ތި ލޯބި އެދިގެން 1

މާމެލާމެލީގެ މީރުވަސް މުޅި ބަގީޗާ ތެރޭގައި ވަނީ ހިފާލެވިފައެވެ. ދާދި ދެންމެއަކު ވެހުނު ވާރޭގެ ކުދި ކުދި ޝަބްނަމް ތިކިތަށް މާމެލާމެލީގެ ފިޔަތަށް މަތީގައި ހުރިއިރު ކުލަކުލައިގެ އެމާތަކަށް ފުރިހަމަކަމެއް ގެނެސްދެއެވެ. ވާރޭ ހުއްޓުނުކަމުގައިވިޔަސް މޫސުން އައްޔެއް ނުވިއެވެ. ކަޅު ބޯ ވިލާތަކުގެ ސަބަބުން އިރު ވަނީ އޭގެ އަލިކަމުން ދުނިޔެއަށް އަލިކުރުމުގެ ވާޖިބުއަދާކުރުމުން މަހްރޫމުންވެފައެވެ. މުޅި ފަޒާގައިވަނީ އަރާމު ތެތް ފިނިކަމެވެ. ރަޖާގަނޑު އަޅާލައިގެން ނިދާލަން މީ އަރާމު ވަގުތެއް ނޫންތޯއެވެ. ނަމަވެސް މިއަދަކީ އާދީއްތަ ދުވަހެވެ. ކިތަންމެ އަރާމަކަސް ނިދަން އޮވެވޭކަށްނެތެވެ. ވަޒީފާއަށް ދާ ގަޑިޖެހެނީއެވެ.

މާ ބަގީޗާ ތެރެއިން ލާފައި ވަދެވެނީ ބޮޑު ގެޔަކަށެވެ. ހުދު ކުލައިގެ ބޮޑު މެނިސަން އެއް ފަދަ އެ ގެ ނަގާފައިވަނީ ތިން ބުރިއަށެވެ. ހުޅުމާލޭގެ ހިތްގައިމު ސަރަހެއްދެއްގައި ހަދާފައިވާ ގެއަކަށް ވުމުން ވަރަށް ހިތްފަސޭހައެވެ. މޫދުގެ ރާޅު ބީއްސަލާ އަޑު ރީއްޗަށް އިވެއެވެ. މުލުހާލުގެ އަޑުގެ އިތުރުން ދޫނި ސޫފާސޫފި އެބަމީހުންގެ ނިދިން ތެދުވެ އުޅޭކަން އަނގައިދޭން އިއްވާ އަޑުތަކާ އެކުވެގެންނެވެ.

ކަންނެއްގޮތަކަށް ނިކްޔަލް ލޯހުުވާލިއެވެ. މޯޅިއަކަށް ދެމެމުން ފާހާނާއަށް ވަނީ ސޯނާގަޑި ތިންވަނަ ފަހަރަށް ސޯނާ ވުުމުންނެވެ . ނަމަވެސް ފާހާއަށް ވަންނަ ދޮރުގެ މަތީގައި ހަރުކޮށްފައިވާ ބޮޑު ގަޑިން ހެނދުނު އަށެއް ޖެހީކަން އެނގުމުން އަތްމަތި އަވަސްކޮށްލައިގެން ފާހާނާ ތެރެއަށް ދުއްވައިގަތެވެ.

ނިކްޔަލްގެ މަންމަ ޝިފާއަށްވެސް ކޮޓަރިއަށް ވަދެވުނީ ނިކްޔަލް އެވައްތަރަށް ތެޅި ބާލަނިކޮށެވެ. ޕިސް ޕިސް ޖަހާލީ އޭނާގެ ދަރިފުޅުގެ ހާލަަތު މިނޫން ގޮތަކަށް ފެންނަނީ ކޮންދުވަހަކުން ބާއޭ ހިތަށް އަރުވަމުންނެވެ.

