އެ ކޮޓަރީގެ ސިއްރު (05)

އަހަންނަށް ހޭވެރިކަންވީއިރު އޮވެވުނީ ކޮންތަނަކުކަމެއް ނޭނގުނެވެ. ރަނގަޅަށް ވަށައިގެން ހޯދާލިއިރު އިގުނީ އަހަންނަށް އޮވެވުނީ ހޮސްޕިޓަލެއްގެ ކޮޓަރިއެއްގައި ކަމެވެ. ޕާޓީގައި އިނދެފައި ދެންވީގޮތެއް އަހަންނަކަށް ނޭނގުނެވެ. ހަމަގައިމުވެސް ނިލްފާ އައިސް އަހަންނަށް ޖޫސްތައްޓެއް ދިއްކޮއްލިކަން އަހަރެން ހަނދާން އެބަ ހުއްޓެވެ. އެއަށްފަހު ވީގޮތެއް އެއްގޮތަކަށްވެސް ހަނދާނެއް ނެތެވެ. އަހަރެން އެކަމާމެދު ވިސްނަން އޮއްވާ މާއިން އައިސް ކޮޓަރި ތެރެއަށް ވަނެވެ. އަހަރެން ހޭއަރާފައި އޮތްތަން ފެނިފައި މާއިންގެ މޫނުމައްޗައް ހިނިތުންވުމެއް ގެނުވައިދިނެވެ. މާއިން އަވަހަށް ޑޮކްޓަރަށް ގޮވިއެވެ. ޑޮކްޓަރު އައިސް އަހަރެން އެގްޒަމިން ކޮއްފާ އަހަރެން ރަނގަޅު ވާހަކަ ބުންޏެވެ. މި އަޑު އިވިފައި މާއިން ފުން ނޭވާއެއް ލިއެވެ. ހީވީ ބޮޑު މުސީބާތަކުން ސަލާމަތް ވީހެންނެވެ.

ޑޮކްޓަރު ބޭރަށް ނިކުތުމުން މާއިން އައިސް އެނދު ކައިރީ އިން ގޮނޑީގައި އިށީނދެލިއެވެ. މާއިން އައިސް އިށީނުމުން އެރޭ ވީ ކީއްތޯ ސުވާލުކުރީމެވެ.

މާއިން: ކީއްހެއްޔޭވީ؟ ކީއްނުވަނީ؟ ބަލާބަލަ މީހާއަށް ވެފައޮތްވަރު… މިހާރު ހޮސްޕިޓަލުގައި އޮންނަތާވެސް ދެ ދުވަސް ވެއްޖެ…

އަހަރެން: ދެ ދުވަހޭ؟ އަހަރެން މިތާ ދެ ދުވަސް ވަންދެން ހޭނެތިފައި މިއޮތީ؟

މާއިން: އާން…. ދެ ދުވަހޭ… އެންމެން ތިބީ ނުލައިހިކު ކަންބޮޑުވެފަ… ޝޫޓިންވެސް ހުއްޓިފަ…. ނަސީބެއްނު އާތިފް ވެއްޓުނީ ސުއިމިންޕޫލަށްކަން…. އެހެންނޫނީ މީހާ މިހާރު އޮތީހީ މަރުވެފަ…. ހަމްދޫނުގޮސް އާތިފް ޓެރަހު ފާރުމަތިން ބާލުއްވަން އުޅެނިކޮށް އާތިފް ކައްސާލައިގެން ވެއްޓުނީ…. އެކަމަކު އެރޭ އާތިފް ހުރީ ހަމަޔަކުނޫން…. އަހަރެން މަރާލީޔޯ… އަނެއްކާ އެއްޗެއް ބުއީތަ؟ ކީއްވެ އަހަންނަށް އަންގާނުލީ…. އެރުންތާ އަހަންނަށްވެސް ބައިވެރިވެލެވުނީހީ…. ކަލޭ ތީ ކަޑަ މީހެއް….

