އެކުގައިވާނަން

އެކުގަވާނަން ( ޕާޓު 1 )

ކަޅު ވިލާތަކުން އުޑުމަތި ބައްދާލާފައިވާއިރު ފެންނަފެނުމަށް ހީވަނީ ދެންމެ ދެންމެ ވާރެ އޮއްސައިގެންފާނެ ހެންނެވެ. ވައިވެސް އެހާމެ ބާރެވެ. ވަޔާއިއެކު ގަސްތައް ހެލޭއަޑާއި، ކަނޑުން ނަގާ ބިޔަ ރާޅުތައް ތޮށި މައްޗައް ބިންދާ އަޑު ފިޔަވާ އިތުރު އަޑެއް ރަށުތެރެއިން ނީވެއެވެ. ވިއްސާރަ ކުލަވަރު އުޑުމަތީގައިވެފައި ރޭގަނޑުގެ ވަގުތުކަމުން މީހުންތައް ގޭގެއަށް ވަދެ ހިޔާވަހިކަން ހޯދާފައިވާ އެފަދަ ވަޤުތެއްގައި، ރަށުގެ ބޮޑު މަގުމަތިން މަޑު ފިޔަވަޅުތަކެއްގައި ހިނގާފައި އެދަނީ ކޮން އަންހެން ކުއްޖެއްބާއެވެ.؟

ދެއަތް މުއްކެވިފައި އޮތްއިރު އަތުގައި މަޑު ތުރުތުރެއް ހުއްޓެވެ. ލައިފައިވާ ކަޅުކުލައިގެ ފައިތިލަޔާ ހަމަޔަށް ހުރި ދޫހެދުން ގަދަ ވައިގެ ސަބަބުން ގައިގާ ތައްލަވާފައިވެއެވެ. ހެދުމުގެ ފަސްބައިން ތަންގަނޑެއް އިރައިގެން ގޮސްފައިވާއިރު ފަން އިސްތަށިގަނޑު އޮތީ މިނިވަން ކަމާއިއެކު ދޫކޮއްލާފައެވެ.

ހުސްފައިގައި ހިނގަމުންދިޔަ އެކުއްޖާގެ އަނގައިން މަޑު ގިސްލުމެއްގެ އަޑު އިވިއިވި ހުއްޓެވެ. ބަލާބެލުމަށް ވައްތަރީ ވަރަށް ބޮޑު އަނިޔާއެއް ލިބި ހިތާމަތަކެއް ތަހަންމަލް ކުރަމުންދާ ކުއްޖަކާއެވެ. އެފަދަ ވަގުތެއްގައި އެކުއްޖާގެ މަންޒިލަކީ ކޮބާބާއެވެ.؟ މިކަހަލަ ތޫފާނީ ރެއެއްގައި ވަރަށް މުހިންމު ބޭނުމަކު ފިޔަވާ މަގުމައްޗަށް މީހަކު ނުކުމެ އުޅުމަކީ ނާދިރު ކަމެކެވެ. ނަމަވެސް ބަލާބެލުމަށް މި އަންހެން ކުއްޖާއަކީ އެފަދަ މުހިންމު ބޭނުމެއް އޮތް ކުއްޖެއް ހެނެއް ހިޔެއް ނުވެއެވެ.

