އެ ވަޢުދު (1)

އަމްނާ މިއަދު ހަތަރު ދަމު ދަށްބަނޑުގައި ރިއްސާތީ ހޮސްޕިޓަލަށް ދިޔައިރު ފެނިގެން ދިޔަ ސޫރައަކީ މީގެ ކުރިން ފެނިފައިނުވާ ފަދަ ފުރިހަމަ ސޫރައެކެވެ. ފުރަތަމަ ނަޒަރުން އޭނާގެ ހިތް ކަތިލި ޒުވާނެއް އެނޫނިއްޔާ ނުވެއެވެ. އާދެ! ޑރ. އަމީމެވެ. ކޮޓަރިއަށް ވަތް ގޮތަށް ބުރުގާ ބޭލުމަށްފަހު ފާޙާނާއަށް ވަދެ ލައިގެން ހުރި ކަޅު އަބާޔާ، އަތްކުރު ޓީޝާޓަކާއި ކުރު ސޯޓަކަށް ބަދަލުކޮށްލީ ނިދަން އޮށޯވެލުމަށެވެ. ފާޙާނާއިން ނުކުތް އިރު އެނދު މަތީގައި އިން ހާތިބު ފެނި ފަހަތަށް ފިޔަވަޅެއް އަޅާލެވުނީ ބޭ އިޚުތިޔާރުގައެވެ. އެކަނިމާ އެކަނި މިހެން އުޅެން ޖެހުމުން އޭނާ ބިރުގަންނަނީވެސް ހާތިބުގެ ސަބަބުންނެވެ. މިރޭވެސް ކަންތައް ވެގެންދާނީ މީގެ އަހަރުތަކެއް ކުރިންސުރެވެސް ތަކުރާރުކޮށް ކަންތައް ވަމުންދާ ގޮތަށްކަން ހަނދުމަ ވުމާއި އެކު ލޯ މަރާލެވުނެވެ.

އެހެން ދުވހަސްތަކެކޭވެސް އެއްފަދައިން މިއަދުވެސް ޑިއުޓީ ނިންމައިފައި އައި ގޮތަށް އަމީމް ކޮޓަރިއަށްވަނީ، މަންމަގެ ކޮޓަރިއަށް ގޮސް މަންމަ އޮތީ ކައިގެންތޯ ބަލާލުމަށްފަހުއެވެ. ހަވީރުގެ ވަގުތު ނަމަވެސް އަވިގަދަ ދުވަސްކޮޅެއް ކަމުން އޭސީ 16 އަށްލުމަށްފަހު އެދުމައްޗަށް އުއްޑުންވާގޮތަށް ވެއްޓިގަތީ ވަރުބަލިވެ ހޫނު ވެފައިވާވަރުންނެވެ. ފަޅި ސިކުންތު ކޮޅެއް ތެރޭ އޭނާގެ ހިތުގެ ވިންދު މަޑުޖެހި މިއަދު ދިމާވި އަންހެނާ މަތިން ހަނދާންވާން ފެށިއެވެ. އެވަގުތު ހަށިގަނޑުގައި ހިނގާލި ކަރަންޓުގެ އޮއެވަރު މަތިންނެވެ. މަޑުމަޑުން އެތުންފަތް މައްޗަށް ހިނިތުންވުމެއް ވެރިވިއެވެ. ލޯމަރާލެވުނީ އެމަންޒަރު ސިފަކޮށްލެވޭތޯއެވެ. އެގޮތުގެ މަތިން ވަގުތު ހޭދަކުރަމުންދަނިކޮށް އަމީމުގެ ލޮލަށް ނިދި ސަވާރުވީ ކޮން އިރަކު ކަމެއް ނޭނގެއެވެ. ނިދިފައި އޮތް އިރު އެ މަޢުސޫމް ދެލޮލުން ކަރުނައިގެ އަސަރު ފާޅުވާން ހުރިކަންނަގައިގަނެވުނު މީހެއްގެ ހިތުގައި ސުވާލު އުފެދޭނެކަން ޔަޤީނެވެ.