____________________________________

“ދަރިފުޅާ..ބައްޕަ ބުނަމެއްނު ގަޑިއަށް ފަރުވާތެރިވާށޭ. މިހާރު މީޓީންވެސް ނިމިއްޖެ.” ކުޑަކޮށް ދުވެލާފައި ކަހަލަ ގޮތަކަށް ބައްފަ އަޒްމީލްގެ ކެބިން ތެރެއަށް ޓަކިޖަހާލައިފައި ވަތް ނިކްޔަލްގެ ފިޔަވަޅުތަށް ހުއްޓުނީ އަޒްމީލްގެ އަޑަށެވެ. “ބައްޕާ..ނިދުނިއްޔޭ.” ނިއްކުރި މައްޗަށް ވެއްޓިފައި ހުރި އިސްތަށިތަށް ކުޑަކޮށް ހިއްލާލަމުން ނިކްޔަލް ޖަވާބުދާރީވިއެވެ.

“ބައްޕާ އަޅުގަނޑު ޗުއްޓީއެއް ނަގަންވެގެން.” މޭޒުމަތީގައި އޮތް ފައިލެއް ނަގާ ލޮލަށް އައިނު ހެޔުވަރުކޮށްލި އަޒްމީލް ތޭވީސް އަހަރުވެފައިވާ އޭނާގެ ދަރިފުޅަށް ބަލާލިއެވެ. “ކޮންއިރަކަށް.” އޭނާ ސުވާލުކޮށްލިއެެވެ. “މި އަންނަ ހަފްތާއިން ފެށިގެން ތޭރަ ދުވަސް.” ބުނަން ނުކެރޭ ފަދައަކުން ނިކްޔަލް ބުނެލީ އޭނާގެ ބައްޕަގެ ޖަވާބެއް ނޭނގޭތީ ހިތް އަވަސް ވެފައިވާ ހާލުއެވެ. ވާނީވެސް އެހެން ނޫންހެއްޔެވެ. ކިޔަވާ ނިމިގެން ބައްޕަގެ އަމިއްލަ މަޝްހޫރު ވިޔަފާރީ ކުންފުނީގައި އޭނާ މަސަތްކަތް ކުރަން ފެށިތަާ އަދި މިވީ އެންމެ ހަ މަހެވެ.

“ހާދަ އަވަހަކަށް. އެކަމު އެންމެ ރަނގަޅު. ދޮންބެގެ ކައިވެނިވެސް ހަމަޖައްސަން މިއުޅެނީ އަންނަ މަހުގަ ކުރާ ގޮތަށް.” އަޒްމީލްގެ ޖަވާބުން ނިކްޔަލް އުފާވިނަމަވެސް އޭނާގެ ހިނިތުންވުން ތުންފަތް މަތިން ފިލައިގެން ދިޔައީ ބައްޕަ ބުނެލި ފަހު ޖުމްލައިގެ ސަބަބުންނެވެ. “އޭނ..ކޮން އިރަކު ކާކާ. ދޮންތަވެސް ކައިވެނި ކުރީ އަމިއްލައަށް އިޙްތިޔާރު ކުރި ކުއްޖަކާއެއްނު. ދެން ކީއްވެ ދޮންބެގެ ކައިވެނި ބައްޕަމެން ހަމަޖައްސަނީ.” ނިކްޔަލްގެ ހިތުން އެއީ އެއްވެސް ވަރަކަށް އިންސާފުވެރި ގޮތެއް ނޫނެވެ. އެހެން ވެގެން ނުވާނެއެވެ . އެހެންކަމުން އޭނާގެ ހިތަށް އަރަމުން ދިޔަ ހުރިހާ ސުވާލެއް ބޭރުކޮށްލިއެވެ.

“އެއްވެސް މީހެއް ކައިރި ނުބުނައްޗޭ މި ވާހަކަ އިނގޭ” އަޒްމީލް އިށީނދެެގެން އިން ގޮނޑި ސޯފާގައި އިން ނިކްޔަލްއާއި ދިމާލަށް ގެންދަމުން އަޒްމީލް ވައިއަޑުން ބުނެލިއެވެ. ދަރިފުޅަށް ފުރިހަމަ އިތުބާރު ކުރަމުންނެވެ.

