ދުރުވުމެއް ނޭދެމޭ…

މުޅި ކޮޓަރި ތެރެއަށް ވެރި ވެފައި ވަނީ މަރުގެ ހިމޭން ކަމެވެ. އޭސީގެ މަޑުމަޑު ފިނިން މުޅި ކޮޓަރި ފިނި ވެފައި ވާއިރު މުޅި ކޮޓަރި ތެރެއަށް ފެތުތިފައި ވަނީ ‘ޓްވިންކްލް’ ސެންޓް ގެ ޖާދުވީ މިރު ވަހެވެ. ހުދާއި މަޑު ފިޔާތޮށި ކުލައިން ޒީނަތް ތެރި ކުރެވިފައިވާ ކޮޓަރީގައި ހުރި ކިންގް ސައިޒް އެނދު މަތީގައި ކަޅު ކުލައިގެ ސްކިނީ އަކާއި ހުދު ކުލައިގެ އަތްދިގު ޓީޝާޓެއް ލައިގެން ބަންޑުން އޮށޯވެލައިގެން އެއޮތީ މި ވީރާނާ ދުނިޔެ މަތިން ފޫހި ވެފައި އޮތް އަންހެން ކުއްޖެކެވެ. “ދަރިފުޅާ ނިއުޝާ. ދެން ތެދުވޭ. އެއޮއް ގަޑި ޖެހެނީ. ފުރަތަމަ ދުވަހު ގަޑިޖެހިގެން ދާކަށް ނުވާނެ.” ކޮޓަރިއަށް ވެރި ވެފައިވާ ހަމަހިމޭންކަން ފުނޑު ފުނޑު ކޮށްލީ ނިއުޝާގެ މަންމަ ނާޝިދާގެ އޯގާތެރި އަޑުންނެވެ. ނިއުޝާ ވެސް މަންމަގެ އަޑަށް ތެދުވެ ގޮސް މޫނުބަލާ ލޯގަޑު ކައިރީގައި ހުއްޓުނެވެ. ކޯތާފަތްމަތިން ކަރުނައިގެ ކޯރެއް ދެމިފައި ވެއެވެ. ފާޚާނާއަށް ވަދެ މޫނު ދޮވެލުމަށްފަހު ރީތި ވެލައިގެން ނިއުޝާ މިސްރާބު ޖެހީ ބޭރަށް ނިކުންނާށެވެ.

އޮފީހުގެ އެންމެން ވެސް ނިއުޝާއަށް މަރުހަބާކީ އުފަލާ އެކުގައެވެ. ވަތް ގޮތަށް ނިއުޝާ ހުރީ އިސްޖަހައިގެންނެވެ. އޮފީހުގެ ބޮޑު މީހާގެ އެދުމަށް ފަހަރަކު މީހަކު އެމީހަކު އަމިއްލަ އަށް ނިއުޝާ އަށް ތަޢާރަފް ވެލިއެވެ. “މުޙައްމަދު އާލިކް. ކުންފުނީގެ މެނޭޖަރ.” އެންމެ ފަހުން އައި މީހާގެ ނަން ބުނުމާއެކު ނިއުޝާއަށް ހީވީ ފައިދަށުން ބިންގަނޑު ދެމިގެން ދިޔަހެންނެވެ. އިސް އުފުލާ ބަލާލީ ނުހަނު ހަލުވި ކަމާ އެކުގައެވެ. ކުރިމަތީގައި އެހުރީ ދެކެ ފަރިތަ މޫނެކެވެ. އެކަމަކު އެއީ ސީދާ ކާކު ކަމެއް އޭނާގެ ނާޒުކު ސިކުނޑި އަކަށް ނުވިސްނުނެވެ. އަޅާނުލާ ނިއުޝާ ވެސް އޭނާގެ މަސައްކަތުގައި މަޝްޣޫވެގެން އުޅުނެވެ.

އެރޭ ނިދަން އޮތް އިރު ނިއުޝާގެ ސުކުނޑީގައި ދައުރު ކުރަމުން ދިޔައީ އާލިކްގެ ހަނދާން ތަކެވެ. ލޯމަރާލާއިރަށް ކުރިމަތިން ސިފަ ވަނީ އާލިކްގެ ފިރިހެންވަންތަ ހަށިގަނޑެވެ. ކުރިންވެސް އޭނާއައް އާލިކް ފެނިފައިވާކަމައް ހިތް ބުނަމުން ގެންދިޔައެވެ. އެހެންނަމަވެސް އެޢީ ކިހިނެއް އަދި ކޮން ތާކުން ކަމެއް ވެސް ހަނދާނެއް ނެތެވެ. ހިތްވަރުކޮށްލާފާ ނިދޭތޯ ނިއުޝާ ކުރި މަސައްކަތް ވީ ބޭކާރެވެ. އޭނާއަށް ނޭނގި އޮތް ކަމަކީ ހަމަ އޭނާ އެކޭ އެއްފަދައިން އާލިކް ވެސް އޭނާއާ ދޭތެރޭ ވިސްނަން ނުނިދިފައި އޮތް  ކަމެވެ.

ނުނިމޭ