15 އަހަރު ކުރި….

އަމްނާއަކީ ދެމަފިރިއެއްގެ ހުރި ހަމައެކަނި ދަރިފުޅެވެ. ލޮލުގެ ކޮއިފަގައިން ބަލާބޮޑުކުރި އުމުރުން 24 އަހަރުވެފައިވާ ހުރި ޒުވާން އަންހެން ކުއްޖެކެވެ. އެދަރިފުޅުގެ އުމުރުން 5 އަހަރުވީ އިރުވެސް ބަހެއް ނުބުނާތިއާއި އެދެމަފިރިންގެ ބަސްތަކަށް ސަމާލުކަން ނުދޭތީ ޑަކްޓަރަށް ދެއްކުމުން އެނގިގެން ދިޔައީ އަމްނާއަކީ އިވުމާއި ވާހަކަ ދެއްކުމުން މަޙުރޫމް ވެފައިވާ ކުއްޖެއްކަމެވެ. އެދަރިފުޅަށް ކިތަންމެ ކުޑަކަމެއް ވިޔަސް އެދެމަފިރިންގެ މުޅިދުވަސް ޚަރާބުވީއެވެ. ނުކުޅެދުންތެރިކަމެއް ހުރުމުން ސަރުކާރު ސުކޫލަކަށް ވެއްދުން ވެގެންދިޔައީ އުނދަގޫ ކަމަކަށެވެ. ނަމަވެސް އެދެމަފިރިންގެ ކަށީގައި ހުރި ގަދަބާރު ދައްކައިގެން ގުރޭޑު 1 އަށް އަމްނާ ވެއްދީ 8 އަހަރުގައެވެ. އަޑުގަދަ މީހާ ރުއްގިނަ ވާނޭ ބުނާ ބީދައިންނެވެ. ރެއާއި ދުވާލު އެތައް ތަކުލީފުތަކެއް އެދެމަފިރިން އުފުލަމުން ދިޔައީ އެދަރިފުޅަކީ މުޖުތަމަޢުގައި މީހުން އިޚްތިރާމާއި އެކު ބަލައިގަންނަފަދަ ކުއްޖަކަށް ހެދުމަށެވެ. ނުކުޅެދުންތެރިކަން ހުއްޓެއް ކަމަކު ބާކީ ވެފައިވާ ފަރާތެއް ކަމުގެ އިޙުސާސް ވިޔަ ނުދިނުމަށެވެ. ނަމަވެސް އެކަން ވެގެން ދިޔައީ ފޫނެތް ފަޔަށް ފެން ފުރުން ފަދަ ކަމަކަށެވެ. މަދަރުސީ ދައުރުގައިވެސް ސްކޫލު ތެރޭފޯރިމަރާ ލާނެތް ފިރިހެން ކުދިންނަށް ވުރެން އަމްނާގެ ޙާލު ބޮޑެވެ. ސްކޫލު ފޮތްތަކުން ގަނޑު ކަނޑައިގެން ރޮކެޓު ދުއްވުމާއި ބޯޅައުކުމެވެ. ކުދިންގެ ތަކެއްޗަށް ގެއްލުން ދިނުމެވެ. ސުކޫލުގެ ގޯތި ތެރޭގައިވާ ގަސްތަކާއި އަދި މިނޫންވެސް ތަކެތި ހަލާކުކުރުމެވެ. ކުދިންނަށް އަނިޔާކުރުމެވެ. ފިލާވަޅު ނުހެދުމެވެ. ޕޭޕަރު ތަކުން ފާސްނުވުމެވެ. މިހެންގޮސް އެތައް އެތައް ކަމެކެވެ. އަމްނާގެ ބައްޕަ ކާސިމަކީ ކަންނެލި ބޭނުމުގެ މަސައްކަތުގައި އުޅޭ މީހެއްކަމުން، ގިނަ ފަހަރަށް މީސް މީހުން އަމްނާއާއި ބެހޭގޮތުން ކުރާ މިފަދަ ޝަކުވާތަކަށް ދެނީ ބީރު ކަންފަތެކެވެ. އަމްނާގެ މަންމަ ނާދިރާތޯއެވެ؟ އަމްނާއާއި އަމްނާގެ މަންމަ ހަފްތާއަކު މަދުވެގެން ދެފަހަރު ޕްރިންސިޕަލް ރޫމަށް ޙާޒިރުކޮށް އަމްނާއާއި ގުޅޭ މައްސަލަތައް ހިއްސާކުރެއެވެ. ނަމަވެސް އެދެވޭ ނަތީޖާއެއް ނުކުންނަ ގޮތް ނުވީ އެވާހަކަތަކަށް ނާދިރާގެ ސަމާލުކަން ނުލިބުމުންނެވެ. ގޯސް ވަނީ އެހެން ދަރިވަރުންނެވެ. ސްކޫލުގެ މުވައްޒަފުންނެވެ. ވާނީވެސް އެހެންތާއެވެ. އެމީހެއްގެ ދަރި އެމީހަކަށް ދޮންފުތު ވާނެއެވެ. އެއީ ޝައްކެއްވެސް އޮތް ކަމެއްނޫނެވެ. މިއީ އެކަމުގެ ލާމަސީލު ނަމޫނާއެކެވެ.