_______________________________________

“އަޔާނީ. ހަމަ މިހާރު އެތަން ސާފުކުރޭ. ގޭގަ އަންހެން ދަރިއަކު ހުރިޔަސް ވާ ފަސޭހައެއް ނެތެއްނު. އަމިއްލަ އަށް ކޭ ތަށިވެސް ދޮންނާކަށް ނުކެރޭ ވިއްޔަ.” ހައުސް ކޯޓު އަރުވާޖަހައިގެން ބަދިގެއިން ނިކުތް ފަޒީލާ ހަޅޭއްލަވައިގަތެވެ. އޭނާގެ އަންހެން ދަރިފުޅާ ދިމާލަށެވެ.

ސޯފާގައިން ވާހަކަ ފޮތެއް ކިޔަން އިން އަޔާނީ އެދިމާލަށް ދިޔައެވެ. “މަންމާ. އަޅުގަނޑެއް ނުކަން.” ފަޒީލާގެ މޫނުމަތީގައި ވީ ރުޅިވެރިކަން ބަލަން އުނދަގޫވުމުން އަޔާނީ އިސްޖަހާލިއެވެ. “ނުކަމޭ؟ ކޮން ދޮގެއް ހަދާކަށް. މިގޭގަ އިތުރު މީހަކު ނެތިސް ދެން ކަނީ ޖިންނިއެއްތަ. މަގޭ މޫނުމައްޗަށް އެއްޗެހި ބުނަން ހާދަ ގޮތެއް ފޮތެއް ނެތޭ.” ފަޒީލާ އައިސްފައި ހުރި ރުޅިގަނޑަށް ޕެޓްރޯލް އެޅި ފަދައެވެ.

އޭނާގެ ބައްޕަ ޝާނިމްވެސް ގެއަށް އައީ އެވަގުތެވެ. އެއްވެސް އަސަރެއް ނެތް ގޮތަކަށް އެ ދެމައިންނަށް ބަލާލައިފައި ދިޔުމުން އަޔާނީގެ ހިތުގައި ރިއްސާލިއެވެ. ތަށިތަށް ނުދޮވެ ސިންކު ތެރޭގައި ބަހައްޓާފައި އެހެރީ އޭނާގެ ބައްޕަކަން ޔަގީންވިއެވެ. އިތުރު އެއްޗެއް ނުބުނެ ބަދިގެތެރެއަަށް ވަދެ ސިންކު ކައިރީ މަޑުކޮށްލިއެވެ. އޭނާގެ ލޮލު ތެރެއަށް ބޮނޑިވެފައިވާ ކަރުނަތަށް އިޙްތިޔާރަކާއި ނުލާ އޮހިގަތެވެ. މަޑު މަޑުން އޭނާގެ ބަނޑުގައި އޭނާ ފިރުމާލިއެވެ. އެ ތުނި ބަނޑު ތެރޭގައި އުފެދެމުން އެދަނީ އޭނާގެ ހިތްވަރެވެ. ދިރިއުޅުމުގެ މައިގަނޑު މަގްސަދެވެ. ދިރިއުޅުން މަތިން ފޫހިވާ ކޮންމެ ވަގުތެކު އުފާވެރި ހިޔާލުތަކުން އަޔާނީގެ ހިތް ފުރައިދެނީ މި ދުނިޔެއަށް އަދި އުފަން ނުވިކަމުގައިވިޔަސް އެ ދަރިފުޅެވެ. އިސްކޫރު ދޫކޮށްލަމުން މާޒީގެ ތެރެއަށް އަޔާނީގެ ހިޔާލުތަށް ދަތުރުކުރިއެވެ.