ގަދަ ނިދީގައި އޮތް ޔާނިޝްއަށް ހޭލެވުނީ ފޯނުގެ އެލާރމް އަޑަށެވެ. ކުޑަކޮށް ބޯހިއްލާލުމަށްފަހު ކައިރީގައި އޮތް ފޯނުނަގައި އެލާރމް އޮފް ކޮއްލާފައި، ބާލީސް މޫނުމަތީގައި އަޅާ ފޮރުވާލުމަށްފަހު އަނެއްކާވެސް ހަމަޖެހިލިއެވެ. ނަމަވެސް އެވަގުތު އޭނާގެ މަންމަ ޒުބޭދާ ކޮޓަރި ދޮރުގައި ދެފަހަރު ޖަހާލަމުން ގޮވާލިއެވެ. ” ދަރިފުޅާ ޔާނިޝް އަވަހައް ތެދުވޭ. މިހާރު އެއޮއް އޮފީހައްދާ ގަޑިޖެހެނީ.” ބާލީސް މޫނުމަތިން ހިއްލާލުމަށްފަހު ކަންނެއް ގޮތަކަށް ޔާނިޝް އޭނާގެ މަންމައަށް ޖަވާބު ދިނެވެ. ” ލައްބަ މަންމާ. އަޅުގަނޑު ހޭލައިފިން.” މަންމައަށް ޖަވާބު ދިނުމަށްފަހު ތެދުވެ ހިންދެމިލާ ކުޑަކޮށް ހަމަޖެހިލުމަށްފަހު ތުވާލި ހިފައިގެން ފާޚާނާއަށްވަނީ ގަޑިޖެހުމުގެ ކުރިން އޮފީހައްދާން ތައްޔާރުވުމުގެ ބޭނުމުގައެވެ.

ފެންވަރާ ތާޒާވެލައިގެން ނިކުތް ޔާނިޝްގެ މޫނުމަތިން ފެންނަނީ ހިތްހަމަޖެހުމެވެ. އުނަގަނޑުން ތިރި ތުވާލިން ނިވާކޮއްލާފައި ވާއިރު ބަނޑާއި މޭމަތި ވަނީ ހާމައަށެވެ. ގަވާއިދުން ކަސްރަތުކުރާ، ހަށިގަނޑަށް ނުހަނު ބަލައިގެން އުޅޭ މީހެއްކަން އޭނާގެ ތަނަވަސް މޭމަތިން ހާމަވޭވޭ ހުއްޓެވެ. ތުންފަތުގައިވާ ލުއި ހިނިތުންވުމުން އަންހެންކުދިންގެ ހިތްތަށް ކަތިލާހާވެއެވެ. ލޯގަނޑު ކުރިމައްޗައް ހުއްޓިލުމަށްފަހު ބޮލުގައި ޖެލްކޮޅެއް ހާކާލާ ރީތިގޮތަކަށް އިސްތަށިގަނޑު ހަދާލިއެވެ. އެއަށްފަހު އަލަމާރިން ގަމީހަކާއި ފަޓުލޫނެއް ނަގާ ރަނގަޅައް ބަލައިލިއެވެ. އަދިވެސް އެއްފަހަރު އަލަމާރި ތެރެއަށް ނަޒަރު ހިންގާލުމައްފަހު އަތުގައި އޮތް އެއްޗެހި ލައި ބެގީކޮއްލިއެވެ. އަދި ކަޅު ހިމަ ޓައީއެއް ކަރުގައި އަޅާލިއެވެ.

އެވަގުތު ކޮޓަރިއަށް ވަދެގެން އައި އަންހެން ކުއްޖާއައް ޔާނިޝް ބަލާލިއެވެ. ” އޯހޯ. ހާދަ ފަރިއެއް ތިވަނީ، އަނެއްކާ ޑޭޓަކަށް ދަނީތަ؟” ހިނިގަނޑެއް ޖަހާލަމުން ޝެލީ އެހެން ބުނެލީ ޔާނިޝްއާއި ދިމާކޮއްލުމުގެ ބޭނުމުގައެވެ. ” ހޫން. އެއްކަލަ އަންހެނާގެ ކަންތައް ފެށުނީ ދޯ. މީނަގެ އަނގަޔާއި ހެދި ނޯންނާނެ މަށައް ހިއްހަމަ ޖެހޭވަރަށް ތައްޔާރު ވެލެވޭކައްވެސް. މީނަޔައް ކީއްތަ މަ ޑޭޓަކަށް ނޫން ކޮންމެ ތާކަށް ދިޔަޔަސް.” އަނގަޔަށް ވައްތަރެއް ޖައްސާލަމުން ޔާނިޝް އޭނާގެ ކޮއްކޮއާއި ވާހަކަ ދެއްކީ ވަކި ތިމަންނަވެސް ދުލެއް ނުކުރާނަމޭ ބުނާ ފަދަޔަކުންނެވެ. “ހަހަހަހަ. ދެން އަނގަތަޅަން ނުހަދާ ހިނގާ ސައިބޯން، ވަރަށް ބަނޑުހައި.” ބަނޑުގައި އަތްހަކާލަމުން ޝެލީ އެހެން ބުނެލީ ހަޤީޤަތުގައިވެސް އޭނަ ބަނޑުހައި ވެފައި ހުރިލެއް ބޮޑުކަމުންނެވެ. ” ސައިވެސް ބޮވޭނީ ތިޔަ އަނގަ މައިތިރިވެގެނެއްނު.” ޝެލީގެ ބޮލުގައި މަޑުމަޑުން ޖަހާލަމުން ޔާނިޝް އެހެން ބުނެލީ ލޯތްބާއެކުގައެވެ. މި ދެބެން އެކަކު އަނެކަކު ދެކެ އިންތިހާއަށް ލޯބިވެއެވެ. ކުޑައިރުއްސުރެ ބަދަލެއްނައިސް އެދެމެދުގައި އޮތްލޯބި އަދިއަދައް ދާންދެންވެސް ބަދަލެއްނުވެ އެގޮތުގައި އޮތެވެ.

