ވައުދު – 3,2 އީދު ހަދިޔާ

ބަރު ކޮތަޅުތަކާއިއެކު ނިޝާ ގޮސް ލިފްޓަށް އެރިއިރު މީހާ ހުރީ ގުބުހިލިފައެވެ. ލިފްޓްގެ އަށްވަނަ ބަޓަނަށް ފިތާލުމަށްފަހު ނިޝާ އަވަސްވެގަތީ ދަބަހުން ފޯނުނެގުމަށެވެ. އޭރު ނަވާޒު ފުލުފުލުން ނިޝާއަށް ގުޅަމުންދިޔައެވެ. “ހަލޯ، މި އައިސް ހަމަ ލިފްޓަށް އެރީ” ފޯނުނެގުމާއިއެކު ނިޝާ އަވަސްވެގަތީ ފޯނު ނުގެގުނު ސަބަބު ނަވާޒަށް ބުނެދިނުމަށެވެ. އެހެންނަމަވެސް ނަވާޒުގެ އެއްވެސް ޖަވާބެއް ނައުމުން ނިޝާ ފޯނަށް ބަލައިލިއެވެ.

ފުލްކޮށް ޗާޖްކޮށްގެން ގެއިން ނުކުތް ފޯނު އޮތީ ނިވިފައެވެ. ހަމައެވަގުތު ލިފްޓަށް ގުޑުމެއް އައިސްފައި ލިފްޓުން ކަރަންޓް ކެނޑުނެވެ. މުޅި ތަނަށްވެރިވެގެން ދިޔަ ކަނުއަނދިރިކަމާއި އެކު ނިޝާގެ ހިތް ވެސް ސުމާރެއް ނެތްވަރަށް ތެޅިފޮޅިގަތެވެ. މަޑުމަޑުން އަތްހޫރަމުންގޮސް ލިފްޓްގައި ހުރި ފިތްތަކަށް ފިތަންފެށިއެވެ. އެ ކަނު އަނދިރީގައި ބެލްއިންނަ ފިތް ނުފެނުމުން ދެން ނިޝާ ލިފްޓުގެ ދޮރުގައި ތަޅަންފެށިއެވެ. ފޯނަށް ސަމާލުކަން ދެވިފައި ހުރުމުން ލިފްޓް ހުރީ ކިތައް ވަން ފްލޯގައި ކަމެއްވެސް ނިޝާއަކަށް ނޭނގެއެވެ.

ލިފްޓްގައި ދެ އަތުން ތަޅަމުން ދިޔަނަމަވެސް މީހަކަށް އޭގެ ހަބަރެއްވެސް ނުވާ ކަހަލައެވެ. ފޯނު ހުޅުވަން އުޅެ އުޅެ ނުހުޅުވުމުން ނިޝާގެ ހާސްކަންވެސް އިތުރުވިއެވެ. ހާސްކަމާއި ބިރުވެރިކަމާއިއެކު ލިފްޓު އެތެރޭގައި ހުރި ނިޝާ ސިއްސައިގެން ދިޔައީ ކަންފަތް ކައިރިއަށް ހޫނު ނޭވާއެއް އެޅުމުންނެވެ. ލިފްޓް ތެރޭގައި ނިޝާގެ އިތުރުން އެހެން މީހަކު ހުރިކަމަށް ނިޝާގެ ހަވަނަ ހިއްސު ބުނެލިއެވެ. ” ކާކު؟” ސިއްސައިގެން ގޮސް ފަހަތަށް އެނބުރިލަމުން ނިޝާ ބާރުބާރަށް ބުންޏެވެ. ހަމައެވަގުތު ލިފްޓްގެ ދޮރު ހުޅުވިގެން ދިޔައެވެ.