އެއް އަހަރު ކުރި

އެއީ މީގެ އެއް އަހަރު ކުރިއެެވެ. އޮފީހުން ޗުއްޓީއެއް ނެގުމަށްފަހު އަޔާނީ އޭނާގެ ރަށަށް ދިޔައީ ހިތްހަމަ ޖައްސާލާށެވެ. މަންމައާއި ބައްޕަގެ އިތުރުން އޭނާގެ ކޮއްކޮ އިނާންވެސް އެ ދަތުރުގައި ބައިވެރިވިއެވެ. މޫސުން ރީތިކޮށް އޮތްދުވަހެކެވެ. މޫދުގެ ލޮނުގަނޑު ކަފަމުން ގޮސް ލޯންޗު މަޑުކޮށްލީ ރަސްމާދޫ ކުރިމައްޗަށެވެ. ފަޒީލާގެ ކޮނޑުގައި ބޯ އަޅާލައިގެން އޮވެފައި އަޔާނީ ތެދުވެލިއެވެ. އޭނާ އިށީނދެގެން އިން ސީޓުން ފެށިގެން ދެބަރި ކުރީގައި އޭނާއަށް ފުރަގަސް ދީގެން އިން ޒުވާނާ ފެނުމުން އޭނާގެ ހިތް އަވަސްވިއެވެ. ލޯންޗަށް އެރީއްސުރެ އޭނާގެ ހިތް ދެކެން އެދެމުންދާ ޒުވާނާއަކީ އެއީއެވެ. އެހިތުގައި ތަފާތު ވިންދެއް ޖަހާލީ އެޒުވާނާގެ ސަބަބުންނެވެ. ” ދަރިފުޅާ އިޝާން. އޭ އިޝާނޫ..” ނިދާފައި އޮތް އެޒުވާނާގެ ކޮނޑުގައި ޖަހާލީ އޭނާ ކައިރީގައި އިން މެދު އުމުރުގެ އަންހެނެކެވެ. ހީވާގޮތުން އެ ޒުވާނާގެ މަންމައެވެ. “އިޝާން.” އަޔާނީ ހިތާހިތުން ކިޔާލީ އެ ޒުވާނާގެ ނަން ޔަގީންވުމުންނެވެ.

ލޯންޗުން ފައިބަން ދިޔަ ވުގެތެވެ. ސިޑިން ފާލަމަށް އަރަން އުޅުނު ވަގުތު އަޔާނީ އަރިއަޅާލިއެވެ. އެހެންނަމަވެސް ބާރުގަދަ އަތަކުން މޫދަށް ވެއްޓެން އުޅުމުގެ ކުރިން އަޔާނީ ހިފާއްޓާލިއެވެ. ދެލޯ މަރާ ތަގުޅިކޮށްލަމުން ދެތިން ސިކުންތަށްފަހު އެސްފިޔަތަށް ދުރުކޮށްލިއެވެ. މޫނާ މޫނު ނުޖެހޭ ހިސާބުން ފެނުނު ހިތްގައިމު މޫނުގެ ސަބަބުން އާޝޯޙްވިއެވެ. ދުވަހުކުވެސް އޭނާއަށް ފެނިފައި ނުވާ ފިރިހެންވަންތަ ކަމެކެވެ. މޫނުމައްޗަށް ވައްޓާލައިފައި ހުރި އިޝާންގެ އިސްތަށިގަނޑުގެ ސަބަބުން އޭނާގެ މޫނަށް އިތުރު ފިރިހެންވަންތަކަމެއް ގެނެސްދެއެވެ.