އެކިސަކަރާތުގައި ތިބެ ކާގެތެރެއަށް ވަދެގެން އައި ދެކުދިން ފެނި ޒުބޭދާގެ ތުންފަތައް ހިނިތުންވުން ވެރިވެގެން ދިޔައެވެ. ” ދަރިފުޅުމެން ހާދަ ލަސްވީ. އަވަހައް އާދޭ ސައިބޯން.” ޒުބޭދާ އޭނާގެ ދެދަރިންނާއި ވާހަކަ ދެއްކީ ލޯތްބާއިއެކުގައެވެ. ލަސްވާނެ އެންނު މީނަ އަނގަގަދަ މިތުރާ ހެދި. މީނަގެ އަނގައިން ސަލާމަތް ވެގެންނު މީހަކަށް ކަމެއް ކުރެވޭނީ.” ޔާނިޝް އެހެން ބުނެލި ވަގުތު ޝެލީގެ އަނގައައް ޖައްސާލީ ވައްތަރުން ޒުބޭދާ ގާތައްވެސް ހިނިއައެވެ.

އުފާވެރި މާހައުލެއްގައި ތިބެ ސައިބޮއެ ނިންމާލުމައްފަހު ޔާނިޝް ނުކުތީ އޮފީހައްދާށެވެ. ސައިކަލައް އަރާ ދުއްވާލި އިރު މޫނުމަތިން ފެންނަނީ ހިއްހަމަ ޖެހުމާއި އުފާވެރިކަމެވެ. އާދައިގެ ވަރަކައް ދުއްވާލާފައި އައިސް ސައިކަލު މަޑުކޮއްލީ އޮފީސް ކަރިއަށެވެ. ސައިކަލު ޕާރކު ކޮއްލުމައްފަހު އޮފީސް ތެރެއައް ވަދެގެން އައި ޔާނިޝް އެތާތިބި ގިނަ އަންހެންކުދިންގެ ލޮލުގެ އަމާޒަކައް ވެގެންދިޔައެވެ. އެބެލުން ތަކުން ކިތަންމެ އުނދަގޫވި ނަމަވެސް އެކަމައް މާބޮޑު ފަރުވާލެއް ނުބެހެއްޓީ އެއީ ކޮންމެ ދުވަހަކުވެސް އޭނާ ކުރިމަތިލާން ޖެހޭ ކަމެއް ކަމައް ވާތީއެވެ. ކޮންމެ މީހަކައްވެސް ހިޔްހެޔޮ ހިނިތުންވުމެއް ރައްދުކޮއްލާފައި ކެބިންތެރެއައް ޔާނިޝް ވަދެގެން ދިޔައީ ކުރިމަތިވަމުންއައި ތޫފާނުގެ ކުޑަވެސް މޭރުމެއް ނުވާހާލުގައެވެ………..

( ނުނިމޭ )