ކުރިމަތިން އަށްވަނަ ފަންގިފިލާ ޖަހާފައި ހުރި ބޯޑު ފެނުމުން ލިބުނު ހިތްހަމަޖެހުމާއިއެކު ދެންމެ ހިތަށް ވެރިވި ބިރުވެރިކަންވެސް ނިޝާގެ ހިތުން ފިލައިގެން ދިޔައެވެ. ކޮތަޅުތައްް އަތަށް ނަގައިގެން ނިޝާ އަވަސް ވެގަތީ އެޕާޓްމަންޓަށް ވަނުމަށެވެ. އެހެންނަމަވެސް އެންމެ ފަހަރަކުވެސް ފަހަތަށް ނިޝާ ބަލައިލިނަމަ ދެންމެ އެވީ ވަހުމެއް ނޫންކަން ނިޝާއަށް ޔަގީންވާނެއެވެ. ލިފްޓުގެ އެތެރޭގައި ހުރި ލޯގަނޑުން ފެންނަން އެ ހުރީ ދެންމެ ލިފްޓުން ނިކުތް ނިޝާގެ ސޫރައެވެ. އެޕާޓްމަންޓް ދޮރަށް ތަޅުދަނޑި ޖަހަން ހުރި ނިޝާއާއި ދިމާލަށް އެ ސޫރަ ބަލަން ހުރިއިރު ލިފްޓްގެ ދޮރު ލެއްޕެމުން ދިޔަވަރަކަށް އެ ހިނިތުންވެސް ވެސް ދިޔައީ ފުންވަމުންނެވެ.

****

އެ ދުވަސް ނިމިގެންދިޔައީ ނިޝާއަށް ވަރަށްވެސް ބިޒީކޮށެވެ. ކުރިއަށް އޮތީ ހުކުރު ދުވަސްކަމުން ނިޝާ ބޭނުންވީ ހުރިހާ މަސައްކަތެއް ބުރާސްފަތި ދުވަހު ނިންމާލުމަށްފަހު ހުކުރު ދުވަހަށް އެއްކޮށް ފްރީވާށެވެ. ސަބަބަކީ ހުކުރު ދުވަހަކީ އެ ކުޑަކުޑަ އާއިލާ އެކުގައި އެންމެ ފުރިހަމައަށް ވަގުތު ހޭދަކޮށްލަން ލިބޭ ހަމައެކަނި ދުވަސް ކަމަށްވުމާއިއެކުއެވެ. ކޭކުގެ މަސައްކަތް އެންމެ ފުރިހަމައަށް ނިންމާލާ ވެރިފަރާތާއި ކޭކު ހަވާލުކުރުމަށްފަހު ނިޝާ އަވަސްވެގަތީ އަލްކާގެ ހަބަރެއް ބަލާލުމަށެވެ. މިފަހަކަށް އައިސް އެނިމޭޓެޑް ސީރީޒްއަށް އަލްކާ މާ ފޯރިއެއް ހުންނާތީވެ ކިޔެވުމަށް ދޭ ޝައުގުވެރިކަންވެސް ވަނީ ކުޑަވެފައެވެ.

އަލްކާގެ ކޮޓަރީގެ ދޮރު ހުޅުވާލިއިރު އެ ކޮޓަރީގެ ތެރޭގައި ރަސްކަން ކުރަމުންދަނީ އަނދިރިކަމެވެ. ލެޕްޓޮޕުން ފުރޭނިގެން އަންނަ އައްޔެއް ފިޔަވައި އިތުރު އައްޔެއް އެ ކޮޓަރިއަކު ނެތެވެ. “ދަރިފުޅާ.. އިޝާ ނަމާދުކޮށްފިންތަ؟” ކޮޓަރީގެ ލައޓުތައް ޖައްސަމުން ނިޝާ އެހެން ބުނިނަމަވެސް ކަންފަތަށް ޖަހާފައި ހުރި ހެޑްސެޓްގެ ސަބަބުން އަލްކާއަށް ނިޝާ އެއްޗެއް ކިޔާހެންވެސް ހީނުވެއެވެ. އެހެން ކަމުން ދެވަނަ ފަހަރަށް އެ ސުވާލު ތަކުރާރުކޮށް ނިޝާއަށް ޖެހުނީ އަލްކާ ގަދަކަމުން ފާހަނާއަށް ފޮނުވާލާށެވެ.

