ކާމިޔާބު1

ދުނިޔެއަކީ ވަގުތީ ތަނެކެވެ.ދާޢިމީ މަންޒިލް  އޮތީ ކުރިއަށެވެ.ދާޢިމީ މަންޒިލް ނުވަތަ އުޚުރަވީ ޙަޔާތް ބާއްޖަވެރިނުކުރެވިއްޖެނަމަަ އެމީހަކު ނާކާމިޔާބުވެއްޖެކަން ކަަށަވަރެވެ.ކަންމިހެން ހުއްޓެއްކަމަކު އުޚުރަވީ ޙަޔާތް ބާއްޖަވެރިކުރުމަށް މަސައްކަތް ކުރަނީ އަހަރެމެންގެ ތެރެއިން ކިތައްމީހުންތޯއެވެ؟މިފަދަ ޚިޔާާލުތަކެއްގެ ތެރެއަށް ގެއްލިފައި އަހަރެން އިނީ އަތިރިމަތީގައެވެ.

އަހަރެންގެ އާދައިގެމަތިން ފަތިސްނަމާދު ކޮށްލައިގެން މިއަދުވެސް ނިކުތީ ހަށިގަނޑާއި ސިކުނޑި ތާޒާކޮށްލުމަށްޓަކައި ހިނގާލާށެވެ.އަރައިގެން އަންނަމުންދާ އިރުގެ ރަންދޯދިތައް އެޅި މުޅިތަން އެކަށް ދިއްލާލައިފިއެވެ.މޫދުން ނަގަމުންއަންނަ ބިޔަ ރާޅުތައް އައިސް ގޮނޑުދޮށަށް ބީއްސާާާލާ މަންޒަރު ވަރަށް ފުރިހަމައެވެ.ޤުދުރަތީ މިފަދަ ފުރިހަމަ މަންޒަރުތަކުން އަހަރެންގެ ހިތަށް ހަމަޖެހުން ގެނުވައެވެ.މުޅި މާހަޢުލަށް ނަޒަރު ހިންގާލިއަސް ފެންނަމުންދާ ޤުދުރަތީ ޗާލު މަންޒަރުން ،ވިސްނައިފި ބަޔަކަށް ﷲގެ ކުޅަދުންވަންތަކަން ހާމަވެގެންދާނެކަމީ ޝައްކެއް އޮތްކަމެއް ނޫނެވެ.

އިރުއެރުމުން ގެއަަށްދާން އަހަރެން މިސްރާބު ޖެހީމެވެ.އެވަގުތު މަގުތަކަށް މީހުންތައް ނިކުންނަން ފެށިއެވެ.ސުކޫލަށްދާ ދަރިވަރުންނާއި މަސައްކަތުދާ މީސްމީހުންނެވެ.ބޮޑުޓައި އަޅައިގެން ސައިކަލުގައި އޮފީސްތަކަށް ދަތުރުކުރާ މީސްމީހުންވެސް ފެނެއެވެ.އޭގެތެރެއިން ފަރުޟުކުރެއްވި ފަތިސް ނަމާދު ކޮށްގެންދަނީ ކިތައްމީހުންބާއޭ އަހަރެންގެ ހިތަށްއެރިއެވެ.ބޮޑުހެނދުނާ ތަޅާމަރާގެން ސުކޫލަށް ކުދިން ގެންދާފަދައިން ފަތިސްނަމާދަށް ތެދުކުރުވީ އެކުދިން ތެދުކުރުވީ ކިތައް މައިންބަފައިންބާވައެވެ؟

މިފަދަ ފިކުރުތަކެއްގައި ހުރެ އަހަރެން ގެއަށް އައީމެވެ.ގެއަށްއައިސް ކޮޓަރިއަށްވަދެ ފެންވަރާލާ ހެނދުނުގެ ޛިކުރުކޮށްލުމަށްފަހު އަހަރެން ނިކުތީ ގޭތެރޭގެ މަސައްކަތުގައި ދައްތައަށް އެހީވުމަށެވެ.އުމުރުން 21 އަހަރުފުރިގެންދިޔައީ ދައްތަގެ ބެލުމުގެ ދަށުގައިހުރެގެންނެވެ.އަހަރެން ވަރަށް ކުޑައިރު މަންމަ ނިޔާވުމާއެކު އަހަރެންގެ ހުރިހާ ކަމަކާ  ހަވާލުވީ އަހަރެންގެ އެއްބަނޑު ދައްތައެވެ.މިއަދު އަހަރެންގެ މަންމައެެއްގެ މަޤާމުގައިވެސް ހުރިމީހަކީ ޚުދު އެދައްތަ އެވެ.ވީއިރު އެދައްތަ ލަދުގަންނާނެފަދަ އެއްވެސް ކަމެއް އަހަރެން ނުކުރަމެވެ.