މާއިން މިހުރިހާ ވާހަކައެއް ދެއްކިއިރު އަހަރެން އޮތީ ހައިރާންވެފައެވެ. ސަބަބަކީ އަހަންނަށް މިކަންތަށް ކުރެވުނީ ކޮންއިރަކުކަމެއް އަހަރެންގެ ސިކުނޑިއަކަށް ނުވިސްނުނެވެ. އަނެއްކާ މާއިން ބުނިހެން އަހަންނަށް އެއްޗެއް ބޮވުނީ ބާވައެވެ. އެކަމަކު އަހަންނަކީ ދުވަހަކުވެސް ރަލުގައި އަތްލިމީހެއްވެސް ނޫނެވެ. ދެން އެވީ ކިހިނެއް ހެއްޔެވެ؟ އަހަންނަށް އެކަށްޗެއްވެސް ހަނދާން ނެތީ ކީއްވެ ހެއްޔެވެ؟ އަނެއްކާ ނިލްފާ ގެނައި ޖޫސްތައްޓަށް އެއްޗެއް އަޅާފައި ހުރީބާވައެވެ؟ އެކަމަކު އަހަރެން އެ ޖޫސްތަށި ބުއި ހަނދާނެއް ނުވެއެވެ. މި ހިނގާ ހާދިސާ ތަކަކީ އާދައިގެ ކަމެއް ނޫނެވެ. އަނެއްކާ މިއީ އެ ކޮޓަރީގެ ސަބަބުން ވާ ކަންތައްތަކެއްބާވައެވެ؟ މިކަމާމެދު ވިސްނާ ވިސްނާ އަހަރެންގެ ބޯ ފަޅައިގެންދާވަރު ވެއްޖެއެވެ #. އަހަރެން މޮޔަނުވަނީ ކަމެއްވެސް ނޭނގެއެވެ.

އަހަރެން މި ހިޔާލުތަކަށް ގެއްލިފައި ވަނިކޮށް މާއިން އަހަންނަށް ގޮވާލުމުން އަހަރެން ދިޔައީ ސިއްސައިގެނެވެ. މާއިން އަހަރެންކައިރީ އަރާމުކުރުމަށް ބުނެ ބޭސް ނަގައިގެން އެބައަންނަމޭ ކިޔާ ބޭރަށް ދިޔައެވެ.

މާއިން ބޭރަށްގޮސް މާ ގިނައިރުތަކެއް ނުވެ ހަމްދޫނު އައިސް އަހަރެންގެ ކޮޓަރިއަށް ވަނެވެ. ކޮޓަރިއަށް ވައިންގޮތައްވެސް އޭނާ ހުރީ އަހަންނާ ދިމާލަށް ވަރަށް ފާޑަކަށް ބަލަހައްޓައިގެނެވެ. ހީވަނީ ދެންމެ ދެންމެ އައިސް އަހަރެން ކާލަފާނެ ހެންނެވެ. ހަމްދޫނު އެ ނަފުރަތުގެ ނަޒަރުން އަހަންނާ ދިމާލަށް ބަލަމުން އައިސް އެނދުކައިރީ އިން ގޮނޑީގައި އިށީނެވެ.

އަހަރެން: ހަމްދޫން…. ކީއްވެ މާ ފާޑަކަށް މަށާ ދިމާލައް ތި ބަލަނީ؟ އަނެއްކާ ކަމެއްވީތަ؟ އަހަންނަށް ކަމެއް ގޯސްކޮއް ކުރެވުނީތަ؟

ހަމްދޫނު: އާތިފަށް މަށާ ބެހޭގޮތުން އެނގެނީ ކޯއްޗެއް؟ ތެދުތެދަށް ބުނޭ!!

ހަމްދޫނު އެ ދައްކަންފެށި ވާހަކައެއް އަހަރެންގެ ސިކުނޑިއަކަށް ނުވަނެވެ. އަނެއްކާ އެރޭ ވީ ކީއްބާވައެވެ؟ މާއިން ކިޔައިދިން ގޮތަކުން އެރޭ ހިނގި ހުރިހާކަމެއް އެހާ ސާފެއްނުވިއެވެ.

