އަފާ

ފަތިހުގެ ހަމަހިމޭން ކަމަށް ހަލަބޮލިކަމެއް ގެނެސްދިނީ ދޫނިސޫފާސޫފީގެ ތުމުން ކުޅެލި މިއުޒިކީ ރާގުތަކެވެ. ފަތިހުގެ ތެތްފިނިކަން ވަނީ މުޅި ކޮޓަރިތެރެއަށް ވެރިވެފަ އެވެ. އެފިނި ކަމުގެ ތެރޭގައި ނިދީގެ ފޮނިމީރުކަން ޙާޞިލްކުރަމުން އައި އަހަރެން، ހޭލައްވާލީ ފޯނުގެ އެލާމެވެ. އަހަރެން ދެލޯ ހުޅުވާލުމަށްފަހު، އަވަސްވެގަތީ ފާހާނާއަށް ވަދެ، ފެންވަރާ ވުޟޫކޮށްލައިގެން ފަތިސް ނަމާދު ޖަމާއަތުގައި ކުރުމަށް މިސްކިތަށް ދިޔުމަށެވެ.

އަލީ ރަމީޒުގެ ހިތްޤައިމު އަޑުން ގޮވަމުން ދިޔަ ބަންގިއަށް ސަމާލުވެ ހުރެ، ހިނގަމުން ދިޔައީމެވެ. ހަލަބޮލި މާލޭގެ މަގުތަކުގައި އެއްޗެއް ދުއްވާތީ މި ވަޤުތު ފެންނަނީ ވަރަށް މަދުންނެވެ. އެވެސް މިސްކިތަށް ދާ މީހުން ކަންނޭނގެވެ.

މިހެން ބުންޏަސް މާއިރާ ތެދުވެ، ނަމާދު ނުކޮށް މާލެ ކުޑަކުރާ ކެނައިން ވެސް އުޅޭނެއެވެ.

ނަމާދުކޮށް ނިމުމުން، ގެޔަށް ގޮސް ކޮފީތަށްޓެއް ތައްޔާރުކޮށްލައިގެން ބޯލީމެވެ. ސޯފާގައި ޖައްސާލައިގެން ކުޑަކޮށް ނޫސްތަށް ބަލާލީމެވެ. އާ ޚަބަރެއް އޮތްތޯއެވެ. އެއަށްފަހު ފިލްމެއް ބަލާލުމަށް ލެޕް ހުޅުވައިލާ ހަމަޖެހިލީމެވެ. ފިލްމު “މީ ލޯތްބަކީ” ބަލަން އަހަރެން އިނީ ވަރަށް ޝައުޤުވެރިކަމާއެކު އެވެ.

ވަޤުތު އަރައިގެން ދިޔަ ގޮތް ވެސް ނޭނގެއެވެ. ކުއްލިއަކަށް އަހަރެންގެ ސަމާލުކަމަށް ގެނުވީ ފޯނުގެ ދެވަނަ އެލާމެވެ. ޑިއުޓީ އެލާމެވެ. އަވަސް އަވަހަށް ތައްޔާރުވެލައިގެން ކޮޓަރިން ނުކުތީމެވެ.

އޭރު މަންމަ ހުރީ ސައި ވެސް ތައްޔާރުކޮށްފައެވެ. ޑިއުޓީ އިނީ 08:00 ގައެވެ. އަދި އެވީ 07:14 ވިއްޔާއެވެ. ހަމަޖެހިލައިގެން ސައި ބޮއެ ނިންމާލުމަށްފަހު، ދަބަސް އަޅުވަގެން ނުކުތީމެވެ. އަމީނީ މަގުން ހުރިގޮތަށް މިސްރާބު ޖެހީ ސީދާ “މިއަދުނޫސް” ގެ އޮފީހަށެވެ.

“ކުޅިވަރު އެކުވެނި” އާ އަރާ ހަމަވާން ކުޑަ ތަންކޮޅެއް ދުރެވެ. އަހަރެން އެއްލި ކަޅިއާއެކު ފެނުނީ ރީތި މަންޖެއެކެވެ. ލޯބި ހީލުމެކެވެ. އެ ލޯބި ހިނިތުން އަމާޒުވީ އަހަންނަށް ކަމުން، ނިތް އަރުވާލާ، ރައްދުގައި ހީލީމެވެ. އެވަޤުތުގެ އިޙްސާސްތަށް ޤަލަމަކުން ބަޔާން ކުރަން އަހަންނަކަށް ހަމަ ލާހިކެއް ނޫނެވެ. އެކަމެއް ނުވާނެއެވެ.

