ވިންދު ލޯބިން (ޓްރެއިލަރ)

ވެލާނާ އިންޓަނޭޝަނަލް އެއާރޕޯޓުގެ ވެއިޓިން އޭރިއާރގައި ވަގުތުތަށް ގުނަމުން ދިޔަ ދެމަފިިރިން ކުރަމުން ދިޔަ އިންތިޒާރު ނިމުމަކަށް ގެނުވައިދިނީ ދެފަރާތަށް ކެހޭ ދޮރު ހުޅުވަމަށްފަހު ފޮށި ދަމަމުން ނިކުތް ޔަމާންއެވެ. ލީޒާމެން ދެމަފިރިންގެ ނަޒަރު ސީދާވެފައިވަނީ ޔަމާންއާއެވެ.

އެމީހުންގެ ކުރިމަތީގައި ފިޔަވަޅުތަށް މަޑުޖައްސާލި ޔަމާންގެ ފައިން ފެށިގެން ބޮލާ ހަމައަށް އަވަސް ނަޒަރެއް ދިނެވެ. ލިޒާމެން ދެމަފިރިން އެކަންޏެއް ނޫނެވެ. އެތާނގައި ތިބި ގިނަ ބަޔެއްގެ ނަޒަރު ހުއްޓިފައިވަނީ ޔަމާންގެ އިސްތަށިގަނޑަށެވެ. ހުދު ކުލައަކަށްދާ މަޑު ދަންބު ކުލައެކެވެ. ނިއްކުރިމައްޗަށް އެ އިސްތަށިގަނޑުގެ ބޮޑު ބައި ވެރިފައިވާއިރު ރަތްވެފައިވާ އޭނާގެ ލޮލާއި ހިކި އަނަރޫފަ ވެފައިވާ ޔަމާންގެ ހަށިގަނޑު ފެނުމުން މައިމީހާ ލީޒާގެ ހިތުގައި ރިއްސާލިއެވެ. ތުންފަތްމަތީގައި އަބަދުވެސް ހިނިތުންވުމެއް ގެންގުޅޭ ހަގު ދަރިފުޅުގެ މޫނުމަތިން އެހިނިތުންވުމުން ނުފެނުމުން އާޒިމަށްވެސް ތަފާތު އިހްސާސެއް ކުރެވުނެވެ.

ކަރުނަ ބޮނޑިވެފައިވާ ލޮލަކާއެކު ޔަމާންގެ މޫނުގައި ފިރުމާލުން ނޫންކަމެއް ލީޒާއަކަށް ނުކުރެވުނެވެ. އާޒިމްވެސް އޭނާގެ ކޮނޑުގައި ޖަހާލީ ހިތްވަރު ދިނުމުގެ ބަހެއް ބުނުމަށް އެ ދޫ ތަޅުލެވިފައިވާ ފަދަައަކުންނެވެ. “ދަރިފުޅާ މަންމަމެންނަށް މާފް..” ޔަމާން ގައިގައި ބައްދާލި ލީޒާގެ ޖުމްލަ ފުރިހަމައެއް ނުކުރެވުނެވެ. ދުލަށް އައިހައި ހުތުރު އެއްޗެއް ކިޔަން ބޭނުންވިޔަސް މަންމަ ލީޒާ ގަޔާ ދުރުކޮށްލަމުން ފުންނޭވާއެއް ދޫކޮށްލުމަށްފަހު ފަސްދީފައި ޔަމާން ހިނގައިގައިގަތީ މައިމީހާއަށް ކުރާ އިޙްތިރާމެއްގެ ބޮޑުކަމުންނެވެ. އާޒިމްގެ ދެމަފިރިން އިސްޖަހާލިއެވެ. އެ ދަރިފުޅު ހުއްޓުވުމުގެ ހައްގެއް އެ ދެމީހުންނަށް މިއަދަކު ނެތޭ ހިތާހިތުން ބުނަމުންނެވެ.