އަހަރެން: ހަމްދޫނު ތިކިޔާ އެއްޗެއް އަހަންނަކަށް ނުވިސްނުނު…އަހަންނަށް އެރޭ ކަމެއް ކުރެވުނީތަ؟

އަހަރެން ވާހަކަ ދައްކަމުން ދިޔައިރު ހަމްދޫނުގެ މޫނުމަތިން ފެންނަމުން ދިޔައީ ނުރުހުމުގެ ކުލަތަކެވެ. އެހެންމީހުނަށް ނޭނގޭނެ ހަމްދޫނުގެ ސިއްރެއް ވަކި އަހަންނަށް އިނގޭނީ ކިހިނެއްހެއްޔެވެ؟ އެތައްއިރެއްވަންދެން ހަމްދޫނު އަހަންނާ ދިމާލަށް ބަލަންއިނދެފައި ވާހަކަ ދައްކަންފެށިއެވެ.

ހަމްދޫނު: އާތިފަށް ހަމަ އެއްގޮތަކަށްވެސް އެރޭ ހިނގި ކަންތަކެއް ހަނދާނެއް ނެއްތަ؟

އަހަރެން: އާނއެކޭ! ކިތައްފަހަރުތަ ބުނަންވީ… އަޅެ އަހަންނަށް ވީގޮތް ކިޔައިދީބަލަ…

އަހަރެން މިހެން ބުނުމުން އެކައްޗެއްވެސް ނުބުނެ ހަމްދޫނު ނިކުމެގެން ދިޔައެވެ. މިހާރަކައް އައިސް މިވާގޮތެއް އަހަންނަކަށް ނުވިސްނުނެވެ offizielle website. އަހަންނަށް ކުރެވޭ ކަންތަށް އަހަންނަށް ހަނދާން ނުހުންނަނީ ކީއްވެބާވައެވެ؟ މިކަންކަމާމެދު ވިސްނާ ވިސްނާ އަހަރެންގެ ސިކުނޑި ސުމަކަށް ހިނގައްޖެއެވެ.

ސްވިމިންޕޫލަށް އަހަރެން ވެއްޓުމީ އަހަރެންގެ ނަސީބެވެ. އެހެން ނޫންނަމަ އަހަރެން މިއަދު އޮންނާނީ ނުކުޅެދޭ މީހެއްގެ ގޮތުގައެވެ. މާބޮޑެތި އަނިޔާތަކެއް ނުލިބުމުގެ ސަބަބުން 4 ދުވަސްތެރޭ އަހަރެން ގެޔަށް ދޫކޮއްލިއެވެ. ނަމަވެސް ރަނގަޅަށް ރެސްޓް ކުރުމަށް ޑޮކްޓަރު އިރުޝާދު ދެއްވިއެވެ. އެހެންކަމުން މާއިން ނިންމީ ޝޫޓިން ނުކޮށް އެއްމަސްދުވަހު މަޑުކުރުނަށެވެ. މާއިން ނޫން އެހެންމީހެއް ނަމަ މިހާރު އަހަރެން މި ފިލްމުން ބޭރު ކޮއްލައިފީހެވެ.

ރެސްޓް ކުރަން ބުނެފައި ވުމުން އެކަކުވެސް އަހަރެން އެނދުމަތިން ތެދުވިޔަވެސް ނުދެއެވެ. މިކަމާހެދި އަހަރެން ހުންނަނީ ވަރަށް ފޫހިވެފައެވެ. އެންމެން ސަކަރާތްޖަހާ މަޖާކުރާއިރު އަހަރެން ހުންނަނީ އެކަނި ކޮއްފައެވެ.