އެއީ ކާކު ހެއްޔެވެ؟ ކޮންތާކު އުޅޭ، ކޮންނަމެއް ކިޔާ، ކާކުގެ ދަރިއެއް ހެއްޔެވެ؟ އެ ހީލުމުގެ މާނައަކީ ކޮބާ ހެއްޔެވެ؟ މި ސުވާލުތަށް ބޮލުގައި އެނބުރޭ ހާލު އޮފީހަށް ގޮސް ވަދެފީމެވެ.

“ބްރޯ މިއީ ވަޒީފާގެ މާހައުލް… ތި ހިޔާލުތަކާ އިހަަށް ދުރައްދޭ” އޮފީސް ތެރެއަށް ވަނުމާއެކު އެ ހިޔާލުތަކުން ބޭރު ވެވުނީ ހަމަ މީހެއްގެ އަމުރަކަށް ހެންނެވެ. އަހަރެންގެ މަސައްކަތް ފެށިއްޖެއެވެ. ޚަބަރަކަށް ފަހު، ޚަބަރެއް ލިޔަމުން ދިޔައީމެވެ.

ދުވަހުގެ މަސަަައްކަތަށް ފަހު، އަހަރެން ދިޔައީ ގްރޭޓާރ މާލެ ބަސް ޓާމިނަލް އަށެވެ. ހުޅުމާލެ ދިޔުމަށްޓަކައެވެ. ހަވީރު 4:45 ގެ ބަހުން ހުޅުމާލެ ދިޔުމަށްފަހު، އަހަރެން ދިޔައީ ކަޒިންއެއްގެ ގެޔަށް އަހަރެންގެ ޕެންޑްރަައިވް ނަގަންށެވެ. އެޔަށްފަހު، ބެސްޓީ އާ ބައްދަލުކޮށްލަން އޭނާ އުޅޭ ފްލެޓަށް ދިޔައީ އެވެ

ބެސްޓީ އާ ވާހަކަ ދައްކަން ކުޑަ ވަގުތުކޮޅަކު ހުރެލާފައި، އެނބުރި މާލެ އައީ 08:00 ގަައި އިވެންޓެއް އޮތީމައެވެ. އަހުމަދިއްޔާ ސްކޫލުގެ އިނާމް ދިނުމުގެ ހަފްލާ ކަވާރކޮށްލުމަށް ދަރުބާރުގެއަށް ދާން އަހަރެންގެ “ބޮސް” ބުނެފައި އޮތީމައެވެ.

ގެއަށް އާދެވުނު އިރު 18:02 ހިނގާފައި ހުރުމުން ތައްޔާރުވެލައިގެން އެއްޗެއް ކާލުމަށްފަހު އޮފީހަށް ދިޔައީމެވެ. އަދި އެއަށްފަހު ބޭނުންވާ އެއްޗެހި ހިފައިގެން އަވަހަށް ދަރުބާރުގެއަށް ގޮސްފީމެވެ.
ޖަލްސާގެ މެދުތެރެއިން އަހަންނަށް ކޯލްއެއް އައެވެ. އެއީ އެކުވެެރި ޝާޔަންގެ ކޯލް އެކެވެ.

ޝާޔަން: “މޭން ކޮބާ ކަލޭ؟”
އަހަރެން: “މަ ދަރުބާރުގޭގައި.. އާދޭ މިތަނަށް”
ޝާޔަން: “އާން އޯކޭ.. ދަން އެބަ”

ޝާޔަން އެހެން ބުނުމުން ފޯން ބޭއްވީމެވެ.

އެހެން ބުންޏަސް ޖަލްސާ ނިމުނު އިރުވެސް މި ސޮރު ދަައްކާ ނުލިއެވެ. ޖަލްސާ ނިމުމުން އަހަރެން ގެޔަށް ދިޔަ މަގުމަތީ ފެނުނު މަންޒަރަކުން ލިބުނީ ޝޮކެކެވެ. ކުއްލި ހައިރާން ކަމެކެވެ. އިއްތިފާޤެއް ބާއެވެ.

– ނުނިމޭ –

– ވާހަކަ ނުނިމޭ…