“މަންމަ ޓޮއިލެޓްގެ ފެންލައިޓް ހުޅުވިންތަ؟” އަލްކާ ކުރި ސުވާލުން ނިޝާއަށްވެސް ލިބުނީ ހައިރާން ކަމެވެ. އެ ފެންލައިޓަކީ ދުވަހަކުވެސް ހުޅުވާ ފެންލައިޓެއް ނޫންވީއްޔާއެވެ. އެހެންކަމުން ފާހަނާއަށް ވަދެ ބަލާލުމަށްފަހު ނިޝާ އަވަސްވެގަތީ ބެލްކަނީގައި ހުރި ހަރުގަނޑު ގެނެސްގެން ފެންލައިޓް ލައްޕާލުމަށެވެ. ފެންލައިޓް ލައްޕާލި ވަގުތު ބިއްލޫރި ގަނޑުގައި އުނގުޅިފައި ހުރި ޗަކަތައްވެސް ނިޝާގެ ލޮލުގައި އަޅައިގަތެވެ. ކުޑަކޮށް ހައިރާންވި ނަމަވެސް ހިތާހިތުން ނަވާލު އެދޮރު ހުޅުވީކަމަށް ނިންމާ ފާހަނާއިން ނުކުމެ ނިޝާ ދޮރު ލައްޕާލިއެވެ.

****

ދަންވަރުގެ ހަމަހިމޭން ވަގުތެވެ. މުޅި ހުޅުމާލެވެސް އެއްކޮށް ނިދާފައިވާ ކަހަލަ އެވެ. މަދުން ނޫނީ ދުއްވާފައިދާ ސައިކަލެއްގެ އަޑެއްވެސް ނީވެއެވެ. ނަވާޒުގެ ކަނާތް ފަރާތުގައި އަރާމު ނިންޖަކުން ނިދާފައިއޮތް ނިޝާއަށް ހޭލެވުނީ ވަރަށް ބާރަށް ބުޅަލެއް ހޭރިގަތް އަޑުއިވިގެންނެވެ. އަޑު އައި ވަގުތު އެއަޑު އައީ ކަންފަތް ބުޑުންނޭ ބުންޏަސް ދޮަގަކަށް ނުވާނެއެވެ. ލިބުނު ސިހުމާއެކު ނިޝާއިނީ އެނދުމަތީ ކޮޅަށެވެ. މީހާއަށް މާނޭވާ ލެވިލެވި ހުރިއިރު ދެލޯ ހުއްޓިފައި ހުރީ ކުރިމަތިން ފަރުދާތައް ހެލިލަ ހެލިލަ ހުރި ބެލްކަންޏަށެވެ.

ކޮޓަރީގެ އޭސީގެ ނިވިފައި ހުރިއިރު ކޮޓަރީގައި ރަސްކަން ކުރަމުންދަނީ އުޑުމަތިން ފެންނަން ހުރި 14 ވިލޭރޭގެ ހަނދުން ފުރޭނިގެން އެޅިފައި ހުރި އަލިކަން އެކަންޏެވެ. އޭސީ ނިވިފައި ހުރި ނަމަވެސް މުޅި ކޮޓަރިތެރޭގައި ހުރީ މީހާ ތުރުތުރު އަޅާފަދަ ދުންފިނިކަމެއް ހިފާފައެވެ.

ހުޅުވާފައި ހުރި ބެލްކިަނީގެ ދޮރު ލައްޕާލަން ދާން އުޅެފައިވެސް ނިޝާ އެންމެ ފުރަތަމަ ޗެކް ކޮށްލީ ކޮޓަރީގައި ކަރަންޓް ހުރިތޯއެވެ. ނަމަވެސް ކަރަންޓް ނެތްކަން އެނގުމުން ނިޝާ ދެފަހަރަކު ނވާޒުއަށް ގޮވާލިއެވެ. އެހެންނަމަވެސް ހޫން އަޅުވާލުމަށްފަހު އަނެއްކާވެސް ނަވާޒު ނިދުމުން، އަލްކާ ކޮބައިތޯ ބަލާލުމަށްޓަކައި ނިޝާ ހިނގައިގަތެވެ.

ދޮރުހުޅުވުމަށްޓަކައި ދިއްކޮށްލި އަތްކުއްލިއަކަށް ނިޝާއަށް ދަމައިގަނެވުނީ ބެލްކަނި ކުރިމަތިން ހިޔަންޏެއް ހުރަސްކުރިހެން ހީވެގެންނެވެ. މޭގެ ތެޅުން އިތުރުވެފައި ހުރިއިރު، ނިޝާ އަނެއްކާވެސް މަސައްކަތް ކުރީ ނަވާޒު ހޭލެއްވުމަށެވެ. ނަމަވެސް މިފަހަރުވެސް އެކަން ކާމިޔާބުޖެހީ ބެލްކަންޏާއި ދިމާލަށެވެ.