ދެ ފަހަރަކު ގުރޭޑު 9 ގައި މަޑުކުރުމަށްފަހު ސުކޫލު ދައުރު ނިންމާލީ ކާންދިން އަތުގައި ދަތްއަޅާފައެވެ. “ޔޫ” ސެޓަކާއި އެކުއެވެ. މައިންބަފައިންގެ ފޮނި ހުވަފެންތައް ފެނަށް ލާފައެވެ. އަޅުކަމެއް ނުކުރާ އިންސާނަކަށް ކާމިޔާބުތޯއެވެ؟ އެއީ ވުމާއި ދުރުގައި އޮތް ކަމެކެވެ. އެންމެފަހުން އެދެމަފިރިން ނަމާދެއް ކުރި ދުވަހެއް ހަނދާން ނުހުންނާނެކަން އެއީ ޔަޤީން ކަމެކެވެ. އަޅުކަންތަކަށް މިހާ ފަރުވާކުޑަ ދެމަފިރިންގެ ދަރި އަމްނާއަށްވެސް މި ނުބައި ސިފަ ލިބިގެންދިޔައެވެ. އަޅުކަމަކީ މުހިއްމުކަމެއްގެ ގޮތުގައި އެދެމަފިރިންވެސް ނުދެކެއެވެ.

އެންމެ ކުޑައިރުއްސުރެވެސް އަމްނާ ހަވީރުގެ ވަގުތު ހޭދަކުރާނީ ގޭގެ އުނިގަސް ދޮށު ޖޯއްޔެއްގައި އެކަނިމާ އެކަންޏެވެ. ގޭ ބޭރަށް ދެވޭ ގޮތް ނުވަނީ އޭނާގެ ރައްކަލަށްޓަކައި އޭނާގެ މައިންބަފައިން ގޭގެ ދޮރު ތަޅުލާފައި ހުންނާތީއެވެ. ބޭރަށް ނުކުމެއްޖެނަމަ މީހުންގެ އަނިޔާ ކުރިމަތިވެދާނެތީއެވެ. އަވަށްޓެރި ކުއްޖަކު ވެސް އަމްނާ ކައިރިއަށް ނާންނަނީ އަމްނާގެ އުޅުން ހުންނަ ނޭދެވޭ ގޮތަކުންނެވެ. ނަމަވެސް އަމްނާ ގެ ކޮންމެ ހަރަކާތަކަށްވެސް ފަރުވާތެރިކަމާއި އެކު ބަލަމުން އަންނަ ފަރާތެއް އަމްނާގެ ކައިރީގައި ހުރެއެވެ.

….> ނިމުނީ <….