ވާލޯބިންނޭ ދީވާނާ ވަނީ (ފެށުން)

އޮމާންކޮށް އޮތް ކަނޑުގެ ލޮނުގަނޑު ކަފަމުން އައި ލާންޗެއް ރަށުގެ ބަނދަރާ ކައިރިކޮށްފިއެވެ. އެ ވަގުތު އެ ލާންޗުން ފޭބީ ޒުވާން ފިރިހެން ކުއްޖެކެވެ. އިސްކޮޅުން ދިގު ބާމަތި ފުޅާ ޒުވާނެކެވެ. މާ ދިގުނޫން ފަން އިސްތަށިގަނޑު ވަނީ ރީތިކޮށް ސްޓައިލް ކޮށްލާފައެވެ. އޭނަ ލާފައިވާ ބްރޭންޑެޑް ގަމީހާއި ސްކިނީ ޖީންސް، އޭނާއަށް ލިބިފައިވާ މާ ދޮންނޫން ހަމުގެ ކުލަޔާ ނުހަނު ގުޅެއެވެ. ލޮލުގައި އަޅާފައިވާ ރޭބަން އަވިއައިނު ނެގުމަށްފަހު، އަޅި ކުލައިގެ ލެންސް ލައްވާފައިވާ އެރީތި ދެލޯ މާހައުލުގެ ތެރެއަށް ހުޅުވާލިއެވެ. ވަށައިގެން ވަނީ ހިތްގައިމު އަމާން މާހައުލެކެވެ. ފެންނަމުން ދަނީ އެކުވެރިކަމާއި،
އޯގާތެރިކަމާއި، އެއްބައިވަންތަކަމުގެ މިސާލެއް ނެތްފަދަ މަންޒަރުތަކެކެވެ. ވަގުތަކީ ހަވީރުގެ ހިތްގައިމު ވަގުތުކަމުން ގިނައަދަދެއްގެ ބަޔަކު އަތިރިމަތީގައި އުޅޭތަން ފެނެއެވެ. ހިތްގައިމު މަޑު މަޑު ފިނި ވައިރޯޅިތައް ޖެހެމުންދާއިރު ހޮޅުއަށި ތަކުގައި މުސްކުޅިފުރައިގެ މީހުން ތަފާތު މައުލޫތަކަށް ބަހުސްކުރަމުން ދެއެވެ. އުނދޯއްޔާއި، މަސްފެންގަނޑާއި، ދޫނިކޮށިތަކުން ފަޅުފިލުވާލާފައިވާ ހިތްގައިމު ޕާކުގައި ކުދިންތައް ކުޅެ، މަޖާކުރަމުން ގެންދާއިރު އެ މަންޒަރު ބަލަން ތިބޭ މީހުނަށްވެސް އުފާވެރިކަމާއި ހިތްހަމަޖެހުން ގެނެސްދޭނެކަން ގައިމެވެ.
ކުއްލިއަކަށް އެއްލިކަޅިއަކުން ތަންކޮޅެއް ދުރުގައި ހުރި ޖޯއްޔެއްގައި އިން ޒުވާން އަންހެން ކުއްޖެއް ފެނުނެވެ. އެ ޒުވާނާ އިންގޮތުން ކޮންމެވެސް ބޮޑު ޙިޔާލެއްގެ ތެރެއަށް ގެއްލިފައި އިންކަން ހާމަވެއެވެ. އެ ފިރިހެން ކުއްޖާގެ މިސްރާބު އެ އަންހެން ކުއްޖާއާ ދިމާލަށް އަމާޒުވިއެވެ. މަޑުހިނގުމެއްގައި ގޮސް އެ އަންހެން ކުއްޖާއާއި އަރާ ހަމަވުމުން އިސްލާމީ ރިވެތި ސަލާމުން ސަލާމް ގޮވާލިއެވެ.
“އައްސަލާމް ޢަލައިކުމް. އައި އޭމް ޒަކްވާން”.. އެ ފިރިހެން ކުއްޖާ އަމިއްލައަށް ތައާރަފް ވެލިއެވެ. އެވަގުތު އެ އަންހެން ކުއްޖާ ސިހިފައި ބަލައިލިއެވެ. ސުވާލުގެ ނަޒަރަކުން ޒަކްވާން އަށް ބަލަން ހުރުމަށްފަހު ސަލާމަށް ދިއްކޮށްފައިވާ އަތަށް ބަލައިލީ ބީރައްޓެހި ނަޒަރަކުންނެވެ. އަދި އެ އަތުގައި ހިފުމުގެ ބަދަލުގައި އިސްޖަހައިލިއެވެ.
“ވައަލައިކުމް ސަލާމް.”… އިސްޖަހައިގެން އެ އިންގޮތަށް އިނދެ އެ އަންހެން ކުއްޖާ ޖަވާބުދިނެވެ. ޒަކްވާން އަތް ތިރިކޮށްލުމަށްފަހު ހިނިތުން ވެލިއެވެ.
“ނަމެއް ނުބުނާނަންތަ؟؟؟” ދެވަނަ ފަހަރަށްވެސް އެ ރީތި އޮމާން އަޑު އަހާލުމުގެ ޝައުގުވެރިކަން އުފެދުމުން ޒަކްވާން ނަން އަހައިލިއެވެ.
“ މައުރީން”… އެ އަންހެން ކުއްޖާ އޭނާގެ ނަން ބުނެލުމަށްފަހު އަނެއްކާވެސް އިސްޖަހައިލީއެވެ.

ނޯޓް: މި ވާހަކަ އަކީ އަޅުގަނޑު ލިޔާ ފުރަތަމަ ދިގު ވާހަކައެވެ. އަދި މިއީ އަޅުގަނޑުގެ އަމިއްލަ ހިޔާލުގެ މައްޗައް ބިނާކޮށް ލިޔާ ހިޔާލީ ވާހަކައެކެވެ. ރަނގަޅު ކުރަންޖެހޭ ކަންކަން ފާހަގަ ކޮށްލަދިނުމަކީ އަޅުގަނޑަށް ލިބޭނެ ކުރިއެރުމެކެވެ. ހުރިހާ ކިޔުންތެރިންނަށްވެސް މި ވާހަކަ ކަމުދާނެ ކަމަށް އުންމީދު ކުރަމެވެ.