އެއްދުވަހެއްގެ މެންދުރު ގަޑިއެވެ. އެންމެން ރާވަމުންދިޔައީ ޕާކަކަށްދާ ވާހަކައެވެ. އަހަރެން ނުލައެވެ. އެކަމާ ފޫހިވެގެން ސިޓިންރޫމުގެ ކަނަކަށްވަދެ އަހަރެން އިނީމެވެ. އެންމެން ސަކަރާތްޖަހަމުން ދިޔައިރު އަހަންނަށް ފާހަގަވެގެން ދިޔައީ ހަމްދޫނު އިނީ ކަމަކާ ވަރަށް ކަންބޮޑުވެފައި ކަމެވެ. އޭނާގެ މޫނުމަތިން ފެންނަމުން ދިޔައީ ހިތްހަމަ ނުޖެހުމާއި ނުތަނަވަސްކަމެވެ. އަހަރެން މަޑުމަޑުންގޮސް ހަމްދޫނު ކައިރީގައި އިށީދެލީމެވެ.

އަހަރެން: ހަމްދޫން! ކިހިނެއްވެފައި ތި އިނީ؟

އަހަރެންގެ އަޑު ހަމްދޫނުގެ ކަންފަތުގައި ޖެހުމުން އޭނާ ސިއްސައިގެން ދިޔައެވެ. އަދި އެކައްޗެކޭވެސް ނުބުނެ ތެޅެގަންފައި ކޮޓަރިޔާ ދިމާލަށް މިސްރާބުޖެހިއެވެ. މިހާރު ހަމްދޫނު އަބަދުވެސް ކަންތައް ކުރާ ގޮތަކީ އެއީއެވެ. އަހަރެން ފެންނައިރަށް ހީވަނީ އޭނާއަށް ބޮޑު ބިރެއް ފެނިގެން އުޅޭހެނެވެ. އެހެން މީހުނާވެސް އުޅެނީ ވަރަށް ދުރުދުރުންނެވެ.

އެންމެން ޕާކަށް ދިޔައިރުވެސް ހަމްދޫނެއް ނުދެއެވެ. އޭނާ ބޮލުގައި ރިއްސަނީއޭ ކިޔާފައެވެ.

އަހަރެން ކޮޓަރީގައި އޮވެފައި ނިކުތީ ފެންފޮދެއް ބޮވައިގަނެގެންނެވެ. ކޮޓަރިން ނިކުންތަނާ އަހަންނަށް ފެނުނީ ހަމްދޫނު ގެއިން ނިކުމެގެން ދާތަނެވެ. އަނެއްކާ އޭނާއަށް ކެއްނުކުރެވޭ ވަރަށް ބޮލުގައި ރިއްސާތީ ޑޮކްޓަރަށް ދައްކަން ދަނީ ކަމަށް ހީކޮއް އޭނާއާއި އެކީދާން އަހަރެން އޭނަގެ ފަހަތުން ނިކުތީމެވެ.

އަހަރެން ބޭރަށް ނިކުމެ ހަމްދޫނަށް ގޮވާލީމެވެ. އޭނާ ކައިރީ އަހަންނާއެކު ދާން މަޑުކުރާށޭ ބުނަންށެވެ. ނަމަވެސް ހަމްދޫނަކަށް އަހަރެން ގޮވާލި އަޑު ނީވުނީ ކަންނޭގެއެވެ. ހަމްދޫނު ކާރައް އަރައިގެން ދިޔައެވެ. އަހަރެންވެސް އޭނާގެ ފަހަތުން ދެންއޮތް ކާރައް އަރަގެން ދިޔައީމެވެ. ހަމްދޫނު ދިޔަގޮތަކަށް އަހަރެންވެސް ދިޔައީމެވެ. އޭނާ ދިޔައީ ހޮސްޕިޓާ އިންނަ މަގަކުން ނޫނެވެ. އެތައް އިރެއްވަންދެން ދުއްވިއްޖެއެވެ. ހަމްދޫނު އެ ދާތަނެއް ބަލަން އަހަރެން ކެއްމަދު ވެއްޖެއެވެ. ހަމްދޫނުގެ މިސްރާބު ހުރީ ވަލުފަރާތާ ދިމާލަށެވެ. ދުއްވަމުންގޮސް ހަމްދޫނު ކުއްލިޔަކަށް ކާރު ހުއްޓައިފިއެވެ. އަހަރެންވެސް ކާރު ހުއްޓީމެވެ. ހަމްދޫނު ކާރުން ފައިބައިގެން އަހަރެންގެ ކާރާ ދިމާލަށް މިސްރާބުޖެހިއެވެ. އަދި އަހަރެންގެ ކާރުގެ ދޮރުމައްޗައް އަރާފައި ދޮރުގެ ލުއްވަގަނޑުގައި ޓަކިޖަހާލިއެވެ. އަހަރެން ލުއްވަގަނޑު ތިރިކޮއްލީމެވެ.