ހުޅުވާފައި ހުރި ބެލްކަނީގެ ދޮރުން ބޭރަށް ނުކުތުމާއިއެކު ޖެހި ތެތްފިނި ވައިރޯޅީގެ ސަބަބުން މީހާ ތުރުތުރު އަޅައިގެން ދިޔައެވެ. އުޑުމަތިން ބުރުހަމަކޮސް ފެންނަން ހުރި ސާދަވިލޭރޭގެ ހަނދާއި ތަރިތައް ފެނުމުން އިންސާނަކު އާޝޯހުކުރުވާނެ ފަދައެވެ. ތެތް ފިނި ވައިރޯޅި ޖެހުނު ނަމަވެސް އުޑުމަތިން ވިއްސާރައިގެ ނިޝާނެއްވެސް ފެންނާކަށް ނެތެވެ.

ބެލްކަނިން ބޭރު ބަލައިލުމަށްފަހު ކޮޓަރިއަށް ވަނުމަށް އެނބުރިލި ނިޝާއަށް ހުއްޓެވުނީ ހީވި އެއްޗަކުންނެވެ. ދެލޯބޮޑުވެފައި ހުރި ނިޝާގެ ހަތަރެސްފައިވެސް ވަގުތުން ދާ ހިއްލަންފެށިއެވެ. މަޑުމަޑުން ކަނާތް ފަރާތަށް އެނބުރުނު ނިޝާގެ ހިތް ހީވީ ފަޅާފައި ނުކުމެދާނެ ހެންނެވެ. އެއީ ހީ އެއް ނޫނެވެ. އެއީ ހަމަ ހަގީގަތެވެ.

ނިޝާގެ ކޮޓަރިއާއި ޖެހިގެން ހުރި އަލްކާގެ ކޮތަރީގެ ފާހަނާގެ ފެންލައިޓްގައި އެލިގަނެގެން އެއޮތީ ހަމަގައިމުވެސް އިންސާނެއެއް ނޫނެވެ. ކަޅު ރޭގަނޑެއް ފަދަ އެ އެީގެ ގައިން ޗަކަފާޑުގެ އެއްޗެއް ހުރިކަން އެއަލިކަމުންވެސް ފާހަގަވެއެވެ. އޭގެ ބޯ ފެންލައިޓުން އތެރެއަށް ލައިގެން އޮތްއިރު ހަށިގަނޑު އޮތީ ފެންލައިޓުން ބެރަށް އެލިފައެވެ. ދެލޯބޮޑުވެ ހަދާނެގޮތް ހުސްވެފައިހުރި ނިޝާއަށް ހަމަހޭވެރިކަން ވީ ކުއްލިއަކަށް އޭތި ނިޝާއާއި ދިމާލަށް ބަލައިލުމުންނެވެ. ކޮންފަދަ ބިރުވެރި ކަމެއް ހެއްޔެވެ؟ މޫނުމަތިން އެއްވެސް އަސަރެއް ފެންނަން ނެތް އެ ބިރުވެރި އެތީގެ އަނގަ ހުރީ ހުޅުވިފައެވެ. އާދަޔާ ހިލާފަށްބޮޑު އެ އަނގައިން އޮލަދުންތަކެއް ދިޔައީ ނުކުންނަމުންނެވެ.

ހެޔޮ އެއްޗެއް ކިޔަން މަސައްކަތް ކުރިނަމަވެސް އެވަގުތު ނިޝާގެ ދުލަކަށް ހެޔޮ ބަހެއް ނައެވެ. ދެލޯ ބޮޑުވެ ބަލަހައްޓައިގެން ހުރި ނިޝާ ކަނޑާ ވައްޓާލި ރުކެއްހެން ބެލްކަންޏަށް އެވަގުތު ވެއްޓުނެވެ. ހަމައެވަގުތު ފަރުދާ ކުރެވިފައިވާ އެ ދެލޯ ހުދުކުލައިން  ދިއްލާލުމަށްފަހު ޖައްވުގެ ތެރެއަށް އޭތި އަރައިގެން ދިޔައެވެ.