******************************************

“މާން..އައި ލަވް ޔޫ..އަހަރުމެންނަށް މި ދުނިޔޭގަ އެއްކޮށް އުޅެވެން ނެތަސް އިރާދަކުރެއްވިއްޔާ ސުވަރުގޭން ބައްދަލުވާނެ..އަހަންނަށް މާފު ކޮށްދެއްޗޭ..މަށަށް ވުރެ މާ ރަނގަޅު ކުދިން މާންއަށް ވާނެ..އެއިން ކުއްޖަކާއެކީ އުފާވެރި މުސްތަގުބަލަކަށް އެދެން” އިޝާގެ އޭނާގެ ދެލޯ މަރައި ތަގުޅި ކޮށްލަމުން ބުނެލިއެވެ. އެންމެ ފަހު ބަހެއްގެ ގޮތުންނެވެ. “ބައްޕާ ހެޔޮނުވާނެ..” ކަރުނަ އަޅާ ހާލު ޔަމާން ބުންޏެވެ. އިޝާގެ ބޮލުގައި ބަޑި ޖައްސައިގެން ހުރި އޭނާގެ ބައްޕަ އާޒިމް ގާތު އާދޭސް ކުރާ ފަދައިންނެވެ. އިޝާގެ ބޮލަށް ޖަހަން ތައްޔާރުކޮށްފައިވާ އުންޑައިގެ ކުރިމައްޗަށް އެރުމަށްޓަކައި ކިތަންމެ މަސަތްކަތެއް ކުރިޔަސް ފަހަތުން އޭނާގެ ހިފާއްޓަފައިވާ މީހާގެ ބާރު މާ ގަދައެވެ.

**************************************

ވެހެމުން ދިޔަ ބޯ ވިއްސާރައިގެ ތެރޭގައި ދެފައި މައްޗަށް ޔަމާން ތިރިވެލިއެވެ. އިޝާގެ މަހާނަ ކައިރިއަށެވެ. ފިރިހެނެއް ކަމަކު އަޑުން އަޑު ނަގައި ރޯންފެށިއެވެ. އަޑުގެ ނެތްތަނަށް ހަޅޭއް ލަވައިގަނެވުނީ ހިތަށް ކުޑަނަމަވެސް ތަސައްލީއެއް ލިބޭތޯއެވެ. ނަމަވެސް ބިމުން ހަފޫޓު އަޑީގައި އޭނާގެ ހިތުގެ ހަމަޖެހުން ވަޅުލެވިގެން ދިޔުމުން އެހިތަށް ހަމަޖެހުން ލިބޭނީ ކިހިނަކުން ހެއްޔެވެ.

އޭނާ ދިރިހުރުުމުގެ މައިގަނޑު މަގްސަދު ކުޑަ ހިނދުކޮޅެއް ތެރޭގައި ގެއްލުމުން މި ދުނިޔޭގައި ދެން އުޅުމުގެ ބޭނުމަކީ ކޮބައިބާއޭ ޔަމާންގެ ހިތަށް އެރިއެވެ. ޝަކުވާ އޭނާގެ އަމިއްލަ ހިތާ ކުރަމުން ދިޔައެވެ. ލޯބި ލިބުމުގެ ނަސީބެއް ނެތްކަމަށްޓަކައެވެ. މި ދުނިޔެއިން ދެން އިތުރު އުފަލެއް ނުލިބޭނެކަމަށްޓަކައި ކަރުނަ އަޅާ ހާލުގައެވެ. މޭމަތީގައި ގޮށް މުށެއް ޖަހާލި ވަގުތު އޭނާގެ ކޮނޑުގައި ވެސް ފަހަތުން މީހަކު އަތްޖައްސާލިއެވެ.

ފަސް އެނބުރި ބަލާލިއިރު ކުރިމަތީގައި ހުރި އާޒިމް ފެނުމުން ޔަމާންގެ ކަންފަތުން ދުން އަރަން ފެށިއެވެ. ވެފައި ހުރި ދެރައާއި އައިސްފައި ހުރި ރުޅީގެ ސަބަބުން އާޒިމްގެ ކޯތާފަތް މައްޗަށް ޔަމާން އަތުގެ ހޫނު ހަމަލާއެއް އަރުވާލިއެެވެ. “ހާދަ ހަޔާތް ކުޑަވެގެން ތިއުޅެނީ..” އާޒިމްވެސް އައީ ރުޅިއެވެ.

“މަގޭތަ ހަޔާތް ކުޑައީ ނޫނީ ބައްޕަތަ..ޔޫ ޑިސާރވް ދިސް…އަހަންނެއް ދެން ދުވަހަކުވެސް ކަލެއަކަށް ބައްޕައެއް ނުކިޔާނަން..ކީއްވެ…ކީއްވެ އަހަންނާ ދޭތެރޭ މިގޮތަށް ކަންތައް ތިކުރަނީ..ކޮބާ މަގޭ ކުށަކީ..އެ މައުސޫމް އިޝާގެ ކުށަކީ ކޮބާހޭ..ޖަވާބުދާރީވެބަލަ..” ވާރޭގެ އަޑައެކު ޔަމާންގެ އަޑު ދިޔައީ އެކުވެގެންނެވެ.