ހަމްދޫނު: އާތިފް  މިތާ ކީއްތިކުރަނީ؟

ހަމްދޫނު ކާރު ހުއްޓީ އަހަރެން ފަހަތުން ދާކަން އިނގުނީމަތާއެވެ. އޭނާ ސުވާލު ކުރިގޮތުން އަހަންނަށް އިގުނީ އޭނާ ހުރީ ހިތްހަމަ ނުޖެހިފައިކަމެވެ.

އަހަރެން: ހަމްދޫނު ބޮލުގައި ރިއްސާތީއޭ ކިޔާފަ ކުއްލިޔަކަށް ބޭރަށް ނިކުތީމަ އަހަރެން ހީކުރީ ހަމްދޫނު އައީ ޑޮކްޓަރަށް ދައްކަންކަމަށް…. އެކަމަކު ހަމްދޫނު ތިދަނީ …….

އަހަރެން މިހާ ހިސާބައް ބުނިތަނާ ހަމްދޫނު އަހަރެންގެ ވާހަކަ މެދުކަނޑާލިއެވެ. އަދި އޭނާ ރައްދު ދިންގޮތުން ހީވަނީ އޭނާ އަހަންނަށް އެއްޗެއް ފޮރުވަން އުޅޭހެނެވެ.

ހަމްދޫނު: އަހަރެން މިއައީ ކުޑަކޮއް ދުއްވާލަންވެގެން…. ވަރަށް ގިނަ… ދުވަސްވެއްޖެ ދުއްވާ ނުލެވޭތާ…. ހިނގާ ދެން ގެއަށްދާން…..

ހަމްދޫނުގެ މި އަމަލުތަކުން އަހަންނަށް އިގުނީ މީނާ މިއަދު ބޭރަށް މި ނިކުތީ އެއްވެސް މީހަކަށް ނޭނގޭ ސިއްރުކަމެއް ކުރުމަށެވެ. އެހެންނޫނީ ދުއްވާލަންށޭ ކިޔާފައި ބޮލުގައި ރިއްސާތީ އުޅުނު މީހަކު މިހާ ދުރަކަށް ނާންނާނެއެވެ.

ހަމްދޫނު އަނބުރާ ގެއައް ދިއުމުން އަހަރެންވެސް ގެއާ ދިމާލަށް މިސްރާބު ޖެހީމެވެ. އަހަންނަށް ގެއަށްދެވުނުއިރު އިރު އޮއްސިއްޖެއެވެ. އަހަރެން ގޮސް ގެއަށްވަނުމާއެކު އެންމެން އަހަންނާ ސުވާލު ކުރަން ފެށިއެވެ. އެންމެން ތިބީ އަހަރެން ވީތަނެއް ނޭނގިގެން ކަންބޮޑުވެފައެވެ.