*****

އެނދުގައި ނިދާފައި އޮތް ނަވާޒަށް ހޭލެވުނީ އާދަޔާ ހިލާފަށް ހޫނުވާން ފެށުމުންނެވެ. ކޮޓަރީގައި އޭސީ ޖައްސާފައި ހުރި ނަމަވެސް ބެލްކަނީގެ ދޮރު ހުޅުވަފައި ހުރުމުގެ ސަބަބުން މުޅި ކޮޓަރިތެރެވަނީ ހީވަނީ ހޫނުކަމުން ފިހިދާނެހެންނެވެ. ސައިޑް ޓެބަލް މަތީގައި ހުރި ގަޑިއަށް ބަލާލުމަށްފަހު އަދި ހަތެއް ޖެހީކަން އެނގުމުން ނަވާޒް ތަންކޮޅެއް ބާރަށް ނިޝާއަށް ގޮވާލިއެވެ. އެހެންނަމަވެސް ނިޝާގެ އެއްވެސް ހަބަރެއް ނުވުމުން ހިތްހަމަނުޖެހިފައި ހުރެ އެނދުން ފޭބި ނަވާޒު ސަމާލުކަން އަތުލައިގަތީ ބެލްކަނި ތެރޭގައި ވެއްޓިފައި އޮތް ނިޝާއަށެވެ.

ހުމާ ފިހިފިހި އޮތް ނިޝާއަށް ކައިރީގައި ވަމުންދާ އެއްވެސް ކަމެއްގެ ހަބަރެއްވެސް ނުވެއެވެ. އިރުއިރުކޮޅުން އަލްކާއަށް ގޮވަމުންދާތީވެ، އަލްކާވެސް އިނީ ނިޝާ ދޫކޮށް ދުރަށް ދަން ބޭނުންނުވެފައެވެ. މެންދުރު 12 ޖެހިއިރުވެސް ނިޝާގެ ހުން ފިނިނުވުމުން ނަވާޒު ނިންމީ އެމްބިއުލާންސް އަށް ގުޅައިގެން ނިޝާ ހޮސްޕިޓަލަށް ގެންދިއުމަށެވެ. އެހެންކަމުން އަލްކާ ނަވާޒުގެ މަންމަމެނާއި ހަވާލުކުރުމަށްފަހު އެމްބިއުލާންސްގައި ނަވާޒު މިސްރާބްޖެހީ ޓްރީޓޮޕް ހޮސްޕިޓަލަށެވެ.

****

“ޓެސްޓްތަކުން ވެސް ހުރިހާ ކަމެއްވެސް ނޯމަލް ކަމަށް ދައްކަނީ. އެހެން ވިޔަސް ހުންމަޑުނުވަންޏާ ޕޭޝަންޓް ޖެހޭނީ އެޑްމިޓް ކޮށްފައި ބާއްވަން. ރޫމް އެއް ބޭނުންވާނަމަ މެއިން ކައުންޓަރުން އެކަން ހަމަޖައްސާލަދޭނެ. ދެން ހުއްޓާނުލާ ފެންފޮތި އަޅާތި، އެއީ މިހާރަށް ދެން ކުރެވެން އޮތް ކަމަކީ.” ނަވަޒު އާއިއެކު ނާރސިންގް ސްޓޭޝަން ކައިރިއަށް ޑޮކްޓަރު ހުއްޓުނީ ދެން ކަންކުރަންވީގޮތުގެ އިރުޝާދު ނަވާޒަށް ދެމުންނެވެ.

ހެނދުނުއްސުރެން ފެށިގެން އެތައް މަސައްކަތެއް ކުރި ނަމަވެސް ނިޝާގެ ހުމަކަށް ކުޑަވެސް ބަދަލެއް ނާދެއެވެ. ހަދާނެގޮތް ހުސްވެފައިހުރި ނަވާޒު މިސްރާބުޖެހީ ހޮސްޕިޓަލުގެ ޕްރައިވެޓް ރޫމަކަށް ނިޝާ ބަދަލުކުރުމަށެވެ.

ނުނިމޭ