___________________________________

“ރާނީ ލިބިފައިވާ ސިފަ ރިވެތި ޝާހީ..ތިބާތީ ޝާއިރެއް ކުރާ ސޫރަ ބާވައޭ…ހިޔާލީ ލަފްޒުތަކުން މިސާލީ ޅެންބަހުން ކިޔާނީ ލޯބި ގުލްޝަނަށް ފޮނުވަދިން މަލޭ ތިބާތީ..” ގަލުން ރާނާފައިވާ ގެއެއްގެ ފާރު ކައިރީގައި ތިބި ގޭންގެ އެތަނުން ލާފައި ދިޔަ ޒުވާން އަންހެން ކުއްޖާއާއި ފޮށެން ފެށިއެވެ. އަޅާވެސް ނުލާ އެއަންހެން ކުއްޖާ އޭނާގެ ފިޔަވަޅުތަށް ކުރިއަށް އަޅަންފެށިއެވެ. ފޯނާ ކުޅެމުންނެވެ. ނަމަވެސް އޭނާގެ ފިޔަވަޅުތަށް މަޑުޖައްސާލަން މަޖުބޫރުވިއެވެ. މުޅި ރަށަށް މަޝްހޫރު ގޭންގުގައި ހިމެނޭ ފަސް ފިރިހެނުންގެ ތެރެއިން އެކަކު އޭނާގެ އަތުގައި ހިފާލުމުންނެވެ. “އޭ. މަންޖޭ އަހަންނަށް ބަލާލިއަކަސް ތި ދެލޯ އަނދިރިއެއް ނުވާނޭ.” ކަރުގައްޔާ ފައިގާ ހުސް ޗޭނު އަޅާ އިސްތަށިގަނޑު ދިގު ކޮށްފައިވާ ނިޔާޒުބުނެލިއެވެ.

ފޯނުން ނަޒަރު ވަކިކޮށްލަމުން ލަޔާނާ ނިޔާޒްއާއި ދިމާލަށް ބަލާލީއިރު އޭނާގެ ލޮލުން އަލިފާން ކަނި ބުރައެވެ. ނިޔާޒްގެ އަތުރޭގައިވާ އޭނާގެ އަތް ނައްޓަން މަސަތްކަތް ކުރިއެވެ. ނިޔާޒް އޭނާގެ އަތުގައި ހިފާއްޓާފައިވަނީ އެ މަޑު އަތްތިލަ ޗިސްކޮށްލަން އުޅޭ ފަދައަކުންނެވެ. އެހެންކަމުން އެއަތް ނެއްޓޭ ގޮތެއް ނުވިއެވެ. ލަޔާނާއައިސްފައި ހުރި ރުޅި އިތުރަށް ގަދަވިއެވެ. ނިޔާޒު އޭނާ އަތުގައި ހުރި ބާރެއް ލާފައި ލަޔާނާ ދަމައިގަތެވެ. ލުކެއް ޖެހި ފަދައިން ލަޔާނާގެ މޫނުގޮސް ޖެހުނީ އިސްކޮޅުން ހަފޫޓު ހަމަވާ ނިޔާޒުގެ މޭމަތީގައެވެ. ދުވި ނުަބައި ސިނގެރޭޓުވަހުން ލަޔާނާ އޯކަށްދެމިގަތެވެ. ނަމަވެސް ނިޔާޒުގެ ބާރުގަދަ އަތުތެރޭގައި އޭނާ ވަނީ ހައްޔަރުވެފައެވެ. ގަދަ ހެދިޔަސް ސަލާމަތްވާނެ ގޮތެއް ނޭނގޭއެވެ. މެންދުރުގެ ހޫނުގަދަ އަވިގަނޑުގައި މަގުމަތީ އުޅޭ މީހުން ވަރަށް މަދެވެ. ލަޔާނާއާއި ނިޔާޒާ ދެމެދު ހިނގާ ހަރަކާތްތަށް ފެންނާނީ ހަމައެކަނި ނިޔާޒު ގޭންގުގެ ހަތަރު މީހުންނަށެވެ.

ލަޔާނާގެ މޫނުގައި ނިޔާޒުގެ މޫނު ޖައްސާލިއެވެ. ދެން ކޮށްލި ކަންތަށް ކެމެރޭއެއްގައި ރައްކާކޮށްލީ ފާރުބުރި ކައިރީގައި ހުރި އަޔާންއެވެ.

( ނުނިމޭ )