އަހަރެން: ބަލަ ހަމްދޫނު ނުބުނޭތަ އަހަރެން ދިޔަ ތަނެއް

މާއިން: ހަމްދޫނަށް އެއްޗެއް ބުނެވޭނީ އޭނާ ގޭގަ ހުރެގެންނު…. ކޮންތާކަށް ގޮއްސަ ތިއައީ؟

ހަމަ ގައިމު އަހަރެން އައީ ހަމްދޫނުގެ ފަހަތުންނެވެ. ދެން އޭނާ ދިޔައީ ކޮންތާކަށް ހެއްޔެވެ؟ ހަމްދޫނު ކޮންމެވެސް ކަމެއް ރާވަމުން ދާކަން އަހަންނަށް މިހާރު ކަށަވަރެވެ. އަހަރެން ޖަވާބެއް ނުދީ ހުރުމުން މާއިން އަނެއްކާވެސް އަހަންނާ ސުވާލު ކުރިއެވެ. އަހަރެން މާއިންއަށް އޮޅުވާލީމެވެ.

އަހަރެން: އާން… އެއީ ގޭގަ އިނދެ އިނދެ ފޫހިވެގެން ކުޑަކޮށް ދުއްވާލަން ދިޔައީ… ތިމީހުން މަޖާކުރާއިރު އަހަރެންވެސް ފޫހިވާނެއެއްނު…..

އެހެންކިޔާ އަހަރެން ދިޔައީ  ކޮޓަރިއަށެވެ. ރޭގަނޑު ކައިގެން އަހަރެން ނިދަން ދިޔައީމެވެ. ދެފަރާތަށް ފުރޮޅިލަ ފުރޮޅިލަ އޮއްވާ ނިދުނީ ކިހާއިރަކުކަމެއްވެސް އަހަންނަކަށް ނޭނގެއެވެ.

ފުއްމައިގެން ތެދުވެވުނު އިރު މީހާ ވަނީ ދަލުން ތަތްތެޅިފައެވެ. މިރޭވެސް އަހަންނަށް އެ ފެނުނީ އެ ހުވަފެނެވެ. ނަމަވެސް މިރޭ އެހެން ރޭރެޔާ ތަފާތެވެ. މިރޭ އަހަންނަށް ފެނުނީ އޭނާގެ ބަދަލުގައި ލައިލާއާއި އެކު އުޅުނުތަނެވެ. ހަމަ އެ މަންޒަރުތަކެވެ. ނަމަވެސް މީހަ ތަފާތުވީއެވެ. މިކަމުގެ ހަގީގަތް އަހަރެން ބަލަން ބޭނުންވިއެވެ. މި ވަނީކީ އާދައިގެ ކަމެއް ނޫނެވެ. މިއީ އެ ކޮޓަރިޔާ ގުޅެފައިވާ ކަމެކެވެ. މިކަމުގެ ހަގީގަތް މިރޭ އަހަރެން ހޯދާނަމެވެ.

އަލަމާރި ވަތްގަނޑުން އެ ކޮޓަރި ތަޅުދަނޑި ނަގައިގެން އަހަރެން މިސްރާބުޖެހީ އެ ކޮޓަރިޔާ ދިމާލަށެވެ. ކޮޓަރި ހުޅުވާލާފައި އަހަރެން ކޮޓަރިއަށް ވަނީމެވެ. އަދި ތަންތަން ހޯދަން ފެށީމެވެ. އެތައްއިރެއް ވަންދެން ހޯދިއިރުވެސް މި ހިނގާ ކަންތައްތަކާ ބެހޭ އެއްޗެއް ފެންނަގޮތެއް ނުވިއެވެ. އެންމެފަހުން އެއްޗެއް ނުފެންނާނެކަމަށް ހީކޮއް ބޭރަށްދާން އަހަރެން ހިނގާގަތީމެވެ. ބޭރައް ދާން ހިނގައިގަތްތަނާ އަހަރެންގެ ފައި އެނދުކައިރި އަޅާފައި އޮތް ކާޕެޓުގައި އަޅައިގަތެވެ. އެވަގުތު ކާޕެޓުގެ އެއްބައި ހިއްލުނެވެ. ކާޕެޓު ރަނގަޅުކޮއްލަން ތިރިވެލިތަނާ އަހަންނަށް ފެނުނީ ހައިރާންކުރުވަނިވި ތަނެކެވެ. ކާޕެޓު އަޑީގައި ވަނީ ދޮރެކެވެ. އަހަރެން ކާޕެޓު ރަނގަޅަށް ދުރުކޮއްލާފައި އެ ދޮރު ހުޅުވާލީމެވެ. ގިނަދުވަސް ވެފައިހުރުމުގެ ސަބަބުން ދޮރު ހުރީ ވަރަށް ބޮޑަށް ތާށިވެފައެވެ.

