔާ ނަމެއް… އެއީ އަންހެން ކުއްޖެކޯ… އޭނަ މިގޭގަ ހުންނާނީ އޭނަގެ ކިޔެވުން ނިމެންދެން…”. ކައިޒިންގެ ބަނޑު ކުކުރާލިއެވެ. ” އޯވް… އައި އޭމް ރިއަލީ ހަންގްރީ… އައި އޭމް ގޮއިން ޓު އީޓް… ބައި…!. މައިޒާ ހިނިގަނޑެއް ޖަހާލިއެވެ. ކައިޒިން މައިޒާ ގައިން ދޫކޮށްލުމަށްފަހު ދިޔައީ ކާގެއަށެވެ. ކާގެއަަށް ވަތްއިރު ރޭގަނޑުގެ ކެއުން ހުރީ ތައްޔާރުކޮށްފައެވެ. ކައި ނިންމާލުމަށްފަހު ކައިޒިން ދިޔައީ ކޮޓަރިއަށެވެ. ދެން އޭނާ އަވަސްވެގަތީ ފެންވަރާ ތާޒާ ވެލުމަށެވެ. ފެންވަރައިގެން އައިސް އޭނާ އެނދު މައްޗަށް ވެއްޓިގަތެވެ. ކައިޒިންގެ ސިކުނޑީގައި އެނބުރެމުން ދިޔައީ އެރޭގެ ހާދިސާއެވެ. އެ ޖާދުވީ އަޑު ރިކޯޑިން އެއްހާ ރީތިކޮށް އޭނާގެ އެތެރެ ހަށީގައި މިއުޒިކެއް ކުޅެމުން ދިޔައެވެ. ކައިޒިންގެ ތުންފަތްމައްޗަށް ރީތި ހިނިތުންވުމެއް ވެރިވިއެވެ. އެ އަޑުގެ ވެރިޔާއަކީ ކާކުތޯ ހޯދަން ހިތުގައި އަޒުމެއް ކަނޑައެޅުނެވެ. މި ޚިޔާލުތަކުގައި އޮވެގެން ކައިޒިން ދެލޯ މަރާލިއެވެ. ކައިޒިންގެ މޫނުމަތީ ހީވީ މީހަކު އެއްޗަކުން ތަޅައިގަތް ހެންނެވެ. ފުންމައިގެން ތެދުވެ ދެލޯ ބޮޑުކޮށްލައިގެން އިނދެވުނެވެ. ” ނޫން ނޫން… އަޅޭ…!”.

=ނުނިމޭ=