ދޮރުގެ ފުރަގަހުގައި ވަނީ އަޑިޔަށްދާން ހަދާފައިވާ ބިންގަރާހެކެވެ. އަހަރެން ވަރަށް ޖެހިލުންވެ ހުރެ ބިންގަރާސް ތެރެޔަށް ފޭބީމެވެ. އެތާ ތެރޭ ވަނީ މަކުނުވާ ފުރާފައެވެ. މުޅިތަން އެއްކޮށްވަނީ ހިރަފުސް އަރާ ފުރިފައެވެ. އަހަރެން ދެންބެލީ އަލިކަމެއް ފެނޭތޯއެވެ. ސިޑީގެ އެއްފަރާތުގައި ސުއިޗު ބޯޑެއް އިނެވެ. އަހަރެން ސުއިޗު ޖައްސާލީމެވެ. ސުއިޗު ޖެއްސުމާއެކު އެތާ އިން ލައިޓެއް ދިއްލުނެވެ.

ބިންގަރާސްތެރޭ އެތައްއެއްޗެއް ހުއްޓެވެ. ނަމަވެސް އަހަރެންގެ ލޯ އެންމެ ފުރަތަމަވެސް އަޅައިގަތީ މޭޒެއް މަތީ ބަހައްޓާފައި ހުރީ ފޮއްޓެއްގައެވެ. އަހަރެން މަޑުމަޑުން ފޮއްޓާ ކައިރިވެލާ ފޮށިމަތީ ހުރި ހިރަފުސްތައް ފޮޅާލީމެވެ. ފޮށި ހުޅުވާލިއިރު ފޮއްޓަކު މާ މުހިންމުއެއްޗެއް ފެންނާކަށްނެތެވެ. ހުރީ ހުުސް އަންނައުނެވެ. ނަމަވެސް އަހަރެންގެ ހިތް ބުނަމުންގެންދިޔައީ އެ ފޮށި ބަލައިލުމަށެވެ. ފޮށި ހާވާލުމުން އޭގެތެރެއިން އަހަންނަށް ގައިރީއެއް ފެނުނެވެ. އަހަރެން އެ ޑައިރީ ނަގާފައި ހުޅުވާލީމެވެ. ޑައިރި ހުޅުވާލާއިރަށް އޭގެ ތެރެއިން އެއްޗެއް ވެއްޓުނެވެ. އަހަރެން ތިރިވެލާފައި އޭތި ނެގީމެވެ. އެއީ ފޮޓޯގަނޑެކެވެ. އެއަށްވަނީ ހިރަފުސްއަރާ ފުރިފައެވެ.

އަހަރެން އެ ފޮޓޯގަނޑުގައިވާ ހިރަފުސްތައް ފޮޅާލާފައި ރަނގަޅަށް ބަލާލީމެވެ. އަހަންނަށް ލިބުނީ ކުއްލި ޝޮކެކެވެ. ހިތް އޭގެ އެއް ހިންދު ނުޖެހިކަހަލައެވެ. އޭގައިވާ މޫނަކީ އަހަރެން ދަންނަ މޫނެކެވެ. ފެނި ބާވެފައިވާ މޫނެކެވެ. ފާއިތުވި 4 އަހަރު ވަންދެން އެ މޫނެއްދެކެ އަހަރެން ނަފުރަތު ކުރި މޫނެވެ. އާއެކެވެ. މިއީ އަހަރެންގެ މާޒީއެވެ. އަހަރެން އެނާދެކެ އެންމެ ލޯބިވީ ކުއްޖާއެވެ. އެއީ އޭނައެވެ. އަހަރެންގެ މައީއެވެ.

(ނުނިމޭ)